Лука 9

1Исусыс даскыкнан велӧтчисьсӧ корис дынас, сетіс нылӧ вын вашӧтлыны сэрпӧсь ловвез да отирсӧ веськӧтны шогӧттэзісь. 2Сія нійӧ ыстіс юӧртны Енлӧн Юралӧм йылісь да веськӧтны шогаліссесӧ. 3Исусыс висьталіс: «Туйӧ петікӧ бедь, кӧзича#9:3 кӧзича ─ (кӧича) мешок, нянь, сьӧм, вежан паськӧм сьӧраныт эд босьтӧ. 4Кытшӧм керкуӧ пырат, сэтчин олӧ мӧдіклаӧ мунтӧдз. Сэссянь вӧрзьӧ туйӧ. 5Кытшӧм карын тіянӧс озӧ пондӧ кывзыны, карсис петӧм коста пыркӧтӧ буссӧ коккезсиныт. Суд Лунас сія лоас ны вылӧ висьталӧм».

6Велӧтчиссес мунісӧ. Ветлӧтісӧ посаддэзӧт, быдлаын висьтасисӧ Бур Юӧрсӧ да веськӧтісӧ шогаліссесӧ.

Иродлӧн тӧждісьӧм

(Мт. 14:1-12; Мк. 6:14-29)

7Исуслӧн быд керӧмыс кывсьӧм Ирод ӧксулӧ. Сія абу вермӧм вежӧртны лоӧмсӧ. Мукӧдыс тай баитӧмась: сія пӧ Иоаныс ловзьӧм. 8Мӧдіккез шуӧмась, Илля пӧ локтіс. Мукӧдыс шуӧмась, кӧркӧся Енсянь юӧртіссез коласісь пӧ ӧтік ловзьӧм. 9Иродыс шуӧм: «Кин Сія, кӧда йылісь ме кыла? Иоаныслісь эд юрсӧ ме орӧті». Иродыс ӧддьӧн мӧдӧм адззывны Исуссӧ.

Вит сюрс#9:10 вит сюрс ─ 5000 мортӧс вердӧм

(Мт. 14:13-21; Мк. 6:30-44; Ин. 6:1-14)

10Апостоллэс бертісӧ. Исусыслӧ нія висьтасисӧ асланыс керӧм йылісь. Сія босьтіс нійӧ сьӧрас да муніс Вифсаида кар дынӧ овтӧминӧ. 11Эта йылісь тӧдӧм бӧрын отирыс мунісӧ Исусыс сьӧрӧ. Сія нійӧ панталіс, висьтасис нылӧ Енлӧн Юралӧм йылісь да веськӧтіс шогаліссесӧ.

12Пондіс сибӧтчыны рыт. Даскыкнан велӧтчись локтісӧ Исусыс дынӧ да висьталісӧ: «Лэдз отирсӧ мунны матісь гӧгӧр посаддэзӧ да оланіннэзӧ чулӧтны ойсӧ да судзӧтны сёян. Мийӧ эд эстӧн овтӧминын». 13А Сія висьталіс нылӧ: «Тійӧ сетӧ нылӧ сёйны». Мӧддэс висьталісӧ: «Миян вит нянься да кык черися нем абу. Вермам разь мийӧ сымда отирлӧ небны сёянсӧ?» 14Отирыс сэтӧн вӧлісӧ вит сюрс морт гӧгӧр. Сэк Исусыс Аслас велӧтчиссезлӧ висьталіс: «Пуксьӧтӧ нійӧ ӧтлаӧ витдас#9:14 витдас ─ 50 мортӧн». 15Нія сідз и керисӧ, быдӧннысӧ пуксьӧтісӧ. 16Исусыс босьтіс вит няньсӧ кык черинас, видзӧтіс енӧжас да бласлӧвитіс сёянсӧ. Сэсся чеглаліс няньсӧ да сетіс велӧтчиссеслӧ, а нія сеталісӧ отирыслӧ. 17Быдӧнныс сёйисӧ пӧттӧдз. Кольччӧм нянь торресӧ ӧктісӧ даскык куд.

Петра шуӧ Исуссӧ Кристос-Мездӧтісьӧн

(Мт. 16:13-23; Мк. 8:27-33)

18Кыдзкӧ Исусыс отирыстӧг кеймис. Сыкӧт вӧлісӧ дзир велӧтчиссес. Сія нылісь юаліс: «Кин туйӧ пуктӧны Менӧ отирыс?» 19Нія Сылӧ висьталісӧ: «Ӧтіккез ─ Пыртісь Иоан туйӧ, мӧддэс шуӧны, Илля пӧ. Мукӧдыс шуӧны, кӧркӧся Енсянь юӧртіссез коласісь кӧдакӧ пӧ ловзьӧм». 20Исусыс нылісь юаліс: «А тійӧ мый шуат, кин Ме?» Петраыс горӧтчис: «Тэ ─ Енлӧн Кристос-Мездӧтісь». 21Исусыс нылӧ чорыта висьталіс: «Этія йылісь некинлӧ эд баитӧ». 22Сія висьталіс: «Морт Зонлӧ уна ковсяс пессьыны-мырсьыны. Бӧрйӧм пӧриссес, аркирейес да Туйдӧтӧ велӧтіссес Сійӧ абутӧм туйӧ пуктасӧ да виясӧ. А куимӧт лунас Сія ловзяс».

Исус сьӧрын мунісьлӧ висьталӧм

(Мт. 16:24-28; Мк. 8:34-9:1)

23Исусыс быдӧнныслӧ висьталіс: «Кин мӧдӧ мунны Ме сьӧрӧ, ась вунӧтӧ асьсӧ, босьтӧ ассис крестсӧ да мунӧ Ме бӧрсянь. 24Кин мӧдӧ видзны ассис олансӧ, сійӧ ӧштас. Кин Ме понда ӧштас ассис олансӧ, сійӧ мездас. 25Мортыс быдсӧн му вылісьсӧ босьтас кӧ, а ассис олансӧ ӧштас али аслыс умӧльсӧ керас, мый мортыслӧ сэтісь бурыс? 26Отир одзын кинлӧ тӧдны Менӧ да Менчим кыввезӧс рожа кулян, и сійӧ мортсӧ тӧдны Морт Зонлӧ лоас рожа кулян, кӧр локтас Айыс югьялӧмӧн вежа ангеллэзкӧт. 27Быльсӧ висьтала тіянлӧ: эстӧн сулаліссез коласын эмӧсь нія, кӧдна кувтӧдззаныс адззыласӧ Енлісь Юралӧмсӧ».

Исуслӧн вежсьӧм

(Мт. 17:1-8; Мк. 9:2-8)

28Нія висьталӧм кыввез бӧрын чулаліс кыкьямыс гӧгӧр лун. Петракӧт, Иоанкӧт да Яковкӧт Исусыс кайис керӧсӧ кеймыны. 29Кеймикас Сылӧн чужӧмыс вежсис. Сылӧн паськӧмыс лоис пежьялана чочком. 30Сэтӧн Сыкӧт баитісӧ кык морт ─ Моисей да Илля, 31кӧдна мыччисисӧ енӧжись югьялӧмӧн. Нія баитісӧ Исуслӧн му вывсис мунӧм йылісь, кӧда аркмас Ерусалимын.

32Петраыс мӧд велӧтчиссескӧт онмӧссис. Нія саймисӧ да казялісӧ Исуслісь югьялӧмсӧ да Сыкӧт кык мортӧс. 33Моисейыс да Илляыс пондісӧ мунны. Сэк Петра висьталіс Исусыслӧ: «Велӧтісь! Бур миянлӧ эстӧн. Керам куим шалаш: ӧтсӧ ─ Тэныт, мӧдсӧ ─ Моисейлӧ, куймӧтсӧ ─ Иллялӧ». Петраыс и ачыс эз тӧд, мый и баитӧ.

34Петралӧн баитӧм коста мыччисис кымӧр да вевттис нійӧ. Кымӧрас пырӧмсянь велӧтчиссес повзисӧ. 35Кымӧрсис кыліс висьталӧм: «Сія Менам дона Зонӧ. Сійӧ кывзӧ!» 36Нія кыввез бӧрсянь Исусыс кольччис ӧтнас. Сія кадӧ нія некинлӧ эзӧ висьтасьӧ адззылӧмныс йылісь.

Сэрпӧсь ловсянь усялӧм зонӧс веськӧтӧм

(Мт. 17:14-23; Мк. 9:14-32)

37Мӧд лунас нія лэдзчисӧ керӧс вывсис. Исуссӧ панталісӧ уна отир. 38Видзчисьтӧг отирыс коласісь кинкӧ горӧтіс: «Велӧтісь! Кеймися Тэныт! Видзӧт менчим зонӧс. Сія менам ӧтнас. 39Сійӧ кутлӧ сэрпӧсь лов. Сія видзчисьтӧг горӧтӧ. Быг петтӧдз сійӧ кыскӧ ойтӧлыс#9:39 ойтӧв ─ судорога. Сэрпӧсь лолыс зонӧс маитӧ-вартӧ да вӧлись ӧдва лэдзӧ. 40Ме кори Тэнчит велӧтчиссетӧ вашӧтны сійӧ, но нія эзӧ вермӧ». 41Исусыс шуис: «Вериттӧм, лэдзчисьӧм отир! Кытчӧдз Ме лоа тіянкӧт? Дыр я понда видзӧтны тіян вылӧ? Вайӧт татчӧ ассит зонтӧ». 42Кӧр зонкаыс пондіс сибӧтчыны Исусыс дынӧ, сэрпӧсь лолыс сійӧ уськӧтіс да пондіс ойтӧлӧн кыскыны. Исусыс ӧліс сэрпӧсь ловсӧ, веськӧтіс зонкасӧ да сетіс айыслӧ. 43Енлӧн вына керӧмсянь быдӧннысӧ диво кутіс. Сэк Исусыс висьталіс Аслас велӧтчиссезлӧ: 44«Босьтӧ тӧдвыланыт энӧ кыввесӧ: Морт Зонсӧ сетасӧ отир киэзӧ». 45Нія висьталӧмсӧ эзӧ вежӧртӧ, сія эд нылӧ вӧлі пӧдана. Сылӧн висьталӧмыс эз лок ны дынӧдз. Юавны жӧ висьталӧмыс йылісь полісӧ.

Кин ыджытжык

(Мт. 18:1-5; Мк. 9:33-40)

46Кыдзкӧ велӧтчиссес ас коласаныс пондісӧ етшасьны, кин ны коласын ыджытжыкыс. 47Исусыс тӧдіс, мый нія пыртісӧ юраныс. Сія босьтіс кага да сувтӧтіс дынас. 48Велӧтчиссеслӧ висьталіс: «Кин Менам ним понда босьтӧ эттшӧм кагасӧ, сія Менӧ босьтӧ. Кин Менӧ босьтӧ, Сія босьтӧ Менӧ Ыстісьсӧ. Тіян коласісь медучӧтыс ─ медыджыт».

49Сэтӧн Иоаныс висьталіс: «Велӧтісь! Мийӧ адззылім Тэнат нимӧн сэрпӧсь ловвесӧ вашӧтлісь мортӧс. Мийӧ сійӧ падмӧтім, мыля сія миянкӧт оз ветлӧт». 50Исусыс сылӧ висьталіс: «Эд падмӧтӧ: кин тіян вылӧ оз лэбтісь, сія тіян дор».

Исусӧс озӧ лэдзӧ Самарияись посадӧ

51Сибалісӧ Исуссӧ енӧжӧ босьтан луннэз. Сэк Сія лӧсьӧтчис мунны Ерусалимӧ. 52Одзлань ыстіс юӧртіссезӧс. Нія мунісӧ Самарияись посадӧ, мӧдісӧ лӧсьӧтны быдӧс коланасӧ Исуслӧн локтік кежӧ. 53Но сэтчин Сійӧ эзӧ лэдзӧ, мыля Сія вачкисис Ерусалимӧ мунісьланьӧ. 54Сылӧн велӧтчиссез Яков да Иоан сэтшӧмсӧ адззикӧ висьталісӧ: «Дӧсвидзись, колӧ кӧ Тэныт, мийӧ висьталам Илляыс моз, медбы енӧжсянь лэдзчисис би да нійӧ вийис». 55Ныланьӧ бергӧтчӧмӧн Исусыс нійӧ падмӧтіс. Нылӧ висьталіс: «Асьныт одӧ тӧдӧ, кытшӧм лов тіянӧс ызйӧтӧ. 56Морт Зон эз лок мортлісь олансӧ босьтны, локтіс мездыны». Сэк нія мунісӧ мӧдік посадӧ.

Исус сьӧрӧ мунӧм йылісь

(Мт. 8:19-22)

57Туй кузя мунӧм коста Исуслӧ ӧтік висьталіс: «Дӧсвидзись! Ме муна Тэ сьӧрӧ быдлаӧ». 58Исусыс висьталіс сылӧ: «Руччезлӧн, кайезлӧн эмӧсь поззэз, а Морт Зонлӧ некытӧн и юрсӧ шоччӧтны».

59Мӧдіклӧ висьталіс: «Лок Ме сьӧрӧ». Сія висьталіс: «Дӧсвидзись! Лэдз менӧ ветлыны дзебны айӧс». 60Исусыс сылӧ висьталіс: «Лэдз кулӧммеслӧ дзебны ассиныс кулӧммесӧ. А тэ мун, висьтась Енлӧн Юралӧм йылісь».

61Мӧдік висьталіс: «Дӧсвидзись, ме муна Тэ сьӧрӧ, но лэдзлы менӧ кольласьны гортіссезӧкӧт». 62Исусыс висьталіс сылӧ: «Гӧр бердӧ кутчисьӧм бӧрын мышкас видзӧтлісьыс абу туяна морт, медбы пырны Енлӧн Юраланінӧ».

Сизимдас велӧтчисьӧс Бур Юӧр висьтасьны ыстӧм

Currently Selected:

Лука 9: БЮ19

Highlight

Copy