Лука 10
10
1Сыбӧрын Дӧсвидзисьыс бӧрйис эшӧ сизимдас велӧтчисьӧс. Сія нійӧ кык мортӧн ыстіс каррезӧ, оланіннэзӧ. Ачыс сэтчин мӧдіс локны сёрӧнжык. 2Нылӧ висьталіс: «Вунданыс уна, а уджаліссес етша. Корӧ Кӧзяиныслісь, медбы ыстіс уджаліссесӧ Аслас вунданінӧ.
3Мунӧ! Ме тіянӧс ыста дзеллезӧс моз кӧиннэз коласӧ. 4Сьӧм#10:4 сьӧм ─ деньги, кӧзича, кӧмкӧт сьӧраныт эд босьтӧ. Туй вылас кинӧскӧ панталікӧ эд сувтчӧ, некинлӧ кинытӧ эд сетӧ. 5Керкуас пырикӧ висьталӧ: "Лӧнь олан эта керкуын оліссезлӧ!" 6Олӧ кӧ сэтчин лӧнь сьӧлӧма морт, тіян бласлӧвитӧмныт сылӧ кольччас. Абу кӧ мортыс лӧнь сьӧлӧма, висьталӧмныт тіянлӧ бертас. 7Сія керкуын кольччӧ, юӧ, сёйӧ, мый сетасӧ. Уджалісьлӧ керӧм удж понда вештӧны. Керкуись керкуӧ эд ветлӧтӧ.
8Карӧ локтікӧ тіянӧс кӧ лэдзасӧ, сёйӧ, мый одзаныт ваясӧ. 9Сэтісь шогаліссесӧ веськӧтӧ да висьталӧ: "Енлӧн Юралӧмыс матын ни". 10Локтат кӧ кытшӧм карӧ, кытчӧ тіянӧс озӧ лэдзӧ, петӧ ӧтӧрас да висьталӧ: 11"Коккезным бердӧ карсиныт лякасьӧм буссӧ пыркӧтам тіянлӧ. Но тӧдӧ: Енлӧн Юралӧмыс матын ни". 12Тіянлӧ баита: Содомыслӧ Суд Лунас лоас буржык сія карся, кӧдаӧ тіянӧс эзӧ лэдзӧ».
Вериттӧм каррезлӧ висьталӧм
(Мт. 11:20-24)
13«Ӧддьӧн умӧль лоас тэныт, Коразин кар! Ӧддьӧн умӧль лоас тэныт, Вифсаида! Тир да Сидон каррезын эзӧ адззылӧ тіянын мыччалӧм адззывлытӧм керӧммесӧ#10:13 адззывлытӧм керӧм ─ чудо. Сэтчин оліссес адззылісӧ бы нійӧ, сэк, натьтӧ, важын ни бы пасьталісӧ чорыт паськӧм, пӧимӧн киськалісӧ юрнысӧ да пондісӧ тӧждісьны асланыс умӧль керӧммез кузя. 14Тир да Сидон каррезын оліссезлӧ Суд Лунас лоас тіянся буржык. 15Тэ, Капернаум кар, енӧжӧдз мӧдан лэбтісьны? Тэ адӧдз усян.
16Кин тіянӧс кывзӧ, сія Менӧ кывзӧ. Кин тіянӧс абутӧмӧ пуктӧ, сія Менӧ абутӧмӧ пуктӧ. Менӧ абутӧмӧ пуктісьыс Менӧ Ыстісьсӧ абутӧмӧ пуктӧ».
Сизимдас велӧтчисьлӧн бертӧм
17Гажаӧсь бертісӧ сизимдас велӧтчисьыс. Нія баитісӧ: «Велӧтісь! Тэнат нимӧн тшӧктам кӧ, сэрпӧсь ловвес кывзісьӧны». 18Исусыс висьталіс нылӧ: «Ме адззылі енӧжсис сотанаыслісь чарньӧв моз усьӧмсӧ. 19Сідз и эм: Ме сета тіянлӧ вын тальны кыйезӧс#10:19 кый ─ змея да скорпионнэзӧс и вермыны миян вылӧ лэбтісьӧм быд лёк вынсӧ. Нем умӧльыс тіянлӧ оз ло. 20Тіянӧс сэрпӧсь ловвес кывзісьӧны кӧ, сысянь эд гажӧтчӧ. Гажӧтчӧ сысянь: тіян ниммезныт эд гижӧмась енӧжас».
Исуслӧн Айсӧ ошкӧм
(Мт. 11:25-27; 13:16-17)
21Сэтӧн Исусыс Вежа Лолыссянь гажмис. Сія висьталіс: «Ошка Тэнӧ, Айӧ, енӧжын да му вылын Дӧсвидзись! Тэ сійӧ быдӧс сайӧвтін мывкыдаэз да уна тӧдіссез шогья, осьтін челядь коддезлӧ. Сідз эд, Айӧ! Сэтшӧма керны эд Тэнат и вӧлі бур лӧсьӧтӧмыт».
22Велӧтчиссеслӧ Сія висьталіс: «Айӧ быдӧс сетіс Меным. Дзир Айыс тӧдӧ, кин Зоныс. Дзир Зоныс тӧдӧ, кин Айыс. Тӧдӧ и сія, кинлӧ Зоныс осьтас».
23Велӧтчиссеслань бергӧтчӧмӧн дзир нылӧ висьталіс: «Шудаӧсь нія, кӧдна асланыс синнэзӧн адззӧны, мый тійӧ адззат. 24Висьтала Тіянлӧ: Енсянь юӧртіссез ӧксуэзкӧт унаӧн мӧдісӧ адззывны ӧні тіянлісь адззылӧмнытӧ, да эзӧ адззылӧ. Мӧдісӧ кывны кылӧмнытӧ, да эзӧ кылӧ».
Самарияись небыт сьӧлӧма морт йылісь
25Ӧтік Туйдӧтӧ велӧтісь чеччис да Исуссӧ кутӧм могись юаліс: «Велӧтісь! Мый меным керны пырся оланӧ#10:25 пырся олан ─ вечная жизнь пырӧм понда?» 26Исусыс сылісь юаліс: «Туйдӧтас мый гижӧм? Мый сэтісь лыддьӧтан?» 27Мӧдыс висьталіс: «Радейт ассит Дӧсвидзись Ентӧ быдсӧн сьӧлӧмнат, быдсӧн ловнат, быдсӧн выннат, быдсӧн мывкыднат. Ассит матісьтӧ радейт асьтӧ моз». 28Исусыс сылӧ висьталіс: «Бура тэ висьталін. Сідз кер, сэк пондан овны».
29Асьсӧ дорйӧм могись сія юаліс Исусыслісь: «Кин менам матісьыс?»
30Исусыс сэтчӧ висьталіс:
«Ерусалимсянь Ериконӧ мунӧм коста ӧтік морт шедас лёк кериссезлӧ. Нія чӧвтасӧ сы вылісь паськӧмсӧ, вартласӧ сійӧ да мунасӧ. Колясӧ сійӧ садьтӧг. 31Сы коста сія туй вылӧт мунас ӧтік вежауджалісь. Вартлӧм мортсӧ казялӧм бӧрын мунас туй мӧдӧрӧттяс. 32Сідз и левит#10:32 левит ─ Левий увтырись Вежа Керкуын уджалісь морт сэті мунтӧн сибӧтчас, видзӧтас, мунас одзлань.
33Самарияись ӧтік морт мунас сія туй вылӧт. Сія казялас вартлӧм мортсӧ да сійӧ жалейтас. 34Сія сибӧтчас сы дынӧ, дойманіннэсӧ мавтас винаӧн да виӧн, каттяс. Сэсся пуксьӧтас сійӧ аслас осёл вылӧ да вайӧтас сувтчан керкуӧ. Видзӧтас сы сьӧрын. 35Мӧд лунас мунтӧнняс кыскас кык динарий, сетас сувтчан керку видзисьлӧ да висьталас: "Видзӧт мортыс сьӧрын. Видзан кӧ унажык, ме бертікам вешта тэныт". 36Тэ шуанӧн, вартлӧм мортыслӧ куимнанныс коласісь кин вӧлі матісьыс?»
37Сія висьталіс: «Сылӧ небыт сьӧлӧмсянь отсалісьыс». Сэк Исусыс сылӧ шуис: «Мун, и тэ кер сы моз».
Марфа да Мария ордын
38Мунтӧнняс Исусыс локтіс ӧтік посадӧ. Сэтӧн Сійӧ Марфа нима инька рочаліс гортас. 39Сылӧн вӧлі Мария нима сой. Марияыс Исусыс коккез дынӧ пуксьӧмӧн кывзіс Сылісь баитӧмсӧ. 40Марфаыс лӧсьӧтіс уна сёян-юан. Сія сибӧтчис да висьталіс: «Дӧсвидзись! Он разь адззы, сойӧ менӧ ӧтнамӧс колис лӧсьӧтны сёян-юансӧ. Висьтав Марияыслӧ, медбы меным отсаліс». 41Исусыс сылӧ висьталіс: «Марфа! Марфа! Тэ котрасян, тӧждісян уна понда. 42Дзир ӧтікӧ колӧ. Марияыс бӧрйис буржыксӧ. Сійӧ сылісь озӧ мырддьӧ».
Кеймыны велӧтӧм
(Мт. 6:9-13; 7:7-11)
Currently Selected:
Лука 10: БЮ19
Highlight
Share
Copy
Want to have your highlights saved across all your devices? Sign up or sign in
