Лука 11
11
1Кыдзкӧ Исусыс ӧтіклаын кеймис. Кеймыны дугдӧм бӧрсянь ӧтік велӧтчись шуис: «Велӧтісь! Велӧт миянӧс кеймыны, кыдз Иоаныс велӧтіс ассис велӧтчиссесӧ».
2Исусыс висьталіс нылӧ: «Кеймиканыт висьталӧ:
─ Миян Ай, енӧжын Олісь!
Тэнчит вежа нимтӧ
ась быд морт видзӧ сьӧлӧмас.
Ась локтас Тэнат Юралӧмыт.
Быдӧс ась керсьӧ Тэ сьӧрті
му вылас, кыдз и енӧжас.
3Быд лун кежӧ вай миянлӧ колан няньсӧ.
4Тэ простит миянлісь умӧль керӧммезнымӧс,
мийӧ эд проститам миянлӧ умӧльӧ кериссесӧ.
Видз миянӧс ылалӧмись.
Ылӧтлісь дынісь миянӧс мезды».
5Исусыс нылӧ висьталіс: «Видзӧтӧ: тіян коласісь кинлӧнкӧ эм ёрт. Тэ локтан сы дынӧ ойшӧрнас. Шуан сылӧ: "Ёртӧ, вай меным одзӧсӧн куим нянь. 6Ме дынӧ туй вывсянь ёртӧ пырис. Менам нем сылӧ одзас вайны". 7Сія пытшксяняс висьталас: "Эн вӧрӧт менӧ, ыбӧсыс пӧдана ни. Менам челядьӧ мекӧт ольпасьын. Ог вермы чеччыны тэныт няньсӧ сетны". 8Шуа тіянлӧ: ёртасьӧмыс кузя сія оз чеччы да оз сет. Но пондас кӧ мӧдыс орӧттӧг корны, сія чеччас да сетас сылӧ, мымда корӧ.
9Сідз и Ме шуа тіянлӧ: корӧ, и тіянлӧ сетасӧ. Кошшӧ, и адззатӧ. Ёркӧтӧ, и тіянлӧ осьтасӧ. 10Быд корисьлӧ сетӧны, кошшисьыс адззӧ, ёркӧтісьлӧ осьтӧны. 11Тіян коласісь кытшӧм ай корӧм няньыс туйӧ зоныслӧ сетас из? Корӧм чери туйӧ сетас разь кыйсӧ? 12Корӧм кольттез туйӧ сетас разь скорпионӧс? 13Тійӧ морттэс лӧгӧсь, а челядьнытлӧ кужат керны бур козиннэз. А Енӧжись Айныт эд сетас ни Вежа Ловсӧ Сылісь кориссезлӧ».
Кинсянь Исуслӧн выныс?
(Мт. 12:22-30; Мк. 3:20-27)
14Кыдзкӧ Исусыс мортісь вашӧтіс кывтӧм сэрпӧсь лолӧс. Сэрпӧсь лолыс петӧм бӧрсянь сія мортыс пондіс баитны. Одзжык баитны эз вермы. Сысянь отирсӧ диво кутіс. 15Ны коласісь мукӧдыс шуисӧ: «Сія вашӧтӧ сэрпӧсь ловвесӧ нылӧн вельзевул юралісьныс вынӧн». 16Исуссӧ кутӧм могись мукӧдыс корисӧ Сійӧ мыччавны енӧжись пас.
17Исусыс тӧдіс юррезаныс видзӧмнысӧ. Нылӧ висьталіс: «Ӧксу кипод увтын олісь йӧзыс ӧтамӧдкӧт янсӧтчас кӧ да пондас пессьыны, сія муыс кушамас#11:17 кушамны ─ опустеть, сэтісь керкуэс киссясӧ. 18Сотанаыс ас вылас лэбтісяс кӧ, кыдз сэк видзсяс сылӧн юралӧмыс? Тійӧ тай баитат, Ме пӧ вельзевулыс вынӧн сэрпӧсь ловвесӧ вашӧта. 19Ме кӧ вельзевулыс вынӧн вашӧта сэрпӧсь ловвесӧ, кытшӧм вынӧн сэк нійӧ вашӧтӧны тіян зоннэзныт? Нія ась лоӧны тіянлӧ судитіссезнас. 20Ме кӧ Ен вынӧн вашӧта сэрпӧсь ловвесӧ, сэк тіян дынӧдз локтіс Енлӧн Юралӧмыс.
21Вына морт шыпуртӧн видзӧтӧ кӧ аслас керку сьӧрын, сэк сылісь пажытьсӧ озӧ вӧрзьӧтӧ. 22Вынажык уськӧтчас кӧ сы вылӧ, вермас сійӧ, мырддяс сылісь тышкасянсӧ#11:22 тышкасян ─ оружие, кӧда вылӧ сія надейтчис. Сылісь мырддьӧм пажытьсӧ сеталас. 23Кин абу Мекӧт, сія Ме вылӧ лэбтісьӧ. Кин Мекӧт оз ӧкты, сія куштӧ-паськӧтӧ».
Сэрпӧсь ловлӧн бертӧм
(Мт. 12:43-45)
24«Мортісь петӧм сэрпӧсь лолыс ветлӧтӧ ватӧминнэзӧт#11:24 ватӧмин ─ безводное место, кошшӧ лӧньсӧ, но оз адззы. Сэк шуӧ: "Берта бӧр аслам керкуӧ, кытісь петі". 25Сія локтӧ да адззӧ: керкуыс чышкӧм, дзимлялӧм. 26Сэк мунӧ, сьӧрас вайӧтӧ асся лёкжык сизим сэрпӧсь лолӧс. Сэтчин пырӧны, олӧны. Сія мортлӧ одззаыс сьӧрті лоӧ умӧльжык».
Кин шуда
27Исуслӧн баитӧм коста отирыс коласісь ӧтік инька Сылӧ горӧн висьталіс: «Шуда Тэнӧ новйӧтісь кынӧмыс! Шуда Тэнӧ вердісь моросыс!» 28Сэтчӧ Исусыс висьталіс: «Шудаӧсь Енлісь Кывсӧ кыліссес да сы сьӧрті оліссес».
Ионалӧн пас
(Мт. 12:38-42)
29Отирыс ӧксисӧ ӧддьӧн уна. Сэк Исусыс пондіс баитны: «Ӧння кадӧ оліссес ─ ылалӧм отир. Нія мыччалан пассэз адззылӧны бы. Енсянь юӧртісь Ионалӧн пасся мӧдік пас нія озӧ адззылӧ. 30Ионаыс вӧлі мыччалан пасӧн Ниневияын оліссезлӧ, а ӧння кадӧ оліссеслӧ ─ Морт Зон. 31Лунлань муись иньӧксу#11:31 иньӧксу ─ царица сувтас Суд Лунас ӧння кадӧ оліссескӧт, нійӧ судитас. Ылісь муэзісь сія вовлӧм кывзыны Соломоныслісь мывкыдсӧ. Эстӧн эд Соломонысся ыджытжык. 32Ниневияын оліссез сувтасӧ судитны ӧння отирсӧ, нійӧ судитасӧ. Нія Ионаыс юӧртӧмсянь умӧль керӧммезныс дынісь бергӧтчӧмась Енлань. Эстӧн эд Ионаысся ыджытжык».
Югыт йылісь
(Мт. 5:15; 6:22-23)
33«Некин ӧзтӧм бисӧ оз дзеб, оз пукты гырнич увтӧ. Сійӧ сувтӧтӧны бивидзан вылӧ, медбы пыриссес адззисӧ югытсӧ. 34Синыт ─ вывтыртӧ югдӧтісь. Синыт кӧ сӧстӧм, быдсӧн вывтырыт югыт. Синыт кӧ умӧль, вывтырыт быдсӧн кольччӧ пемытын. 35Сідзкӧ, видзӧт: тэын югытыс абу разь пемытыс? 36Тэнат кӧ вывтырыт быдсӧн югыт, абу ӧтік пемыт тор, сэк быдӧс лоас ӧддьӧн югыт, жыв тэнӧ югьялана югдӧтан ёна югдӧтӧ».
Фарисейез да Туйдӧтӧ велӧтіссез йылісь
(Мт. 23:1-36; Мк. 12:38-40; Лк. 20:45-47)
37Исуслӧн баитӧм бӧрын ӧтік фарисей рочаліс сійӧ гортас сёйны. Исусыс локтіс да пуксис сёйны. 38Фарисейсӧ диво кутіс, мыля Исусыс пуксис сёйны киэсӧ миссьӧттӧг.
39Дӧсвидзисьыс сылӧ висьталіс: «Тійӧ фарисейес ӧні бекӧрыслісь, юан дозыслісь вевдӧрсӧ миссьӧтат, а пытшкныт тай тіян тырӧм гусясьӧмнас да лӧгнас. 40Ылӧстӧммез! Вевдӧрсӧ аркмӧтісьыс эз я аркмӧт и пытшксӧ? 41Сеталӧ кориссезлӧ, мый тіян доз пытшкас, сэк тіян быдӧс лоас сӧстӧм.
42Ӧддьӧн умӧль лоас тіянлӧ, фарисейез! Тійӧ сёян турунісь, карчись дасӧт торсӧ сетат. Отирыскӧт тай одӧ бӧрйисьӧ веськыта, одӧ радейтӧ Енсӧ. Этна тшӧктӧммез сьӧрті тіянлӧ колӧ керны да и мӧддэсӧ оз ков вунӧтны.
43Ӧддьӧн умӧль лоас тіянлӧ, фарисейез! Тійӧ радейтат синагогаэзын пукавны одзас. Тіянлӧ сьӧлӧмви, копрасьӧны кӧ тіян одзын отир ӧксяніннэзын.
44Ӧддьӧн умӧль лоас тіянлӧ, фарисейез да Туйдӧтӧ велӧтіссез! Ылӧтлісь отир! Тійӧ пуксьӧм шойнаэз#11:44 шойна ─ могила кодьӧсь, кӧдна вылӧт отирыс тӧдтӧг ветлӧтӧны».
45Сэтчӧ ӧтік Туйдӧтӧ велӧтісь Сылӧ висьталіс: «Велӧтісь! Сідз баитӧмнат Тэ и миянлісь сьӧлӧммезнымӧс дойдан». 46Исусыс висьталіс: «Ӧддьӧн умӧль лоас тіянлӧ, Туйдӧтӧ велӧтіссез! Тійӧ отирыслӧ кышаліт сьӧкытся-сьӧкыт ноп#11:46 ноп ─ бремя, кӧдӧ нія и нӧбӧтны озӧ вермӧ. Асьныт тай и ӧтік чуньӧн одӧ павкӧтчӧ, медбы отсавны.
47Ӧддьӧн умӧль лоас тіянлӧ! Тійӧ эд лэбтат шой керкуэз#11:47 шой керку ─ гробница Енсянь юӧртіссезлӧ, кӧднӧ вийӧмась вӧлі тіян айезныт. 48Тійӧ айезныткӧт ӧтдор. Сідз керӧмнаныт тійӧ мыччалат нылісь уджсӧ. Нія вийисӧ Енсянь юӧртіссесӧ, а тійӧ нылӧ лэбтат шой керкуэз. 49Сійӧн Еныслӧн мывкыдыс висьталӧ: "Ны дынӧ ыста Енсянь юӧртіссезӧс да апостоллэзӧс. Ны коласісь ӧтіккезӧс виясӧ, мӧдіккезӧс вашӧтасӧ". 50Сідзкӧ, ӧння оліссес вештісясӧ Енсянь юӧртіссезлӧн вир понда, кӧда киссис быдӧс аркмӧтӧмсянь#11:50 аркмӧтӧм ─ сотворение: 51Авельыс киссьӧм вирсянь Закар вирӧдз. Закарсӧ вийисӧ езъяланін#11:51 езъяланін ─ жертвенник да Вежа Керку коласын. Тіянлӧ баита: ӧння оліссес вештісясӧ.
52Ӧддьӧн умӧль лоас тіянлӧ, Туйдӧтӧ велӧтіссез! Тійӧ босьтіт тӧдӧмсис ключсӧ. Асьныт эдӧ пырӧ, и кин мӧдіс пырны, эдӧ лэдзӧ».
53Исуслӧн баитӧм коста Туйдӧтӧ велӧтіссес фарисейескӧт лӧгувьяныс лэбтісисӧ уна мый юасьны Сылісь. 54Кошшисӧ мог, мыйын бы Сійӧ кутны. Мӧдісӧ кутны Исуссӧ баитӧмас, медбы вӧлі, мый Сы вылӧ висьтавны.
Фарисейез моз олӧмись ӧлӧм
(Мт. 10:26-27)
Currently Selected:
Лука 11: БЮ19
Highlight
Share
Copy
Want to have your highlights saved across all your devices? Sign up or sign in
