Лука 12
12
1Сы коста отирыс ӧксисӧ сюрс-мӧд#12:1 сюрс-мӧд ─ несколько тысяч ӧтамӧд бердӧ дзескӧтчӧмӧдз. Исусыс пондіс баитны велӧтчиссеслӧ: «Фарисейезлӧн нянь шӧмись ылына видзсьӧ, сія ылӧтлӧмӧн олӧм#12:1 ылӧтлӧмӧн олӧм ─ лицемерие. 2Быдӧс сайӧвтӧмыс оссьӧ, быд гусьӧна керӧм йылісь пондӧны тӧдны. 3Сійӧн пемытінын висьталӧмныт кывсяс югытінын. Мый баитіт пельӧ гусьӧник керку пытшкын, лоас висьталӧм керку вывсянь».
Кинісь колӧ повны?
(Мт. 10:28-30)
4«Висьтала тіянлӧ, Аслам ёрттэзлӧ: эд полӧ вывтырнытӧ вийиссезісь. Нія сэсся нем озӧ вермӧ керны. 5Висьтала тіянлӧ, кинісь колӧ повны: полӧ Сыись, Кӧда вийӧм бӧрас вермас куслытӧм биӧ чапкыны. Тіянлӧ шуа: Сыись полӧ. 6Озӧ я вит пышкай#12:6 пышкай ─ воробей вузалӧ кык учӧт сьӧм вылӧ? Ны коласісь Еныс некӧдӧ абу вунӧтӧм. 7Тіян эд и юрси тылӧппэзныт лыддьӧмӧсь. Сідзкӧ, эд полӧ, тійӧ эд пышкайесся донажыкӧсь».
Кристоссӧ тӧдӧмись суськисьӧм
(Мт. 10:32-33; 12:32; Мк. 3:29)
8«Висьтала тіянлӧ: кин отир одзын оз повзьы Менӧ тӧдӧм йылісь висьтасьны, сійӧ Морт Зоныс пуктас Аслас мортӧ Енлӧн ангеллэз одзын. 9Кин отир одзын суськисяс Менӧ тӧдӧмись, сійӧ и Ме пукта тӧдтӧм мортӧ Енлӧн ангеллэз одзын. 10Морт Зон вылӧ умӧль кыв висьталісь мортыс лоас проститӧм. Вежа Лов вылӧ умӧль кыв висьталісь мортыс оз ло проститӧм.
11Кӧр тіянӧс вайӧтасӧ синагогаэзӧ, юраліссез да веськӧтліссез одзӧ, эдӧ тӧждісьӧ, кыдз пондат асьнытӧ дорйыны, мый пондат баитны. 12Сія кадӧ Вежа Лолыс тіянӧс велӧтас, мый колӧ висьтавны».
Мывкыдтӧм бура олісь йылісь велӧтан висьт
13Отирыс коласісь Исусыслӧ ӧтік висьталіс: «Велӧтісь! Тшӧкты вонӧс айӧсянь кольччӧм пажытьсӧ мекӧт янсӧтны». 14Исусыс висьталіс сія мортлӧ: «Кин Менӧ сувтӧтіс судитісьнас, медбы тіян коласын бӧрйисьны?» 15Сія быдӧнныслӧ висьталіс: «Видзӧтӧ, эд горшасьӧ. Уна пажыть ӧктӧмсянь мортлӧн оланыс эд оз видзсьы».
16Сэтчӧ Сія висьтасис велӧтан висьт:
«Ӧтік мортлӧн муыс уна сетас воӧмсӧ. 17Сія аскӧттяс баитас: "Мый нӧ керны? Меным некытчӧ ӧктыны ыб вывсис быдӧс воӧмсӧ". 18Сэк висьталас: "Тӧда, мый керны: разя ассим амбаррезӧс, лэбта ыджытжыккезӧ. Быдӧс ассим няньсӧ, быдӧс ассим бурсӧ ӧкта сэтчӧ. 19Висьтала аслым: лолӧй, уна кад кежӧ куйлӧ тэнат ӧктӧмыт. Ӧні шоччись, сёй, ю, гажӧтчы!" 20А Еныс сылӧ висьталас: "Мывкыдтӧм! Эта ойӧ тэнчит ловтӧ босьтасӧ! Кинлӧ дӧнзяс тэнат ӧктӧмыт?"
21Сідз овлӧ пажытьсӧ ас понда ӧктіссезкӧт, Ен понда кӧ озӧ ӧктӧ».
Тӧждісьтӧг овны велӧтӧм
(Мт. 6:19-21,25-34)
22Аслас велӧтчиссезлӧ Исусыс висьталіс: «Сійӧн шуа тіянлӧ: эдӧ тӧждісьӧ, мый сёйны, мый пасьтавны. 23Оланныт эд сёянся донажык, вывтырныт ─ паськӧмся. 24Видзӧтӧ ракаэз вылӧ. Нія озӧ кӧдзӧ, озӧ вундӧ. Абу нылӧн чоммез, амбаррез. Нійӧ Еныс вердӧ. А тійӧ эд кайесся унаӧн донажыкӧсь! 25Кин тіян коласісь аслас тӧждісьӧмӧн вермас содтыштны олан кадсӧ? 26Сідзкӧ, нельки учӧт торсӧ одӧ кӧ вермӧ керны, мый сэк тӧждісят мӧдік йылісь?
27Видзӧтӧ дзоридззез быдмӧм вылӧ. Нія озӧ уджалӧ, озӧ печкӧ. Висьтала тіянлӧ: нельки Соломон ӧксулӧн югьялан паськӧмыс абу вӧлӧм дзоридззез кодь басӧк. 28Еныс сэтшӧм басӧка пасьтӧтӧ талун видз вылын быдман турунсӧ, кӧда ашын лоас чапкӧм горӧ. А тіянӧс, умӧля веритіссесӧ, буржыка пасьтӧтас!
29Сідзкӧ, сёян-юан эд кошшӧ, сы понда эд тӧждісьӧ. 30Енсӧ тӧдтӧм отирыс быдӧс сійӧ и кошшӧны. Айныт эд тӧдӧ, тіянлӧ сія колӧ. 31Кошшӧ Еныслісь Юралӧмсӧ, сэк и быдӧс коланаыс лоас тіянлӧ сетӧм.
32Эд полӧ, учӧт чукӧр! Айныт шуис сетны тіянлӧ Юралӧм.
33Вузалӧ пажытьнытӧ, сеталӧ кориссезлӧ. Керӧ аслыныт бырлытӧм кӧичкаэз#12:33 кӧичка ─ кошелёк. Бырсьывлытӧм дона берсясӧ ӧктӧ енӧжас. Сэтчӧ гусясисьыс оз сибӧтчыв, сійӧ кор#12:33 кор ─ моль оз сёй. 34Дона берсяныт куйланінын и сьӧлӧмныт лоас».
Лӧсьӧтчӧмӧн видзчисьӧм йылісь
(Мт. 24:42-44)
35«Пыр лоӧ лӧсьӧтчӧмӧсь: тіян коссэзныт йыалӧмӧсь, биэзныт ─ ӧзтӧмӧсь. 36Асьныт лоӧ раббез кодьӧсь, кӧдна кӧзяиннысӧ видзчисьӧны гӧтрасьӧм порйӧтан вылісь, ёркӧтчикас медбы сэк жӧ сылӧ осьтны. 37Шудаӧсь нія раббес, кӧзяинныс локтӧм коста нія видзчисьӧны кӧ сійӧ. Веськыта висьтала тіянлӧ: сія лӧсьӧтчас, пуксьӧтас нійӧ пызан сайӧ да пондас потшуйтны. 38Кӧзяиныс локтас кӧ нельки ойшӧрнас али асъяпоннас да казялас, нія сійӧ видзчисьӧны, шудаӧсь сэк нія раббес.
39Тійӧ тӧдат: гусясисьлісь локтан кадсӧ кӧзяиныс тӧдіс бы, сэк эз бы лэдз сійӧ сюрны керкуас. 40Сідз и тійӧ, пыр лоӧ лӧсьӧтчӧмӧсь. Морт Зоныс локтас видзчисьтӧг».
Бур да умӧль раббез йылісь велӧтан висьт
(Мт. 24:45-51)
41Сэк Петра Исусыслісь юаліс: «Дӧсвидзись! Миянлӧ сія велӧтан висьтыс али быдӧнныслӧ?» 42Дӧсвидзисьыс сылӧ висьталіс:
«Лоӧ надейнӧй, мывкыда раб кодьӧсь. Кӧзяиныс аслас керкуын сувтӧтас сійӧ аскадӧ сетавны уджаліссеслӧ сёян. 43Шуда сія рабыс, кӧзяиныс локтас кӧ да казялас: рабыс керӧ сы тшӧктӧм сьӧрті. 44Веськыта тіянлӧ висьтала: аслас керкуын быдӧс сьӧрын видзӧтны сувтӧтас сійӧ.
45Сія рабыс висьталас кӧ аслыс: "Менам кӧзяинӧ оз лок чожа", сэк сія пондас вартлыны мӧд раббесӧ, а ачыс пондас сёйны-юны, кодавны. 46Кӧзяиныс локтас видзчисьтӧг, тӧдтӧм кадӧ. Сійӧ рабсӧ кувтӧдз вартлас, и сылӧ дӧнзяс сія жӧ, мый и вериттӧммезлӧ.
47Рабыс кӧ тӧдӧ аслас кӧзяинлісь тшӧктӧмсӧ, но оз лӧсьӧтчы да оз кер сы тшӧктӧм сьӧрті, сійӧ ӧддьӧн вартласӧ. 48А кин тӧдтӧг керас умӧльсӧ, сія лоас вартлӧм етшажык. Кинлӧ уна сетӧм, сысянь уна и корасӧ. Уна кӧ морт кипод увтӧ сетӧм, сысянь унажык юаласӧ».
Би да янсӧтӧм
(Мт. 10:34-36)
49«Ме локті му вылас би лэдзны. Ме видзчисьны ни ог вермы сылісь ӧзйӧмсӧ! 50Пыртчӧмӧн колӧ Меным пыртчыны. Сы аркмӧмӧдз Менам сьӧлӧмӧ ӧддьӧн пессьӧ. 51Поди, шуат, Ме лӧнь олан вайи му вылын оліссезлӧ? Тіянлӧ шуа: абу сідз, янсӧтчӧм вайи. 52Ӧнісянь керкуас вит олісьыс пондасӧ янсӧтчыны: куимыс лэбтісясӧ кыкыс вылӧ, кыкыс ─ куимыс вылӧ. 53Айыс лэбтісяс зоныс вылӧ, зоныс ─ айыс вылӧ, мамыс ─ нылыс вылӧ, нылыс ─ мамыс вылӧ, аньыс ─ моньыс вылӧ, моньыс ─ аньыс вылӧ».
Кадлӧн пассэз
(Мт. 16:2-3)
54А отирыслӧ Исусыс висьталіс: «Рытвывсянь лэбтісян кымӧрсӧ казялікӧ шуат: "Зэрны пондас". Сідз и овлӧ. 55Лунланьсянь тӧв пӧльтікӧ шуат: "Пӧжны пондас". Сідз и лоӧ. 56Ылӧтліссез! Му да енӧж вылӧ видзӧттӧн тӧдатӧ, мый видзчисьны. Мыля нӧ одӧ вермӧ тӧдны ӧння кадсӧ?»
Суд вылӧ мунтӧн бурасьӧм
(Мт. 5:25-26)
57«Мыля и асьныт одӧ ылӧстӧ, мый буржык? 58Тэнӧ кӧ нуӧтӧны суд вылӧ, туй вылас вынсьӧтчы бурасьны тэнӧ нуӧтіськӧт. Сэк сія оз вайӧт тэнӧ судитісь дынӧ. А судитісьыс тэнӧ оз сет пуксьӧтісь киӧ. Сэк тэнӧ озӧ пуксьӧтӧ. 59Висьтала тэныт: мӧдмоз кӧ керан, он пет сэтчинісь медбӧрья сьӧмтӧ сеттӧдз».
Енлань бергӧтчыны тшӧктӧм
Currently Selected:
Лука 12: БЮ19
Highlight
Share
Copy
Want to have your highlights saved across all your devices? Sign up or sign in
