Лука 8
8
1Сыбӧрын Исусыс ветлӧтіс каррезӧт да посаддэзӧт. Сія висьтасис Енлӧн Юралӧм йылісь Бур Юӧр. Даскык велӧтчисьыс ветлӧтісӧ Сыкӧт. 2Ӧтлаын вӧлісӧ инькаэз, кӧднӧ Исусыс веськӧтіс шогӧттэзісь да мездіс сэрпӧсь ловвезісь. Нія вӧлісӧ: Магдала Мария, кӧда пытшкись Исусыс вашӧтіс сизим сэрпӧсь лов, 3Иоанна, сія Ирод керкуын веськӧтлісь Кузлӧн инь, Сусанна и уна мӧдіккез. Нія отсалісӧ Исусыслӧ быдӧсӧн, мый нылӧн вӧлі.
Кӧдзись йылісь велӧтан висьт
(Мт. 13:1-9; Мк. 4:1-9)
4Исусыс дынӧ ӧксисӧ уна отир. Нія локтісӧ быд карись. Сія баитӧмсӧ пондӧтіс велӧтан висьтӧн: 5«Кӧдзись петас кӧдзны. Кӧдзикас мукӧд кӧдзыс туссес усясӧ туй дорас. Нія тальсясӧ. Енӧжись кайез кокаласӧ нійӧ. 6Кынымкӧ тусь усясӧ изъяинӧ, петаласӧ да ватӧг косьмасӧ. 7Мукӧд туссес усясӧ йӧн коласӧ. Йӧныс быдмас да петассэсӧ пӧдтас. 8Мукӧдыс усясӧ бур муӧ да петаласӧ. Нія ваясӧ сюсӧ кӧдзӧмысся сёись#8:8 сё ─ 100 унажык». Висьтасьӧм бӧрын Исусыс горӧтчис: «Пеля мортыс ась кылӧ!»
Велӧтан висьтсӧ вежӧртӧтӧм
(Мт. 13:10-23; Мк. 4:10-20)
9Велӧтчиссес Исуслісь юалісӧ: «Мый йылісь сія велӧтан висьтыс?»
10Сія висьталіс: «Тіянлӧ Енлӧн Юралӧмись сетӧм тӧдны тӧдлытӧмсӧ#8:10 тӧдлытӧм ─ тайна. Мӧддэслӧ ─ велӧтан висьттэз пыр. Нія видзӧтӧны, да озӧ адззӧ, кылӧны, да озӧ вежӧртӧ. 11Сія висьтасьӧмыс лоӧ то мый: кӧдзысыс ─ Енлӧн Кыв. 12Туй дорӧ усьӧм кӧдзыс туссес ─ кывзіссез. Ны дынӧ сэсся локтӧ кульыс, сьӧлӧмсиныс нӧбӧтӧ Кывсӧ, медбы нія эзӧ веритӧ да эзӧ мезмӧ.
13Изъяинӧ усьӧм кӧдзыс туссес ─ Кывсӧ кылікӧ сійӧ гажӧн босьтіссез. Вуджыс жӧ нылӧн абу. Кытшӧмкӧ кадӧдз веритӧны, сьӧкыт кадӧ бӧр керсьӧны. 14Йӧн коласӧ усьӧммес ─ Кывсӧ кыліссес. Нія тӧждісьӧмнаныс, уна сьӧмнаныс да долыта му вылын олӧмнаныс пӧдтӧны Кывсӧ. Сэтӧн бур воӧмыс абу.
15Бур муӧ усьӧммес ─ кылӧм Кывсӧ рам да бур сьӧлӧмын видзиссез. Нія вайӧны воӧмсӧ мыланыс быртӧг видзсьӧмӧн».
Сідз висьталӧм бӧрын Исусыс горӧтчис: «Пеля мортыс ась кылӧ!»
Югдӧтӧм йылісь
(Мк. 4:21-25)
16«Некин ӧзтӧм бисӧ оз вевттьы дозӧн, оз сувтӧт топчан увтӧ. Бисӧ сувтӧтӧны бивидзан вылӧ, медбы пыриссесӧ буржыка югдӧтны. 17Быд гусьӧна керӧмыс пондӧ тыдавны. Быдӧс дзебӧмыс ─ петӧ вевдӧрӧ. 18Видзӧтӧ ас сьӧраныт, кыдз тійӧ кывзат. Кинлӧн эд эм, сылӧ сетасӧ. Кинлӧн абу, сылісь мырддясӧ и сійӧ, мый сія чайтіс босьтны».
Исуслӧн мам да воннэз
(Мт. 12:46-50; Мк. 3:31-35)
19Исусыс дынӧ локтісӧ Сылӧн Мамыс да воннэс. Уна ӧксьӧм отир кузя Сы дынӧ сибӧтчыны эзӧ вермӧ. 20Исуслӧ висьталісӧ: «Мамыт воннэткӧт сулалӧны ӧтӧрас, мӧдӧны Тэнӧ адззывны». 21Сія нылӧ висьталіс: «Менам мамӧ да воннэзӧ ─ Ен Кывсӧ кывзіссес да сы сьӧрті оліссес».
Ты вылын тӧв ӧлӧм
(Мт. 8:23-27; Мк. 4:35-41)
22Ӧтік лунӧ Исусыс Аслас велӧтчиссезкӧт пырис пыжӧ да нылӧ висьталіс: «Вуджам ты мӧдӧрас». Нія вӧрзисӧ. 23Уйиканыс Исусыс онмӧссис. Ты вылас лэбтісис вына тӧв, васӧ вайӧтіс, койис ны вылӧ. Нія вермисӧ вӧйны. 24Велӧтчиссес саймӧтісӧ Сійӧ. Нія шуисӧ: «Велӧтісь! Велӧтісь! Вӧям эд!» Сія чеччис, ӧліс тӧвсӧ, васӧ. Тӧлыс да ваыс лӧньсисӧ. 25Сэк Сія велӧтчиссеслӧ висьталіс: «Кытӧн тіян веритӧмныт?» Нійӧ повзьӧмувьяныс диво кутіс. Нія ӧтамӧдныслӧ баитісӧ: «Кин Сія? Тӧлӧн, ваӧн веськӧтлӧ, и нія кывзісьӧны Сійӧ».
Сэрпӧсь ловвезӧс вашӧтӧм
(Мт. 8:28-34; Мк. 5:1-20)
26Исусыс велӧтчиссескӧт локтіс Гадара муӧ. Сія муыс куйлӧ Галилея весьтын. 27Му вылас петӧм бӧрын Исуссӧ панталіс карсис ӧтік морт. Сійӧ мортсӧ важынсянь видзӧмась-маитӧмась сэрпӧсь ловвез. Сія абу олӧм керкуын, олӧм керӧс гырккэзын#8:27 керӧс гырк ─ пещера, кытӧн дзебсьывлісӧ. Сія ветлӧтӧм пасьтӧг. 28Исуссӧ казялікӧ сія лёк горшӧн горӧтіс, уськӧтчис Сы одзӧ. Сія горӧтіс: «Мый Тэныт ме дорӧдз, Исус, Медвылісь Енлӧн Зон? Кеймися Тэныт, эн маит менӧ!» 29Сэрпӧсь лолыс сідз висьталіс, мыля Исусыс тшӧктіс сылӧ петны сія морт пытшкись. Мортыс ӧддьӧн дыр пессьӧм-мырсьӧм#8:29 пессьӧм-мырсьӧм ─ страдание сэрпӧсь ловсянь. Мортсӧ домавлӧмась цеппезӧн, геззэзӧн, медбы сія эз пышшы. Но сія орлавлӧм домӧттэсӧ. Сэрпӧсь лолыс сійӧ вашӧтлӧм кушмуӧ. 30Исусыс юаліс: «Кыдз тэнӧ шуӧны?» Сія висьталіс: «Легион#8:30 легион ─ Римлӧн ыджыт воин чукӧр, 6000 морт». Сэрпӧсь ловвес эд морт пытшкас пырӧмась ӧддьӧн уна. 31Нія корисӧ Исуссӧ, медбы эз тшӧкты нылӧ мунны пыдӧстӧминас.
32Нія корсисӧ пырны порссезӧ, кӧдна йирсисӧ сія керӧс вылын. Порссес вӧлісӧ ӧддьӧн уна. Исусыс лэдзис сэрпӧсь ловвеслӧ пырны ны пытшкӧ. 33Сэрпӧсь ловвес петісӧ мортыс пытшкись да пырисӧ порссес пытшкӧ. Порсь чукӧрыс керӧс вывсяняс уськӧтчис тыас да вӧйис.
34Лоӧмсӧ казялікӧ порссес сьӧрын видзӧтіссес сэтісь пышшисӧ. Нія быдӧс висьтасьӧмась карас да посаддэзас. 35Отирыс петісӧ видзӧтны лоӧмсӧ. Нія локтісӧ Исусыс дынӧ. Сы коккез дынісь казялісӧ мортсӧ, кӧдаись петісӧ сэрпӧсь ловвес. Мортыс вӧлі паськӧма, веськалӧм мывкыда. Сійӧ казялӧмсянь отирыс повзисӧ. 36Адззыліссес нылӧ висьтасисӧ, кыдз мортыс мезмис сэрпӧсь ловвес дынісь. 37Гадара мусис быдӧс отирыс корисӧ Исуссӧ ны дынісь мунны. Нія эд ӧддьӧн повзисӧ. Исусыс пырис пыжас да бертіс. 38Сэрпӧсь ловвез дынісь мездӧм мортыс корсис мунны Исусыскӧт. А Исусыс сійӧ ыстіс гортас да висьталіс: 39«Берт гортат да висьтась, мый тэныт керис Еныс». Сія мунӧм да карас быдӧнныслӧ висьтасьӧм, мый сылӧ керис Исусыс.
Иаирлісь нывсӧ ловзьӧтӧм да инькаӧс веськӧтӧм
(Мт. 9:18-26; Мк. 5:21-43)
40Исусыс бертіс. Сійӧ панталісӧ уна отир. Нія быдӧнныс видзчисьӧмась Сійӧ. 41Сэтчӧ локтіс Иаир нима морт. Сія вӧлі синагогаын веськӧтлісь. Иаирыс уськӧтчис Исуслӧн коккезӧ да корис Сійӧ локны гортас. 42Сылӧн вӧлӧм даскык вося#8:42 даскык во ─ 12 лет ӧтік ныв, кӧда вӧлӧм куландорын.
Исусыс муніс Иаирыскӧт, сы коста отирыс Сы гӧгӧрын дзескӧтчисӧ. 43Сэтӧн вӧлӧм даскык во сьӧрна вир ӧштан шогӧтӧн шогалісь инька. Веськӧтіссез вылӧ сія видзӧм быдӧс пажытьсӧ#8:43 пажыть ─ имущество. Нія абу вермӧмась сійӧ веськӧтны. 44Инькаыс сибӧтчӧм бӧрсяняс, павкӧтчӧм Исуслӧн паськӧм бердӧ. Сэк вирыс сылӧн дугдӧм петны. 45Исусыс юаліс: «Кин павкӧтчис Ме бердӧ?» Быдӧнныс пондісӧ шуны, мийӧ пӧ эгӧ павкӧтчӧ. Сэк Петраыс да сэтісь мӧддэс висьталісӧ: «Велӧтісь, отирыс ӧксисӧ Тэ гӧгӧрӧ да дзескӧтчӧны. Тэ тай шуан: "Кин павкӧтчис Ме бердӧ?"». 46Сэк Исусыс висьталіс: «Кинкӧ Ме бердӧ павкӧтчис. Ме кылі вын петӧмӧс». 47Инькаыс казяліс, сія оз вермы сайӧвтчыны. Сія полӧмӧн сибӧтчис да уськӧтчис Исусыс одзӧ. Быдӧнныс одзын висьтасис, кытшӧм могӧн павкӧтчыліс Сы паськӧм бердӧ да кыдз сэтӧн жӧ веськаліс. 48Исусыс сылӧ висьталіс: «Эн пов, нылӧй! Тэнат веритӧмыт мездіс тэнӧ, мун лӧнь сьӧлӧмӧн».
49Сэтӧн баитӧм коста кинкӧ локтӧм веськӧтлісьыс керкуись. Сія Иаирыслӧ юӧртіс: «Тэнат нылыт куліс, эн ни падмӧтлы Велӧтісьсӧ». 50Юӧртӧмсӧ кылікӧ Исусыс сылӧ висьталіс: «Эн пов, дзир верит. Сэк нылыт лоас ловья». 51Керку дынас локтікӧ Исусыс некинӧс эз лэдз пырны. Пырисӧ дзир Петра, Иоан, Яков и нылочкаыслӧн ай-мамыс. 52Быдӧнныс горзісӧ, герьялісӧ сы понда. Исусыс висьталіс: «Эд горзӧ. Сія эз кув. Сія узьӧ». 53Сы вылын пондісӧ серавны. Нія эд тӧдісӧ: нылочкаыс куліс. 54Быдӧннысӧ керкусис ыстӧм бӧрын Исусыс босьтіс нылочкаыслісь кисӧ да висьталіс: «Нылӧй, чеччы!» 55Нылочкаыслӧн лолыс бертіс. Сія сэк жӧ чеччис. Исусыс тшӧктіс сійӧ вердны. 56Нылочкаыслісь ай-мамсӧ диво кутіс. Но Исусыс эз лэдз висьтасьны лоӧмыс йылісь.
Даскык велӧтчисьӧс Бур Юӧр висьтасьны ыстӧм
(Мт. 10:5-15; Мк. 6:7-13)
Currently Selected:
Лука 8: БЮ19
Highlight
Share
Copy
Want to have your highlights saved across all your devices? Sign up or sign in
