खास चेलों 28

माल्टा टापू मा पौलुस

1अर जब हम वे आंधी-तूफान से बचि ग्यां, त हमतै पता चलि कि ये टापू को नौ माल्टा च। 2अर उखा लोगु न हम पर बड़ी दया दिखै, किलैकि बरखा लगीं छै अर भौत जादा ठण्ड लगणि छै, इलै ऊंन हम खुणि आग जगै अर हमरु स्वागत भि कैरी। 3अर जब पौलुस भै न लखड़ा इकट्‍ठा कैरिके आग मा रखिनी, त हाळ लगण से एक गुरौ निकळि अर उ पौलुस का हाथ पर काटी के लटक्युं रै। 4अर जु लोग उखा छा ऊंन देखि कि गुरौ पौलुस का हाथ पर लटक्युं च, त वु आपस मा बोन्‍न लगि गैनी कि, “पक्‍की बात यू मनखि खूनि च, भले ही यू समुन्दर बटि बचि के ऐ गै, मगर अब न्याय की देवी वेतैं ज्यून्दु नि छुड़ण चाणि।” 5तब वेन अपणु हाथ झटकै के वे गुरौ तैं आग मा ढोळि दिनी अर पौलुस तैं कुछ भि नुकसान नि ह्‍वे। 6अर लोग ईं बात को इंतजार करणा छा कि उ उसै जालु अर तुरन्त भ्वीं मा पोड़ि के मोरि जालु, मगर वु लोग वेतैं काफी देर तक दिखणा रैनी। अर ऊंन देखि कि वेतैं कुछ भि नि ह्‍वे, त ऊंन अपणु विचार बदलि के बोलि, “पक्‍की बात यू कुई भगवान च।”

7अर ईं जगा का नजदीक ही ये टापू का परधान पुबलियुस की जमीन छै। अर येन अपणा घौर लि जैके हमरु स्वागत कैरी, अर तीन दिनों तक हमरि खूब अच्छे से खातिरदारि कैरी। 8अर पुबलियुस भै को बुबा तैं खून काट होणा छा, अर यां की वजै से वु पस्त ह्‍वेके बिस्तर पर पोड़्यूं छौ, अर वेतैं जौर भि अयूं छौ। तब पौलुस वेका पास गै अर वे पर हाथ रखी के प्रार्थना कैरी, अर वु खूब ह्‍वे गै। 9अर जब लोगु तैं ईं बात का बारा मा पता चलि, त वे टापू का और बिमार लोग भि ऐनी अर वु सब भि खूब ह्‍वे गैनी। 10अर ऊं लोगु न हमरु भौत आदर-सम्मान कैरी अर जब हम उख बटि जाण लगि ग्यां, त ऊं लोगु न हमरि जरुरत को समान जाज मा रखी दिनी।

पौलुस को माल्टा से रोम कू जाण

11अर तीन मैना का बाद हम सिकन्दरिया नगर कू जाण वळा पाणि का एक जाज मा बैठ ग्यां, अर हमुन जाज को सफर शुरु कैरी अर यू जाज पूरा ह्‍यूँद बटि माल्टा टापू पर ही रुक्युं छौ। अर ये जाज पर दुई जौंळ्या भैयों को चिन्‍न बणयूं छौ, जु कि द्‍यबता छा। 12अर फिर सुरकूसा नगर का छाला मा पौंछी के हमुन लंगर डालि अर तीन दिन तक उखि रयां। 13अर येका बाद हम घूमी के रेगियुम नगर मा पौंछयां। अर एक दिन बाद दक्छिण दिसा बटि बथौं चलण लगि गै, इलै हम दुसरा दिन पुतियुली नगर मा ऐ ग्यां।

14अर उख हमतै बिस्वासी भै-बैंणा मिलिनी, अर ऊंन हम बटि बिन्ती कैरी कि सात दिनों तक इखि रा, अर हम उखि रयां। अर येका बाद हम रोम नगर कू चलि ग्यां। 15अर जब रोम नगर का बिस्वासी भै-बैंणो तैं हमरा औण का बारा मा पता चलि, त ऊ हमतै मिलणु खुणि अप्पियुस का बजार तक, इख तक कि कुछ लोग तीन धर्मशाळाओं नौ का नगर तक ऐनी। अर यों लोगु तैं देखि के पौलुस भै की हिम्मत बढी, अर वेन परमेस्वर को धन्यवाद दिनी।

रोम नगर मा पौलुस

16अर जब हम रोम नगर मा पौंछयां, त पौलुस भै तैं इखुली रौण की इजाजत मिली गै, मगर वेकी पैरेदारी करणु खुणि एक सिपै तैं रखै गै। 17अर तीन दिन का बाद पौलुस न यहूदियों का खास लोगु तैं एक साथ बुलै। अर जब वु इकट्‍ठा ह्‍वेनि, त वेन ऊंकू बोलि, “हे मेरा भैयों, मिन अपणा लोगु या अपणा पितरों की रीति-रिवाजों का खिलाप मा कुछ भि नि कैरी। फिर भि यरूशलेम नगर का लोगु न मितैं कैदी बणै के रोमियों का सुपुर्द कैरी दिनी। 18अर जाँच-पड़ताल करण का बाद ऊंन मितैं छुड़ण चै, किलैकि मौत का दण्ड का लैख मेरु कुई भि अपराध नि कर्युं छौ। 19मगर जब यहूदी लोग ईं बात को विरोध कैरिके बोन्‍न लगि गैनी, तब मिन अपणा न्याय खुणि महाराज की मांग कैरी। अर मिन या मांग इलै नि कैरी, कि मि ऊं लोगु पर इळजाम लगौं, ना ही मेरु इन्द्रयो कुई मकसद छौ। 20अर मिन तुमतै इख इलै बुलै, ताकि तुम बटि मिलु अर बात-चित कैरी सैकु, अर जै मसीह औण की आस इस्राएली लोगु न रखी च, वे ही मसीह का बारा मा परचार करण का बानो आज मि इख बेड़ियों मा बन्धयूं छौं।”

21तब ऊंन वेकू बोलि, “पौलुस, हमुन तेरा बारा मा यहूदिया मुलक बटि कुई चिठ्‍ठी नि पै, अर ना ही कै यहूदी भै न इख ऐके तेरा बारा मा भलु-बुरु बोलि अर ना कुछ बतै। 22मगर तू क्या चाणि छैई वा बात हम त्वे बटि ही सुनण चन्द्‍यां, किलैकि हमतै पता च कि हरेक जगा का लोग ये मसीह का बाटा का खिलाप मा बात कना छिन।”

23तब ऊंन पौलुस का दगड़ा मा बात-चित करणु खुणि एक दिन ठैरै। अर जब उ दिन ऐ, त भौत सा लोग वे घौर मा जमा ह्‍वेनि, जै घौर मा पौलुस रुक्युं छौ। तब पौलुस ऊंतैं यीशु का बारा मा, मूसा का दियां नियम-कानूनों का बारा मा, अर रैबर्यों की किताबों बटि समझौण लगि गै, अर वेन परमेस्वर का राज का बारा मा भि अपणी गवै दे, अर यू सब बिंगौन्द-बिंगौन्द सुबेर बटि रुमुक ह्‍वे गै। 24अर कुछ लोगु न पौलुस की बातों पर बिस्वास कैरी, पर कुछ लोगु न बिस्वास नि कैरी। 25अर जब वु लोग आपस मा एकमत नि ह्‍वेनि, अर जाण लगि गैनी, तब पौलुस न ऊंकू बोलि, “जान्द-जान्द मेरी बात तैं सुणिल्या, यशायाह रैबर्या का द्‍वारा पवित्र आत्मा न तुमरा पितरों बटि ठिक ही बोलि छौ कि,

26“‘तू जैके यों लोगु कू बोल दे कि,

# यूहन्‍ना 12:40; यशा 6:9-10 तुम सुणिल्या त सही, मगर तुमरि समझ मा कुछ नि औण,

अर तुमतै दिख्यालु त सही,

मगर वीं बात को मतलब पता नि चलण,

27किलैकि यों लोगु को मन निठुर ह्‍वे गै,

अर वु अपणा कन्दूड़ो न सुनण नि चनदिन,

अर ऊंन अपणा आंख्यों तैं बन्द कैरियाली,

ताकि इन नि हो कि वु अपणा आंख्यों न देखा अर कन्दूड़ो न सुणा,

अर अपणा मन मा समझा, अर अपणा-अपणा पापों बटि पस्ताप कैरा,

अर मि ऊंतैं खूब कैरी द्‍यो।’

28“इलै तुम भि जाणि जा कि परमेस्वर को बचौण वळु वचन अब ऊं लोगु का पास भि भेजि गै, जु कि यहूदी जाति का नि छिन अर वु लोग वेका बारा मा सुणला।” [ 29अर पौलुस की यों बातों तैं सुणी के यहूदी लोग आपस मा भौत वाद-विवाद करद-करद उख बटि चलि गैनी।]

30अर पौलुस पूरा दुई साल तक अपणा किराया का घौर मा रै, अर जु लोग वेका पास औन्दा छा, वु ऊं सब लोगु को स्वागत बड़े प्यार से करदु छौ। 31अर बिना रुकावट उ, परमेस्वर का राज को परचार बड़ी हिम्मत से करदु छौ, अर प्रभु यीशु मसीह का बारा मा लोगु तैं सिखौणु रौन्दु छौ।

Currently Selected:

खास चेलों 28: GBM

Highlight

Copy