खास चेलों 27

पौलुस की रोम यात्रा

1अर जब इन फैसला ह्‍वे गै कि अब हमतै कैसरिया नगर बटि निकळि के जाज को सफर शुरु कैरिके इटली देस कू जाण पोड़लु, त ऊंन पौलुस अर कुछ और कैदियों तैं यूलियुस नौ का एक सुबेदार का सुपुर्द कैरी दिनी। अर यूलियुस महाराजा की पलटण को सुबेदार छौ। 2अर हमुन अद्रमुत्तियुम नगर बटि पाणि का एक जाज मा बैठि के अपणु सफर शुरु कैरी। अर ये जाज न आसिया का बंदरगाहों से ह्‍वेके जाण छौ, अर हमरा दगड़ा मा मकिदुनिया मुलक को अरिस्तर्खुस भै भि छौ, जु की थिस्सलुनीकी नगर को रौण वळु छौ। 3अर वेका दुसरा दिन हम सैदा नगर मा पौंछयां। अर इख यूलियुस सुबेदार न पौलुस पर बड़ी दया दिखै के वेका दगड़्यों से मिलणे की इजाजत दे दिनी, ताकि वेकी देख-रेख ह्‍वे सैको। 4अर येका बाद हमुन इख बटि पाणि का जाज की यात्रा फिर से शुरु कैरी, मगर हवा जाज का खिलाप मा चलणी छै, इलै हम साइप्रस टापू की आड़ मा ह्‍वेके चलयां, 5अर फिर हमुन समुन्दर की ईं यात्रा तैं किलिकिया अर पंफूलिया मुलक का अगनै बटि ह्‍वेके कैरी अर तब हम लूसिया मुलक का मूरा बंदरगाह मा पौंछयां। 6अर उख सुबेदार यूलियुस तैं सिकन्दरिया नगर को एक जाज मिली, जु इटली देस जाण वळु छौ, तब वेन हमतै वे जाज मा बैठे दिनी।

7अर भौत दिन तक हम आराम-आराम से अगनै चलणा रयां, अर आखिरकार हम बड़ी मुस्किलन कनिदुस नगर पौंछयां। अर बथौं इथगा तेज चलणु छौ कि हमरु जाज अगनै नि बढी सैकी, इलै हम सलमोने नगर का पास बटि ह्‍वेके क्रेते टापू की आड़ मा जाण लगि ग्यां। 8अर क्रेते टापू का छाला ही छाला बड़ी मुस्किलन हम “सुन्दर बंदरगाह” नौ की एक जगा पर पौंछयां, अर इख बटि लसया नगर नजदीक ही छौ।

9अर हमरा काफी दिन इन्‍नि बरबाद ह्‍वे गैनी, इख तक कि हम यहूदी लोगु को उपवास#27:9 यहूदी लोगु का उपवास रखण का दिन सितम्बर मैना का आखिरी दिनों से अक्टूबर मैना तक होन्दा छा। अर जै बाटा बटि यू लोग जाणा छा ये बगत मा मौसम बड़ु खतरनाक ह्‍वे गै छौ, अर नबम्बर का मैना मा समुन्दर की यात्रा करण बन्द ह्‍वे जान्दी छै। रखण का दिन भि चलि गै छा। अर जाज को यू सफर करण बड़ु खतरनाक होण लगि गै छौ, इलै पौलुस न ऊंतैं सला देके बोलि, 10“हे मेरा भैयों, मितैं लगदु कि ईं यात्रा मा ना सिरफ समान अर जाज को नुकसान होलु, बल्किन मा हमरा जीवन भि खतरा मा पोड़ि सकदिन।” 11मगर सुबेदार न पौलुस की बातों से जादा जाज का कप्‍तान अर जाज का मालिक की बातों पर ध्यान देई। 12अर ह्‍यूँद का दिन होण की वजै से जादातर लोगु न इन सला देई अगर ह्‍वे सैको, त हम कनकै भि जाज को सफर शुरु कैरिके बस फीनिक्स नगर तक पौंछी जां, ताकि हम ह्‍यूँद को मैना उखि काटा। अर फीनिक्स नगर त क्रेते टापू को एक बंदरगाह च, जु की दक्छिण-पच्छिम और उत्तर-पच्छिम दिसा मा च।

समुन्दर मा तूफान

13अर जब दक्छिण दिसा बटि हवा कम-कम चलण लगि गै, त हमतै लगि, कि अब त हमरि फीनिक्स नगर जाण कि योजना पूरि ह्‍वे जालि। इलै हमुन जाज को लंगर#27:13 लंगर, जाज को इन हिस्सा च ज्यां से जाज की चाल तैं कम किये जान्दु छौ। उठे अर क्रेते टापू का छाला ही छाला ह्‍वेके अगनै जाण लगि ग्यां। 14मगर कुछ देर बाद मौसम बदलि गै अर वे टापू की तरफा बटि एक बड़ु तूफान ऐ, जैकू “यूरकुलीन” भि बुल्दिन, अर हम छाला से अलग होण लगि ग्यां, 15अर तूफान का तेज बथौं का बीच मा हमरु जाज फंसी गै अर जाज अगनै नि बढी सैकी, इलै हमुन हार माणी दिनी अर जाज तैं बथौं का मुताबिक चलण दिनी। 16तब हम वे बथौं मा बुगदी-बुगदी कौदा नौ का एक टापू की आड़ मा ऐ ग्यां, अर बड़ी मुस्किलन हमुन जान बचौण वळी नाव तैं जाज पर बान्धि। 17अर वेका बाद हमुन जाज तैं मूड़ी बटि ज्यूड़ोळ बान्धि दिनी, ताकि जाज टूटी नि जौ। अर हमतै डौऽर छै कि हमरु जाज सुरतिस टापू का बळा मा फंसी नि जौ अर जाज का टुकड़ा नि ह्‍वे जा, इलै हमुन जाज का बड़ा परदा तैं भि मूड़ी खैंची दिनी, अर जाज तैं बथौं मा बुगण दिनी। 18अर तूफान की वजै से हमरा बुरा हाल ह्‍वे गै छा, अर जाज हमरा वस से भैर ह्‍वे गै छौ, इलै हमतै दुसरा दिन जाज को समान पाणि मा ढोळण पोड़ि। 19अर तिसरा दिन ऊंन खुद ही जाज मा काम औण वळी चीजों तैं भि ढोळि दिनी। 20अर भौत दिनों तक हमतै सूरज अर गैंणा नि दिखैनि, किलैकि मौसम अर तूफान बड़ु खतरनाक होयुं छौ, अर आखिरी मा हमरि बचणै उम्मीद भि खतम होण लगि गै।

21अर भौत दिनों बटि कैन भि कुछ नि खै छौ। तब पौलुस न ऊंका बीच मा खड़ु ह्‍वेके बोलि, “हे मेरा भैयों, जरुरी त यू छौ कि अगर तुम लोग मेरी बात तैं क्रेते टापू मा ही माणी जान्दा, कि हमतै समुन्दर को यू सफर नि करण चयेणु, त आज ईं विपदा मा नि पोड़दा, अर ना ही इथगा नुकसान होन्दु। 22मगर फिर भि मि तुमतै एक सला देण चान्दु कि हिम्मत रखा, किलैकि तुम मा बटि कुई भि नि मुरलु, मगर जाज को नास ह्‍वे जालु। 23किलैकि जै परमेस्वर पर मि बिस्वास रखदु अर जैकी सेवा करदु, वे ही परमेस्वर को स्वर्गदूत राति मेरा पास ऐके खड़ु ह्‍वे। अर वेन बोलि कि, 24‘पौलुस डौऽर ना, त्वेतै महाराजा का समणि हाजिर होण जरुरी च। अर सुण, जथगा भि लोग तेरा दगड़ा मा यात्रा कना छिन, तेरी प्रार्थना तैं सुणी के परमेस्वर ऊं लोगु की भि हिफाजत करलु।’ 25इलै हे मेरा भैयों हिम्मत रखा, किलैकि मितैं परमेस्वर पर बिस्वास च कि जन वेन मितैं बतै उन्‍नि होलु 26अर हम जरुर कै टापू पर ठैरि जौला।”

पौलुस द्‍वारा लोगु की हिम्मत बढौण

27तूफान औण का बाद जब चौदहवीं रात ऐ, त हम अद्रिया समुन्दर की उथल-पुथल मा इनै-उनै जाणा छा, अर अधि रात का करीब जाज चलौण वळो तैं इन लगि कि हम कै छाला पर पौंछण वळा छां। 28जब ऊंन पाणि की गैरै नापी त गैरै एक सौ बीस फुट छै, अर जरा अगनै जैके ऊंन फिर गैरै नापी त नब्बे फुट छै। 29अर ऊंतैं डौऽर लगण लगि गै कि कखि जाज चटानों पर टकरै नि जौ, इलै ऊंन पिछनै जैके जाज का चार लंगर पाणि मा डालि दिनी ताकि जाज रुकी जौ। अर वीं रात ऊ प्रार्थना करण लगि गैनी कि बस सुबेर ह्‍वे जौ। 30अर जाज चलौण वळा लोगु की उख बटि भजणे की इच्छा छै, इलै ऊंन जाज का अगनै का हिस्सा मा लंगर डलण को बहाना कैरिके अर जान बचौण वळी नाव तैं समुन्दर मा उतारि दिनी। 31तब पौलुस न सुबेदार अर सिपयों कू बोलि, “अगर यू लोग जाज मा नि राला, त तुम भि नि बचि सकद्‍यां।” 32इलै सिपयों न नाव का ज्यूडों तैं काटी के पाणि मा छोड़ि दिनी।

33जब सुबेर होण वळी छै, त पौलुस न सभ्यों तैं खाणुक खाणु कू समझै अर बोलि कि, “हे मेरा भैयों, तुमुन चौदह दिनों बटि कुछ नि खै बस इंतजार ही कना रयां, 34इलै मि तुम बटि बिन्ती करदु कि तुम कुछ खैल्या ताकि बच्यां रा, अर मि तुमतै बतै देन्दु कि तुमरा मुण्ड़ को एक भि बाळ बाकुं नि होलु।” 35अर इन बोलि के वेन रुट्‍टी लेई अर सभ्यों का समणि परमेस्वर को धन्यवाद कैरी अर वीं रुट्‍टी का टुकड़ा कैरिके खाण लगि गै। 36तब ऊं सब लोगु की हिम्मत बढी गै, अर ऊंन भि खाणुक खै। 37अर वे जाज मा हम सब कुल मिलै के दुई सौ छियत्तर लोग छा। 38अर ऊंन पुटगु भोरी के खाणु खै, अर बच्यां ग्यूँ का बोरयों तैं पाणि मा ढोळि दिनी ताकि जाज हलकु ह्‍वे जौ।

जाज को टूटण

39अर जब सुबेर ह्‍वे, त ऊंतैं समुन्दर को एक छालु दिखै, पर वु वीं जगा तैं पछ्याणी नि सकिनी। अर या जमीन सूखि छै, अर ऊंन इन ठाणि कि वु जाज तैं उखि खड़ु कैर द्‍या। 40तब ऊंन लंगरों तैं खोली के समुन्दर मा डालि दिनी, अर वेका दगड़ा-दगड़ि जु रस्सा हेंडळ से जुड़यां छा ऊंतैं भि खोली दिनी, अर हवा मा जाज को बड़ु परदा फिर से चड़ै के छाला जनै जाण लगि गैनी। 41अर अगनै दुई समुन्दर की लैरों का आपस मा मिलण की वजै से बळो का एक ढेर जमा होयुं छौ। अर हमरा जाज को अगनै को हिस्सा वे बळा मा फंसी गै अर हिली नि सैकी, अर पिछनै को हिस्सा तेज लैरों की वजै से टूटण लगि गै।

42तब सिपयों न कैदियों तैं मरणे मनसा कैरी, ताकि कुई भि तैरी के भागी नि सैको। 43मगर सुबेदार न पौलुस तैं बचौण की मनसा से ऊंतैं इन करण से रोकी अर आदेस देई, “जु तैरी सकदिन उ फाळ मारी के छाला जनै पैलि चलि जा, 44अर जौं तैं तैरण नि औन्दु वु लोग तखतों अर जाज का टुटयां हिस्सों की मददळ जा। अर इनकै हम सब लोग बचि के छाला पर पौंछी ग्यां।”

Currently Selected:

खास चेलों 27: GBM

Highlight

Copy