San Lucas 21

Usurä isaju kiyinö huȩnȩ

1Diosrö ucuocuäcuähuodettö järe ruhuotö ttöäre pärätä ofrenda ȩnä̧huä̧ca̧nä̧ ttȩna̧'a̧ topinödo Jesús. 2Ja̧'hua̧ta̧nö̧ yajute recua, usurä isaju, ja̧huä̧ca̧nä̧ pärätä̧bi̧ ji̧'qui̧cha̧jä̧bi̧ to̧bi̧rȩtä̧ kȩna̧'a̧ topinödo. 3Jesús pä'inödo:

—Iso päi'önä pä'ösä ucuturu, paju recua, usurä isaju kö̧ja̧'a̧nä̧, o'ca toi'önä korotöttö'inä abonänö rö̧ȩnä̧ ȩnö̧ iyäjäju. 4Jahuätö o'ca toi'önä ttöäre o'ca'a ka̧cui̧pa̧'a̧nä̧ iyäjätö. Jahuäjumä usurä isaju kö̧ja̧'a̧nä̧, o'ca juiyönä köäre ȩmä̧huä̧ micuä iyäjäju, —pä'inödo Jesús.

Diosrö ucuocuäcuähuode toei'ä̧cuȩ huȩnȩ huo̧juȩti̧nö̧do

5Korotömä Diosrö ucuocuäcuähuode adihuode pä'ö ucuocuinätödo. Ja̧'hua̧ta̧nö̧ adihuo'quinä ttaditinö'inä, koro juäi ofrenda päi'önä ttiyinö'inä ja̧'a̧ttö̧, adiu uhuähua'a pä'ö ucuocuinätödo. Ja̧'hua̧ ja̧'a̧ Jesús pä'inödo:

6—Pi̧yȩ o'ca juiyönä tocu'ätucumä yodoji mo̧ro̧ toei'äcua'a, ido'qui koro'qui huäme yoröiso ki̧'o̧ca̧'a̧ jä̧cua̧'a̧.

Röji mo̧ro̧ huȩnȩ huo̧juȩti̧nö̧do

7Ja̧'hua̧ ja̧'a̧ttö̧ ja̧u̧ru̧ jä'epinätödo:

—Huo̧juȩcuä̧ I̧sa̧, ja̧u̧mä̧ ¿ti̧yȩnö̧ 'cuäopäcua'ajä̧ttö̧? Ja̧u̧ o'ca juiyönä 'cuäopä̧cuȩ mo̧ro̧ ¿tta̧'a̧nö̧ tu̧huo̧juä̧cua̧'a̧jä̧ttö̧?

8Jesús pä'inödo:

—Korotö yapareu jittähuomenä, jittäumä jȩcu̧'ä̧tu̧cuo̧ca̧'a̧ adiu jȩpä̧tu̧cui̧. Ja̧u̧nu̧ mo̧ro̧ päi'omenä, recuätö ttö chi̧mi̧nä̧ ucuocu ttichäcuotö. Pättäcuotö: “Ttötäsä Cristo. Jitätä cuesetätucu'a̧nö̧ ja̧'a̧.” Ja̧'hua̧nö̧ pättomenä, jahuätörö cuesetätucuä'. 9Ja̧'hua̧nö̧ ja̧'a̧nä̧ rö̧ȩnä̧ curä huȩnȩ'i̧nä̧, ra̧huȩpi̧jö̧ huȩnȩ'i̧nä̧ cuä̧ju̧cuä̧tu̧cuo̧mȩnä̧, yecuhuecuätucuä'. Ja̧u̧ o'ca juiyönä 'cuäopäcua'a. Ja̧'hua̧ta̧nö̧ 'cuäopa'anä, röji mo̧ro̧ ji̧nä̧ päi'oca'a jä̧cua̧'a̧.

10Ja̧u̧nu̧ o'ca'a juhua'a yabonö pä'inödo:

—Korotö ttö̧ja̧ korotö ttö̧ja̧cu̧ ttörohuähuäcuotö. Ko̧ro̧jä̧ ttö̧ja̧, ko̧ro̧jä̧ ttö̧ja̧cu̧ ttörohuähuäcuotö. 11Rȩjȩ'i̧nä̧ korome pö̧nä̧ ttö̧ȩpä̧cua̧'a̧. Rö̧ȩnä̧ ppäi ttuttäcuotö. Rö̧ȩnä̧ na̧ttä̧chä̧cuo̧tö̧. Mo̧ro̧jä̧ jähuä, yoröiso tottocö juäi'inä, topö yettecui'äcuotö.

12“Ja̧'hua̧nö̧ ja̧'a̧nä̧ pi̧yȩ o'ca juiyönä 'cuäopäcua'a ä'canä, ucuturu 'chuttädäcuotö. Ucuturu suronä jȩttä̧cuo̧tö̧. Ucuturu judíos ttu̧huo̧jui̧'i̧nodehuiyära̧'a̧ ttȩpä̧cuo̧tö̧ suronä ucuocu. Cärenä ttötäcuotö ucuturu. Ji̧nä̧ isocu ruhuotö ttä'ca jo̧mȩttö̧'i̧nä̧, ppeyä ruhuotö ttä'ca jo̧mȩttö̧'i̧nä̧ ttȩpä̧cuo̧tö̧ ucuturu, ttörö cuesetätucua'attö. 13Ja̧'hua̧nö̧ ttȩpo̧mȩnä̧, ucutumä ttö chi̧huȩnȩ cucuocuäcuotöjä. 14Ja̧'hua̧nö̧ ja̧'a̧ttö̧ cuamönä jicuhuähuätucuä̧cuȩmä̧ ä'canä amöcuädö cu̧ja̧cuä̧tu̧cuä̧'. 15Ja̧u̧nu̧ mo̧ro̧ päi'omenä jicuhuähuätucuä̧cuȩ'i̧nä̧, rö̧ȩnä̧ huo̧juä̧huä̧'i̧nä̧, cuaboiyotö yoröiso ucutu päcuhuätucuttu'inä i̧mi̧cu̧nä̧ pättö juiya pä'ö, chi̧yä̧cuä̧u̧jä̧. 16Ja̧'hua̧nö̧ ja̧'a̧nä̧ ucutu cuamönä cuä̧'o̧tö'i̧nä̧, cuamönä cu̧jä̧hua̧tö̧'i̧nä̧, cuamönä cuahuaruhuä'inä, cuamönä cu̧huo̧juä̧u̧'i̧nä̧, ucuturu ttiyäcuotö korotörö. Ucututtu yotöcunärö cuä'ö tticuäcuotö. 17Ja̧'hua̧ta̧nö̧ ttörö cuesetätucua'attö, o'ca toi'önä ttö̧ja̧ kö'cocotö ttäcuotö ucuturu. 18Ja̧'hua̧nö̧ ja̧'a̧nä̧ ucutu cuttu cuhuocoi yoite'inä yoröiso ma̧ä̧cho̧ca̧'a̧ jä̧cua̧'a̧. 19Cuami 'qui'ächi'ö cu̧ja̧cuä̧tu̧cu̧ttu̧mä̧, kä̧cuä̧huä̧ i'co cu̧ju̧nä̧rä̧cuo̧tö̧jä̧.

20“Su̧ro̧da̧u̧ Jerusalén ötahuiyä u̧mi̧nä̧ pa̧ja̧cu̧nä̧ ttö̧ja̧cua̧'a̧ tocu'ätucuomenä, täcö ja̧u̧ ötahuiyä beipächäcua'a tö'cöhuächa'a cu̧huo̧juä̧tu̧cua̧ja̧. 21Ja̧'hua̧ ja̧'a̧ttö̧ Judea rȩjȩnä̧ ka̧cuä̧tö̧mä̧, möä'cara̧'a̧cu̧ jotte'ö'a̧nö̧ ja̧'a̧. Ja̧'hua̧ta̧nö̧ Jerusalén ötahuiyänä ka̧cuä̧tö̧mä̧, juhua'attö rättopächö'a̧nö̧ ja̧'a̧. Pättara̧'a̧ ka̧cuä̧tö̧'i̧nä̧ ötahuiyära̧'a̧ ppa̧ttä̧chö̧ juiyö'a̧nö̧ ja̧'a̧. 22Ja̧u̧nu̧ mo̧ro̧ ro̧ȩcuä̧ mo̧ro̧ jä̧cua̧'a̧. Ja̧u̧nu̧mä̧ o'ca juiyönä Huȩyu̧cuä̧ Huȩnȩ päömä 'cuäopäcua'a. 23Ja̧u̧nu̧ mo̧ro̧ surojäcua'a muchotörö'inä, ppo̧'ä̧tö̧ ttatate isoya ahuätörö ku̧nä̧rä̧tö̧rö̧'i̧nä̧. Ja̧u̧nu̧mä̧ rö̧ȩnä̧ ubara kä̧cua̧'a̧ pi̧jä̧nä̧mä̧. Ja̧'hua̧ta̧nö̧ jahuätö ttö̧ja̧rö̧ rö̧ȩnä̧ ro̧ȩcuä̧ kä̧cua̧'a̧. 24Ttörohuähuomenä, yotöcunä hua'ö tticuäcuotö. Korotörö ko̧ro̧jä̧cu̧tä̧, ko̧ro̧jä̧cu̧tä̧ cärenä ttötatö pä'ö ttȩpä̧cuo̧tö̧. Ja̧'hua̧ta̧nö̧ korotö ko̧ro̧jä̧ttö̧ ichäcuähuotö Jerusalén ötahuiyänä surojuo'epö cuettächäcuotö, jitöjarö huettö beipächome jubö päi'önä, —pä'inödo Jesús.

Ubo I̧tti̧ ichä̧cuȩ huȩnȩ huo̧juȩti̧nö̧do

25Juhua'a yabonö huo̧juȩti̧nö̧do Jesús:

—Ja̧'hua̧ ja̧'a̧ttö̧ mo̧ro̧ kä̧hua̧nä̧'inä̧, yodo kä̧hua̧nä̧'i̧nä̧, si̧ri̧'cö̧nä̧'i̧nä̧ i̧jȩcuä̧ kä̧cua̧'a̧. Pi̧jä̧nä̧'i̧nä̧ ttö̧ja̧, dubora rö̧ora rö̧ȩnä̧ ppahua'a pä̧i̧cu̧nä̧ ucuocua'attö ä̧ju̧cu̧, jerunä yettecuäcuotö. 26Pi̧jä̧nä̧ 'cuäopä̧cuȩ amöcuädö, pi̧jä̧ ttö̧ja̧ ye'ecu ttijuiyuächi'äcuotö. Mo̧ro̧jä̧ jähuä'inä ttö̧ȩpä̧cua̧'a̧. 27Ja̧'hua̧nö̧ päi'omenä, Ubo I̧tti̧ adihuä ujurunä dä'änö kä̧dȩpö̧nä̧ ajiya isoppanä icha'a tottäcuotö. 28Pi̧yȩ juäi pä'ötä 'cuäopäcua'a tocu'ätucuomenä, ka̧ra̧'i̧nä̧, ka̧ra̧'i̧nä̧ ppä'ädö cupiyä cä'epätucui. Täcö adiunä cu̧ja̧cuä̧tu̧cua̧ pä'ö tö'cöhuächa'a.

29Ja̧'hua̧ta̧nö̧ koro juäi jä̧'i̧nö̧'a̧nö̧ jö̧ huȩnȩ ji'ähuinödo jahuätörö:

—Pä̧jä̧rȩttö̧'i̧nä̧, koro juäi dauttu'inä topö, amöcuädätucui. 30Ame 'cärächa'a topö, ucutu huo̧juä̧tö̧jä̧ täcö du'huo tö'cöhuächa'a pä'ö. 31Ja̧'hua̧ta̧nö̧ pi̧yȩ o'ca juiyönä 'cuäopa'a tocu'ätucuomenä, Dios Tu̧ru̧hua̧ päi'önä ö̧jä̧cuȩmä̧ tö'cöhuächa'a pä'ö cu̧huo̧juä̧cuo̧tö̧jä̧.

32“Iso päi'önä pä'ösä ucuturu, jitä ka̧cuä̧tö̧mä̧ hua'ö tticua'anä, be'ipocotö ja̧u̧ jidähuäji 'cuäopa'a päi'önä. 33Mo̧ro̧jä̧'i̧nä̧, pi̧jä̧'i̧nä̧ beipächäcua'a. Ttö chi̧huȩnȩmä̧ yoröiso beipocö.

34-35“Ttu̧ȩcuä̧nä̧tä̧ ka̧cuä̧tu̧cui̧. Pi̧jä̧ jähuä jȩpö̧, tä̧'ä̧mä̧'chö̧ jȩpö̧, cuami iso'quitucu 'quiyönä juoächa'acu jȩcu̧'ä̧tu̧cuä̧'. Ja̧'hua̧ta̧nö̧ pi̧jä̧ jähuä amöcuädö kä̧nö̧, koro hua̧rö̧ 'chuttäda'a jä̧'i̧nö̧'a̧nö̧ ja̧u̧ juäi 'cuäopä̧cuȩ mo̧ro̧ tta̧cu̧huä̧rä̧tu̧cuo̧ca̧'a̧ adiu ka̧cuä̧tu̧cui̧. O'ca toi'önä ttö̧ja̧ pi̧jä̧ pa̧ja̧cu̧nä̧ ka̧cuä̧tö̧rö̧ ja̧'hua̧nö̧ ichäcua'a ja̧u̧nu̧ mo̧ro̧. 36'Cuäopönä jo̧mȩ päi'önä tta̧'ä̧rä̧tu̧cui̧. Pi̧yȩ 'cuäopä̧cuȩmä̧ ucuturu 'cuäopö juiya pä'ö, Diosrö ucuocuätucui 'cuäopönä. Ja̧'hua̧ta̧nö̧ Ubo I̧tti̧ ä'ca jo̧mȩttö̧ adiu cu̧ja̧cuä̧tu̧cuä̧cua̧'a̧nö̧ ucuocuätucui, —pä'inödo Jesús.

37Jesús mo̧ro̧ji̧nö̧ a̧'u̧cuä̧ huo̧juȩti̧nö̧do Diosrö ucuocuäcuähuodenä. Yodomä Olivos inähuä pä'ö micuome 'chi̧nö̧do. 38Ja̧'hua̧ ja̧'a̧ o'ca toi'önä ttö̧ja̧ 'cuäopönä yo̧ȩi̧ a̧mö̧cuä̧rö̧nö̧ Diosrö ucuocuäcuähuodera̧'a̧ 'chi̧nä̧tö̧do, ja̧u̧ru̧ ttä̧ju̧cua̧ pä'ö.

Currently Selected:

San Lucas 21: PIDNT86

Highlight

Copy