San Lucas 14

Jesús ya̧tȩrö̧ rittädö märichei ku̧nä̧rö̧rö̧ aditö icuinö huȩnȩ

1Koro mo̧ro̧ ttö̧ja̧ 'cuättächi'ö mo̧ro̧ Jesúsmä fariseos huotö ttu̧ru̧hua̧ ojusodera̧'a̧ 'chi̧nö̧do ucua pä'ö. Ja̧'hua̧nö̧ ja̧'a̧ korotö fariseos huotö dajahuächö to̧ttä̧ri̧nä̧cu̧do. 2Ju̧huȩnȩ ä'ca jo̧mȩ ki̧nö̧do ya̧tȩ rittädö märichei ku̧nä̧rö̧. 3Ja̧'hua̧nö̧ ja̧'a̧ Jesús jä'epö ä̧ju̧cui̧nö̧do hueähuä huȩnȩ huo̧juȩtä̧tö̧rö̧'i̧nä̧, fariseos huotörö'inä:

—Ttö̧ja̧ 'cuättächi'ö mo̧ro̧ na̧'ä̧chö̧rö̧ aditö tticua, ¿hueähua'a tä̧ji̧? ¿hueähuoca'a tä̧ji̧?

4Ja̧'hua̧nö̧ ja̧'a̧ jahuätö 'corunä ki̧nä̧tö̧do. Ja̧'hua̧nö̧ ja̧'a̧ na̧'ä̧chö̧rö̧ 'chu'ädö, aditö icu, hue'ö icuinödo. 5Ja̧'hua̧nö̧ ja̧'a̧ pä'inödo fariseos huotörö:

—Ucututtumä ya̧tȩ äji caballo, ja̧'hua̧nö̧ jo̧co̧mȩnä̧ äji päcäyä reju jacuä ma̧ä̧chö̧ttö̧mä̧, ¿reju jacuättö ȩmo̧cö̧ tä̧ji̧, ttö̧ja̧ 'cuättächi'ö mo̧ro̧ ja̧'a̧ttö̧?

6Ja̧'hua̧nö̧ ja̧'a̧nä̧ yoröiso ttädätö juiyönä ji̧nä̧u̧do.

Ttirecuarö ttȩma̧'a̧ o'icuotö

7Jesús korotö o'icuotömä korotöttö'inä abonänö adihuä̧cä̧nä̧ ttö̧'a̧'a̧ topö, pa̧'a̧nö̧ huȩnȩtö̧ jiähuina̧u̧do:

8—Ya̧tȩ irecuarö ö'cähua'a cuäcuähuä jȩtto̧mȩ oipomenämä, ucuo isomettö pojopömä cu̧'ä̧mä̧dä̧'. Ka̧ra̧ o̧'i̧cua̧ ucuttu'inä abonänö ucuo i̧sa̧ ichö'a̧nö̧ ja̧'a̧. 9Ja̧'hua̧nö̧ cu̧'ä̧mä̧dö̧ttö̧mä̧, ucuturu o'ipäjimä 'chä̧hui̧'ö̧ pä̧cua̧ ucuru: “Cu̧'o̧mȩ hue'i pide ö̧'ä̧mä̧da̧ pä'ö.” Ja'hua̧nö̧ ja̧'a̧ ucu dä'ä ttu'u kä̧nö̧, rö̧ji̧ päcuähuome cu̧'ä̧mä̧dä̧cua̧jä̧. 10Ja̧'hua̧nö̧ jȩttä̧'i̧nö̧ juäimä ja̧'hua̧nö̧ ottipomenämä, röjinä päcuähuome pä̧mä̧di̧. Ucuru o'ipäji päacu: “Cha̧hua̧ru̧hua̧, korotöttö'inä abonänö adihuä̧cä̧nä̧ pä̧mä̧di̧.” Ja̧'hua̧nö̧ huomenä, ucucu ttu̧cuȩ cuäcuähuodänä pȩjä̧tö̧'i̧nä̧ ttucuotäcuotö ucuru. 11Ya̧tȩ ucuo i̧sa̧ ö̧ja̧ pä'ömä, ucuo i̧sa̧ ko̧cö̧. Ja̧'hua̧ta̧nö̧ ya̧tȩ ucuo i̧sa̧ ö̧ja̧ pä'ocömä, ucuo i̧sa̧ ö̧jä̧cua̧, —pä'inödo Jesús.

12Ja̧'hua̧ta̧nö̧ Jesús pä'inödo ji̧nä̧ iso o'ipäjirö:

—Ji̧yȩnö̧ cu̧cuȩ ttucua pä'ö ocuhui'omenä, ucutä cuahuaruhuärö'inä, ucutä cu̧jä̧hua̧tö̧rö̧'i̧nä̧, ji̧nä̧ ji̧yȩtȩ cuahuaruhuärö'inä, ötahuiyä ruhuä järe ruhuotörö'inä ocuhui'ä'. Ja̧'hua̧nö̧ ja̧'a̧ jahuätö micuä päi'önä o̧tti̧pä̧cua̧jä̧. Ja̧'hua̧nö̧ cu̧ju̧nä̧rä̧cua̧jä̧ ocuhuipäji micuä. 13Ja̧'hua̧nö̧ jȩttä̧'i̧nö̧ juäimä, cuäcuähuä cuaditomenä, o'ähui usurä isotörö'inä, ttö̧jä̧pi̧yä̧ jui'ätörö'inä, kosu kosunu ka̧cuä̧tö̧rö̧'i̧nä̧, ä̧to̧cä̧tö̧rö̧'i̧nä̧. 14Ja̧'hua̧nö̧ eseu cu̧jä̧cua̧jä̧ jahuätömä ttimitä̧cuȩ juitta'attö. Ja̧'hua̧nö̧ cu̧ju̧nä̧rä̧cua̧jä̧ ocuhuipäji micuä adihuä isotö ttottächomettö.

Cuäcuähuä rö̧ȩnä̧ ji̧nö̧ huȩnȩ

15Ja̧u̧ ä̧ju̧cu̧, ya̧tȩ fariseos i̧sa̧ jitötäcu ttu̧cuȩ cuäcuähuodänä pö̧, pä'inödo Jesúsru:

—Eseunu ö̧jä̧cua̧ Dios ö̧jo̧mȩttö̧ u̧cuȩ cumä.

16Ja̧'hua̧ ja̧'a̧ Jesús pä'inödo:

—Ya̧tȩ cuäcuähuä rö̧ȩnä̧ aditinödo. Ja̧'hua̧ta̧nö̧ ottäja pä'ö hue'inödo recuätö ttö̧ja̧rö̧ chucu ttucua pä'ö. 17Ja̧'hua̧nö̧ ja̧'a̧ ttu̧cuȩ ttu̧cuä̧cuȩmä̧ jo̧mȩ päi'a'a, hue'inödo u̧mö̧huä̧ya̧rö̧ o'icuotörö jiähuäjiyarö pä'ö: “Täcö ichätucuido. O'ca juiyönä aditö ku̧nä̧hua̧'a̧do.” 18Ja̧'hua̧nö̧ ja̧'a̧nä̧ o'ca toi'önä: “Tichö juiyö'a̧nö̧ ja̧'a̧” pä'inätödo. Äcuomenä jäepäcu pä'inödo: “Chi̧rȩjä̧ jareönä chȩmä̧ja̧'a̧ topö chi̧'chä̧cua̧sä̧. Ja̧'hua̧nö̧ ja̧'a̧ttö̧ chichö juiyö'a̧nö̧ ja̧'a̧.” 19Ka̧ra̧ pä'inödo: “Pä̧cä̧yu̧ to̧mö̧rȩ ruhuärö ȩmä̧ji̧sä̧. Ka̧cuä̧mö̧ topö 'chö̧sä̧. Ja̧'hua̧nö̧ ja̧'a̧ttö̧ chichö juiyö'a̧nö̧ ja̧'a̧.” 20Ja̧'hua̧nö̧ ja̧'a̧ ka̧ra̧ pä'inödo: “Jareönä chirecuarö ȩmä̧ji̧sä̧. Ja̧'hua̧nö̧ ja̧'a̧ chichö juiyö'a̧nö̧ ja̧'a̧.” 21Täcö u̧mö̧huä̧ya̧ ppa̧'ä̧chö̧, ja̧u̧ o'ca juiyönä ji'ähuinödo u̧ru̧hua̧rö̧. Ja̧'hua̧nö̧ ja̧'a̧ u̧ru̧hua̧ ra̧huä̧ri̧pi̧nö̧do. Pä'inödo u̧mö̧huä̧ya̧rö̧: “Ötahuiyä mä̧ni̧yä̧ bäreunä'inä, ppo̧ö̧nä̧'i̧nä̧ täi. I'cächi pocu usurä isotörö'inä, ttö̧jä̧pö̧ jui'ätörö'inä, kosu kosunu ka̧cuä̧tö̧rö̧'i̧nä̧, ä̧to̧cä̧tö̧rö̧'i̧nä̧.” 22Ju̧huȩnȩ o'comenä, u̧mö̧huä̧ya̧ pä'inödo: “Chu̧ru̧hua̧, täcö jȩpä̧ji̧sä̧ huecuhuäji ta'anö. Ji̧nä̧ pä̧cuä̧huo̧mȩ ka̧'a̧. 23U̧ru̧hua̧ u̧mö̧huä̧ya̧rö̧ pä'inödo: “Täi mä̧ni̧yä̧ra̧'a̧'i̧nä̧, pättiyu mä̧ni̧yä̧ra̧'a̧'i̧nä̧. Juhua'attö cu̧'o̧cui̧'ä̧u̧ru̧ pä̧i̧cu̧nä̧ ji'ähui chojusode suhuädi'önä dodetta. 24Ucuturu pä'ösä, yoröiso jitö ä'coji o̧di̧pä̧jä̧u̧mä̧ cuocotö ttäcuotö chu̧cuȩttö̧mä̧.”

Jesús u̧huo̧juȩtä̧u̧ pätti'ö'a̧nö̧ huȩnȩ ji'ähuinödo

25Recuätö ttö̧ja̧ Jesúscu 'chi̧nä̧tö̧do. Ja̧'hua̧nö̧ ja̧'a̧ kärächi'ö päinä̧u̧do:

26—Ya̧tȩ ttöcu ichömä, jä'orö'inä, ja̧ju̧ru̧'i̧nä̧, esehuomettö'inä abonänö ȩsȩhuä̧cua̧ ttörö. Ja̧'hua̧ta̧nö̧ irecuarö'inä, i̧tti̧mö̧rö̧'i̧nä̧ esehuomettö'inä abonänö ȩsȩhuä̧cua̧ ttörö. Ja̧'hua̧ta̧nö̧ u̧bö̧o̧tö̧rö̧'i̧nä̧, ö̧jä̧hua̧tö̧rö̧'i̧nä̧ esehuomettö'inä abonänö ȩsȩhuä̧cua̧ ttörö. Ja̧'hua̧ta̧nö̧ chutä ö̧jö̧ttö̧ esehuomettö'inä abonänö ȩsȩhuä̧cua̧ ttörö. Ja̧'hua̧nö̧ jȩö̧ juiyöttömä, chu̧huo̧juȩtä̧cu̧ pä'i'ocö. 27Ya̧tȩ ttöcu cue'ächö, 'corupäi'a pä'ö ubara ttu juiyöttömä, ttö chu̧huo̧juȩtä̧cu̧ pä'i'ocö. 28Ucututtu ya̧tȩ isode ju'toju isode adita pä'ömä, ¿äcuomenämä pä̧mä̧dö̧ chojusode jo̧mȩ päi'önä cädäda pä'ö ku̧nä̧rö̧sä̧cö̧ pä'ö amöcuädocö tä̧ji̧? 29Amöcuädoca'a jȩö̧ttö̧mä̧, icui'quiyu ku̧ni̧pö̧'ca̧ cädi'öttömä, aditähuä topätömä ya̧ttä̧huȩ'a̧ja̧cu̧ ja̧u̧mä̧. 30Pättajacu: “Ja̧u̧mä̧ isode rö̧ode adita päina'anä, cä'ädocö pi̧nö̧.” 31Ja̧'hua̧ta̧nö̧ ya̧tȩ ru̧hua̧ ka̧ra̧ ru̧hua̧cu̧ örohuähua pä'ömä, chutä diez mil jo̧mȩnä̧tä̧ su̧ro̧da̧u̧ru̧ u̧ju̧nä̧ra̧'a̧, ka̧ra̧ a̧bo̧i̧ya̧mä̧ veinte mil jo̧mȩnä̧ su̧ro̧da̧u̧ru̧ u̧ju̧nä̧ra̧'a̧, ¿“Iso juo̧dȩpä̧cua̧sä̧di̧” ä'canä pä̧mä̧dö̧ amöcuädocö tä̧ji̧? 32Iso juoepö'a̧nö̧ jö̧ juiyöttömä, a̧bo̧i̧ya̧ ji̧nä̧ otonä icha'a ä̧ju̧cu̧, hue'aji jiäcuähuä isotörö järönä ttö̧ja̧cua̧ pä'ö jittähuarö pä'ö. 33Ja̧'hua̧ta̧nö̧ ucututtu ya̧tȩ u̧ju̧nä̧rö̧ o'ca juiyönä jaroi'ö juiyöttömä, chu̧huo̧juȩtä̧cu̧ pä'i'ocö.

Jesús 'cäruäbö ö̧nö̧ä̧ juiyö huȩnȩ ji'ähuinödo

34“'Cäruäbö adiudo. Ja̧'hua̧nö̧ ja̧'a̧nä̧ 'cäruäbö ö̧nö̧ä̧ juiyöttömä, ¿tta̧'a̧nö̧ jä̧cua̧'a̧jä̧ttö̧? 35'Cäruäbö ö̧nö̧ä̧ juiyomenä, rȩjȩ i̧sa̧ppȩcu̧ 'cäruäböcu huihuatö jȩä̧cuä̧huä̧nä̧ yoröiso surojö. Do'opötä do'opö icuähuä. Ä̧ju̧cuä̧tö̧mä̧, adiu ä̧ju̧cuä̧tu̧cui̧, —pä'inödo Jesús.

Currently Selected:

San Lucas 14: PIDNT86

Highlight

Copy