San Mateo 18

¿Díjä̧ttü̧ ji̧nä̧so ukuo i̧sa̧mä̧?

(Mc 9.33-37; Lc 9.46-48)

1Jua̧u̧nu̧tä̧ hora-nä̧ Jesú ü̧jo̧mȩku̧ ichi'ü u̧wo̧juȩtä̧u̧mä̧ jä'epü ttä̧ju̧kui̧nä̧ku̧:

—¿Díjä̧ttü̧ mo̧ro̧jä̧ ru̧wa̧ weomȩttü̧ ji̧nä̧so ukuo i̧sa̧mä̧?

2Jesú-mä̧ ji̧'ki̧cha̧wa̧rü̧ wopo'ü ttü̧'kä̧tȩ jo̧mȩ kku̧no̧po̧'ü̧, 3pä'inü̧:

—Isopäi'ünä̧ pädäu̧jä̧ ppo̧'ä̧tü̧ jä̧'i̧nü̧'a̧nü̧ kui'ärowächätuku juiyüttümä̧, mo̧ro̧jä̧ ru̧wa̧ weomȩmä̧ do'ächokotü kuäkuotüjä̧. 4Ja̧'wa̧nü̧ ja̧'a̧ttü̧, pide ji̧'ki̧cha̧wa̧ jü̧ta̧'a̧nü̧ a̧mü̧nä̧ pa̧ja̧tü̧ ukuo teäkuäwuö juiyüttümä̧ mo̧ro̧jä̧ ru̧wa̧ weomȩttü̧mä̧ ukuo kku̧nä̧rü̧ ja̧'a̧. 5Jua̧u̧ ya̧tȩ ji̧'ki̧cha̧wa̧rü̧ ttü chi̧mi̧nä̧ do'ädürümä̧, ttürü do'ädü.

Surojünä̧ ma̧'ä̧chü̧rü̧ ra̧wä̧pi̧ja̧'a̧

(Mc 9.42-48; Lc 17.1-2)

6Ja̧'wa̧nü̧ ja̧'a̧nä̧, pitü ppo̧'ä̧tü̧ttü̧ ttürü esetätürü, ya̧tȩrü̧ ma̧ä̧chü̧nä̧ jȩpü̧rü̧mä̧, molino pättäyu i̧nä̧yunä̧ u̧ru̧pä̧'kȩnä̧ ti̧'ä̧dü̧ rü̧ä̧ duboranä̧ täkuomȩku̧, ya'uteku do'opü ttiku'anü̧tä̧ wotü. 7¡Pi̧jä̧ jäwämä̧, suroja'a pi̧jä̧ ttü̧ja̧rü̧ surojüku mattä̧chä̧'chü̧nä̧ jȩo̧mȩttü̧! iweye 'kuäopa pä'ü ja̧'a̧ ja̧'wa̧nü̧ ja̧'a̧nä̧ ¡juiyo ra̧wä̧pi̧ja̧'a̧ ya̧tȩ surojüku ma̧ttä̧chü̧nä̧ jȩpü̧rü̧mä̧!

8Ja̧'wa̧nü̧ ja̧'a̧ttü̧ ku̧mü̧'i̧nä̧, ku̧jä̧pü̧'i̧nä̧ surojünä̧ ma̧kuä̧chü̧nä̧ jȩü̧ttü̧mä̧ 'kui'opü iku, ukuttümä̧ do'opü ikui; adiu'anü̧ ja̧'a̧ ku̧mü̧pi̧yä̧'i̧nä̧, kui̧jä̧pi̧yä̧'i̧nä̧ juikua'anä̧ ä̧'kua̧rä̧kuä̧wä̧ra̧'a̧ dokuächüttümä̧ ja̧'wa̧nü̧ jo̧ka̧'a̧ jü̧ttü̧mä̧ ku̧mü̧ pi̧yä̧'i̧nä̧, kui̧jä̧pi̧yä̧'i̧nä̧ jättäjiku okurä na̧wi̧pokorära̧'a̧ iku ikuäwä̧kua̧jä̧. 9Ja̧'wa̧ta̧nü̧ kui'äre'i̧nä̧ surojüku ma̧kuä̧chü̧nä̧ jȩü̧ttü̧mä̧, baroku iku ukuttümä̧ do'opü ikui; kui'äre jiretekutä ja̧'a̧nä̧, a̧'kua̧rä̧kuä̧wä̧ra̧'a̧ dokuächäkua'anü̧ ja̧'a̧ ja̧'wa̧nü̧ jo̧ka̧'a̧ jü̧ttü̧mä̧, kui'äre torerekue'ütä okurä na̧wi̧pokorära̧'a̧ do'opü i̧kuä̧wä̧kua̧jä̧.

Oweja re'tewinünä̧ wȩnȩtü̧ ji'äwinü̧

(Lc 15.3-7)

10Pitü ppo̧'ä̧tü̧ttü̧ ya̧tȩrü̧'i̧nä̧ kuju'kätukuoka'amä̧ jȩ'kuä̧'chä̧tu̧kuä̧; juätümä̧ mo̧ro̧jä̧ra̧'a̧ttü̧ A̧gȩrȩ-mä̧ tta̧'a̧rä̧tü̧ 'kuäopünä̧tä̧. 11[Ubo I̧tti̧mä̧ suronä̧ jȩpü̧ to'e'ächinä̧tü̧rü̧ ȩmü̧ ichinü̧.]

12¿Tta̧'a̧nü̧ kuamükuädätukua'ajä̧ttü̧? Ya̧tȩ ttü̧ja̧sa̧ ciȩnü̧ wotü oweja-tü̧rü̧ u̧ju̧nä̧ra̧'a̧, juätüttü ya̧tȩ re'tewächü toepiyäkumä̧, ¿Noventa y nueve-nü wotürümä̧ mü̧ä̧'kanä̧ kku̧ni̧pü̧, re'tewächäji oweja-rü usupo'ümä̧ i̧'cho̧ka̧'a̧ tä̧jí̧? 13Isopäi'ünä̧ pädäu̧jä̧ ja̧'wa̧nü̧ usú i̧'chä̧ja̧'a̧ jua̧u̧ oweja-rü ü̧'o̧kui̧'omȩnä̧mä̧, jitü noventa y nueve-nü wotü re'tewächokotü päjätüttü'i̧nä̧ abonä̧nü̧ eseu jua̧u̧ ü̧'o̧kui̧'ä̧ku̧ oweja-rümä̧. 14Ja̧'wa̧nü̧ jü̧ta̧'a̧nü̧, Kuä'otuku mo̧ro̧jä̧nä̧ kkü̧mä̧ pitü ppo̧'ä̧tü̧ ja̧'a̧nä̧ ya̧tȩrü̧'i̧nä̧ toe'ächa pä'okü.

Ta̧wa̧ru̧wa̧ ti̧jä̧wa̧rü̧ esekuäkuäwä wȩnȩ

(Lc 17.3)

15Kua̧wa̧ru̧wa̧ kui̧jä̧wa̧ ukuru suronä̧ jȩü̧ttü̧mä̧, kkatärütä o'ipächü ro̧'ȩpü̧nü̧ ukuokuirü u̧wo̧jui̧pü̧nä̧; u̧wo̧jui̧pü̧ttü̧mä̧, kua̧wa̧ru̧wa̧rü̧ esekujä̧. 16Ja̧'wa̧nü̧ ja̧'a̧nä̧, esetü juiyüttümä̧, kka̧ra̧rü̧ o'ipächü, ta̧ju̧ru̧ jü̧ttü̧'i̧nä̧, wä̧mȩtukuä jü̧ttü̧'i̧nä̧ juätürü o'ipächü ukuokuirü, kukuokumä̧ juätü ttä̧ju̧kuä̧ra̧'a̧nä̧ jä̧kua̧'a̧nü̧. 17Ja̧'wa̧nü̧ jȩ'kuo̧mȩnä̧'i̧nä̧ esetü juiyüttümä̧, igresia-rü ji'äwi; ji̧nä̧ juätürü'i̧nä̧ esetü juiyüttümä̧ Dio-rü esetokotü jü̧nä̧tä̧, Roma impuesto pättü ka̧ka̧kuä̧ isotü jä̧'i̧jü̧'a̧nü̧tä̧ topätukuirü.

18Isopäi'ünä̧ pädäu̧jä̧ pi̧jä̧nä̧ttü̧ ku̧nü̧'kätukumä̧ mo̧ro̧jä̧ra̧'a̧ttü̧'i̧nä̧ nü̧'kächi'äkua'a; ja̧'wa̧ta̧nü̧ pi̧jä̧nä̧ttü̧ kuejädätükumä̧ mo̧ro̧jä̧ttü̧'i̧nä̧ ejächi'äkua'a.

19Pä'äjita'anü̧ pädäu̧jä̧, pi̧jä̧nä̧ttü̧ ukututtü ta̧ju̧ kkorojuei Dio-rü jäkuepätukua pä'ü kuamükuädätukuttümä̧, Chä'o mo̧ro̧jä̧ ru̧wa̧mä̧ i̧yä̧kua̧. 20Isopäi'ünä̧ ta̧ju̧tä̧ ja̧ pä'ü'i̧nä̧, wä̧mȩtukuätä ja̧ pä'ü'i̧nä̧ ttü chi̧mi̧nä̧ ka̧ka̧ku̧ ttü̧'ȩjü̧ttü̧mä̧, juätütäku ttü̧'kä̧tȩnä̧ kkü̧sä̧.

21Ja̧'wa̧nü̧ ja̧'a̧ Peduru-mä̧, Jesú-ru jä'epü ä̧ju̧kui̧nü̧:

—Chu̧ru̧wa̧, ¿cha̧wa̧ru̧wa̧ chi̧jä̧wa̧ ttürü suronä̧ jȩü̧ttü̧mä̧, tta̧'a̧nü̧ rü̧ȩnä̧ jo̧mȩnä̧ chesekuäkua'ajättü̧, jua̧u̧ru̧mä̧? ¿Kko̧ro̧mü̧ttü̧nü̧ todäre jo̧mȩnä̧tä̧?

22Jesú-mä̧ ädätinä̧ku̧:

—Suro, sietenü̧ jo̧mȩnä̧tä̧mä̧ pädokokujä̧, jua'a yabo, jua̧u̧ sietenü̧ jä̧ji̧mä̧, setenta-nü̧ jo̧mȩnä̧ kuesekua pädäkujä̧.

Esekua pä'okü pinü̧nä̧ wȩnȩtü̧ ji'äwinü̧

23Ja̧'wa̧nü̧ ja̧'a̧ttü̧ mo̧ro̧jä̧ ru̧wa̧ weomȩmä̧, ya̧tȩ ru̧wa̧ umüwäyotürü ttadita pä'ü we'inü̧'ka̧ jäepinü̧'a̧nü̧ ja̧'a̧. 24Kkä̧mä̧dü̧ jäepomȩnä̧, ya̧tȩ diez mil jo̧mȩnä̧ pärätä mi̧ppotürü i'kächipinä̧tü̧. 25Ja̧'wa̧nü̧ ja̧'a̧nä̧, i̧mi̧täwajü juiyiyäku ru̧wa̧mä̧, churutä'i̧nä̧, irekuarü'i̧nä̧, i̧tti̧mü̧rü̧'i̧nä̧, u̧ju̧nä̧rü̧mä̧ o'kajuiyünä̧tä̧ mikuä pä'ü iyä'chü ttikua pä'ü weini̧yä̧ku̧, i̧mi̧ppotü mikuäwächa pä'ümä̧. 26Ja̧'wa̧nü̧ ja̧'a̧nä̧, jua̧u̧ mippotümä̧, ru̧wa̧rü̧ ä'ka jo̧mȩ iwe'kiyunä̧ kkä̧mä̧dü̧ ajuäkuäu pä'inü̧: Ji̧nä̧ yabonä̧nü̧ tta̧'a̧ri̧pi̧ttü̧, jua'akumä̧ chi̧mi̧tä̧wä̧kua̧jä̧, jü̧nä̧. 27Ja̧'wa̧nü̧ ajuäkuäwäku, jua̧u̧ ru̧wa̧mä̧, rȩrü̧jü̧nü̧ topü i̧mi̧ppotäjimä̧, o'kajuiyünä̧ i̧mi̧ppotü juiyünä̧tä̧ jȩpü̧ ikuinä̧ku̧.

28Ja̧'wa̧nü̧ jä̧ji̧ o'ka'a, jua̧u̧mä̧ juorü räopächomȩnä̧ a̧wa̧ru̧wa̧rü̧ po̧kui̧pi̧nü̧, pärätämä̧ ciȩnü̧ jo̧mȩnä̧ mi̧ppotürü; i̧mi̧ppotäku u̧ru̧pä̧'kȩnä̧ 'chu'ädi'ünü̧ pä'inü̧: ¡Kuimi̧ppotümä̧ mitäu ikuittü!, jü̧nä̧. 29Ja̧'wa̧nü̧ jȩä̧ku̧, chutä ä'ka jo̧mȩ iwe'kiyunä̧ ma̧'ä̧mü̧ ajuäkuäunü̧ päinä̧ku̧: Ji̧nä̧ yabonä̧nü̧ tta̧'a̧ri̧pi̧ttü̧ jua'akumä̧ o'kajuiyünä̧ chi̧mi̧tä̧kua̧jä̧, jü̧nä̧. 30Ja̧'wa̧nü̧ ajuäkuäwa'anä̧, jarodi'ü kärenära̧'a̧ rütü ttikunä̧ weinä̧ku̧, i̧mi̧ppotü i̧mi̧täwomȩbü päi'ünä̧. 31Ja̧'wa̧nü̧ jȩi̧yä̧u̧, chutäku aditä'ijätümä̧, ta̧'kua̧tta̧nü̧ jä̧u̧, o'kajuiyünä̧ 'kuäopäjimä̧ ttu̧ru̧wa̧rü̧ ji'äu 'chi̧nä̧tü̧. 32Ja̧'wa̧nü̧ jittäwäku, u̧ru̧wa̧mä̧ ottopo'äjarü pä'ü we'äji̧'ka̧ päinä̧ku̧: ¡Surojütä jȩä̧kuä̧wä̧ i̧sa̧jä̧! kuajuäkuäwäku ukurumä̧, kuimippotü jo̧mȩnü̧ jȩpü̧ chikuinä̧ku̧jä̧. 33Uku'i̧nä̧ rȩrü̧jü̧nü̧ to'kua pä'ü jä̧ja̧'a̧ chuku kuaditä'ijäkurumä̧, ttü'i̧nä̧ ukuru rȩrü̧jü̧ tochinüta̧'a̧nü̧. 34Ja̧'wa̧nü̧ ji̧yä̧ku̧ u̧ru̧wa̧mä̧, rü̧ȩnä̧ ra̧wä̧ri̧pü̧ o'kajuiyünä̧ i̧mi̧ppotü i̧mi̧täwomȩbü päi'ünä̧ kärenä̧ ttütünä̧ weinä̧ku̧.

35Jesú-mä̧ jua'a yabonü̧ pä'inü̧:

—Ja̧'wa̧nü̧ ji̧nü̧ta'anü̧ Chä'o mo̧ro̧jä̧nä̧ kkü̧mä̧ jȩä̧kuä̧u̧jä̧, ukutu'i̧nä̧ kuawaruwä kui̧jä̧wa̧tü̧rü̧ kua̧mi̧'iso'kitukunä̧ jo̧mȩnü̧ eseku kuikuätuku juiyüttümä̧.

Currently Selected:

San Mateo 18: PNT13

Highlight

Copy