San Mateo 17

Jesú ü'ärowächi'inü̧ wȩnȩ

(Mc 9.2-13; Lc 9.28-36)

1Jesú-mä̧ kko̧ro̧mü̧ttü̧nü̧ ya'ute mo̧ro̧ o'ka'a, Peduru-rü'i̧nä̧, Sa̧ti̧a̧ku̧rü̧'i̧nä̧ ja̧'wa̧ta̧nü̧ i̧jä̧wa̧ Ju̧a̧-rü̧'i̧nä̧ mü̧ä̧'ka ju'toju jä'kara̧'a̧ i̧mi̧ku̧nä̧ o'ipächü 'chi̧nü̧. 2Jua'attümä̧, juätü ttä'ka jo̧mȩttü̧ Jesú-mä̧ pärowächi'inü̧, i'ämä̧ kkä̧wa̧ jä̧'i̧nü̧'a̧nü̧ kkä̧dȩpi̧na̧'a̧ ja̧'wa̧ta̧nü̧ ü̧'ka̧tä̧wä̧ta̧mä̧ tei'ina̧'a̧ tȩya̧u̧ jä̧'i̧nü̧'a̧nü̧tä̧. 3Ja̧'wa̧nü̧ päi'omȩnä̧, Elía'i̧nä̧, Moisé'i̧nä̧ rättoa'attü̧ Jesú-ku ukuoku kka̧kui̧nä̧tü̧. 4Ja̧'wa̧nü̧ jä̧ji̧ o'ka'a Peduru-mä̧ Jesú-ru pä'inü̧:

—Chu̧ru̧wa̧, ¡pȩnȩ́ tü̧jü̧ttü̧tä̧ adiu'anü̧ ja̧'a̧! odewiyä ppo̧ü̧ wäbodekuä chadita pä'üsä: yodetemä̧ uku ku̧jä̧kuode, kkorodemä̧ Moisé ü̧jä̧kuode, kkorodetä Elía ü̧jä̧kuode jü̧nä̧ ja̧'wa̧nü̧ ja̧'a̧nä̧ uku wekuttütä.

5Peduru-mä̧ ji̧nä̧ ukuoku ü̧ja̧'a̧nä̧, ajiya isoppa kkȩdȩpoppa juätü ttu̧wä̧mȩ jo̧mȩ mȩyȩwi̧a̧'a̧ttü̧, juoppattü ya̧tȩ i̧wȩnȩ rȩmi̧pi̧na̧'a̧: «Pidemä̧ ttü chi̧tti̧ rü̧ȩnä̧ eseu repedäku: Jua̧u̧ru̧mä̧ ä̧ju̧kuä̧tu̧kui̧», jü̧nä̧.

6Jua̧u̧ ä̧ju̧ku̧, u̧wo̧juȩtä̧u̧mä̧ rü̧ȩnä̧ ye'äwipü rȩjȩ ma̧'ä̧mi̧nä̧tü̧. 7Ja̧'wa̧nü̧ jȩtti̧yä̧ku̧ Jesú-mä̧ juätü ttü̧'ȩjo̧mȩku̧ 'chä̧wi̧'ü̧, mȩ'ü̧nü̧ päinä̧u̧:

—Yekuekuätukuä; Ä̧rä̧mi̧'ä̧tu̧kui̧.

8Ja̧'wa̧nü̧ pä̧u̧, ttu kä'epü tottomȩnä̧, kkorotü päjätümä̧ toa'a, Jesú-tätä ü̧ja̧'a̧ topinä̧tü̧.

9Ja̧'wa̧nü̧ jä̧ja̧'a̧ mü̧ä̧'kattü tti̧mȩyȩwo̧mȩnä̧, Jesú-mä̧ ro̧'ȩpü̧nü̧ päinä̧u̧:

—I̧jȩkua̧'a̧ to'kuäjätukumä ya̧tȩrü̧'i̧nä̧ jikuäwätukuä, ubo I̧tti̧ wa'arettü ttoächomȩbü päi'ünä̧.

10Ja̧'wa̧nü̧ pä̧i̧yä̧u̧ u̧wo̧juȩtä̧u̧mä̧ jä'epü ttä̧ju̧kui̧nä̧ku̧:

—¿Tta̧'a̧nü̧ pä'ü weäwä wȩnȩ wo̧juȩtä̧tü̧mä̧, Elía-mä̧ ä̧kuo̧mȩnä̧ i̧chä̧kua̧do pättä'ijä̧ttü̧?

11Jättepäku, Jesú-mä̧ ädätinä̧u̧:

—Isopäi'ünä̧tä̧, Elía-mä̧ ä̧kuo̧mȩnä̧ i̧chä̧kua̧ o'kajuiyünä̧ pä'äji jä̧ji̧ta̧'a̧nü̧ jo̧mȩnü̧ aditü u̧ju̧na̧ pä'ü. 12Ja̧'wa̧nü̧ ja̧'a̧nä̧, ukuturu pä'üsä, Elía-mä̧ täkü ichinü̧; ichina̧'a̧nä̧ ttesetajü jueimä̧ pä̧wä̧rü̧ja̧'a̧ku̧tä̧ jȩtti̧nä̧ku̧. Ja̧'wa̧nü̧ ji̧nü̧ta'anü̧, ubo I̧tti̧mä̧ juätütä ttu̧mü̧nä̧ usurä ȩmä̧wä̧kua̧. 13Ja̧'wa̧nü̧ ja̧'a̧ u̧wo̧juȩtä̧u̧mä̧, bautizo jȩä̧kuä̧wä̧ i̧sa̧ Ju̧a̧ ütü'kü ukuoku pä'ü wo̧jui̧'i̧nä̧tü̧.

Jesú-mä̧, mü̧ä̧ya̧rü̧ epíritu su̧ro̧pa̧ ü̧jä̧ku̧ru̧ aditü ikuinü̧

(Mc 9.14-29; Lc 9.37-43)

14Ttü̧ja̧ ttü̧ja̧kuo̧mȩku̧ tti̧'chi̧'o̧mȩnä̧, ya̧tȩ Jesú ä'ka jo̧mȩku̧ ichi'ü iwe'kiyunä̧ pä̧mä̧dü̧ pä'inü̧:

15—Chu̧ru̧wa̧, chi̧tti̧rü̧ re kkä̧wi̧yi̧ttü̧, jue'ipä̧rü̧ na̧'ä̧chü̧ usurä ȩmä̧wi̧yä̧ku̧sä̧; kko̧ro̧nü̧ pünä̧mä̧ okuränä̧'i̧nä̧, ajenä̧'i̧nä̧ ma̧ä̧chä̧'chä̧'i̧jiyä̧ku̧sä̧. 16Ku̧wo̧juȩtä̧u̧rü aditü ttikuiyattü pä'ü chi'chächaja'anä̧, jȩttü̧juiyünä̧ wäjätü,

17Päku, Jesú-mä̧ ädätinü̧:

—¡Isoo ukutumä̧ esetokotü, suropätü ttü̧ja̧jä̧! ¿Ti̧yȩnü̧bü päi'ünä̧ ukutukumä̧ chü̧jä̧kua̧'a̧jä̧ttü̧? ¿Ti̧yȩnü̧bütä kuesetätukuoka'amä̧ cha̧mi̧'kidächi'äkua'ajä̧ttü̧? Poku i'chächirü.

18Ja̧'wa̧nü̧ ja̧'a̧, Jesú-mä̧ ujuruku weäku epíritu su̧ro̧pa̧mä̧ jua̧u̧ mü̧ä̧ya̧ttü̧ rä'opächinü̧, ja̧'wa̧nü̧ jo̧mȩnä̧ ji̧yȩtä̧ hora-nä̧tä̧ na̧wä̧chä̧ji̧ttü̧mä̧ pi̧'i̧nü̧.

19Jua̧u̧nü̧ o'ka'a Jesú-mä̧ kkatä päi'omȩttü̧ u̧wo̧juȩtä̧u̧mä̧ jä'epü ttä̧ju̧kui̧nä̧ku̧:

—¿Tta̧'a̧nü̧ pä'ü, ujutumä̧ epíritu su̧ro̧pa̧rü̧mä̧ rä'epü tiku juiyünä̧ jä̧ja̧'a̧kuä̧ttü̧?

20Pättäku Jesú-mä̧ ädätinä̧u̧:

—Jua'amä̧ kua̧'kua̧ ku̧wȩnä̧rä̧tu̧ku̧ juikuätukua'attü. Isopäi'ünä̧tä̧ pä'üsä ukuturu, mostaza u̧wä̧ju̧ isäte a̧'u̧kuä̧'i̧jü̧ta̧'a̧nü̧, a̧'u̧ku̧nä̧tä̧ kua̧'kua̧ ku̧wȩnä̧rä̧tu̧ku̧ttü̧'i̧nä̧, ji'kaja mü̧ä̧'ka juorümä̧ tü'ipächi päkuätukuttümä̧ tüipächäkua'a. Ja̧'wa̧nü̧ ja̧'a̧ttü̧ jȩttü̧ juiyünä̧ weyekumä̧ juiya'a. 21Ja̧'wa̧nü̧ ja̧'a̧nä̧ epíritu su̧ro̧pa̧mä̧, suró ttu̧kuȩ a̧do̧chü̧ Dio-rü ukuokuäkuäwänä̧tä̧ rä'opächü.

Jesú to̧ȩ'ä̧chä̧kuȩmä̧ todärenä̧ päi'ünä̧ ji'äwinü̧

(Mc 9.30-32; Lc 9.43-45)

22Galirea rȩjȩnä̧, yo̧mȩtȩnä̧ tti̧'cho̧mȩnä̧ Jesú-mä̧ päinä̧u̧:

—Ttümä̧ kuä'ü ttikuattü pä'ü iyü tti̧kuä̧kua̧sä̧, 23ja̧'wa̧nü̧ kuä'ü ttikua'anä̧, wäbodäkuä mo̧ro̧ päi'omȩnä̧ wa'arettü tto̧dä̧chä̧kua̧sä̧.

Ja̧'wa̧nü̧ jiäwa'a ä̧ju̧ku̧ rü̧ȩnä̧ tta̧'kua̧ tta̧'ȩkui̧pi̧nä̧tü̧.

Dio-rü ukuokuäkuäwodenä̧ pärätä ttiyinü̧

24Jesú-mä̧ u̧wo̧juȩtä̧u̧ku Cafarnaúm ütawiyära̧'a̧ i̧'chi̧'ä̧ja̧'a̧, Dio-rü ukuokuäkuäwode jäwä pärätä ka̧ka̧tä̧'i̧jä̧tü̧, Peduru-rü 'chä̧wi̧'ü̧ jä'epinä̧tü̧:

—¿Ku̧ru̧wa̧mä̧ Dio-rü ukuokuäkuäwode jäwä pärätämä̧ iyokü?

25Pättäku Peduru-mä̧, «A̧» jua'akumä̧, mitü pä'ü ädätinä̧u̧.

Jua̧u̧nü̧ o'ka'a, Peduru-mä̧ isodenä̧ doächi'a'a, ji̧nä̧ päüjuiyäi, Jesú-mä̧ päinä̧ku̧:

—¿Toku päkuättü Simón? ¿pi̧jä̧ ruwotümä̧, titürütä impuesto pättümä̧ jä'epätüjä̧ttü̧, tti̧tti̧mü̧rü̧ tä̧jí̧, tti̧tti̧mü̧ wokotürü tä̧jí̧?

26Peduru-mä̧, ädätinä̧ku̧:

—Tti̧tti̧mü̧ wokotürütä.

Päomȩnä̧ Jesú-mä̧, päinä̧ku̧:

—Ja̧'wa̧nü̧tä̧ ja̧'a̧, iweye tti̧tti̧mü̧rü̧mä̧ jä'epokotü. 27Ja̧'wa̧nü̧ ja̧'a̧nä̧, ttü̧ra̧wä̧rü̧ juiyäkua'anü̧ rü̧ä̧ duborara̧'a̧ täi, kua̧juä̧ isa'che kuikua, kuikuomȩnä̧ ä̧kuo̧mȩnä̧ rü̧'i̧pü̧rü̧mä̧ ä ba'epü to'kuajä̧, to'kuomȩnä̧ pä̧rä̧tä̧bi̧ ȩkä̧kua̧'a̧; juä̧bi̧nä̧mä̧ kui̧mi̧tajä̧ ttü jäwä'i̧nä̧ uku jäwä'i̧nä̧, jü̧nä̧.

Currently Selected:

San Mateo 17: PNT13

Highlight

Copy