लुका 20
20
येसुकर अधिकारबारे परस्न
(मति २१:२३-२७; मर्कुस ११:२७-३३)
1एक दिन येसुन मन्दिरनाइ मान्छेल्काइ सिछ्या सिकाइतिन सुसमचार पर्चार गरिधर्ल रइल। होइ बेला मुख्य पुजारिलत, धर्म-गुरुलत र मुख्य अगुवालत येसु हक्लनाइ आइला, 2र होल्किन येसुलाइ सोद्ला, “हाइलाइ बल, तुइ कछ्यान अधिकार पाइके ह्य काम गर्छस? तुइलाइ ह्य अधिकार दिनार कुन हो?”
3येसुन होल्काइ बल्-ल्याक, “मुइ पुनि तोराल्काइ एउटो कुरो सोद्छु, मुइलाइ जबाफ देओ। 4युहन्नान बप्तिस्मा दिनार अधिकार कछ्यान पाइले? परमेसोरबान हो कि मानुसबान?”
5ह्य सुनिके होलत आफि-आफिनाइ इत्तिके बाजइ थाल्ला, “अब हाइ केति बाज्नार? परमेसोरबान बाजु भने ‘तोराल्किन युहन्नालाइ किनारइ बिस्वास बइगर्लो?’ बाजिके होइनिन सोद्छइ। 6मानुसबान बाजु भने सेब्बाइ मान्छेल्किन हाइलाइ पाथरिन हिर्काइनार आछत किनारइभने युहन्ना अगमबक्ता हो बाजिके होल्किन पक्का बिस्वास गर्छत।” 7होइ हुदान होल्किन बाज्ला, “हाइलाइ था बइने, ह्व अधिकार कछ्यान पाइले।”
8अनि येसुन होल्काइ बल्-ल्याक, “उसोभए मुइ कुनकर अधिकारिन ह्य काम गर्छु, मुइ पुनि तोराल्काइ बइबलु।”
किसानकर उखान
(मति २१:३३-४६; मर्कुस १२:१-१२)
9येसुन मान्छेल्काइ एउटो उखान बल्-ल्याक, “एउटो मानुसिन अङ्गुर लाइके अद्यानाइ कामाइ किसानकाइ छाड्दिकइ धेरइ समयकर लागि आफि चाइ पर्देस जाइले।#यस ५:१ 10अङ्गुर टुन्नार बेला हक्ल पछि मालिकिन नोकरलाइ आफ्ने भाग अङ्गुर लेइ पाठाल्ते। तर अद्या कामाइनाराइ किसानकिन होलाइ हिर्काइके सुदे हात पाठाइ दिल्याक। 11मालिकिन फेरि अर्को नोकरलाइ पाठाल्ते, तर होलाइ पुनि होल्किन ठाटाइकइ बिजेत गरिके सुदे हात पाठाइ दिल्याक। 12फेरि मालिकिन तेस्रो नोकरलाइ पुनि पाठाल्ते, तर होलाइ पुनि होल्किन घाइते बानाइके अङ्गुर बारिबान निकालिदिल्याक। 13ह्य हकिसक्ल पछि अङ्गुर बारिकर मालिकिन बाज्ले, ‘अब मुइ केति गरुँ? अब मुइ आफ्ने प्यारो बेटाकलाइ पाठाइछु। ह्यलाइ ता होल्किन पक्कइ आदर गर्छत हक्ति।’ 14तर होल्किन मालिककर बेटाकलाइ आइतिन गर्ल देखिके आपसनाइ इत्तिके सल्ला गर्ला, ‘ह्य ता बारि धनिकर हकवाला हो। अब हाइ ह्यलाइ मारु अनि होक्र सम्पति हाम्रो हक्नारआछि।’ 15अनि होल्किन मालिककर बेटाकलाइ अङ्गुर बारिबान बाइर लाकाइके मार्ला।”
अनि येसुन सोद्ल्याक, “अब अङ्गुर बारिकर मालिकिन होल्काइ केति गर्स्याक ता?”
16“अब मालिक आफि आइके दुस्ट किसानकाइ मार्नारआछ र आफ्ने बारि आनेल्काइ कामाइ दिनारआछ।”
ह्य सुनिके मान्छेल्किन बाज्ला, “इन्खा ता कइले जुन हक्दिक।”
17अनि येसुन होल्काइ हेर्तिन बल्-ल्याक, “उसोभए धर्मसास्तरनाइ लेख्ल ह्य कुरोन बाजइ हेर्ल केति हो ते?
‘घर बानाइनाराइ कर्मिकिन काम बइलागि बाजिके फ्याक्ल पाथर ने,
घर बानाइतिन मुख्य सुरे पाथर हकल्ते।’#भजन ११८:२२
18ह्व पाथर उप्रान खस्नार सेब्बे चक्नाचुर हक्नारआछि, अनि जुन्टो पाथर उप्रान ह्व पाथर खस्छि ह्व धुलोपिठो हक्छि।”
कर तिर्नार बारेनाइ परस्न
(मति २२:१५-२२; मर्कुस १२:१३-१७)
19धर्म-गुरुल्किन र मुख्य पुजारिल्किन ह्य कुरो हाम्रे बिरुद्दनाइ बाज्ल हो बाजिके बुज्ला र येसुलाइ पक्रइ आट्ला तर होलत मान्छेल्कोसिन डाराइतेला। 20होइ हुदान होल्किन येसुलाइ सुटुक्क आठाइके बडा-हाकिम र सासककर हातनाइ सुम्पइ चाइतेला। केइ मान्छेल्काइ धर्माति बनि टोपलिकइ येसुन बाज्ल कुरोनाइ होलाइ फसाइकर लागि पइसा दिके पाठाइल्याक। 21होल्किन येसुलाइ सोद्ला, “गुरु, हाइलाइ था आछ, कि तुइ ठिक कुरो बाज्छस, ठिक सिकाइछस, कुनुल्को पछ्यपात बइगरस र परमेसोरकर बाट साँच्चिसिन देखाइछस। 22होइ हुदान हाइनिन कइसरलाइ कर तिरइ ठिक आछ, कि बइने?”
23येसुन होल्को छलि बिचार बुजिकइ होल्काइ बल्-ल्याक, 24“मुइलाइ एउटो सिक्का देखाओ। हेइनाइ कुनकर नाउँ र छाप आछि?”
होल्किन बाज्ला, “कइसरकर।”
25येसुन होल्काइ बल्-ल्याक, “होइ हुदान जे कइसरकर हो ह्व कइसरलाइ देओ र जे परमेसोरकर हो ह्व परमेसोरलाइ देओ।”
26होल्किन मान्छेल्को अगाडि येसुलाइ केइ कुरोनाइ फसाइ बइसक्ला र येसुन दिल जबाफनाइ अचम्म मान्तिन चुपचाप बस्ला।
पुनरुत्थान र ब्याहा
(मति २२:२३-३३; मर्कुस १२:१८-२७)
27ह्व पछि केइ सदुकिलत येसु हक्लनाइ आइला। मर्लपछि पुनरुत्थान बइहकि बाजिके होल्किन बिस्वास गर्तेला।#पे २३:८ 28होल्किन येसुलाइ सोद्ला, “गुरु, मोसान हाइलाइ लेख्दिल परमेसोरकर नियम अन्सार कुनइ मानुसकर दाजेककर सन्तान नहकिके मर्ले भने दाजेककर लागि सन्तान हक्दिक बाजिके भाएकिन भोजेकसिन ब्याहा गर्दिक।#बेब २५:५-६ 29एउटो परिवारनाइ सात भाइ रइला। जेड्काइनिन ब्याहा गर्ले तर सन्तान नहकिके मर्ले। 30उन्खाए माइलान भोजेकलाइ ब्याहा गर्ले होक्र पुनि सन्तान नहकिके मर्ले। 31र साइलान पुनि ब्याहा गर्ले र उन्खाए गरिके साते भाइकिन भोजेकसिन ब्याहा गर्ला र सन्तान नहकिके मर्ला। 32पछि ह्व बेटि पुनि मर्लि। 33होइ हुदान मर्लबान पुनरुत्थान हक्तिन ह्व बेटि कुनकरि बोहेक हक्छइ? किनारइभने होलाइ ता साते भाइकिन ब्याहा गर्लाइ रइला।”
34येसुन होल्काइ बल्-ल्याक, “ह्य सन्सारकराइ मान्छेलत ब्याहा गर्छत र गर्दिस्याक। 35तर पछि आइनार समयनाइ इन्खा बइहकि किनारइभने मर्लबान जिउँतिकइ स्वर्ग जाइकर लागि योग्य हक्लाइ मान्छेल्किन अर्को जिबननाइ न ब्याहा गर्छत, न गर्दिस्याक। 36होलत फेरि बइमरत किनारइभने होलत स्वर्गदुत जिन्खाए हक्नारआछत। होलत मर्लबान बाच्ल हुदान परमेसोरकर सन्तान हक्नाराइआछत। 37मर्लाइ जिउँते हक्छत बाजिके मोसान जिगिधर्ल पोथ्राकर घटनानाइ देखाइलाछ। परमपर्भुलाइ ‘अब्राहामकर परमेसोर, इसहाककर परमेसोर र याकुबकर परमेसोर’ बाजिके पुकार्लाछ।#पर ३:१-६ 38परमेसोर मर्लाल्को परमेसोर बया, तर ह्व जिउँताल्को परमेसोर हो, किनारइभने परमेसोरकर नजरनाइ सेब्बाइ जिउँते आछत।”
39अनि कोइ-कोइ धर्म-गुरुल्किन बाज्ला, “गुरु, तुइनिन ठिक बाज्लाछस।” 40ह्व पछि फेरि कुन्नुल्किन केइ सोद्नार आँट बइगर्ला।
खिरिस्ट कुनकर बेटाक?
(मति २२:४१-४६; मर्कुस १२:३५-३७)
41येसुन होल्काइ बल्-ल्याक, “खिरिस्ट दाउदकर बेटाक हो बाजिके मान्छेल्किन किनिखे बाजइ सक्छत? 42दाउदिन आफि लेख्ल भजन किताबनाइ इत्तिके बाज्लाछ,
‘परमपर्भुन मोर पर्भुलाइ बलल्ते,
“तुइ मोर दाइने हात पटि बस।
43जब सम्म मुइ तोर सतुरकाइ तोर पइतला हेठ्ठान बइपारु।”’#भजन ११०:१
44इत्तिके दाउद आफिन खिरिस्टलाइ पर्भु बल्ल पछि, फेरि किनिखे खिरिस्ट दाउदकर बेटाक हक्ले?”
धर्म-गुरुल्काइ चेतावनि
(मति २३:१-३६; मर्कुस १२:३८-४०)
45सेब्बाइ मान्छेल्किन सुनिधर्ल बेलानाइ येसुन आफ्ने चेलाल्काइ बल्-ल्याक, 46“धर्म-गुरुल्कोसिन होसियार हकिके बसो! होलत ता देखावटि लामो लुगा लाइके हिनइ मन पराइछत, बजारकराइ मान्छेल्किन आदर सत्कार गर्ल चाइछत अनि सभाघरनाइ र भोज-भतेरनाइ आदर पाइनार ठउँनाइ बसइ मन पराइछत। 47होल्किन बिद्दुइकर घरबार खोस्छत र देखावटि लामो पार्थना गर्छत। इन्खाएल्किन ने बढ्ता सजाय पाइनारआछत।”
Currently Selected:
लुका 20: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
