लुका 19
19
कर उठाइनार जखायस
1येसु यरिहो सहर हकिके जाइतिन रइल। 2ह्व सहरनाइ जखायस नाउँ हक्ल धनि मानुस कर उठाइनारकर हाकिम रइल। 3होइनिन येसु कुन्टो रइलसइ बाजिके हेरइ चाइतेल तर ह्व पुड्के रइल र मान्छेल्को भिडिन गर्तिन होइनिन देखइ बइसक्ले। 4होइ हुदान ह्व येसुलाइ हेरइकर लागि कुत्तिन अगाडि जाइके एउटो नेभाराकर गाछनाइ चड्ले किनारइभने येसु होइ बाट हकिके आइतिन रइल। 5जब येसु उछि आइपुग्ले अनि उप्रउने हेरिकइ जखायसलाइ बलल्ते, “ए जखायस चानो हेठ्ठ झर, किनारइभने आज मुइलाइ तोर घरनाइ बास बसइ पर्लाछ।”
6जखायस खुसि हकिके चाने झरिके येसुकर स्वागत गर्ले। 7ह्य देखिके सेब्बाइ मान्छेलत गनगनाइतिन इन्खा बाजइ लाग्ला, “ह्य मानुस ता पापिकर घरनाइ पो बास बसइ जाइले।”
8जखायसिन ठडाइके येसुलाइ बलल्ते, “पर्भु, अब मुइ आफ्ने सम्पतिकर आदा भाग गरिबकाइ बाड्दिनारआछु, र कुनुल्काइ झुक्काइकइ केइ लिलाछु भने मुइ होक्र चार गुना फिर्ता गरिदिनारआछु।”
9येसुन जखायसलाइ बलल्ते, “आज ह्य घरकराइ मान्छेल्किन मुक्ति पाइलाछत, किनारइभने जखायस पुनि अब्राहामकर बेटाक हो। 10किनारइभने मानुसकर बेटाक नाठ्लाल्काइ हेरइ र बाचाइ बाजिके आइल हो।”#मति १८:११
सुनकर सिक्काकर उखान
(मति २५:१४-३०)
11होल्किन ह्य कुरो सुन्तिन गर्तिन येसुन होल्काइ एउटो उखान बाजइ लाग्ले। येसु यरुसलेमकर नजिकइ रइल अनि मान्छेल्किन परमेसोरकर राज्य चाने आइतिन आछि बाजिके सम्जिलाइ रइला। 12येसुन बाज्ले, “कुनइ एउटो खान्दानि मानुस बद्दुरकर देसनाइ जाइके आफ्ने देसकर राजा हकिके फर्किनार बिचार गर्ले। 13जाइभन्दा अगाडि होइनिन आफ्ने दसुटाइ नोकरकाइ बालाइके एक-एक ओटो सुनकर सिक्का दितिन बल्-ल्याक, ‘मुइ फर्किके नआउन्जेलसम्म ह्य सुनकर सिक्काबान बेपार गरो।’ 14तर आफ्ने देसकराइ मान्छेल्किन होलाइ मन बइपराइतेला र होल्किन होक्र पछि-पछि इन्खा बाजिके दुतकाइ पाठाइल्याक, ‘ह्य मानुसिन राज्य गर्ल हाइ बइचाए।’
15“ह्व मानुस राजा हकिके फर्किल पछि आफिन सिक्का दिलाइ नोकरकिन बेपार गरिके कत्ता नाफा कामाइला बाजिके सोदइकर लागि बालाइनार हुकुम गर्ले। 16पइलो नोकर आइके बाज्ले, ‘मालिक, तुइनिन दिल एउटो सिक्कान मुइनिन आने दसुटो सिक्का कामाइलाछु।’ 17राजान होलाइ बलल्ते, ‘स्याबास असल नोकर, तुइ थोरे कुरोनाइ इमान्दार हक्लइ। अब तुइनिन दसुटो सहरनाइ अधिकार पाइनारआछस।’ 18अनि दोस्रो नोकर आइके बाज्ले, ‘मालिक, तुइनिन दिल एउटो सिक्कान मुइनिन आने पाँचुटो सिक्का कामाइलाछु।’ 19राजान होलाइ बलल्ते, ‘तुइनिन पुनि पाँचुटो सहरनाइ अधिकार पाइनारआछस।’ 20अर्को नोकरिन आइके बाज्ले, ‘मालिक, तुइनिन दिल सिक्का इछि आछि, मुइनिन ह्यलाइ रुमालनाइ नुकाइके धर्ल रइनाइ। 21मुइ तुइसिन डाराइनाइ किनारइभने तुइ कठोर मानुस आछस। तुइनिन ता आफिन लगानि बइगर्ल ठउँनाइ पुनि नाफा हेर्छस र आफिन बइरोप्ल ठउँनाइ कटनि गर्छस।’ 22राजान होलाइ बलल्ते, ‘ए दुस्ट नोकर, तोरे मुखकर बोलिन मुइ तुइलाइ दोसि ठहराइछु। मुइ कठोर मानुस हो, आफिन लगानि बइगर्ल ठउँबान नाफा हेर्नार र आफिन बइरोप्ल ठउँबान कटनि गर्नार बाजिके तुइनिन जान्ल रइलइ भने ता 23तुइनिन मोर सिक्का किनारइ ब्याजनाइ बइलाइलइ? मुइ आइके ह्व पइसाकर ब्याजसहित ता पाइनानाइ।’ 24राजान उछि ठडाइनारकाइ बल्-ल्याक, ‘होइसिन ह्व सिक्का खोसिकइ दस सिक्का हक्नारलाइ दिक।’ 25होल्किन बाज्ला, ‘मालिक, होइसिन ता दस सिक्का रोइहाल्सि नि।’ 26‘मुइ तोराल्काइ बल्छु, जुनसिन आछि, होलाइ अजइ धेरइ दिनारआछ, तर जुनसिन बइने, होइसिन हक्ल पुनि खोसिनारआछ।#मति १३:१२; मर्क ४:२५; लुक ८:१८ 27अब मुइनिन होलत उप्रान राज्य गर्ल मन बइपराइनाराइ मोर सतुरकाइ इछि आनिकइ मोर अगाडि मार्खन।’”
यरुसलेमनाइ येसुकर पर्बेस
(मति २१:१-११; मर्कुस ११:१-११; युहन्ना १२:१२-१९)
28येसुन ह्य कुरो बाजिसक्ल पछि होल्को अगि-अगि यरुसलेम जाइनार बाट लाग्ले। 29येसु बेथफागे र बेथानियाकर नजिक जइतुन डाँरानाइ आइपुग्तिन येसुन दुइटाइ चेलाल्काइ इन्खा बाजिके पाठाइल्याक, 30“तोरा अगाडिकर गाउँनाइ जाउबे र उछि तोराल्किन कइले कोइ पुनि बइचढ्ल गधाकर बछेडा बाँदिधर्ल भेट्टाइनार आछो। होलाइ फुकाइके इछि आनो। 31यदि कुन्नुल्किन ‘ह्यलाइ किनारइ फुकाइछो?’ बाजिके तोराकाइ सोद्ल्या भने, ‘पर्भुलाइ हेक्र खाँचो आछि’ बाजइ।”
32ह्व दुइटाइ चेलालत जाइला र येसुन बल्ल जिन्खाए गधाकर बछेडालाइ बाँदिधर्ल भेट्टाइला। 33होल्किन गधाकर बछेडालाइ फुकाइ लाग्तिन बछेडाकर मालिकिन होल्काइ सोद्ल्याक, “तोराल्किन गधाकर बछेडालाइ किनारइ फुकाइछो हँ?”
34होल्किन बाज्ला, “पर्भुलाइ हेक्र खाँचो आछि।” 35चेलाल्किन बछेडालाइ येसु हक्लनाइ आन्ला र आफ्ने लुगा बछेडाकर ढाडनाइ ओछ्याइकइ येसुलाइ चडाइला। 36येसु गधानाइ चडिके जाइतिन खेर मान्छेल्किन आफ्ने लुगा फुकालिकइ बाट्नाइ ओछ्याइला।
37येसु जइतुन डाँराकर ओरालोनाइ आइपुग्तिन चेलालत र भिडलत येसुन गर्ल सेब्बे सक्तिसालि काम सम्जिकइ रामाइतिन बड्खो सोरिन साराइतिन परमेसोरकर पर्सन्सा गरइ लाग्ला,
38“परमपर्भुकर नाउँनाइ आइनार राजा धन्यकर हो।
स्वर्गनाइ सान्ति र परमेसोरकर महिमा हक्दिक।”#भजन ११८:२६
39अनि मान्छेल्को भिडबान केइ फरिसिल्किन येसुलाइ बल्ला, “गुरु, तोर चेलाल्काइ चुपलाग बल्खन।”
40येसुन होल्काइ बल्-ल्याक, “मुइ तोराल्काइ बल्छु, हेलत चुप लाग्ला भने ता पाथरलत साराइनारआछत।”
यरुसलेमकर लागि येसु कान्ल
41जब येसु यरुसलेम नजिकइ आइपुग्ले ह्व सहरलाइ देखिके येसु कान्ले र इत्तिके बाज्ले, 42“तुइनिन आज सान्तिकर लागि केति चाइछि बाजिके जान्लासिन हक्नाल्ति! तर तुइनिन ह्व देखइ ने बइसक्लइ। 43अब इन्खा दिन आइनारआछि, तोर सतुरकिन तोर वरिपोरि मोर्चा घेरा हालिके सेब्बे पट्यान थुन्नाराइ आछत। 44सतुरकिन तुइलाइ र ह्व भित्र बस्नाराइ तोर सन्तानकाइ नास पार्नाराइ आछत र एउटो पाथर उप्रान अर्को पाथर छाड्नाराइ बइनेत किनारइभने परमेसोरिन बाचाइ आइल समयलाइ तुइनिन चिनइ बइसक्लइ।”
येसु मन्दिरनाइ जाइल
(मति २१:१२-१७; मर्कुस ११:१२-१९; युहन्ना २:१३-१६)
45अनि येसु मन्दिरनाइ जाइले र उछि किनबेच गर्नारकाइ इत्तिके बाज्तिन निकाल्-ल्याक, 46“धर्मसास्तरनाइ लेख्लाछि, ‘मोर घर पार्थनाकर घर हक्नारआछि’ तर तोराल्किन ता ह्यलाइ चोर डाकाल्को ओडार बानाइलाछो।”#यस ५६:७; यर ७:११
47ह्व पछि येसुन दिन्ने मन्दिरनाइ सिछ्या सिकाइतेल। तर मुख्य पुजारिलत, धर्म-गुरुलत र आने अगुवालत मिलिके येसुलाइ मारइ हेर्तेला।#लुक २१:३७ 48तर होल्किन येसुलाइ मार्नार केइ उपाय बइभेट्टाइला किनारइभने सेब्बाइ मान्छेल्किन येसुकर सिछ्या सुनइ मन पराइतेला।
Currently Selected:
लुका 19: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
