लुका 18
18
बिद्दुइ र न्यायधिस
1येसुन चेलाल्काइ सदइ पार्थना गरिधर्दिखन र निरास जुनहक्दिखन बाजिके होल्काइ एउटो उखान बल्-ल्याक, 2“कुनइ एउटो सहरनाइ परमेसोरकर डर बइमान्नार र मान्छेल्काइ पुनि वास्ता बइगर्नार एउटो न्यायधिस रइल। 3अनि होइ सहरनाइ एउटि बिद्दुइ पुनि रइलि। ह्व न्यायधिसकर उछि घरि-घरि जाइके बाज्तेलि, ‘मुइलाइ मोर बिरोदिकर अगि मोर न्याय गर्देउ।’ 4केइ दिन सम्म ता होइनिन बिद्दुइकर कुरइ बइमान्ले, तर पछि होइनिन आफ्ने मननाइ सोच्ले, ‘मुइ परमेसोरकर डर बइमानु र मान्छेल्को वास्ता पुनि बइगरु। 5तर ह्य बिद्दुइनिन मुइलाइ हइरान पार्लि हुदान मुइ हेक्र न्याय गर्दिनारआछु, नत्र ता हेइनिन एकतारइ आइके मुइलाइ दिक्क पार्छइ।’”
6पर्भुन बाज्ले, “सुनो, ह्व अधर्मि न्यायधिसिन केति बाज्तिनआछ। 7उन्खाए परमेसोरलाइ रात-दिन पुकार्नाराइ आफ्ने मान्छेल्काइ परमेसोरिन न्याय बइगरक र? केति परमेसोरिन होल्काइ सायता गरइ ढिलो गर्छइ र? 8मुइ तोराल्काइ बल्छु, परमेसोरिन चाने ने होल्को न्याय गर्दिनारआछ। तर मानुसकर बेटाक आइतिन केति होइनिन धर्तिनाइ बिस्वास गर्नाराइ भेट्टाइछइ र?”
फरिसि र कर उठाइनारकर पार्थना
9आफिनाइ भर पर्नाराइ र आफिलाइ धर्माति ठानिकइ आनेल्काइ तुच्छ ठान्नाराइ मान्छेल्काइ येसुन ह्य उखान बल्-ल्याक, 10“दुइटाइ मान्छे पार्थना गरइ मन्दिरनाइ जाइला। एउटो फरिसि र अर्को चाइ कर उठाइनार रइल। 11फरिसिन ठडाइके आफ्ने बारेनाइ इनिखे पार्थना गर्ले, ‘हे परमेसोर, मुइ तुइलाइ धन्नेबाद दिछु किनारइभने मुइ आने मान्छेलत जिन्खाए लोबि र अत्याचारि बइने। मुइनिन बेभिचार गर्ल बइने र मुइ हेइ कर उठाइनार जिन्खाए पुनि बइने। 12मुइ हप्तानाइ दुइ फेरा उपबास बस्छु र मुइनिन कामाइल र पाइल सेब्बे कुरोकर दस भागकर एक भाग तुइलाइ दिछु।’ 13तर कर उठाइनार मानुसिन चाइ बद्दुर ठडाइके स्वर्गदिस पुनि नहेरिकइ आफ्ने छाति ठाटाइतिन बाज्ले, ‘हे परमेसोर, मुइ पापिलाइ दया गर।’ 14मुइ तोराल्काइ बल्छु, ह्व फरिसि भन्दा कर उठाइनार मानुस चाइ परमेसोरकर नजरनाइ धर्माति हकिके आफ्ने घर फर्किले। किनारइभने जुनिन आफिलाइ उच्च पार्छइ ह्व होच्याइछइ र जुनिन आफिलाइ होच्याइछइ ह्व उच्च हक्नारआछ।”#मति ६:५;२३:१२; लुक १४:११
येसु र स्याउनाइ नानिलत
(मति १९:१३-१५; मर्कुस १०:१३-१६)
15मान्छेल्किन आफ्ने नानिल्काइ येसुन छुइकइ आसिस दिदिक बाजिके येसु हक्लनाइ आन्ला तर ह्य देखिके चेलाल्किन होल्काइ हप्काइल्याक। 16येसुन नानिल्काइ आफिहक्लनाइ बालाइके चेलाल्काइ बल्-ल्याक, “ह्य नानिल्काइ मुइ हक्लनाइ आइ दिखन, होल्काइ जुनरोको किनारइभने परमेसोरकर राज्य ता इन्खाएल्को लागि हो। 17साँच्चि मुइ तोराल्काइ बल्छु, जुनिन परमेसोरकर राज्यलाइ नानिल्किन जिन्खाए बइसुइकार ह्व कइले पुनि ह्व भित्र पसइ बइपाक।”
धनि मानुस र परमेसोरकर राज्य
(मति १९:१६-३०; मर्कुस १०:१७-३१)
18एउटो सासक आइके येसुलाइ सोदल्ते, “हे असल गुरु, अजम्बरि जिबन पाइलाइ मुइनिन केति गरइ पर्छइ?”
19येसुन होलाइ बलल्ते, “तुइनिन मुइलाइ किनारइ असल बल्छस? परमेसोर बाएक कोइ पुनि असल बइने। 20तुइनिन परमेसोरकर आग्यालत ता जान्छस, ‘बेभिचार जुनगर, मान्छे जुनमार, जुनचोराउ, झुटो साँक्छि बइदेइ र आफ्ने आमेर-ब्वारकाइ आदर गरइ।’”#पर २०:१२-१६; बेब ५:१६-२०
21होइनिन बाज्ले, “ह्य सेब्बे नियम ता मुइनिन छोडारिसिन ने पालन गर्तिन आइलाछु।”
22ह्य सुनिके येसुन होलाइ बलल्ते, “तुइनिन अजइ एउटो काम गरइ बाकि आछि। तुइसिन हक्ल सेब्बे सम्पति बेचिके गरिबकाइ बाड्दिखन र तुइनिन स्वर्गनाइ धन पाइनारआछस अनि आइके मोर पछि लाग।” 23ह्य सुनिके ह्व मानुस एकदम दुखित हक्ले किनारइभने ह्व एकदम धनि रइल।
24अनि येसुन होलाइ हेरिकइ बलल्ते, “धनि मान्छेल्काइ परमेसोरकर राज्यनाइ पसइ एकदम गारो आछि। 25किनारइभने धनि मानुसलाइ परमेसोरकर राज्यनाइ पसइभन्दा ता बुरु उँटलाइ सियोकर नाथ्रिबान छिरइ सजिलो हक्छि।”
26ह्य कुरो सुन्नारकिन येसुलाइ बल्ला, “उन्खा हक्लासिन कुनिन मुक्ति पाइ सक्छइ ते?”
27येसुन होल्काइ बल्-ल्याक, “जे कुरो मान्छेल्को लागि असम्भब आछि ह्व परमेसोरकर लागि सम्भब आछि।”
28अनि पत्रुसिन बाज्ले, “हेर, हाइनिन आफ्ने सेब्बे घरबार छाडिके तोर पछि लाग्लाछे।”
29येसुन होल्काइ बल्-ल्याक, “साँच्चि मुइ तोराल्काइ बल्छु, जुनिन परमेसोरकर राज्यकर लागि आफ्ने घरबार, बोहेक, छ्वाएक, आमा-ब्वा, दाजि-भाइ, छाड्छइ, 30होइनिन हेइ जिबननाइ धेरइ आसिस पाइनारआछ र आइनार युगनाइ चाइ अजम्बरि जिबन पाइनारआछ।”
येसुन फेरि आफ्ने मर्नार बारेनाइ बाज्ल
(मति २०:१७-१९; मर्कुस १०:३२-३४)
31येसुन बारेउटाइ चेलाल्काइ अर्कइ पटि लाकाइके बल्-ल्याक, “सुनो, हाइ यरुसलेम जाइतिन आछे। मानुसकर बेटाककर बारेनाइ अगमबक्ताल्किन लेख्ल सेब्बे कुरो पुरा हक्नारआछि। 32ह्व आने जातिल्को हातनाइ सुम्पिनारआछ, होल्किन होलाइ गिल्ला गर्नारआछत, बिजेत गर्नारआछत र थुक्नारआछत। 33होल्किन होलाइ कोर्रा#१८:३३ कोर्राअपराधिल्काइ ठाटाइकइ कायल पारइलाइ हिर्काइनार साधन हो। ह्य छालाकर वा लाबरकर बानाइछत। लाइनारआछत र मार्नारआछत, तर तिन दिननाइ ह्व फेरि मर्लबान जिउँते हकिके उठ्नारआछ।”
34तर चेलाल्किन ह्य कुरो एउटि पुनि बइबुज्ला किनारइभने ह्य कुरोकर अर्थ होल्कोबान नुकाइल रल्ति। होइ हुदान येसुन बाज्ल कुरो होल्किन बुजइ बइसक्ला।
अन्धा भिकारि देख्नार हक्ल
(मति २०:२९-३४; मर्कुस १०:४६-५२)
35येसु यरिहो सहरकर नजिक पुग्तिन उछि एउटो अन्धा बाटकर छेउनाइ बसिके भिक मागिधर्ल रइल। 36मान्छेल्को भिड जाइधर्ल था पाइके “केति हक्तिन आछि?” बाजिके होइनिन मान्छेल्काइ सोद्ल्याक।
37मान्छेल्किन होलाइ बल्ला, “नासरतकर येसु हेइ बाट हकिके जाइतिन आछ।”
38ह्य सुनिके ह्व अन्धान बड्खो सोरिन बाज्ले, “हे येसु, दाउदकर बेटाक, मुइलाइ दया गर।”
39अगि-अगि हिन्नारकिन होलाइ चुप लाग बाजिके हाकार्ला, तर ह्व झन बड्खो सोरिन बाज्ले, “हे दाउदकर बेटाक, मुइलाइ दया गर।”
40ह्य सुनिके येसु टक्क अडिले र होलाइ आफि हक्लनाइ आन्नार आग्या गर्ले। ह्व नजिक आइल पछि येसुन होलाइ सोदल्ते, 41“तुइ केति चाइछस? मुइ तोर लागि केति गरुँ?”
होइनिन बाज्ले, “पर्भु, मुइ देखइ सकु।”
42येसुन होलाइ बलल्ते, “तुइ देख्नार हकिहाल। तोर बिस्वासिन तुइ बिसेक हक्लाछस।”
43अनि ह्व तुरुन्तइ देख्नार हक्ले र परमेसोरकर पर्सन्सा गर्तिन येसुकर पछि लाग्ले। ह्य देखिके आने मान्छेल्किन पुनि परमेसोरकर पर्सन्सा गर्ला।
Currently Selected:
लुका 18: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
