लुका 21
21
बिद्दुइकर भेटि
(मर्कुस १२:४१-४४)
1मन्दिरनाइ येसु दान हाल्नार बाक्सा छेउनाइ बसिके हेर्तिन धनि मान्छेल्किन भेटि हाल्ल देख्ले, 2र एउटि गरिब बिद्दुइनिन पुनि दुइटो तामाकर सिक्का चाराइल देख्ले। 3ह्य देखिके येसुन बाज्ले, “साँच्चि मुइ तोराल्काइ बल्छु, ह्य गरिब बिद्दुइनिन आने सेब्बाल्किन भन्दा धेरइ भेटि चाराइलाछि। 4किनारइभने आनेल्किन ता आफिसिन हक्ल पर्सस्तबान केइ भेटि चाराइलाछत तर ह्य बिद्दुइ गरिब हक्तिन पुनि आफिसिन हक्ल सेब्बे जिबिका चालाइनार पइसा चाराइलाछि।”
अन्त्यकर दिनकर चिन्न
(मति २४:१-२; मर्कुस १३:१-२)
5केइ चेलाल्किन मन्दिरकर बारेनाइ “किन्खा मजार-मजार पाथरिन बानाइल र मान्छेल्किन परमेसोरलाइ दिल दानबान मन्दिर सजाइल!” बाजिके कुरो गरिधर्लाइ रइला। येसुन होल्काइ बल्-ल्याक, 6“इन्खा समय आइनारआछि, तोराल्किन अखन देखिधर्ल ह्य भबनकर एउटो पाथर उप्रान अर्को पाथर हक्नार बइने, ह्व सेब्बे भत्किनारआछि।”
दुख र कस्टकर सुरु
(मति २४:३-१४; मर्कुस १३:३-१३)
7होल्किन येसुलाइ सोद्ला, “गुरु, ह्य कखन हक्नारआछि? र ह्य कुरो हकइ लाग्तिन केति चिन्न हक्नारआछि?”
8येसुन होल्काइ बल्-ल्याक, “होसियार बसो, तोराल्काइ कुन्नुल्किन पुनि जुनछक्याइदिखन किनारइभने धेराइ मान्छेलत मोर नाउँनाइ ‘मुइ ने खिरिस्ट हो’ र ‘बेला नजिकइ आइलाछि’ बाजिके बाज्नारआछत तर तोरा होल्को पछि जुनलागो। 9जब तोराल्किन लडाइ र झगडा हक्ल कुरो सुन्छो तब जुनडाराओ, किनारइभने अन्त्य हकइ भन्दा पइला ह्य कुरो हकइ ने पर्छि तर उत्तिने खेर सन्सारकर अन्त्य चाइ बइहकि।”
10फेरि येसुन होल्काइ बल्-ल्याक, “जातिल्को बिरुद्दनाइ जाति र रास्टकर बिरुद्दनाइ रास्ट लडाइ हक्नारआछि। 11बड्खो-बड्खो भुइचालो जाइनारआछि। धेरइ ठउँनाइ अनिकाल र महामारि हक्नारआछि, भयङ्कर आतङ्क र आकासनाइ डर लाग्दो अचम्मकर चिन्न देखा पर्नारआछि। 12तर ह्य सेब्बे कुरो हकइ भन्दा पइला मान्छेल्किन तोराल्काइ आठाइनारआछत, सताइनारआछत, सभाघरनाइ लाकाइके सुम्पिनारआछत र झ्यालखन्डनाइ हाल्दिनारआछत। तोराल्काइ मोर नाउँकर कारन राजा र हाकिमकर अगाडि पुराइनारआछत। 13तर ह्व बेला तोराल्किन मोर बारेनाइ गबाहि दिनार मउका पाइनारआछो। 14होइ हुदान आफि जोगइकर लागि केति बाजइ पर्छइ बाजिके पइला ने चिन्ता जुनगरो। 15किनारइभने मुइ तोराल्काइ इन्खा सब्द र बुद्दि दिनारआछु कि तोराल्किन बाज्ल तोराल्को बिरोदिल्किन जबाफ देइ बइसकत र बिरोद गरइ पुनि बइसकत।#लुक १२:११-१२ 16तोराल्काइ आफ्ने आमेर-ब्वार, दाजेर-भाएरकिन, आफन्तल्किन र साथेरकिन पुनि धोका दिके पक्राइनारआछत। तोरा मद्दे कोइ-कोइकाइ ता होल्किन मार्नारआछत। 17मुइलाइ बिस्वास गर्ल कारनिन तोराल्काइ सेब्बाइ मान्छेल्किन घिर्ना गर्नारआछत। 18तर तोराल्को कापालकर एउटो बार पुनि झर्नार बइने। 19तोराल्किन ह्य सेब्बे सइलो भने जिबन पाइनारआछो।”
यरुसलेमकर नास
(मति २४:१५-२१; मर्कुस १३:१४-१९)
20“जब यरुसलेम सहरलाइ सतुरकर सेनाल्किन घेर्ल देख्छो, तब ह्य सहरकर नास हक्नार बेला आइपुगल्तिसइ बाजिके जानो। 21ह्व बेला यहुदिया छेत्रनाइ हक्नाराइ मान्छेलत डाँरादिस भाग्दिखन। सहर भित्र हक्नाराइ बाइर भाग्दिखन र गाउँनाइ हक्नाराइ सहरनाइ जुनजाइदिखन। 22किनारइभने धर्मसास्तरनाइ लेख्ल सेब्बे कुरो पुरा हकइलाइ ह्य सजाय दिनार दिन हक्नारआछि।#हो ९:७ 23ह्व बेला नानि पाइनाराइ र दुत ख्वाइनाराइ बेटिल्को लागि झन डर लाग्दो हक्नारआछि। किनारइभने धर्तिनाइ भयङ्कर दुख आइनारआछि र परमेसोरकर दन्ड ह्य जातिकराइ मान्छेल्कोनाइ आइपर्नारआछि। 24होलत तरवारिन मारिनार आछत र धेरइ देसनाइ कइदि बानाइके लाकाइनार आछत। आने जातिल्को समय पुरा नहकुन्जेलसम्म होल्किन यरुसलेमलाइ पइतला हेठ्ठान धर्नारआछत।
मानुसकर बेटाककर आगमन
(मति २४:२९-३१; मर्कुस १३:२४-२७)
25“घाम, चानाजुन र तारानाइ अचम्मकर चिन्न देखा पर्नारआछि। समुन्द्रकर गर्जन र बड्खो छालिन गर्तिन धर्तिकराइ सेब्बाइ मान्छेलत सङ्कटनाइ परिके डरिन आत्तिनार आछत।#यस १३:१०; इज ३२:७; यो २:३१; पर ६:१२-१३ 26धर्तिनाइ हकइ आइनार घटना सम्जिकइ मान्छेल्को डरिन सातो पुत्लो उड्नारआछि, किनारइभने आकासकर सक्ति डगमगाइनारआछि। 27ह्व पछि मानुसकर बेटाकलाइ बादलनाइ सक्ति र बड्खो महिमासाथ आइधर्ल मान्छेल्किन देख्नारआछत।#दा ७:१३; पर १:७ 28जब ह्य कुरो हकइ थाल्छि तब तोरा ठडाकइ उप्रउने हेरो, किनारइभने तोराल्को उद्दार नजिक आइधर्लाछि।”
नेभाराकर गाछबान सिछ्या
(मति २४:३२-३५; मर्कुस १३:२८-३१)
29येसुन होल्काइ एउटो उखान बल्-ल्याक, “नेभाराकर गाछ र आने सेब्बे गाछकाइ हेरो। 30होल्कोनाइ नयाँ चिउला फेर्ल देखिके तोरा आफि गर्मिकर बेला आल्ते बाजिके था पाइछो। 31उन्खाए ने मुइनिन बल्ल ह्य सेब्बे कुरो हकिधर्ल देख्तिन परमेसोरकर राज्य नजिकइ आछि बाजिके जानो।
32“साँच्चि मुइ तोराल्काइ बल्छु, ह्य सेब्बे घटना पुरा नहकुन्जेलसम्म ह्य पुस्ता नास हक्नार बइने। 33स्वर्ग र धर्ति बितिके जाइनारआछि तर मोर बचन कइले बित्नार बइने।”
चलाख हको
34“तोरा होसियार हकिके बसो, धेरइ भोज-भतेरनाइ जुनलागो, मातिकइ जुनहिनो र जिबनकर चिन्ता जुनगरो, नत्रता तोराल्को मन बोदो हक्नारआछि र तोराल्किन बइसोच्ल बेलानाइ एक्कासि ह्व दिन पासोठि आइनारआछि। 35इनिखे धर्तिनाइ हक्लाइ सेब्बाइ मान्छे उप्रान ह्व दिन आइनारआछि। 36होइ हुदान चलाख हको, ‘हकइ आइनार डर लाग्दो घटनाबान उम्कइ सकउ र मानुसकर बेटाककर अगाडि ठडाइनार योग्य बानाउ’ बाजिके हरसमय पार्थना गरो।”
37येसुन दिउँसो मन्दिरनाइ सिछ्या दितेल र राति चाइ सहर बाइर जइतुन डाँरानाइ बास बसइ जाइतेल।#लुक १९:३७ 38येसुकर सिछ्या सुनइलाइ सेब्बाइ मान्छेलत ब्यानिन्न मन्दिरनाइ आइतेला।
Currently Selected:
लुका 21: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
