पेरित 7
7
इस्तिफनसकर भासन
1पर्धान पुजारिन इस्तिफनसलाइ सोदल्ते, “केति तुइलाइ दोस लाइल कुरो साँच्चि हो?”
2इस्तिफनसिन बाज्ले, “मोर दाजि-भाइ र ब्वालत, मोर कुरो ध्यान दिके सुनो, हाम्रो पुर्खा अब्राहाम हाराननाइ जाइ भन्दा अगाडि मेसोपोटामियानाइ हक्तिन महिमाकर परमेसोर देखा पर्ले, 3र परमेसोरिन अब्राहामलाइ बल्ल रल्ति, ‘तुइ आफ्ने देस र आफ्ने नातेदारकाइ छाडिके मुइ तुइलाइ जुन्टो देस देखाइछु उछि जा।’#उत १२:१ 4तब अब्राहाम कल्दिको देसबान#७:४ कल्दिको देसबान मेसोपोटामियाकर अर्को नाउँ निस्किके हाराननाइ जाइके बस्ले। होक्र ब्वाक मर्लपछि परमेसोरिन होलाइ अखन तोरा बस्ल हेइ देसनाइ आनल्ते।#उत ११:३१;१२:४ 5ह्व बेला परमेसोरिन अब्राहामलाइ ह्य देसनाइ पाइला धर्नार ठउँसम्म बइदिल्ते, तर परमेसोरिन ‘ह्य देस तुइ र तोर सन्तानलाइ दिनारआछु’ बाजिके पर्तिग्या गर्ले। ह्य पर्तिग्या गर्तिन अब्राहामकर बेटाक-बेटेक ने हक्लाइ बइरइला।#उत १२:७;१३:१५;१५:१८;१७:८ 6पछि परमेसोरिन अब्राहामलाइ ह्य पुनि बलल्ते, ‘तोर सन्तानलत आनेल्को देसनाइ जाइके बस्नारआछत, र उछिकराइ मान्छेल्किन होल्काइ दास बानाइके चार सय बर्ससम्म धेरइ दुख दिनारआछत। 7तर होल्काइ दास बानाइनाराइ मान्छेल्काइ मुइ दन्ड दिनारआछु। ह्व पछि होलत ह्व देसबान निस्किके आइनारआछत, र हेइ ठउँका आइके मोर आराधना गर्नारआछत।’#उत १५:१३-१४; पर ३:१२ 8अनि परमेसोरिन अब्राहामसिन गर्ल पर्तिग्याकर सम्जना गराइकर लागि खतनाकर बाचा गर्ले। अब्राहामिन आफ्ने बेटाक इसहाक जन्मिल पछि आठउ दिननाइ होक्र खतना गर्दिल्ते। इनिखे इसहाकिन याकुबकर र याकुबिन बारेउटाइ बेटाकख्यानको खतना गर्दिल्याक, होइलत ने हाम्रो पुर्खा हक्ला।#उत १७:१०-१४;२१:२-४;२५:२६;२९:३१—३५:१८
9“याकुबकर बेटाक योसेफलाइ आने दाजेकख्यानकिन डार गर्तेला। होल्किन योसेफलाइ मिस्र देसनाइ दासकर रुपनाइ बेच्दिल्याक। तर परमेसोर योसेफसिन रइल।#उत ३७:११,२८;३९:२,२१ 10परमेसोरिन योसेफलाइ सेब्बे दुखबान छुटाल्ते। जब योसेफ मिस्र देसकर राजा फारोकर अगाडि आइले, तब परमेसोरिन होलाइ दया गरल्ते र बुद्दि दिल्ते, अनि फारोन होलाइ मिस्र देसकर र होक्र परिवारकर सासक बानाल्ते।#उत ४१:३९-४९ 11ह्व पछि मिस्र देसभरि र कनान देसनाइ बड्खो अनिकाल परल्ते, अनि अनिकालिन गर्तिन हाम्रो पुर्खाल्किन एकदम दुख पाइला र अन्न ने बइपाइला।#उत ४२:१-२ 12अनि याकुबिन मिस्र देसनाइ अन्न आछि बल्ल सुनिके हाम्रो पुर्खाल्काइ पइलो पालि ह्व देसनाइ पाठाइल्याक। 13अनि होलत दोस्रो पालि अन्न किनइ जाइतिन योसेफिन आफिलाइ आफ्ने दाजेक-भाएकख्यानको अगाडि चिनाइले। होइ बेला योसेफकर परिवारकर बारेनाइ फारोलाइ पुनि था हकल्ते।#उत ४५:१,१६ 14योसेफिन आफ्ने ब्वाक याकुबलाइ ‘सेब्बाइ जाहान-परिवारकाइ लिके मिस्रनाइ आबे’ बाजिके खबर पाठाइले।#उत ४५:९-१०,१७-१८;४६:२७ 15अनि याकुब आफ्ने पचत्तर जनको परिवारकाइ लिके मिस्रनाइ जाइले। याकुब र हाम्रो पुर्खालत पुनि उछि बित्ला।#उत ४६:१-७;४९:३३ 16होल्को लासलाइ सकेमनाइ लाकाइके चिहाननाइ धर्ला। ह्व जग्गा चाइ अब्राहामिन हमोरकर बेटाकख्यानकोसिन किन्ल रइल।#उत २३:३-१६;३३:१९;५०:७-१३; यहो २४:३२
17“जब परमेसोरिन अब्राहामसिन गर्ल पर्तिग्या पुरा हक्नार समय नजिक आल्ते तब मिस्र देसनाइ हाम्राइ मान्छेलत सङ्ख्यानाइ बाढिके धेरइ हकिसक्लाइ रइला। 18तब मिस्रनाइ योसेफलाइ बइचिन्नार नयाँ राजान राज्य गरइ लाग्ले।#पर १:७-८ 19होइनिन हाम्रो पुर्खाल्को बिरुद्दनाइ अन्याय र अत्याचार गर्ले। होइनिन इज्राएलिल्को नानिल्काइ जन्मिलेसात मर्दिखन बाजिके जबरजस्ति बाइर फ्याकइ लाइतेल, इनिखे भख्खर जन्मिलाइ सेब्बाइ नानिलत मर्तेला।#पर १:१०-११,२२ 20होइ समयनाइ मोसा जन्मिले। ह्व हेर्तिन ने एकदम मजार रइल र परमेसोरिन होलाइ मन पराइल रल्ति। होक्र आमेक-ब्वाकिन होलाइ तिन महिनासम्म घरनाइ ने नुकाइके धर्ला।#पर २:२ 21तर पछि नुकाइ नसकिकइ घर बाइर लाकाइके धर्तिन फारोकरि बेटेकिन होलाइ लाकाइके आफ्ने बेटाक बानाइके धर्लि।#पर २:३-१० 22मोसान मिस्रनाइ हक्ल सेब्बे कुरो पढ्नार मउका पाइले। मोसा बचन र कामनाइ सक्तिसालि रइल।
23“जब मोसा चालिस बर्सकर हक्ले, तब होइनिन आफ्ने इज्राएलि दाजेक-भाएकख्यानकाइ भेट्टाइ इछ्या गर्ले। 24एक दिन मोसान एउटो मिस्रिन एउटो इज्राएलिलाइ हिर्काइधर्ल देख्ले। होइनिन ह्व इज्राएलिलाइ बाचाइकइ मिस्रिलाइ मारिकइ बदला लिले। 25परमेसोरिन मोर हातबान ने इज्राएलिल्काइ छुट्कारा देइ लाग्लाछ बाजिके आफ्ने मान्छेल्किन बुज्छत हुदो बाजिके मोसान बिचार गर्ल रइल। तर होल्किन ह्य कुरो बइबुज्ला। 26अर्को दिन मोसान दुइटाइ इज्राएलिल्काइ आफि-आफिनाइ झगडा गरिधर्ल देख्ले, र होल्काइ मिलाइनार कोसिस गरिके बल्-ल्याक, ‘तोरा ता दाजेक-भाएक हकिके पुनि किनारइ आपसनाइ झगडा गर्छो?’ 27तर हिर्काइनार इज्राएलिन मोसालाइ हुत्याइतिन बलल्ते, ‘कुनिन तुइलाइ हाइ उप्रान सासक र न्यायधिस बानाइके पाठाइल्यास? 28कानि ह्व मिस्रिलाइ मार्ल जिन्खाए मुइलाइ पुनि तुइ मारइ चाइछस?’ 29इन्खा कुरो सुन्ल पछि मोसा उछ्यान भागिके मिद्दान देसनाइ जाइके बसइ थाल्ले। उछि होक्र दुइटाइ बेटाकलत जन्मिला।#पर २:११-१५;१८:३-४
30“चालिस बर्स बित्ल पछि सिनइ डाँराकर केइ बइहक्नार उजाड ठउँनाइ जिगिधर्ल पोथ्राकर ज्वालानाइ एउटो स्वर्गदुत मोसा हक्लनाइ देखा पर्ले। 31ह्य देखिके मोसा छक्क पर्ले, अनि मजसिन हेरइलाइ नजिक जाइतिन मोसान परमपर्भुकर इन्खा आवाज सुन्ले, 32‘मुइ तोर पुर्खा अब्राहाम, इसहाक र याकुबकर परमेसोर हो।’ ह्य सुनिके मोसा डरिन थरथर कामइ लाग्ले, र होथउने हेर्नार आँट पुनि बइगर्ले। 33तब परमपर्भुन मोसालाइ बलल्ते, ‘तोर गोडकर जुत्ता फुकाल, किनारइभने तुइ ठडाइल ठउँ पबित्र आछि। 34मिस्रनाइ हक्लाइ मोर मान्छेल्को दुख-कस्ट मुइनिन देख्लाछु, र होल्को बिलाप पुनि सुन्लाछु। होल्काइ छुट्कारा देइलाइ मुइ झरिके आइलाछु। ह्य कामकर लागि मुइ तुइलाइ मिस्र देसनाइ पाठाइनारआछु।’#पर ३:१-१०
35“हेइ मोसालाइ इज्राएलिल्किन इन्खा बाजिके त्याग्लाइ रइला, ‘कुनिन तुइलाइ हाइ उप्रान सासक र न्यायधिस बानाइके पाठाइल्यास?’ होलाइ ने परमेसोरिन जिगिधर्ल पोथ्रानाइ स्वर्गदुत मार्फत इज्राएलिल्काइ छुट्कारा दिनार सासक बानाइके पाठाल्ते।#पर २:१४ 36मोसान ने होल्काइ मिस्र देसबान बाइर आन्ल्याक र परमेसोरकर पर्तिग्या गर्ल देसनाइ जाइतिन मिस्र देसनाइ, लाल समुन्द्रनाइ र चालिस बर्ससम्म केइ बइहक्नार उजाड ठउँनाइ अचम्मकर काम र चिन्नलत देखाइले।#पर ७:५;१४:२१; गन्ति १४:३३ 37होइ मोसान इज्राएलिल्काइ बल्ल रइल, ‘परमेसोरिन तोराल्को दाजेक-भाएकबान मुइ जिन्खाए एउटो अगमबक्ता तोराल्को लागि पाठाइनारआछ।’#बेब १८:१५,१८ 38इज्राएलिलत केइ बइहक्नार उजाड ठउँनाइ जम्मा हक्तिन मोसा होल्कोसिन रइल। स्वर्गदुत सिनइ डाँरानाइ मोसासिन बाज्नार गर्तेल, र होइनिन पाइल जिबन दिनार बचन हाइलाइ सुनाइतेल।#पर १९:१—२०:१७; बेब ५:१-३३
39“तर हाम्रो पुर्खाल्किन मोसाकर आग्या पालन गरइ इन्कार गर्ला, र होल्किन मोसालाइ छाडिके मिस्र देसनाइ ने फर्किनार मन गर्ला। 40होल्किन हारुनलाइ इन्खा बल्ला, ‘हाम्रो लागि हाइलाइ बाट देखाइनार देउता बानाइदेउ, किनारइभने हाइलाइ मिस्रबान निकालिके आन्नार ह्व मोसालाइ केति हकल्ते हाइलाइ था बइने।’#पर ३२:१ 41ह्व पछि होल्किन एउटो बाछाकर मुर्ति बानाइके बलि चाराइला, र आफ्ने हातकर कामनाइ खुसियालि मानाइला।#पर ३२:२-६ 42होइहुदान परमेसोरिन होल्काइ त्याग्ले र आकासनाइ हक्ल तारामन्डलकाइ पुज्दिखन बाजिके छाड्दिल्याक। अगमबक्ताल्किन धर्मसास्तरनाइ इन्खा लेख्लाछत,
‘हे इज्राएलकराइ मान्छे हो,
केति तोराल्किन चालिस बर्ससम्म
केइ बइहक्नार उजाड ठउँनाइ मुइलाइ पसु बलि र भेटि चाराइलो?
43तोराल्किन मोलेख देउताकर पाल,
र रेफन देउताकर तारा आकारकर मुर्तिलाइ बोकिके लाकाइलो।
ह्व तोराल्किन ने पुजा गरइलाइ बानाइल मुर्ति रल्ति।
होइहुदान मुइ तोराल्काइ दन्ड देइलाइ बेबिलोन भन्दा पुनि बद्दुर पाठाइनारआछु।’#आमो ५:२५-२७
44“हाम्रो पुर्खाल्कोसिन केइ बइहक्नार उजाड ठउँनाइ परमेसोर उपस्थित हक्नार पबित्र पाल रल्ति। मोसान ह्व पबित्र पाल परमेसोरिन देखाइल नमुना अन्सार ने बानाइल रइल।#पर २५:९,४० 45परमेसोरिन ह्य देसनाइ बस्नाराइ आने जातिराइ मान्छेल्काइ खेद्ले र यहोसुन ह्य देस जितिकइ लितिन होल्किन ह्व पबित्र पाल ह्य देसनाइ आन्ला। ह्व पबित्र पाल दाउद राजाकर पालोसम्म रल्ति।#यहो ३:१४-१७ 46दाउदिन परमेसोरकर किर्पा पाइले, र याकुबकर परमेसोरकर लागि एउटो पबित्र मन्दिर बानाइनार अनुमति माङ्ले।#२समु ७:१-१६; १इति १७:१-१४ 47तर परमेसोरकर लागि पबित्र मन्दिर चाइ सोलोमनिन बानाइले।#१रा ६:१-३८
48“तर सेब्बाइ भन्दा महान परमेसोर मान्छेल्किन बानाइल मन्दिरनाइ बइबस, अगमबक्तान इन्खा बाज्लाछ,
49परमपर्भु बाज्छइ, ‘स्वर्ग मोर सिहासन हो,
र धर्ति मोर पाउदान हो।
तोराल्किन मोर लागि किन्खा मन्दिर बानाइछो?
मोर बिस्राम गर्नार ठउँ कछि हो?
50केति ह्य सेब्बे थोक मुइनिन ने बानाइल बया र?’#यस ६६:१-२
51“हे अट्टेरि मान्छे हो, तोराल्को हिर्दय आने जातिल्को जिन्खाए कठोर र कान बइरा हक्लाछि, तोराल्किन सदइ पबित्र आत्माकर बिरोद गर्छो। तोराल्को पुर्खाल्किन जिन्खाए गर्ला तोरा पुनि उन्खाए गर्छो।#यस ६३:१० 52तोराल्को पुर्खाल्किन कुन्टो अगमबक्तालाइ चाइ बइसताइला? परमेसोरकर धर्मि जन आइतिन आछ बाजिके खबर सुनाइनार अगमबक्तालाइ समेत होल्किन मार्ला। तोराल्किन चाइ आइल परमेसोरकर धर्मि जनलाइ ने धोका दिके मार्लो।#मति ५:१२ 53तोराल्किन स्वर्गदुतिन दिल परमेसोरकर नियम ता पाइलो, तर ह्व पालन बइगर्लो।”
इस्तिफनसलाइ पाथरिन हिर्काइके मार्लाइ
54जब होल्किन इस्तिफनसकर कुरो सुन्ला तब होलत रिसिन चुर हक्ला र दारा किटइ लाग्ला। 55तर इस्तिफनस पबित्र आत्मान भरिपुर्न हकिके स्वर्गदिस एकडिस लाइके हेर्ले, अनि परमेसोरकर महिमा र येसुलाइ परमेसोरकर दाइनेपटि ठडाइधर्ल देख्ले। 56होइनिन बाज्ले, “हेरो, मुइ स्वर्ग उघ्रिल र मानुसकर बेटाकलाइ परमेसोरकर दाइनेपटि ठडाइधर्ल देख्तिन आछु।”
57तर होलत बड्खो सोरिन साराइतिन उठ्ला, र आ-आफ्ने कान थुन्ला, अनि होलाइ एकेचोटि झम्टिला। 58होल्किन इस्तिफनसलाइ पाथरिन हिर्काइके मारइकर लागि घिस्याइतिन सहर बाइर लाकाइला। साछिकिन आफ्ने-आफ्ने लुगा फुकालिकइ साउल नाउँ हक्ल छोडारिकर गोडनेरि धर्ला, र पाथरिन हिर्काइ लाग्ला। 59होल्किन पाथरिन हिर्काइधर्तिन इस्तिफनसिन पार्थना गर्ले, “हे पर्भु येसु, मोर आत्मालाइ सुइकार गर।” 60ह्व पछि होइनिन घोडा टेकिके बड्खो सोरिन बाज्ले, “हे पर्भु, ह्य पापकर दोस हेल्काइ जुन्लाग्दिक।” ह्य बाजिके होइनिन आफ्ने परान त्याग्ले।
Currently Selected:
पेरित 7: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
