पेरित 8
8
साउलिन बिस्वासिल्काइ सताइल
1मान्छेल्किन इस्तिफनसलाइ पाथरिन हिर्काइके मार्तिन साउल पुनि सहमत रइल। होइ दिनसिन यरुसलेमनाइ हक्ल मन्डलिकर बिरुद्दनाइ बड्खो सतावट सुरु हकल्ते, होइहुदान पेरितलत बाएक आने सेब्बाइ बिस्वासिलत भागिके यहुदिया र सामरिया छेत्रनाइ छरपस्ट हक्ला। 2इस्तिफनसलाइ मार्लनाइ पर्भुकराइ केइ सेबककिन बड्खो बिलाप गर्तिन होक्र लास लाकाइके चिहाननाइ गड्काइला। 3तर साउलिन चाइ मन्डलिलाइ नास गर्नार कोसिस गर्तिन रइल। होइनिन घर-घरनाइ पसिके पर्भुनाइ बिस्वास गर्नाराइ अडे र बेटिकाइ घिस्याइतिन लाकाइके झ्यालखन्डनाइ थुन्दितेल्याक।#पे २२:४-५;२६:९-११
फिलिपिन सामरियानाइ पर्चार गर्ल
4तब ह्व छरपस्ट हक्लाइ बिस्वासिल्किन चारेपटि जाइके पर्भुकर बचन सुनाइ लाग्ला। 5फिलिप चाइ सामरियाकर सहरनाइ जाइके येसु ने मुक्ति दिनार खिरिस्ट हो बाजिके पर्चार गर्ले। 6फिलिपिन बाज्ल बचन सुनिके र होइनिन गर्ल अचम्मकर काम देखिके भिडकराइ सेब्बाइ मान्छेल्किन एउटे मनकर हकिके होक्र कुरो ध्यान दिके सुन्ला। 7धेराइ मान्छेल्कोबान भुत आत्मालत बड्खो सोरिन चिच्याइतिन निस्कइ लाग्ला, अनि पछ्यघातिलत र कुजोलत पुनि बिसेक हक्ला। 8होइहुदान ह्व सहरकराइ मान्छेलत एकदम आनन्दित हक्ला।
9ह्व सहरनाइ सिमोन नाउँ हक्ल एउटो मानुस रइल। होइनिन पइलादेखि ने सामरिया सहरनाइ जादु देखाइके उछिराइ मान्छेल्काइ दङ्ग पार्ल रइल, र आफिलाइ बड्खो हो बाजिके ठान्तेल। 10ह्व मानुसलाइ उछिराइ स्याउनाइ-बुङ्डाइ सेब्बाल्किन इन्खा बाजिके मान्तेला, “ह्य मानुस परमेसोरबान बड्खो सक्ति पाइल मानुस हो।” 11धेरइ समयदेखि ने होइनिन आफ्ने जादुन मान्छेल्काइ दङ्ग पार्ल हुदान सेब्बाल्किन होलाइ मान्तेला। 12तर जब फिलिपिन परमेसोरकर राज्यकर बारेनाइ र येसु खिरिस्टकर नाउँकर बारेनाइ सुसमचार सुनाइले तब धेराइ मान्छेल्किन फिलिपकर कुरोनाइ बिस्वास गर्ला, र अडे र बेटिल्किन बप्तिस्मा लिला। 13सिमोनिन पुनि बिस्वास गर्ले, र बप्तिस्मा लिले। ह्व फिलिपसिन हिनइ लाग्ले, र फिलिपिन गर्ल अचम्मकर काम र चिन्नलत देखिके ह्व छक्क पर्तेल।
14सामरियाकराइ मान्छेल्किन परमेसोरकर बचन सुइकार गर्ला बल्ल सुनिके यरुसलेमनाइ हक्लाइ पेरितकिन पत्रुस र युहन्नालाइ उछि पाठाइला। 15होलत उछिका आइके पर्भुनाइ बिस्वास गर्लाइ मान्छेल्किन पबित्र आत्मा पाइदिखन बाजिके पार्थना गर्ला। 16किनारइभने ह्व बेलासम्म कुन्नुल्किन पुनि पबित्र आत्मा पाइलाइ बइरइला। होल्किन पर्भु येसुकर नाउँनाइ बप्तिस्मा मात्र पाइलाइ रइला। 17तब पत्रुस र युहन्नान आफ्ने हात होलत उप्रान धर्ला, र होल्किन पबित्र आत्मा पाइला।
18पेरितकिन हात धर्तिन पबित्र आत्मा पाइनार रइलेसे बाजिके सिमोनिन देख्ले, र होल्काइ पइसा दितिन बल्-ल्याक, 19“मुइलाइ पुनि ह्य सक्ति देउ, मुइनिन जुन मान्छे उप्रान हात धर्तिन पुनि होइनिन पबित्र आत्मा पाइदिक।”
20तर पत्रुसिन बलल्ते, “तोर पइसा तुइसिन ने नस्ट हक्दिक, किनारइभने तुइनिन परमेसोरकर बरदानलाइ पइसानाइ किनइ सक्छे बाजिके बिचार गर्लइ। 21तोर मन परमेसोरकर अगाडि ठिक बइरल्तिसइ, होइहुदान ह्य सेवानाइ तोर केइ भाग बइने र हिस्सा पुनि बइने। 22अब तोर ह्य दुस्ट बिचारलाइ मानिलिके छाड र पर्भुसिन पार्थना गर। सायद होइनिन तोर इन्खा बिचारलाइ छेमा दिछइ हुदो। 23मुइ तुइलाइ एकदम डाहन भरिल र पापकर बन्धननाइ पर्ल देख्छु।”
24ह्य सुनिके सिमोनिन बाज्ले, “तोराल्किन बल्ल ह्य सेब्बे कुरो मुइउप्रान जुनआइदिक बाजिके तोराल्किन ने मोर लागि पर्भुसिन पार्थना गर्देओ।”
25अनि पत्रुस र युहन्नान आफ्ने साछि र पर्भुकर बचन सुनाइसक्ल पछि सामरिया छेत्रकर धेरे गाउँनाइ सुसमचार पर्चार गर्तिन यरुसलेम फर्किला।
फिलिप र इथियोपियाकर नपुङ्सक
26एक दिन परमपर्भुकर स्वर्गदुतिन फिलिपलाइ बलल्ते, “उठ र यरुसलेमबान दछिन पटि गाजादिसउने जाइनार उजाड केइ बइहक्नार ठउँकर बाटनाइ जा।” 27अनि फिलिप उठिके जाइले र एउटो इथियोपियाकर नपुङ्सकलाइ भेट्टाल्ते। ह्व इथियोपिया देसकरि बड्खि रानि कन्दाकिकर सेब्बे सम्पतिकर जिम्मा पाइल बड्खो अधिकारि रइल। ह्व यरुसलेमनाइ जाइके परमेसोरकर आराधना गरिके घरदिस फर्कितिन रइल। 28ह्व आफ्ने रथनाइ बसिके यसइया अगमबक्ताकर किताब पढिधर्ल रइल। 29तब पबित्र आत्मान फिलिपलाइ बलल्ते, “जा र ह्व रथकर साथ लाग।” 30फिलिप कुत्तिन रथकर छेउनाइ पुग्ले, र यसइया अगमबक्ताकर किताब पढिधर्ल सुनिके फिलिपिन सोदल्ते, “तुइनिन पढिधर्ल कुरो बुज्छस?”
31नपुङ्सकिन बाज्ले, “कुन्नुल्किन नबुझाइकइ मुइ किनिखे बुज्छु?” अनि होइनिन फिलिपलाइ रथनाइ चडिके आफिसगिन बसइ बिन्ति गर्ले। 32ह्व नपुङ्सकिन पढिधर्ल धर्मसास्तरकर खन्ड ह्य रल्ति,
“ह्व काटइ लाकाइल भेडि जिन्खाए रइल,
अथवा उन काट्तिन चुप लाग्नार थुमा जिन्खाए,
होइनिन आफ्ने मुख बइखोल्ले।
33होइनिन अपमानित अबस्तानाइ न्याय बइपाइले।
होक्र सन्तानकर बारेनाइ कुनिन बाजइ सक्छइ?
किनारइभने होलाइ मान्छेल्किन मार्ला।”#यस ५३:७-८
34तब नपुङ्सकिन फिलिपलाइ बलल्ते, “दया गरिके मुइलाइ बुजाइदेउ, ह्य कुरो अगमबक्तान कुनकर बारेनाइ बाज्ल हो? आफ्ने बारेनाइ हो कि आने कुनुल्को बारेनाइ?” 35अनि फिलिपिन होलाइ धर्मसास्तरकर होइ खन्डबान येसुकर बारेनाइ सुसमचार सुनाल्ते। 36होलत बाटनाइ जाइतिन-जाइतिन केइ पानि हक्ल ठउँनाइ पुग्ला। नपुङ्सकिन फिलिपलाइ बलल्ते, “इछि पानि रल्तिसइ, केति मुइलाइ बप्तिस्मा लेइ केइ कुरोन रोकइ सक्छइ?”
37[फिलिपिन होलाइ बलल्ते, “यदि सेब्बे हिर्दयदेखि ने बिस्वास गर्छस भने तुइनिन बप्तिस्मा लेइ सक्छस।”
होइनिन बाज्ले, “येसु खिरिस्ट ने परमेसोरकर बेटाक हो बाजिके मुइ बिस्वास गर्छु।”]#८:३७ धेरे जसो सोरोतनाइ ह्य पद लेख्ल बइपाय। होइहुदान इछि इन्खा “[]” कोस्टभित्र लेख्लाछि।
38होइनिन रथ रोकइ लाइले, अनि होलत धेउटाइ झरिके पानि हक्ल ठउँनाइ जाइला, र फिलिपिन होलाइ बप्तिस्मा दिल्ते। 39होलत पानिबान बाइर निस्किके आइलपछि पर्भुकर आत्मान तुरुन्तइ फिलिपलाइ लाकाल्ते, र नपुङ्सकिन फिलिपलाइ फेरि बइदेखल्ते, तर ह्व खुसिन रामाइतिन आफ्ने बाट लाग्ले। 40तब फिलिप अस्दोदनाइ देखा पर्ले, र कइसरिया नपुगुन्जेलसम्म सेब्बे सहरनाइ सुसमचार सुनाइतिन जाइले।
Currently Selected:
पेरित 8: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
