पेरित 6
6
सातुटाइ सेबकलत छानिलाइ
1ह्व दिननाइ चेलाल्को सङ्ख्या बाढ्तिन जाइल रल्ति, बाढ्तिन जाइतिन हिब्रु भासा बाज्नाराइ यहुदिल्को बिरुद्दनाइ गिरिक भासा बाज्नाराइ यहुदिल्किन गनगन गर्ला, किनारइभने दिन्ने खाइनार कुरो बाड्तिन हाम्राइ बिद्दुइको मजसिन वास्ता बइगर्ला बाजिके गिरिक भासा बाज्नाराइ यहुदिल्को भनाइ रल्ति। 2तब बार पेरितकिन सेब्बाइ चेलाल्काइ बालाइके बल्-ल्याक, “ख्वाइपि गर्नार कामनाइ लागिकइ परमेसोरकर बचन पर्चार गरइ छाडइ हाइलाइ उचित बइहक। 3होइहुदान दाजि-भाइ हो, तोराल्को माजबान पबित्र आत्मा र बुद्दिन भरिलाइ र सेब्बाल्को आदर पाइलाइ सात जनकाइ छानो। हाइ ह्य कामकर जिम्मा होल्काइ दिनारआछे। 4तर हाइ चाइ पार्थना र बचन पर्चारकर सेवानाइ सेब्बे समय दिनारआछे।”
5ह्य कुरो समुहकराइ सेब्बाल्काइ मन पर्ल्याक, अनि होल्किन बिस्वास र पबित्र आत्मान भरिपुर्न हक्ल इस्तिफनसलाइ छान्ला र सङ्सगे फिलिप, पर्खरस, निकनोर, तिमोन, पर्मिनास र एन्टिओखिया सहरकर यहुदि धर्मनाइ आइल निकोलाउसलाइ छान्ला। 6होल्किन छान्लाइ ह्व सातुटाकाइ पेरितको अगाडि आन्ला र पेरितकिन पार्थना गर्ला र होलत उप्रान आफ्ने हात धर्ला।
7परमेसोरकर बचन फइलितिन जाल्ते र चेलाल्को सङ्ख्या यरुसलेमनाइ एकदम बाढ्तिन जाल्ते। धेराइ पुजारिल्किन पुनि येसुनाइ बिस्वास गर्ला।
इस्तिफनसलाइ आठाइलाइ
8इस्तिफनस अनुगरह र सक्तिन भरिपुर्न हकिके मान्छेल्को माजनाइ अचम्म-अचम्मकर काम गर्तिन चिन्नलत देखाइतेल। 9तर स्वतन्तर बाज्नार सभाघरकराइ कत्ता मान्छेल्किन चाइ इस्तिफनसकर बिरोद गरइ लाग्ला। होलत कुरेनि र अलेक्जेन्डिरिया सहर, किलिकिया र एसिया छेत्रकराइ यहुदिलत रइला। होलत सेब्बाइ मिलिके इस्तिफनसिन बाद-बिबाद गरइ लाग्ला। 10जब इस्तिफनसिन पबित्र आत्माकर सक्ति र बुद्दिन बाज्तेल तब होल्किन इस्तिफनसकर बिरोद गरइ बइसक्तेला। 11होल्किन केइ मान्छेल्काइ खुसुक्क उस्काइके इन्खा बलइ लाइल्याक, “ह्य मानुसिन मोसा र परमेसोरकर बिरुद्दनाइ बाज्ल हाइनिन सुन्ले।” 12तब होल्किन जनता, अगुवा र धर्म-गुरुल्काइ पुनि उस्काइला र होल्किन इस्तिफनसलाइ आठाइके महासभाकर अगाडि आन्ला। 13ह्व पछि होल्किन झुटो साछिकाइ अगाडि सार्ला र होल्किन बाज्ला, “ह्य मान्छेन ता पबित्र मन्दिर र मोसान लेख्ल नियमकर बिरुद्दनाइ बाज्नार गर्छइ। 14नासरतकर येसुन ह्य मन्दिरलाइ भत्काइनारआछ र मोसान हाइलाइ दिल रितिथिति पुनि परिबर्तन गर्नारआछ बाज्ल हाइनिन सुन्ले।” 15महासभानाइ बस्लाइ सेब्बाल्किन इस्तिफनसलाइ एकडिस लाइके हेर्ला, र होक्र अनुहार स्वर्गदुतकर अनुहार जिन्खाए देख्ला।
Currently Selected:
पेरित 6: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
