लुका 18
18
बिध्वा आउँ नियाँधिसक् खिसा
1येसुइ चेलालकलाइ साँद्धाउनि पाराथ्ना कर्बा पोर्लाहार आउँ निरास बुन् भेबा बाजिहिन् बुझाबाक्लाइ ओहिं एक्टा खिसा सुनालाहा, 2“कुन्हुँ एक्टा सहरै एक्जेना नियाँधिस रैल्हक्। ओहिं परमेस्वरक् डर नहिंमानै आउँ मानुसुहुँक्लाइ वास्ता नहिंकरेथ। 3उहे सहरिहिमा एक्टा बिध्वा आको रैल्हक्। ओहिं घरि-घरि नियाँधिसक् ठालाइ जाहिन् बोलेक्, ‘मोरा आउँ मोरा बिरोधिक् बिचै नियाँ करिदे।’ 4कट्का दिनसम्म ता ओहिं बिध्वाक् कहिने नहिंसुनिदेलकुन्। तर पाछुसे ओहिं आफ्नि मनमने बाज्लक्, ‘मुँइ परमेस्वरक् डर नामानम्। आउँ मानुसुहुँक् वास्ताउ नाहाँकरम्। 5तर यहिं मोरालाइ एक्दमे हैरान काराओगे, उहे सिहिरे मुँइ यक्राक् नियाँ करिदेमिना, नाटेन् ता यहिं आइबानाइ मोरालाइ एकेहोरि बोल्लोक्-बोल्लोय करिबानाइ मोरानि वाक्कय पारैस्!’”
6तसौ पर्भुइ बोल्लाहा, “उ गाभि नियाँधिसक् कहिन् सम्झह। 7उहेरङ् करिहिने किस् दिन-रात परमेस्वरक् नाउँ पुकार्लाहार आफ्निक् मानुसलकलाइ ओहिं अन्यायक्भटे ना जोगाओइ ते? किस् ओहिं आफ्नि चुन्ल मानुसलकलाइ मदप कर्बा ढिलो करइस् भेकाते? 8मुँइ तोहोरालाइ बोल्मेहेर्ला, ओहिं आफ्निक् मानुसलकलाइ तुरुन्ते अन्यायक्भटे जोगायट्थ्ला। भेटौसुधा मानुसक् बेटायक आइटे बेलाइ किस् ओहिं पिर्थिबिमाहा ओक्रालाइ बिस्वास कर्लाहारलक् भेंटाबगे ते?”
फरिसि आउँ तिरो उठालाहारक् खिसा
9आफ्निलाइ माटेन् धर्मि सम्झलाहार आउँ ओर्कोलकलाइ किच्छुय नहिंठान्ल्हाहार मानुसलकलाइ येसुइ यन्हिं बाजिहिन् एक्टा खिसा सुनालाहा, 10“एक्बाजि दुइजेना मानुसलक् मन्दिरै पाराथ्ना कर्बा जाइलुहुन्, एक्जेनासेहे फरिसि आउँ ओर्कोसेहे तिरो उठालाहार। 11तसौ फरिसिसेहे उठिबानाइ आफ्निक् बिसइमा यन्हिं बाजिहिन् पाराथ्ना कर्लक्, ‘हे परमेस्वर, मुँइ तोरानि धन्यबाट देमेर्ला, किसाबुने मुँइ ओर्को मानुसलकक् परौ लोभि आउँ बइमानि बोइने। मुँइ बेबिचार नाहाकरम्। मुँइ उ तिरो उठालाहार ठघक् परौ बोइने। 12मुँइ साताय-पिच्छे दुइ बाजि बर्त बसम्ना आउँ मोरा आयस्ताक् सेब्थोकोक्भरे दस भागक् एक भाग तोरालाइ देलधरम्ना।’ 13तर उ तिरो उठालाहार मानुससेहे टार्होय ठध्याइबानाइ स्वर्गोक्पटि दिठाबाक् आँटसम्मउ नहिंकरिहिन् छाति पिटि-पिटि यन्हिं बाज्लक्, ‘हे परमेस्वर, मुँइ पापिक् उप्रै दाया कर्’!” 14तसौ येसुइ आफ्निक् कहिन् सक्बाक्टाकै यन्हिं बोल्लाहा, “मुँइ तोहोरानि बोल्मेहेर्ला, उ फरिसिसेहे बोइने बरुस् तिरो उठालाहार यि मानुससेहे परमेस्वरक् आगारि सहि ठहरिबानाइ घर जाइलक्। किसाबुने जैहिं आफ्निलाइ बर्के बानाट्थ्ला, उखर्ह्वा जम्मा होच्याइजाट्थ्ला, तर जैहिं आफ्निलाइ होच्याट्थ्ला, उखर्ह्वा बर्के बानाइजाट्थ्ला।”#मत्ति २३:१२; लुका १४:११
येसु आउँ छोट्-छोटे केराकुटिलक्
(मत्ति १९:१३-१५; मर्कुस १०:१३-१६)
15येसुइ आफ्निक् हाथे छुहिन् आसिक् देउस् बाजिहिन् मानुसलके आफ्निक् छोट्-छोटे केराकुटिलकलाइ ओक्राक्ठालाइ आन्लाहा। यि देखिहिन् चेलालके उखर्ह्वालाइ हप्कालाहा। 16तसौ येसुइ उखर्ह्वानि आफ्निक्ठालाइ हाँख्राहिन् बोल्लाहा, “केराकुटिलकलाइ मोराठालाइ आबादेहो, उखर्ह्वालाइ बुन् छेंकहखान् किसाबुने परमेस्वरक् राज्जे ता यहेरङे केराकुटिलकक् परओक् लागिय हो। 17साँच्चिय मुँइ तोहोराखर्ह्वालाइ बोल्मेहेर्ला, जैहिं एक्टा बालखक् परौ परमेस्वरक् राज्जेलाइ सुइकार नाकरथ्, उ मानुस कुन्हुँ उपाइसौ ओक्राक् भिटर पोस्बा नापाओइ।”
धनि मानुसक् समस्या
(मत्ति १९:१६-३०; मर्कुस १०:१७-३१)
18कुन्हुँ एक्जेना यहुदि सासक आइबानाइ येसुलाइ सोर्ल्होकुन्, “तुँइ राम्रो गुरु रहस्ला, अजम्मरि जिबन पाबाक्लाइ मुँइ किवा कर्बा पोरेका?”
19तसौ येसुइ ओक्रालाइ बोल्लोकुन्, “तुँइ किसा मोरानि राम्रो बाजस्ला? एक माटेन् परमेस्वर बाहेक कुन्हुँय राम्रो बोइने। 20परमेस्वरक् नियमक् आग्यालक् ता तोरानि थाहाय रहेस्ला, बेबिचार बुन् कर्बा, हत्या बुन् कर्बा, बुन् चोराबा, झुँट्ठा साछि बुन् देबा, आउँ महँटार-बाप्पोक् मान कर्बा।”#प्रस्थान २०:१४-१६; ब्यबस्था ५:१६-२०
21ओहिं जुबाप देलक्, “यि सेब्भ्रोउ आग्या ता मुँइ छोट्के बेलाहिंसौ मान्तिहि आइल रहम्ना।”
22तसौ यि सुनिहिन् येसुइ ओक्रालाइ बोल्लोकुन्, “तुँइ अज्झउ एक्टा काम कर्बाक् बाँकि रहेस्ला। तोरासङ्हिं भेल सेब्भ्रोउ थोक् बेंचिहिन् गरिपलकलाइ बाँटिदेहिखान्, आउँ तुँइ स्वर्गोक् धन पास्ला, तसौ आइबानाइ मोरा पाछु लाग।” 23तर यि कहिन् सुनिहिन् ओक्राक् मन एक्दमे खिन्न भेलकुन्, किसाबुने उ असाध्य धनि रैल्हक्।
24ओक्राक् मन खिन्न भेल देखिहिन् येसुइ बोल्लोकुन्, “देखैबे, धनि मानुसलाइ परमेस्वरक् राज्जेइ पोस्बाक् कट्का अफ्ठ्यारो रहेला! 25किसाबुने धनि मानुसलाइ परमेस्वरक् राज्जेइ पोस्बाक् भन्दा ता बरुस् उँटलाइ टिप्निक् छेंरक्भटे छिंर्बाक् सजिलो भेला।”
26तसौ यि कहिन् सुन्लाहारलके ओक्रालाइ सोर्ल्हिहिंक्, “ओरोङ् भेने कुनेग्वाइसेहे मुक्ति पाबा पार्बुकाते?”
27येसुइ उखर्ह्वालाइ जुबाप देलाहा, “मानुसलकक् लागि भेबाय नहिंपार्लाहार काम भेटौ परमेस्वरक्भटे सेहे उ काम भेबा पारेला।”
28तसौ पत्रुसे बाज्लक्, “दिठाउ, हामि आफ्निक् घरबार छारिहिन् तोरालाइ पछ्याल धहुँक्ला।”
29तसौ येसुइ उखर्ह्वालाइ बोल्लाहा, “साँच्चिहिंक् मुँइ तोहोराखर्ह्वालाइ बोल्मेहेर्ला, परमेस्वरक् राज्जेक् लागि जैहिं आफ्निक् महँटार-बाप्पो, दाजुभाइ, बहु, छावापुटा, आउँ घरबार छार्ल धरैस्, 30यिहे जिबनिहिंमा ओहिंसौ धेरेक्कुर पाइस्, तसौ आबाक् लाग्ल जुगइसेहे अजम्मरि जिबन पाइस्।”
येसुइ फेरि आफ्निक् मरनक् बिसइमा भबिस्यबानि कर्लक्
(मत्ति २०:१७-१९; मर्कुस १०:३२-३४)
31येसुइ बार्हजेना चेलालकलाइ छुट्टाय ठाँओइ लेगाहिन् बोल्लाहा, “सुनहँ, हामि यरुसलेम जाइतिहि रहुँक्ला। असौ अगमबक्तालके मानुसक् बेटाहिंकक् बिसइमा लेख्ल जम्मा कहिनलक् ओछि पुरा भेलाबे। 32उ अर्जातिलकक् हाथमाहा पोरोइस्। उखर्ह्वाइ ओक्रालाइ हँस्थिला, बेज्जत कर्थिला, थुक्थिला। 33उखर्ह्वाइ ओक्रानि कोर्रा लागाथिला आउँ मार्थिला। भेटौसुधा उ तिन दिनमाहा फेरि मोर्लोक्भटे जिउँटिहिन् उठैस्।”
34तर चेलालके यि कहिनलक् किच्छुय नहिंबुझ्बा पार्लुहुन्। किसाबुने यि कहिनक् अर्थ उखर्ह्वाक् लागि नुकालय रैल्हाहा। उहेसैर्हे यि कहिन् उखर्ह्वाइ सोंच्बाय नहिंपार्लुहुन्।
येसुइ एक्जेना अन्धा भिखारिलाइ राम्रो पार्लक्
(मत्ति २०:२९-३४; मर्कुस १०:४६-५२)
35येसु यरिहो सहरक् लज्जिकै पुग्लक्। ओछि एक्जेना अन्धा मानुस पैंदाक् छेंओइ भिख माङिबानाइ बस्ल रैल्हक्। 36धेरेक्कुर मानुसलक् जाइतिहि रैल्ह थाहा पाइबानाइ उ अन्धा माङ्लाहारे सोर्ल्होकुन्, “बोइने, किवा भेइतिहि रहेला हाँ?”
37मानुसलके ओक्रानि बोल्लिहिंक्, “नासरतक् येसु यत्तिहिभटे जाइतिहि रहैस्।”
38तसौ यि सुनिबानाइ उ अन्धा मानुसे चिच्याहिन् बोल्लोकुन्, “हे येसु, दाउदक् बेटायक! मोरा उप्रै दाया कर्!”
39आघु-आघु हिंठ्लाहारलके ओक्रालाइ बुन् साराउ बाजिहिंन् हप्कालिहिंक्। भेटौ ओहिं झन् बर्के चोटे चिच्याहिन् बोल्लोकुन्, “हे दाउदक् बेटायक! मोरा उप्रै दाया कर्!”
40तसौ येसु जाइतिहि-जाइतिहि ठिङ्ङ ठड्ध्यालक्, आउँ ओक्रालाइ यछि मोराठालाइ आनहक् बाजिहिन् बोल्लाहा। तसौ उ अन्धा मानुस आइलक् आउँ येसुइ ओक्रालाइ सोर्ल्होकुन्, 41“तोरा लागि मुँइ किवा कर्बा ते, बाज?”
ओहिं बाज्लक्, “पर्भु, मुँइ आँखे देख्बा पाउस्।”
42तसौ येसुइ ओक्रानि बोल्लोकुन्, “तुँइ आँखे देख्बा पार्लाहार भेउ। तोरा बिस्वासे तोरानि राम्रो पार्ल धरेस्ला।”
43उहे बेलाहिंमा उ मानुस आँखे देख्बा पार्लाहार भेलक्, आउँ परमेस्वरक् पर्सन्सा कर्तिहि येसुक् पाछु लाग्लक्। यि देखिबानाइ जम्मा मानुसलके परमेस्वरक् पर्सन्सा कर्लुहुन्।
Currently Selected:
लुका 18: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
