लुका 17
17
पाप आउँ छेमा
(मत्ति १८:६-७,२१-२२; मर्कुस ९:४२)
1येसुइ आफ्निक् चेलालकलाइ बोल्लाहा, “साँच्चिय मानुसलाइ पापमाहा फाँसालाहार कहिनलक् ता आइहालेला, तर धिक्कार भेउस्, अर्कालाइ पापमाहा फाँसालाहार मानुसलाइ! 2यि चुटुनाइ केराकुटिलक्मध्येमा एक्टाहुलाइ पापै फाँसाबाक् मौका जुन् पाउस् बाजिहिन् पापै फाँसालाहार मानुसलाइ ता आगारिय ओक्राक् घेंचाइ जाँटा झुराइबानाइ समुन्रइ घुघाइपाठाल ओक्राक् लागि राम्रो भेइटकुन्। 3उहे सिहिरे हस् करह!
“तोरा भाइर्हे पाप कर्ल भेइबुने ओक्रालाइ सम्झाहिंक्। ओहिं आफ्नि कर्ल पापलाइ मानिलेहिन् छारिगलक् बुने, ओक्रानि छेमा देहिक्।#मत्ति १८:१५ 4तोरा भाइर्हे तोरा बिरोधइ दिनै सात फेरा पाप करेटौ ओहिं तोराठालाइ आइबानाइ सातौ फेरा आफ्नि कर्ल पाप मानिलेहिन् माफ माङिगलक् बुने, ओक्रानि छेमा देहिक्।”
बिस्वास
5बार्होजेना चेलालके येसुलाइ बोल्लिहिंक्, “पर्भु, हाम्रा बिस्वास बार्हाइदे।”
6येसुइ उखर्ह्वानि जुबाप देलाहा, “तोहोराखर्ह्वाक् ठालाइ रायोक् एक गेराक् जट्केरि बिस्वास रेहेर्ला भेइबुने यि टुँइटक् गाछलाइ ‘उप्किबानाइ तुँइ समुन्रइ घुघाइ जा’ बोलिबुने ओउहुँ मानिदेहेर्ला।
चाकरे कर्बा पोर्लाहार काम
7“तोहोराखर्ह्वा कुन्हुँइ आफ्निक् चाकरेहार खेतक्भटे होर जोटिहिन् आउँ भेंरा चार्हाहिन् घर आहेबिट्के ‘चान्चारो आहिन् खाबा बस्’ बाजिहिन् बोलोहोला ते? 8बर्सक ता यन्हिंसेहे ते बोलोहोला, ‘जा, मोरा लागि खाबाकथोक् पाकाउ आउँ पाकाहिन् सक्नेसौ तुँइ तियार भेहिन् मोरानि खाबाक् आन्, आउँ मुँइ खाइ-पिइ करिहिन् नहिंसिधाबासम्म मोरा सेवा कर्, तसौ माटेन् तुँइ खाइ-पिइ कर्ब्या।’ 9आर्हाल कहिन् मान्लसैर्हे किस् तुँइ उ चाकरलाइ स्याबास बाजिहिन् बोल्सिला ते? 10उहेरङ् करिहिन् तोहोराखर्ह्वाइ आको आफ्निलाइ आर्हाल जम्मा काम करिहिन् सक्नेसौ बाजह, ‘हामि ता किच्छुय बोइने, हामि चाकर माटेन् रहुँक्ला, हामि ता आफ्नि कर्बा पोर्लाहार कामलक् माटेन् कर्ल धरुहुँक्ला’।”
दसजेना माहारोग लाग्ल मानुसलक् राम्रो भेल
11येसु यरुसलेम जाइतिहि कर्लटाकै सामरिया आउँ गालिल पर्देसक् साँर्ह् पोर्न्या करिहिन् जाइलक्। 12उहेटाकै एक्टा गाँओमा पोस्लोटाकै दसजेना माहारोग#१७:१२ माहारोग: माहारोग लाग्ल मानुसलकक्सङ्हिं लज्जिकै जाबा नहिंभेलाहार रैल्हकुन्। (लेबि १३:४६) लाग्ल मानुसलकक्सङ्हिं येसुक् भेंट भेलकुन्। 13चुटेक् टार्होहिंसौ ठड्ध्याइबानाइ उखर्ह्वाइ चिच्याहिन् बाज्लुहुन्, “हे पर्भु येसु, हाम्रा उप्रै दाया कर!”
14तसौ येसुइ उखर्ह्वालाइ देखिबानाइ बोल्लाहा, “तोहोराखर्ह्वा पुझरिक्ठालाइ जाहिन् आफ्निलाइ जाँचाहो।” तसौ उखर्ह्वा जाइतिहि-जाइतिहि पैंदाहिंमा राम्रो भेइहाल्लुहुन्।#लेबि १४:१-१३
15एक्जेनासेहे आफ्निलाइ राम्रो भेल देखिबानाइ बर्के स्वरे साराहिन् परमेस्वरक् पर्सन्सा कर्तिहि फर्किबानाइ आइलक्। 16आउँ येसुक् टाङमाहा घोप्टो पोरिहिन् धन्यबाट चार्हालक्। उ फर्किबानाइ आइल मानुससेहे सामरि जातक् रैल्हक्। 17तसौ येसुइ बोल्लोकुन्, “दसौजेना राम्रो भेल बोइने ते? ओर्को नौ जेनासे कछि रहट्थ्ला? 18यि अर्जाति मानुस बाहेक ओर्कोलकेसेहे परमेस्वरलाइ धन्यबाट चार्हाबा किसा नहिंआहुन्?” 19ओक्राक्पाछु येसुइ ओक्रानि बोल्लोकुन्, “असौ उठिबानाइ जा, तोरे बिस्वासे तोरालाइ राम्रो पार्ल धरेस्ला।”
परमेस्वरक् राज्जे
(मत्ति २४:२३-२८; २४:३७-४१)
20परमेस्वरक् राज्जे काँहाइ आयला बाजिहिन् फरिसिलके येसुलाइ सोर्ल्हुहुन्। येसुइ उखर्ह्वानि बोल्लाहा, “परमेस्वरक् राज्जे ता आँखे देख्न्या करिहिन् नाँआयक्। 21कुन्हुँहि आको ‘दिठाउ! परमेस्वरक् राज्जे यछि रेहेला,’ अथबा ‘ओछि रेहेला’ बाज्बा नाप्पारेक् किसाबुने परमेस्वरक् राज्जे ता तोहोरे माझै रेहेर्ला।”#१७:२१ परमेस्वरक् राज्जे ता तोहोरे माझै रेहेर्ला: यक्राक् गिरिक भासाइ यन्हिं आको अनुबाद भेबापारेला, “परमेस्वरक् राज्जे तोहोरे भिट्रै रहेला।”
22ओक्राक्पाछु येसुइ आफ्निक् चेलाहिकलकलाइ बोल्लाहा, “ओरोङ् समइ आको आयला, जख्नि तोहोराखर्ह्वाइ ‘मुँइ मानुसक् बेटाहिकक् राज्जेक् एकेदिन् देख्बा पायटौ भेइट्कुन्’ बाजिहिन् बाज्बेहेबे, तर देख्बासेहे नापाहो। 23मानुसलके ‘दिठाहो, उ ओछि रहैस्’ अथबा ‘दिठाहो, उ यछि रहैस्!’ बाजट्थ्ला, तर उटाकै तोहोलेक उखर्ह्वाक् पाछु जुन् लागह। 24किसाबुने मुँइ मानुसक् बेटायक आबाक् दिनै आकासक् चारौपाखा बिजुलि मिलकलक् परौ करिहिन् मुँइ देख्वार पोरोम्ना। 25तर यरङ् भेबाइसौ आगारि मुँइ धेरेक्कुर दुक्ख उठाबा पोर्लाहार रेहेला आउँ यि पुस्ताक् मानुसलके मोरानि त्यागट्थ्ला। 26नोआक् समइमा भेलहिक् परौ मुँइ मानुसक् बेटायक आबाक् समइहुमा उहेरङे भेला।#उत्पति ६:५-६ 27नोआ जाहाज भिट्रइ पोस्बायसम्म मानुसलक् भोज-भट्यार खाहिन् आउँ बिहाउलक् कर्बामाहा भुल्ल रैल्लुहुन्। उहेटाकिहिमा उब्गाहा आहिन् जम्माहिंलाइ नास पार्लाहा।#उत्पति ७:६-२४ 28लोतक् समइमा आको उहेरङे भेल रैल्हकुन्। मानुसलक् खाबाक्-पिबाक्, सरसामान बेचबिखन कर्तिहि रैल्लुहुन्, आउँ मानुसलक् खेतै बालि लागातिहि रैल्लुहुन्, आउँ घर बानाबाक् काम कर्लाहार कर्तिहि रैल्लुहुन्।#उत्पति १८:२०—१९:२५ 29तर लोत सदोम सहरेसौ निस्कलय दिनै स्वर्गोक्भटे आगि आउँ गन्धक् झरिबानाइ उखर्ह्वा जम्माहिंलाइ नास पार्लाहा। 30मुँइ मानुसक् बेटायक फेरि देख्वार पोर्लो दिनै आको उहेरङे भेला।
31“उ दिनै घरक् बार्हटलिमाहा भेलाहार मानुसे किच्छु सरसामान भिट्रै रैल्ह भेइबुने उ थोक् लेबा टर बुन्नाभुस्। उहेरङ् करिहिन् खेतबारिमा भेलाहारलकौ घर बुन् आउस्।#मत्ति २४:१७-१८; मर्कुस १३:१५-१६ 32लोतक् बोइके पाछारि फर्किहिन् दिठाटे नुनक् खाम्भा भेल कहिन् सम्झह!#उत्पति १९:२६ 33जैहिं आफ्निक् जिबन जोगाबाक् खोजइस् ओहिं उ जिबनुहुलाइ गुमाइस्। जैहिं आफ्निक् जिबनलाइ गुमाइस् ओहिं उ जिबन जोगाइस्।#मत्ति १०:३९; १६:२५; मर्कुस ८:३८; लुका ९:२४; यहुन्ना १२:२५ 34मुँइ तोहोराखर्ह्वालाइ बोल्मेहेर्ला, उ रातइ सङ्हिं एकेग्वा बिछौनाइ सुत्लाहार दुइजेना मानुसलक्मध्येमा एक्जेना लेगाइजाइस्, आउँ ओर्कोसेहे ओच्छि छारिजाइस्। 35तसौ सङसङ्हिं जाँटाइ दर्लाहार दुइजेना अइमाइलकुहुमा एक्जेना लेगाइजाइस्, आउँ ओर्कोसेहे ओच्छि छारिजाइस्। 36[उहेरङ् करिहिन् खेतमाहा भेलाहार दुइजेना मानुसलक्मध्येमा एक्जेना लेगाइजाइस्, आउँ ओर्कोसेहे ओच्छि छारिजाइस्।]”#१७:३६ कुन्हुँ-कुन्हुँ आगारकोक् लेखोटलकमाहा यि ३६ पद थप्ल रहेला।
37चेलालके येसुलाइ सोर्ल्हिहिंक्, “हे पर्भु, यि कछि भेला?” येसुइ जुबाप देहिन् बोल्लाहा, “जच्छि सिनो भेला, ओच्छि गिर्ह्लक् जम्मा भेट्थ्ला।”
Currently Selected:
लुका 17: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
