लुका 19
19
तिरो उठालाहार जक्कै
1येसु यरिहो सहर भेहिन् जाइतिहि रैल्हक्। 2ओछि एक्जेना जक्कै नाउँ भेल धनि मानुस रैल्हक्। उसेहे तिरो उठालाहारलकक् हाकिम रैल्हक्। 3येसु बाज्ल कुन्ग्वा भेका बाजिहिन् ओहिं दिठाबाक्लाइ खोज्तिहि रैल्हक्। मानुसलकक् धुइरो रैल्हसैर्हे ओहिं येसुलाइ देख्बा नहिंपार्लकुन्, किसाबुने उ पुर्क्या रैल्हक्। 4उहेसैर्हे येसुलाइ दिठाबाक्नि उ दगर्टे आगारि जाहिन् एक्टा नेभाराक् गाछइ चर्ल्हक्। किसाबुने येसु उहे पैंदा भेहिन् जाइतिहि रैल्हक्। 5जब येसु उ ठाँओइ आइपुग्लक्, तसौ येसुइ उप्रक्पाखा दिठाहिन् बोल्लोकुन्, “अ जक्कै छिट्टो टर नाभिबानाइ आउ! किसाबुने आजु मुँइ तोरा घरै बासो बस्बा पोर्लाहार रहैस्।”
6तसौ जक्कै चान्चारो गाछेसौ नाभिबानाइ येसुलाइ आफ्निक् घरमाहा लेगाहिन् खुस्सिसम् स्वागत कर्लकुन्। 7यरङ् कर्ल देखिबानाइ जम्मा मानुसलक् यन्हिं बाजिहिन् गनगनाबा ठाल्लुहुन्, “यि येसु ता पापि मानुसक् घरै ते बासो बस्बा जाइस् खमक्!”
8तर जक्कैय उठिबानाइ येसुलाइ बोल्लोकुन्, “पर्भु दिठाउ, असौ मुँइ आफ्निक् धनसम्पतिक् आधा भाग गरिपलकलाइ बाँटिहिन् देम्खान्ला, आउँ कुन्हुँ मानुसलाइ ठघिंहिन् किच्छु लेल भेटौ एकक् चार गुना फर्काइ देमिखान्ला।”
9येसुइ ओक्रानि बोल्लोकुन्, “आजु यि घरक्-परिबारे मुक्ति पाइल रहट्थ्ला। किसाबुने यि जक्कै आको अब्राहामिहिक् सन्तान हो। 10किसाबुने मुँइ मानुसक् बेटायक हेर्ललकलाइ खोज्बा आउँ जोगाबाक्लाइ आइल रहम्ना।”#मत्ति १८:११
सोनोक् डब्बल पैसाक् खिसा
(मत्ति २५:१४-३०)
11उखर्ह्वाइ यि कहिनलक् सुन्तिहि कर्लटाकै येसुइ एक्टा खिसा लेहिन् सुनाबा ठाल्लाहा। किसाबुने येसु यरुसलेमक् लज्जिकिहिमा आइपुग्ल रैल्हक् आउँ मानुसलके असौ परमेस्वरक् राज्जे चाँरोय आयला बाजिहिन् बिचार कर्तिहि रैल्हुहुन्। 12येसुइ बोल्लाहा, “एक्जेना बर्के खालक् मानुस आफ्निक् देसक् राजा भेहिन् फर्किहिन् आम्ना बाजिहिन् एक्दमे टार्हो देसइ जाइलक्। 13आफ्निक् दसजेना चाकरलकलाइ हाँख्रालक् आउँ उखर्ह्वालाइ एकुन्गोटा सोनोक् डब्बल पैसा#१९:१३ सोनोक् डब्बल पैसा: उ बेलाइ एक्टा सोनोक् डब्बल पैसाक् मुल्यसेहे एक सइ दिनक् कामाइक् यट्केकुर भेक्। देइबानाइ बोल्लाहा, ‘जख्निसम्म मुँइ फर्किहिन् ना आम यिहेभटे बेपार करह।’ 14तर ओक्रालाइ आफ्निक् देसक् मानुसलकेसेहे मन नहिं पोराठिक्। उहेसैर्हे उ जाहिन् सक्नेसौ पाछु उखर्ह्वाइ यन्हिं बोल्बा मानुसलकलाइ पाठालुहुन्, ‘यि मानुस हाम्रा राजा भेल हामि नाचाहुँक्।’
15“तर उ मानुस राजा भेहिने फर्कलक्। तसौ फर्किबानाइ आइनेसौ ओहिं चाकरलकलाइ बेपार करिबानाइ कट्का नाफा कामाउहेबे बाजिहिंन् सोर्भाक्नि हाँख्रालाहा। 16ओक्राक्ठालाइ आगारि आइलाहार चाकरे बाज्लक् ‘मालिक, तुँइ देल एक्टा सोनोक् डब्बल पैसाइ मुँइ ओर्कोउ दसग्वा सोनोक् डब्बल पैसा कामाहिन् आन्ल धरम्ना।’ 17उ राजाइ ओक्रालाइ बोल्लोकुन्, ‘स्याबास!’ तुँइ एक्दम राम्रो चाकर खमक्! ‘तुँइ चुटुनाइ कहिनुहुँमा बिस्वासिलो भेलसैर्हे असौ मुँइ तोरालाइ ओर्को दसग्वा सहरलकै सासन कर्बाक् अधिकार देमेर्ला।’ 18ओर्को चाकरिहिके आइबानाइके यन्हिं बाज्लक्, ‘मालिक, तुँइ देल एक्टा सोनोक् डब्बल पैसाइ मुँइ ओर्को पाँचग्वा कामाइबानाइ आन्ल धरम्ना।’ 19उ राजाइ ओक्रालाइ बोल्लोकुन्, ‘तुँइ आको पाँचग्वा सहरै सासन कर्बाक् अधिकार पास्ला।’ 20फेरि ओर्को चाकरुहुँ आहिन् बोल्लोकुन्, ‘मालिक, तोरा सोनोक् डब्बल पैसा यछि रहेला। यि मुँइ रुमाले बाँर्हिहिन् नुकाहिन् धर्लम्। 21मोरालाइ तोरासङ्हिं डर लाग्लक्, किसाबुने तुँइ एक्दमे गाभि मानुस रहस्ला। तुँइ ता आफ्नि लागानि नहिं कर्ल ठाउँहुमा नाफा खोजोस्ला आउँ आफ्नि नहिं लागाल बालि काटिहिन् लेगास्ला।’ 22तसौ राजाइ ओक्रालाइ बोल्लोकुन्, ‘अ बदमास् चाकरस्, तोरे मुखक् बोलिय मुँइ तोरानि दोसि थान्म्हेर्ला। मुँइ दुस्ट मानुस रहम्ना, आफ्नि लागानि नहिं कर्ल ठाँओक्भरे नाफा खोज्लाहार आउँ आफ्नि नहिं रोप्ल बालि काटिबानाइ लेलाहार बाजिहिन् तोरालाइ थाहाय रहेस्ला खमक्। 23ओरोङ् भेने तुँइ मोरा पैसा किसा बियाजइ नहिंलागालै ते? बियाजइ लागाइदेल सन्तेक् मुँइ फर्किहिन् आइटे बियाजसुधाय पाइटम्बे।’ 24ओहिं ओछि ठध्यालाहारलकलाइ बोल्लाहा, ‘लु असौ ओक्राक्भटे उ सोनोक् डब्बल पैसा लेहिन् दसग्वा डब्बल पैसा भेलाहारक्लाइ देहोक्।’ 25तसौ उखर्ह्वाइ बाज्लुहुन्, ‘मालिक, ओक्राक्ठालाइ दसग्वा सोनोक् डब्बल पैसा रैतिहि रहेक्ला ते!’ 26तसौ राजाइ बोल्लाहा, ‘मुँइ तोहोराखर्ह्वानि बोल्मेहेर्ला, जक्राक्ठालाइ रहेक्ला, ओक्रालाइ अज्झ बर्ता देइजाइस्। तर जक्राक्ठालाइ बोइने ओक्राक्ठालाइ भेल चुटेकउ ओक्राक्भटे ओंच्छ्रिजायक्ला।#मत्ति १३:१२; मर्कुस ४:२५; लुका ८:१८ 27असौ मोरानि राजा भेल नहिं चाइल्हाहार मोरा उ सत्रुलकलाइ यच्छि आनिबानाइ मोरे आगारि मारहखान्’!”#मत्ति २५:१४-३०
यरुसलेमै येसुक् स्वागत
(मत्ति २१:१-११; मर्कुस ११:१-११; यहुन्ना १२:१२-१९)
28येसुइ यि कहिन् बाजिहिन् सक्नेसौ पाछु येसु चेलालकक् आघु-आघु यरुसलेमक्पाखा जाबा ठाल्लक्। 29जब येसु बेथफागे आउँ बेथानियाक् लज्जिक् जैतुन बाज्ल डाँराइ पुग्लक्, ओहिं आफ्निक् दुइजेना चेलालकलाइ यन्हिं बाजिहिन् पाठाल धर्लाहा, 30“ओट्टे उ आगारकोक् गाँओइ जाहा, ओछि तोहोराखर्ह्वा कख्नुहुँ कुन्हुँ नहिं चर्ल्ह एक्टा गाडाहाक् बाच्छा बाँर्हिहिन् धर्ल भेंटाहोला, ओक्रानि फोकाहिन् यछि आनहक्। 31कुन्हुँ मानुसे ‘किसा फोकाहोला?’ बाजिहिन् तोहोराखर्ह्वालाइ सोर्हिगलह्वारबुने, ‘पर्भुलाइ चाइल्ह रहेक्ला’ बोल्बेहेरा।”
32उ दुइजेना चेलालक् गाँओइ जाइलुहुन् आउँ येसुइ उखर्ह्वालाइ बोल्लोहिंक् परौ गाडाहाक् बाच्छा भेंटालुहुन्। 33तसौ उखर्ह्वाइ गाडाहाक् बाच्छा फोकाबाक् कर्लटाकै ओक्राक् मालिकलके सोर्लाहा, “तोहोलेके किसा यि गाडाहाक् बाच्छा फोकाहोला हाँ?”
34उखर्ह्वाइ जुबाप देलुहुन्, “पर्भुलाइ यि चाइल्ह रहेक्ला।” 35तसौ उखर्ह्वाइ गाडाहाक् बाच्छालाइ येसुक्ठालाइ आन्लुहुन्, आउँ उखर्ह्वाइ आफ्नि होर्लो लुगालक् गाडाहाक् बाच्छाक् पिठै बिछ्यालुहुन् आउँ येसु ओक्राक् उप्रै चर्ल्हक्। 36येसु आगारि जाइतिहि कर्लटाकै मानुसलकेसेहे आफ्नि होर्लो लुगालक् पैंदाइ बिछ्यालुहुन्।
37तसौ येसु जैतुन डाँराक् ओर्हालक् ठालाइ यरुसलेमक् लज्जिकै आइपुग्लक्। येसुइ कर्ल सक्तिगर कामलक् सम्झिबानाइ उ बेलाइ जम्मा चेलालके रामातिहि बर्के स्वरेसौ यन्हिं बाजिहिन् परमेस्वरक् जइजइकार कर्बा ठाल्लुहुन्, 38“परमपर्भुक् नाँओमाहा आइलाहार राजा आसिक् देलाहार रहैस्! स्वर्गोमा सान्ति आउँ जम्माहिंसौ उप्रै बस्लाहार परमेस्वरलाइ महिमा भेहिन् रहुस्!”#भजनसङ्ग्रह ११८:२६
39यि सुनिबानाइ मानुसलकक् हुलमा रैल्ह कुन्हुँ-कुन्हुँ फरिसिलके येसुक्लाइ बोल्लिहिंक्, “अ गुरु, तोरा चेलाहिरलकलाइ बुन् साराहो बाजिहिन् हप्काहिंखान्।”
40तर उखर्ह्वालाइ येसुइ यन्हिं जुबाप देलाहा, “मुँइ तोहोरानि बोल्मेहेर्ला, इखर्ह्वा चुप्लाइ बुनेता यि दोंखोलकौ साराबा थालट्थ्ला।”
यरुसलेमक् मायाइ येसु काँर्लक्
41जख्नि येसु यरुसलेमक् लज्जिकै आइपुग्लक्, तसौ आफ्निक् आगारि उ सहरलाइ देखिहिन् काँर्लक् आउँ यन्हिं बाज्लक्, 42“कुन कहिने सान्ति आनेला बाजिहिन् तुँइ आजु जान्लसन्टेक् राम्रो भेइटकुन्। तर असौ तुँइ देख्बा नाप्पारस्! 43असौ ता यरङ् दिनलक् आयला, जख्नि तोरा सत्रुलके तोरालाइ चारौपाखाक्भटे घेरा मारिबानाइ, जम्माभटे तोरानि छेंकिबानाइ थुनिहिन् धरेस्ला। 44तसौ तुँइ आउँ तोरा सन्तानलकलाइ नास करिदेहेर्ला। उखर्ह्वाइ एक्टा दोंखोक् उप्रक् ओर्को दोंखोउ नाछारथ्। किसाबुने परमेस्वरे तोरालाइ दाया करिबानाइ बाँचाबा आइल समइलाइ तुँइ चिन्भाय नहिंचिन्हइ।”
येसु मन्दिरै जाइलक्
(मत्ति २१:१२-१७; मर्कुस ११:१५-१९; यहुन्ना २:१३-२२)
45ओक्राक्पाछु येसु मन्दिरै जाइलक् आउँ ओहिं मन्दिरै बेंच्बिखन् कर्लाहारलकलाइ ओछिसौ निस्कालाहा, 46आउँ उखर्ह्वालाइ बोल्लाहा, “धर्मसास्टरइ यरङ् लेख्ल रहेला, ‘मोरा घर पाराथ्नाक् घर भेबापोर्लाहार।’ तर तोहोराखर्ह्वाइ ता यक्रालाइ डाँकुलकक् ओडार बानाल धरहला।”#यसैया ५६:७; यर्मिया ७:११
47ओक्राक्पाछु येसुइ दिन्हुँपट मन्दिरै सिच्छा देओइ। तर बर्के-पुझरिलक्, धर्म-गुरुलक् आउँ ओर्को बर्बरे मानुसलके ओक्रालाइ मार्बाक् खोज्थिक्।#लुका २१:३७ 48तर उखर्ह्वाइ ओक्रालाइ मार्बाक् कुन्हुँ मौकाय नहिंपाइलुहुन्, किसाबुने जम्मा मानुसलके ओक्रिहिक् सिच्छा सुन्बाक् असाध्य मन पोराल धर्लुहुन्।
Currently Selected:
लुका 19: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
