प्रेरित 2
2
पेन्तिकोसक् दिनै पबित्र आत्मा आइल
1पेन्तिकोस बाज्ल यहुदिलकक् पाबनक् दिनै पर्भु येसुमाहा बिस्वास कर्लाहार जम्मायँ मानुसलक् एके ठाँओइ जउर भेल रैल्हुहुन्।#लेबि २३:१५-२१; ब्यबस्था १६:९-११ 2उहे टाकै एक्कासि स्वर्गोक्भटे बर्के तेरेसौ बातास बहलक् परौ एक्टा आवाज आइलकुन्, आउँ उ आवाजे उखर्ह्वा बस्ल पुराय घर घन्कलकुन्। 3तसौ आगिक् मुस्लालकक् परौ जिभक् रुपै उखर्ह्वाक्ठालाइ देख्वार पोर्लाहा। आउँ उ आगिक् मुस्लालक् चिंरा-चिंरा भेइबानाइ ओछि रैल्ह जम्मायँ मानुसक् उप्रै बस्लाहा। 4उखर्ह्वा जम्मायँ जेनालाइ पबित्र आत्माइ पुराय रुपै चालालाहा, तसौ पबित्र आत्माइ उखर्ह्वानि साराबा लागालय बमजिम भिन्ने-भिन्ने भासाइ साराबा ठाल्लुहुन्।
5उ समइमा यरुसलेमै सन्सारक् सेब्भ्रोउ देसक्भटे धर्मि यहुदिलक् आइल रैल्हुहुन्। उखर्ह्वा परमेस्वरक् डर मान्लाहार मानुसलक् रैल्हुहुन्। 6तसौ यि आवाज सुनिबानाइ उ ठाँओइ मानुसलकक् भिर जम्मा भेलुहुन्। आउँ उखर्ह्वा अकमक्क पोर्लुहुन्, किसाबुने ओछि भिन्ने-भिन्ने ठाँओक्भटे आइल यहुदिलके आफ्नि-आफ्नि भासाइ साराबा ठाल्ल उखर्ह्वाइ सुन्लुहुन्। 7उखर्ह्वा जम्मायँ एकदमे छक्क पोरिहिन् सोर्भा ठाल्लुहुन्, “किस् यि सारालाहार मानुसलक् जम्मायँ गालिलिलक् बोइने ते? 8कहनेसेहे इखर्ह्वाइ जम्माहिं हाम्रे आफ्निक्-भासालकै साराल हामि सुन्तिहि रहुँक्ला? 9हामि ता यछि पार्थि, मादि, आउँ एलामि, मेसोपोटामिया, यहुदियाक्, कापाडोकिया, पोन्टस आउँ एसियाक् मानुसलक् रहुँक्ला, 10तसौ फ्रिगिया, पामफिलिया, मिस्रदेस आउँ कुरेनिक् आस-पासक् लिबिया बाज्ल इलाकालकक् मानुसलक् आउँ रोम सहरक्, 11क्रेट टप्पुक् आउँ अरब देसक्भटे आइल मानुसलक् रहुँक्ला। यछि ता हामि यहुदि आउँ यहुदि धर्म मान्लाहार अर्जातिलक् रहुँक्ला, हामि ता इखर्ह्वाइ आफ्नि-आफ्निक् भासाइ परमेस्वरक् माहान् कामलकक् चर्चा कर्तिहि रैल्ह सुन्तिहि रहुँक्ला।” 12उखह्र्वा जम्मायँ छक्क पोर्लुहुन्। आउँ अकमक्क भेइबानाइ एक्टाइ ओर्कोलाइ सोर्हा-सोर्ह कर्बा ठाल्लुहुन्, “यक्राक् अर्थ किवा हो?”
13तर कुन्हुँ-कुन्हुँ मानुसलकेसेहे उखर्ह्वानि यन्हिं बाजिहिन् गिंज्याबा ठाल्लुहुन्, “इखर्ह्वा ता अङ्गुरक् छिप्ल रस पिइबानाइ माट्ल रहट्थ्ला।”
भिरलकलाइ पत्रुसे सुनाल खभर
14तसौ पत्रुस एघारो प्रेरितलकक् आगारि ठड्ध्यालक् आउँ बर्के सोरेसौ उखर्ह्वालाइ यन्हिं बोल्बा ठाल्लाहा, “अ यहुदियाक् मानुसेहेलक्, आउँ यरुसलेमै बस्लाहार जम्मायँ ताचु-बाबुहेलक्, यछि किवा भेइतिहि रहेला बाजिहिन् मुँइ उ तोहोखर्ह्वालाइ बोल्मेहेंर्ला। असौ मुँइ बाज्बाठाल्ल कहिन् ध्यान देहिन् सुनह। 15यि मानुसलक् तोहोलेके सोंच्लोक्परौ माट्ल बोइने, किसाबुने अख्नि ता भर्खर बिहानकोक् नौ माटेन् बज्ल रहेला। 16तर अख्नि भेल यि कहिने योएल अगमबक्ताइ बाज्ल बचन पुरा भेल रहेला।
17“‘परमेस्वरे बाज्ल रहैस्,
अन्तक् दिनलकै मुँइ जम्मायँ मानुसलकक्उप्रै मोरा आत्मा खन्याम्ना,
तसौ तोहोरा बेटाइह्यार आउँ बेटेहारलके अगमबानि साराट्थ्ला,
तन्ह्याँरिलके दर्सन देखट्थ्ला,
आउँ बुढ्रापाकालकेसेहे सप्ना देखट्थ्ला।#योएल २:२८-३२
18उ दिनलकै मुँइ मोरा सेवा कर्लाहार पुर्खर आउँ अइमाइलकक्
उप्रै आफ्निक् आत्मा खन्याम्ना।
तसौ उखर्ह्वाइ अगमबानि साराट्थ्ला।
19मुँइ आकासै अचम्मक् कामलक् देखाम्ना।
आउँ पिर्थिबिमाहा चिन्हँलक् देखाबाक् काम करम्ना।
रकट, आगि आउँ धुवाँक् मुस्ला देखापोरेला।
20परमपर्भुक् उ माहान् आउँ अचम्मक् (गौरवमय) दिन आबाइसौ आगारि
सुर्ज आधाँर भेहिन् जायला आउँ
चान्दा रकटक्परौ लाल्ल बनेंला।
21तसौ यरङ् भेला, उटाकै जैहिं परमपर्भुक् नाउँ लेइस्, उसेहे बाँच्बा पाइस्।’
22“अ इस्राएलक् मानुसेहेलक्, यि कहिन् सुनह। नासरतक् येसु यरङ् बेक्ति रैल्हक्, जक्रालाइ परमेस्वरे सक्तिगर कामलक्, अचम्मक् कामलक् आउँ चिन्हँलक् देखाहिन् तोहोराखर्ह्वाक् आगारि साबित कारालक्। तोहोराखर्ह्वालाइ थाहाय रहेर्ला किसाबुने परमेस्वरे तोहोराखर्ह्वाक् माझै यि कामलक् ओक्राक्भटेहि कर्ल धरैस्। 23परमेस्वरे पक्का कर्ल आफ्निक् योजना आउँ पैल्हाहि थाहा रैल्ह ग्यानक्भटे येसुलाइ तोहोराखर्ह्वाक् हाथै सोंप्लोक्, आउँ यिहे येसुलाइ अधर्मि मानुसलकक् हाथक्भटे तोहोराखर्ह्वाइ कुरुसै टाङिहिन् मार्लेहेंक्।#मत्ति २७:३५; मर्कुस १५:२४; लुका २३:३३; यहुन्ना १९:१८ 24तर ओक्रालाइ परमेस्वरे मरनक् पिराक्भटे छुट्कारा देइबानाइ जिउँटो पार्लकुन्। किसाबुने मरने येसुलाइ रोकिहिन् धर्बा नहिं पार्लाहार रैल्हकुन्।#मत्ति २८:५-६; मर्कुस १६:६; लुका २४:५ 25किसाबुने दाउद राजाइ ओक्राक् बिसइमा यन्हिं बाज्ल रैल्हक्–#भजनसङ्ग्रह १६:८-११
“‘मुँइ पर्भुलाइ साँद्धाउ मोरे आगारि देख्ल धरम्ना,
मुँइ बुन् डराउस् बाजिहिन् उ मोरा दैन्हँक्पटि बस्ल रहैस्।
26उहेसिहिरे मोरा हिर्दाया रामाल रहैस्,
आउँ खुसिसम् तोरा पर्सन्सा करम्ना।
मुँइ मोरिहिन् जाबापोरेटौ
फेरि जिउँटो भेबाक् आसै बाँच्ल रहम्ना।
27किसाबुने तुँइ मोरा देहिलाइ पातारै नाँछारस्,
ना ता तुँइ आफ्निक् पबित्र सेबकक् मोर्लो देहिलाइ चिहानै कुहबा देस्ला।
28तुँइ मोरानि जिबनक् पैंदालक् देखाल धरस्ला,
आउँ मोरा सङ्हिं तुँइ रैल्ह सैर्हे मुँइ एकदम खुसिसम् रामाम्ना।’
29“अ मोरा ताचु-बाबुहेलक्, हाम्रा पुर्खा दाउदक् बिसइमाहा मुँइ तोहोराखर्ह्वालाइ पक्का करिहिन् बोल्बा पारम्ना कि, उ मोर्लोक् आउँ मानुसलके चिहानै गार्लिहिंक्, आउँ उ चिहान अज्झसम्म रैतिहि रहेला। 30तर दाउद एक्टा अगमबक्ता रैल्हक्। उहेसिहिरे परमेस्वरे ओक्राक्सङ्हिं कसम खाहिन् कर्ल बाचा ओक्रानि थाहा रैल्हकुन् कि, ओक्रिहिक् सन्तानलकक्भटे एकजेनालाइ ओक्रिहिक्परौ राजा बानाबकुन्बे।#भजनसङ्ग्रह १३२:११; २ समुएल ७:१२-१३ 31परमेस्वरे कर्बाक् काम दाउदे पैल्हाहि थाहा पाहिन् सक्ल रैल्हक्।
“यिहेसिहिरे खिरिस्ट मोर्लोक्भटे फेरि जिउँटो भेइस् बाज्बाक् कहिनक् सङ्हिं यि मिल्ल रहेला,
‘ओक्रालाइ ना ता चिहानै छारिजाइलक् ना ता ओक्राक् देहिय कुइल्हकुन्।’
32उहे येसुलाइ परमेस्वरे मोर्लोक्भटे जिउँटो पार्लक्, आउँ हामि जम्मायँ यि कहिनक् साछि रहुँक्ला। 33परमेस्वरे येसुलाइ जम्माहिंसौ बर्के अधिकार देहिन् आफ्निक् दैन्हँ हाथक्पटि धर्लकुन्। आउँ परमेस्वर बाबाक्भटे पबित्र आत्माक् पर्तिग्या ओहिं पाइलक्। उहे पबित्र आत्मा ओहिं यछि खन्याँल धरैस्, जुन् कहिनलाइ तोहोराखर्ह्वाइ अख्नि देख्तिहि आउँ सुन्तिहि रहला। 34-35किसाबुने दाउद राजा ता स्वर्गोइ जाहिन् परमेस्वरक् दैन्हँ हाथक्पाखा नहिं बस्लक्, भेटौसुधा ओहिं आफ्निहि यन्हिं बाज्ल धरैस्–
‘परमपर्भुइ मोरा पर्भुलाइ बोल्लोकुन्,
जख्निसम्म मुँइ तोरा सत्रुहिरलकलाइ तोरा टाङक् टरै ना तुलाइदेमेर,
ओख्निसम्म तुँइ मोरा दैन्हँ हाथक्पाखा बस्।’#भजनसङ्ग्रह ११०:१
36“उहेसिहिरे असौ इस्राएलक् जम्मा मानुसलके यि कहिन् पक्का करिहिन् जान्बा पोर्लाहार कि, येसु जक्रालाइ तोहोलेके कुरुसै टाङ्लेहेंक्, उहे येसुलाइ परमेस्वरे पर्भु आउँ मुक्ति देलाहार खिरिस्ट बानाल धरेला।”
37यि कहिन् सुनिबानाइ ओछि जउर भेल मानुसलकक् हिर्दाया छिया-छिया भेलाहा, तसौ उखर्ह्वाइ पत्रुस आउँ ओर्को प्रेरितलकलाइ यन्हिं सोर्ल्हाहा, “अ ताचु-बाबुहेलक्, असौ हामि किवा कर्बा ते?”
38तसौ पत्रुसे बोल्लाहा, “तोहोराखर्ह्वा जम्माहिं आफ्नि-आफ्निक् पापलाइ मानिलेहिन् परमेस्वरक्पटि फर्कह आउँ पाप छेमा पाबाक् लागि येसु खिरिस्टक् नाँओइ बप्तिस्मा लेहो, आउँ परमेस्वरक् बरदानक् रुपै तोहोराखर्ह्वाइ पबित्र आत्मा पाहोला। 39किसाबुने परमेस्वरे यि पर्तिग्या तोहोलेक आउँ तोहोराखर्ह्वाक् सन्तानलकक् लागि आउँ टार्ह्-टार्होइ रैल्ह जम्माहिंक् लागि हो, जक्रालाइ-जक्रालाइ पर्भु हाम्रा परमेस्वरे हाँख्रायट्थ्ला।”
40ओर्को थुप्रोय कहिनलकक्भटे ओहिं उखर्ह्वालाइ साछि देलक्, तसौ उखर्ह्वालाइ राम्रोइसौ सम्झातिहि बोल्लाहा, “यि दुस्ट पुस्ताक् उप्रै आइपोर्लाहार दन्डक्भटे आफ्निलाइ जोगाहो।” 41तसौ जैहिं-जैहिं पत्रुसक् कहिन् सुइकार कर्लुहुन्, उखर्ह्वाइ बप्तिस्मा लेलुहुन्, उहे दिनै झन्ने तिन हाजार जेना मानुसलक् उखर्ह्वाक्सङ्हिं थपिजाइलुहुन्। 42उखर्ह्वा प्रेरितलकक् सिच्छाइ, सङ्गतिमाहा आउँ भोजलकै आउँ पाराथ्ना कर्बाक्नि साँद्धाउ लागिपोरोथ्।
पर्भु येसुमाहा बिस्वास कर्लाहारलकक् रहनसहन
43प्रेरितलके अचम्मक् कामलक् कर्तिहि थुप्रोय चिन्हँलक् देखायथ्। यि देखिबानाइ जम्मा मानुसलके परमेस्वरक् डर मान्बा ठाल्लुहुन्। 44पर्भुलाइ बिस्वास कर्लाहारलक् जम्मायँ सङ्हिं बसथ्, आउँ उखर्ह्वाक् सेप्थोक् सँज्झ्या भेथ्।#प्रेरित ४:३२-३५ 45उखर्ह्वाइ आफ्निक् सम्पति आउँ मालमाट्टा बेंचिबानाइ जक्राक्-जक्राक्लाइ जेहे-जेहे थोक् खाँचो पोरेथ् जम्माहिंलाइ उ बाँटिबानाइ देथ्। 46दिन्हुँकपट उखर्ह्वा परमेस्वरक् मन्दिरै एकेठालाइ जम्मा भेथ्, आउँ घर-घरे सङ्गति कर्टे बुलिहिन् खुसि आउँ सुद्ध मनेसौ उखर्ह्वा जम्मायँ मिलिबानाइ भोज खाथ्, 47साँद्धाउनि परमेस्वरक् पर्सन्सा करथ् आउँ जम्मायँ मानुसलके उखर्ह्वालाइ मन पोरायथ्। तसौ उद्धार पाइललकलाइ पर्भुइ दिनदिने उखर्ह्वाक्सङ्हिं थप्टेलेगिदेथ्।
Currently Selected:
प्रेरित 2: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
