प्रेरित 3
3
पत्रुसे एकजेना लङरालाइ राम्रो पार्ल
1एक्बाजि पत्रुस आउँ यहुन्ना दिनकोक् तिन बजे पाराथ्नाक् समइमा मन्दिरै जाइतिहि रैल्हुहुन्। 2उहे समइमा मन्दिरक् भिट्र पोस्बाक् सुन्दर बाज्ल दिहाँरै एकजेना जल्महिंसौ लङरा मानुसलाइ साँद्धाउनि बोकिहिन् आनिहिन् धर्टे आइल रैल्हिहिंक्। ओहिं मन्दिरै आइलाहार मानुसलकक्सङ्हिं भिख माङुस् बाजिहिन् मानुसलके ओक्रानि ओछि आनिहिन् धर्थिक्। 3पत्रुस आउँ यहुन्नालाइ मन्दिरक् भिट्र पोस्बा ठाल्ल देखिबानाइ ओहिं उखर्ह्वाक्सङ्हिं भिख माङ्लक्। 4यहुन्ना आउँ पत्रुसे ओक्रानि एकेटोले दिठालिहिंक्, आउँ पत्रुसे ओक्रानि यन्हिं बोल्लोकुन्, “हाम्रापटि दिठाउ!” 5ओक्राक्पाछु ओहिं उखर्ह्वाक्भटे किच्छु पाम्ना ना बाजिबानाइ आस करिहिन् उखर्ह्वालाइ दिठाइ धर्लाहा। 6तसौ पत्रुसे बोल्लोकुन्, “मोराठालाइ सोनो आउँ चाँरि ता बोइने, तर जेहे मोराठालाइ रहैस्, उहे मुँइ तोरानि देमेर्ला। नासरतक् येसु खिरिस्टक् नाँओइ उठिहिन् हिंठ्टेबुल्।” 7तसौ पत्रुसे उ मानुसलाइ दैन्हँ हाथै गर्थिबानाइ उठालकुन्, आउँ ताट्काले ओक्राक् टाङ् आउँ गिच्चालक् बल्यो भेलकुन्। 8आउँ उ जुरुक्कय उठिबानाइ हिंठ्बा ठाल्लक्, आउँ हिंठ्तिहि आउँ उफ्रतिहि, परमेस्वरक् इस्तुति पर्सन्सा कर्तिहि उहेखर्ह्वाक्सङ्हिं मन्दिरै पोस्लोक्। 9तसौ ओछि रैल्ह जम्मा मानुसलके ओक्रालाइ हिंठ्ल आउँ परमेस्वरक् पर्सन्सा कर्ल देख्लिहिंक्। 10मन्दिरक् सुन्दर बाज्ल दिहाँरै बसिबानाइ भिख माङ्लाहार मानुस यिहे हो बाजिहिन् उखर्ह्वाइ चिन्हिहाल्लिहिंक्। “यि मानुस कहने हिंठ्बा पार्लाहार भेओक्?” बाजिहिन् उखर्ह्वा अचम्म भेइबानाइ छक्क पोर्लुहुन्।
मन्दिरै पत्रुसक् पर्चार
11उ राम्रो भेल मानुस पत्रुस आउँ यहुन्नाक्सङ्हिं टाँसिबानाइ हिंठ्ल देखिहिन् जम्मा मानुसलक् अचम्म मानिहिन् सोलोमन बाज्ल पिनाओइ दग्रटे आइलुहुन्। 12यि देखिबानाइ पत्रुसे उखर्ह्वालाइ यन्हिं बोल्लाहा, “अ इस्राएलक् मानुसेहेलक्, यि कहिनमाहा तोहोलेक किसा अचम्म मानहला? हाम्रा आफ्निक् सक्ति आउँ भक्तिक्भटे हामि यक्रानि हिंठ्बा पार्लाहार कारालक्परौ किसा तोहोराखर्ह्वा त्वाल्ल पोरिबानाइ हाम्रानि दिठाहोला? 13अब्राहाम, इसाहाक, याकुब आउँ हाम्रा ओर्को पुर्खालकक् परमेस्वरे आफ्निक् सेबक येसुलाइ महिमित कारालकुन्, आउँ जक्रालाइ तोहोलेकेसेहे मार्बापोर्लाहार बाजिहिन् सत्रुलकक् हाथै सोंप्लेहेक्। तसौ पिलातुसे ओक्रानि छारिदेबाक् निर्नय करेटौ तोहोलेकेसेहे ओक्रालाइ असुइकार कर्लेहेक्।#प्रस्थान ३:१५ 14उ ता पबित्र आउँ धर्मि रैल्हक्। तर तोहोराखर्ह्वाइ ओक्राक् साँटा एकजेना ज्यानमारालाइ छार्बा पोर्लाहार बाजिहिन् माङ् कर्लेहे।#मत्ति २७:१५-२३; मर्कुस १५:६-१४; लुका २३:१३-२३; यहुन्ना १९:१२-१५ 15आउँ जिबन देलाहारकलाइसेहे तोहोलेके मार्लेहेंक्। तर परमेस्वरे ओक्रालाइ मोर्लोक्भटे जिउँटो पार्लकुन्। हामि यि कहिनक् साछि रहुँक्ला। 16येसुक् नाँओइ कर्ल बिस्वासे आउँ ओक्रिहिंक् नाँओक्भटे तोहोलेके देख्ल आउँ चिन्ल्ह यि मानुस आजु बल्यो भेल रहैस्। येसुक्भटे पाइल बिस्वासे कर्टे यि मानुसलाइ पुराय राम्रो भेल तोहोलेके देख्तिहि रहला।
17“अ मोरा दाजु-भायहेलक्, मोरानि थाहा रहैस्, तोहोलेके येसुलाइ नहिं बुझिहिने ओरोङ् कारालेहेक्, आउँ तोहोराखर्ह्वाक् अगुवालकुहु उहेरङे कर्लुहुन्। 18तर परमेस्वरक्भटे आइलाहार खिरिस्टइ दुक्ख#३:१८ खिरिस्टइ दुक्ख: कुरुसै ओक्राक् मरन बाजिहिन् बुझेला। भोग्बापोर्लाहार बाजिहिन् जम्मा अगमवक्तालकक्भटे ओहिं आगारिय बाज्ल अगमबानि यहेरङ् करिहिने पुरा कर्लक्। 19उहे सिहिरे असौ तोहोराखर्ह्वा आफ्नि-आफ्निक् पापलाइ मानिलेहिन् परमेस्वरक्ठालाइ फर्कह, तसौ ओक्राक्भटे तोहोराखर्ह्वाक् जम्मा पाप छेमा भेहेर्ला। आउँ तोहोलेके परमेस्वरक्भटे आत्मामाहा लौओ जोस पाहोला, 20आउँ परमेस्वरे तोहोराखर्ह्वाक् लागि आगारिहिंसौ चुन्ल मुक्ति देलाहार खिरिस्ट, अथबा येसुलाइ फेरि पाठाइदेहेर्ला। 21परमेस्वरे उबेर्कोक् समइहिंसौ आफ्निक् पबित्र अगमबक्तालकक्भटे बोल्लोहिक्परौ सेप्थोक् फेरि लौओ बानाबाक् समइ नहिंआबासम्मयँ येसु स्वर्गोहिमा रहबापोर्लाहार। 22मोसाइ आको यन्हिं बाज्ल रैल्हक्, ‘परमपर्भु परमेस्वरे तोहोराखर्ह्वाक् दाजेहार-भाइह्यारलकक् माझक्भटे मोरेक्परौ एकजेना अगमबक्तालाइ तोहोराखर्ह्वाक् लागि चुन्बगे। ओक्राक् जम्मा कहिन् तोहोराखर्ह्वाइ मान्बा पोर्लाहार।#ब्यबस्था १८:१५; १८:१८-१९ 23तर जैहिं उ अगमबक्ताइ बाज्ल कहिन् नासुनथ् उखर्ह्वा परमेस्वरक् मानुसलकक्भटे छुटाइजाट्थ्ला आउँ नास भेट्थ्ला।’#ब्यबस्था १८:१९ 24तसौ समुएलेसौ लेइबानाइ ओक्राक्पाछुल्कोक् जम्मायँ अगमबक्तालके यिहे दिनलकक् बिसइमा अगमबानि बाज्ल धरट्थ्ला। 25अगमबक्तालकक्भटे परमेस्वरे तोहोराखर्ह्वाक् बाज्या-बाराजुलकक्सङ्हिं बाँर्ल्ह बाचा तोहोरेखर्ह्वाक् लागि हो। हाम्रा पुर्खा अब्राहामलाइ परमेस्वरे ‘तोरा सन्तानलकक्भटे मुँइ पिर्थिबिक् सेब्भ्रोउ जातलकलाइ आसिक् देम्ना’ बाजिहिन् बोल्लो धर्लकुन्।#उत्पति २२:१८ 26तोहोलेक जम्माहिंलाइ आफ्निक् दुस्ट कामक्भटे फर्काइबानाइ आसिक् देबा बाजिहिन् परमेस्वरे आफ्निक् सेबक येसुलाइ खटाइबानाइ सेब्भुइसौ पैल्हा तोहोराखर्ह्वाक्ठालाइ पाठालक्।”
Currently Selected:
प्रेरित 3: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
