प्रेरित 1
1
1मान्जन थियोफिलस ज्यु, येसुइ काम सुरु कर्बा थाल्लहिंसौ स्वर्गो नहिं लेगिजाबासम्मयँ ओहिं कर्ल जम्मा कामलक् आउँ सिखाबाक् खोज्लो कहिनलकक् बिसइमा मोरा पैल्हाकोक् कितापै मुँइ लेखिहिन् सक्ल धरम्ना।#लुका १:१-४ 2आफ्नि छान्ल प्रेरितलकलाइ येसुइ स्वर्गो जाबाइसौ आगारि पबित्र आत्माक्भटे आफ्निक् आग्या देलक्। 3आफ्नि दुक्ख भोगिबानाइ कुरुसै मोरिहिन् पाछु येसु चालिस दिनसम्मयँ घरि-घरि उहेखर्ह्वाक्ठालाइ देख्वार पोर्लोक् आउँ थुप्रोयबाजि पक्का पर्मानलकक्भटे आफ्निलाइ जिउँटो रहम्ना बाजिहिन् देखालक्, आउँ ओहिं उखर्ह्वालाइ परमेस्वरक् राज्जेक् बिसइमाहा कहिनलक् जानालाहा। 4एकफेरा येसु चेलालकक्सङ्हिं खाबा बस्ते बेलाइ ओहिं उखर्ह्वानि यन्हिं बाजिहिन् आग्या देलाहा, “तोहोराखर्ह्वा यरुसलेम छारिबानाइ कट्टुहु बुन् जाहा, तर स्वर्गोक् बाबाइ पबित्र आत्मा पाठाम्ना बाजिहिन् कर्ल पर्तिग्यालाइ तोहोराखर्ह्वाइ अस्याहिन् बसह। यि पर्तिग्याक् बिसइमा मुँइ तोहोराखर्ह्वालाइ आगारिय जानाल धर्लमेंहार।#लुका २४:४९ 5यहुन्नाइसेहे पानिक् बप्तिस्मा देओइ, तर असौ किच्छु दिनपाछुहि तोहोराखर्ह्वाइ पबित्र आत्माक् बप्तिस्मा पाहोला।”#मत्ति ३:११; मर्कुस १:८; लुका ३:१६; यहुन्ना १:३३
येसु स्वर्गोइ लेगिजाइलक्
6एक्दिन प्रेरितलक् जउर भेलटाकै, उखर्ह्वाइ येसुलाइ यन्हिं सोर्ल्हिहिंक्, “पर्भु, किस् तुँइ यिहे समइमा इस्राएलिलकक् राज्जेलाइ फेरि आगारकिहिंक् परौ बानास्ला?”
7येसुइ उखर्ह्वालाइ बोल्लाहा, “यि कहिन् कख्नि भेबा आयला बाजिहिन् जान्बा खोज्बाक् तोहोराखर्ह्वाक् काम बोइने। उ ता परमेस्वर बाबाइ आफ्निक् अधिकारक्भटे निस्चित कर्ल कहिन् हो। 8तर पबित्र आत्मा तोहोरामाहा आइनेसौ तोहोराखर्ह्वाइ सक्ति पाहोला। आउँ तोहोराखर्ह्वा यरुसलेमै, पुरा यहुदिया आउँ सामरिया इलाकाइ आउँ पुराय पिर्थिबिभोरि मोरा साछि भेहोला।”#मत्ति २८:१९; मर्कुस १६:१५; लुका २४:४७-४८ 9ओट्का बाजिहिन् सक्नेसौ उखर्ह्वाइ दिठातिहि-दिठातिहि येसु स्वर्गोक्पाखा उठाइ-लेगिजाइलक्, आउँ बादरे ओक्रालाइ झाँकालकुन्, तसौ येसु उखर्ह्वाक् नजरक्भटे अल्पिहिन् जाइलक्।#मर्कुस १६:१९; लुका २४:५०-५१
10जख्नि उखर्ह्वाइ येसु आकासक्पाखा जाइतिहि कर्ल एकेटोले दिठातिहि रैल्हुहुन्। उहेटाकै एक्कासि गोरो लुगा पेहेर्ल दुइ जेना स्वर्गोदुत उहेखर्ह्वाक् छेंउहिमा ठड्ध्यालुहुन्। 11आउँ उखर्ह्वाइ यन्हिं बोल्लाहा, “ए गालिलक् मानुसेहेलक् तोहोराखर्ह्वा किसा ठड्ध्याइबानाइ आकासक्पाखा दिठातिहि रहला? येसु ता, तोहोराखर्ह्वाक्भटे स्वर्गोइ उठाइ-लेगिजाइल रहैस्। अख्नि जहेरङ् करिहिन् ओक्रालाइ तोहोराखर्ह्वाइ स्वर्गोइ जाइतिहि कर्ल देखेहेक्, उहेरङे करिहिन् येसु फेरि एक्दिन फर्किबानाइ आबगे।”
यहुदाक् साँटाइ मतियासलाइ चेला चुन्ल
12ओक्राक्पाछु प्रेरितलक् जैतुन बाज्ल डाँराक्भटे यरुसलेमै फर्कलुहुन्। यरुसलेमेसौ उ डाँरा एक किलोमिटर जट्का टार्हो पोरेला। 13यरुसलेम पुग्नेसौ उखर्ह्वा आफ्नि बस्ल घरक् उप्रक् तालाइ उक्लिहिन् एक्टा कोठाइ जउर भेलुहुन्। ओछि पत्रुस, यहुन्ना, याकुब, अन्द्रियास, फिलिप, थोमा, बारथोलोमाइ, मत्ति, अल्फयसक् बेटायक याकुब, देसभक्त दलक् सिमोन आउँ याकुबक् बेटायक यहुदा रैल्हुहुन्।#मत्ति १०:२-४; मर्कुस ३:१६-१९; लुका ६:१४-१६ 14उखर्ह्वा कुन्हुँ अइमाइलक् आउँ येसुक् माँयक मरियम आउँ ओक्राक् भायकलकक्सङ्हिं मिलिहिन् जम्मायँ एके मनक् भेइबानाइ साँद्धाउ पाराथ्ना करिहिन् बसथ्।
15उ समइमा येसुलाइ बिस्वास कर्लाहार मानुसलक् ओछि झन्ने एकसइ बिस जेना जउर भेल रैल्हुहुन्। तसौ पत्रुसे ठड्ध्याइबानाइ उखर्ह्वाक् माझै यन्हिं बोल्बा ठाल्लाहा, 16“ताचु-बाबुहेलक् सुनह, येसुलाइ पक्रालाहारक् अगुवा यहुदाक् बिसइमा पबित्र आत्माइ दाउदक् मुखक्भटे धर्मसास्ट्रक् कितापै आगारिय बाज्ल कहिन् पुरा भेबा पोर्लाहार रैल्हकुन्। 17किसाबुने यहुदा इस्करियोत आको हाम्रेसङ्हिं पर्भुक् बार्ह जेना प्रेरितलकमध्ये एकजेना रैल्हक् आउँ उ हाम्रेपरौ पर्भुक् काम कर्बाक्नि चुन्ल रैल्हक्।”
18(यहुदाइ अधर्मक् कामक्भटे कामाल पैसाइ एक्टा खेत किन्लक्। तसौ उहे खेतै उ मुँर टर टाङ् उपर भेहिन् लरिबानाइ ओक्राक् पेट फुट्लकुन् आउँ जम्मा आँटिभोंटि बाहार निस्किबानाइ मोर्लोक्।#मत्ति २७:३-८ 19यि कहिन् यरुसलेमक् जम्मायँ मानुसलके थाहा पाइलुहुन्, तसौ उखर्ह्वाइ उ खेतक् नाउँ आफ्निक् भासाइसम् “आखेल्दामा” बाजिहिन् धर्लुहुन्, जक्राक् अर्थ “रकटक् खेत।”)
20पत्रुसे अज्झौ यन्हिं बाज्लक्, “किसाबुने भजनसङ्ग्रहक् कितापै यन्हिं लेख्ल रहेला–#भजनसङ्ग्रह ६९:२५; १०९:८
“‘ओक्राक् घर सुन्य भेउस्,
ओछि कुन्हुँय जुन् बसुस्।’
फेरि,
‘ओहिं कर्ल कामक् जिम्मा ओर्कोहि लेउस्।’
21“यिहेसिहिरे हाम्रासङ्हिं रहलाहार मानुसलकक्मध्ये एकजेना यरङ् खालक् मानुस चुन्बा पोर्लाहार रहेला, जुन् मानुस पर्भु येसु हाम्रा माझै भेहिन् भिट्र-बाहार कर्लटाकै सटौघरि हाम्रेसङ्हिं रैल्ह भेबापोर्लाहार, 22अथबा उ मानुस यहुन्नाक् बप्तिस्माक् समइसौ लेहिन् येसु हाम्राभटे स्वर्गोइ उठाइ-लेगिजाइल दिनसम्म हाम्रेसङ्हिंय रैल्ह, आउँ उ मानुस हाम्रेसङ्हिं येसु जिउँटिहिन् उठ्ल कहिनक् साछि भेबापोर्लाहार।”#मत्ति ३:१६; मर्कुस १:९; १६:१९; लुका ३:२१; २४:५१
23तसौ यि कहिन् सुन्नेसौ उखर्ह्वाइ दुइजेना अथबा बारसाबास बाज्ल योसेफ जक्राक् ओर्को नाउँ युस्तस रैल्हकुन्, आउँ मतियासक् नाउँ आगारि आन्लुहुन्। 24ओक्राक्पाछु उखर्ह्वाइ यन्हिं बाजिहिन् पाराथ्ना कर्लुहुन्, “अ पर्भु, तुँइ जम्मा मानुसक् हिर्दायाक् कहिन् थाहा पास्ला उहेसिहिरे यि दुइजेनामध्येमा तुँइ कुनाहाँक्लाइ चुन्ल धरस्ला उ हाम्रानि देखाउ, 25आउँ ओहिं यि प्रेरितक् सेवाक् काम कर्बा पारुस्, जुन् कामक्भटे छारिबानाइ यहुदा आफ्निक् ठाँओइ जाहिन् मोर्लोक्।” 26ओक्राक्पाछु उखर्ह्वाइ उ दुइजेनाक् नाँओइ चिट्ठा बाज्रालुहुन्। उ चिट्ठा मतियासक् नाँओइ पोर्लोकुन्, आउँ एघार प्रेरितलकक्सङ्हिं ओक्रुहुक् नाउँ थपिजाइलकुन्।
Currently Selected:
प्रेरित 1: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
