लुका 9
9
येसुइ चेलासब्के प्रचार करिके पाठाइकेभइल
(मति १०:५-१५; मर्कुस ६:७-१३)
1येसुइ बाह्रइ जेना मुक्खे चेलासब्के बोलाइकेभइल। उसब्के सभइ भुत निस्काइके र मन्देलसब्के निक पार्लार सक्ति र अधिकार देइकेभइल 2मन्देलके निक पारिके र परमेसोरक राज्जेक बारेयँ प्रचार करिके पाठाइकेभइल। 3ओनेनेइ उसब्के कहिकेभइल “पइडाक लागि केहाउ पुनु नालेइके: थेगिके लउरि, झोला, पइसा, खइलाहार कुरा र फेर्लार लुगा पुनु नाबोकिके। 4तेउह्रासब्के जोनो घरक मानुससबेइ मान कर्ताहात्, उसे गाउकमाटे बिदा निजभइलसमन उहइ घरयँ बसुक। 5तेउह्रासब्के कोलोउ ठाउक मानुससबेइ मान नाकरत् कने उसे मानुससब्के परमेसोरेइ देलाहार दन्डक चेतावनि दिकेलागि पइतलाक धुलो झारिकुन#९:५गोडक धुलो झरिके कहल येसुक कुरा सुनिके निजमान्लार मानुससब्के तोइ इन्कार कर्ल र आबे तेर उसबसाङ केहाउ सम्बन्ध नइजेबाटइ कहल हखइ। उसे ठाउके छाडिदेओ।”
6गाउ-गाउयँ जाइकुन चेलासबेइ परमेसोरक खुसिक समचार प्रचार कर्तिन मन्देलसब्के निक पार्ल।
हेरोद अलमल्लइ पोर्ल
(मति १४:१-१२; मर्कुस ६:१४-२९)
7इसे सभइ घटनाक बारेयँ सुनिकुन सासन कर्लाहार हेरोद अलमल्लइ पोर्ल, किकेकने बप्तिस्मा देलाहार युहन्ना मोर्लकमाटे जिइकुन उठ्ल कइकुन कोलोउ-कोलोउयेइ कतेरहत्। 8कोलोउ “एलिया देखा पोर्ल” कतेरहत्। अरुइ चाहिँ “कोलोउ आघुहिँक अगमबक्ता मोर्लकमाटे बाचिकुन अइल” कतेरहत्। 9हसे हेरोदेइ यस्के कहल, “युहन्नाक मुड काटिके मोइ लागाल हखम। तर इसे मानुसचाहिँ कोनो हखइ जोक्र बारेयँ मोइ यस्न अचम्मक कुरा सुन्तिन बाटम?” उहइगुनेइ येसुके उहाइ भेटिके खोज्ल।
येसुइ पाँच हजार मानुसके खावाइकेभइल
(मति १४:१३-२१; मर्कुस ६:३०-४४; युहन्ना ६:१-१४)
10बाह्र जेना मुक्खे चेलासब प्रचार करिकुन फर्कलपाछु उसबेइ आफुइ कर्ल सभइ कुरा येसुके सुनाल। हसे ओनेनेइ उसब्के आफ्नेन् साङ लिकुन बेथसेदा कलाहार सहरयँ छुट्टइ जाइकेभइल। 11तर इसे कुरा थाहा पाइकुन मानुसक भिड ओनेन्कपाछु लाग्ल। ओनेनेइ उसब्के मान करिकेभइल र परमेसोरक राज्जेक बारेयँ सुनाइकेभइल हसे मन्देलसब्के निक पारिकेभइल।
12येसुके बाह्र जेना मुक्खे चेलाइ घाम बुड्लाहार बेलायँ आइकुन कहल, “इछि त केहाउ पुनु नइजे। इसे मानुसक भिडके बिदा देओ। उसबेइ छेउछाउक गाउयँ जाइकुन बास बोसुस र आफ्न खइलाहार कुराक बन्दबस्त आफइ करुस् किकेकने हामे उजाड-ठाउयँ बाटिहिँ।”
13हसे येसुइ उसब्के कहिकेभइल, “तोहेसब नइ उसब्के खाइके देओ।” उसबेइ कहल, “प्रभु, हाम्रसाङ पाँचोटा रोटि र दुक्टा माछ बाहेक केहाउ नइजे। किति आबे हामे यत्का धेरइ मानुसके खइलाहार कुरा किनिकुन आनिके?”
14उछिका पाँच हजार जेना बेटा मानुस मत्रइ रहत।
येसुइ चेलासब्के कहिकेभइल, “पचास-पचास जेना करिकुन मानुससब्के बोसिके लागाओ।”
15हसे ओसिनकरिकुन चेलासबेइ सभइ मानुसके बोसिके लागाल। 16उपाछु येसुइ उअ पाँचोटा रोटि र दुक्टा माछ लेइकेभइल र सोर्गपटि चाहातिन् परमेसोरके धन्यबाद देइकेभइल हसे ओनेनेइ रोटि र माछ टुक्रा-टुक्रा पारिकुन चेलासब्के बाटिके देइकेभइल। 17हसे सभइ जेनाइ आघालाहार करिकुन खाइकुन उब्रल रोटि र माछक टुक्रा चेलासबेइ बोटेतेखना त बाह्र ढकिया भरिल।
येसु बाचालार ख्रिस्ट
(मति १६:१३-२३; मर्कुस ८:२७-३३)
18येसु एक दिन अस्करइ पार्थाना करिराख्तेखना चेलासब पुनु ओनेन्कइ छेओयँ रहत। ओनेनेइ उसब्के पुछिकेभइल, “मोइ कोनो हखम कइकुन मानुससबेइ मेराके किति कताहात्?”
19उसबेइ कहल, “कोलोउ बप्तिस्मा देलाहार युहन्ना, कोलोउ एलिया हसे कोलोउ कोलोउयेइ चाहिँ पइलाकइ कोलोउ अगमबक्ता मोर्लकमाटे बाच्ल हखत कि कताहात्।”
20येसुइ उसब्के पुछिकेभइल, “हसे तोहेसब चाहिँ मेराके किति कताहाउ त? मोइ कोनो हखम?”
पत्रुसेइ कहल, “तोहे परमेसोरेइ पाठाइकेभइल बाचालार ख्रिस्ट हखउ!”
21येसुइ “इसे कुरा कोख्राहुके पुनु झुनकहुक” कइकुन उसब्के कडा चेतावनि देइकेभइल।
येसुइ आफ्नेन् मोर्लारक बारेयँ कहिकेभइल
(मति १६:२०-२८; मर्कुस ८:३०-३८; ९:१)
22हसे येसुइ कुरा बुझातिन उसब्के कहिकेभइल, “मोइ मानुसक छावाइ धेरइ दुख भोगिके पोरित। अगुवा, बड्क पुजेहेरि र धर्मगुरुइ उख्राके नामानत र मार्देतात् तर तिन दिनयँ उसे फेरि पुनु मोर्लकमाटे बाचित।”
23फेरि पुनु येसुइ सभइके कहिकेभइल, “सुनुक्, कोलोउ मेर चेला भइके खोजित कने उहाइ आफुके माया मारिके पोरित हसे दिन-दिनइ आफ्न क्रुस बोकिकुन#९:२३ क्रुस बोकिके कलक अर्थ येसुक लागि दुख भोगिके र मोरिके तयार भइके हखइ। मेर पाछु लागुस। 24किकेकने जोनेइ आफ्न जिबन जोगाइके खोज्तात् उहाइ जिबन गुमाइत, तर जोनेइ आफ्न जिबन मेर लागि गुमाइत उहाइ आफ्न जिबन बाँचाइत। 25किकेकने सन्सारक सबथोक मानुसेइ आफ्न हातयँ पार्ने पुनु आफ्न आत्मा चाहिँ गुमानेपार उख्राके किति फाइदा भइत र? 26हसे जन मानुसेइ मेर नाउ र सिछासे लाजाइत, मोइ मानुसक छावा पुनु आफ्न महिमायँ हसे परमेसोर बुबाक र पबित्र सोर्गदुतक महिमायँ अइतेखना उसे मानुसके आफ्न कहिके लाजातम। 27तर मोइ तेउह्रासब्के साच्चिकइ कतेबाटम, परमेसोरक राज्जेके निजदेख्लसमन कत्का जेना मानुसचाहिँ इछिका ठोडेलमद्धे नामोरत।”
येसुक रुप फेरिल
(मति १७:१-८; मर्कुस ९:२-८)
28येसुइ इसे कुरा कइकेभइलक लगभग एक हप्तापाछु पत्रुस, युहन्ना र याकुबके लिकुन डाँडायँ पार्थाना करिके जाइकेभइल। 29हसे ओनेनेइ पार्थाना करिराख्ते बेलायँ येसुक अनुहारक रुप भिन्दइ भइल र ओनेन्क लुगा हिउँ जस्नइ गोरो र चहकिलो भइकुन अइल। 30उछिका अन्चक्लइ दुइ जेना मानुस देखा पोरिकुन, येसुसाङ कुरा करिके लाग्ल, जोनो चाहिँ मोसा र एलिया रहत। 31उसब पुनु सोर्गक ओजङ्यँ चम्कतिन, येसु मोरिकेपोर्लार बारेयँ ओनेन्साङ कुरा कर्तेरहत। ओनेनेइ इसे कुरा यरुसलेमयँ पुरा करिके पोर्लाहार रहइ। 32पत्रुस र उक्र साङ्घातिसब मस्त निन्दाल रहत, बिउँझतेखना त येसुक महिमा र ओनेन्साङ दुइ जेना मानुसके ठोडेल देख्ल। 33येसुसाङ उसे दुइ जेना बिदा भइकुन जइतेखना पत्रुसेइ उनेहेनके कहल, “गुरुजिउ, हाम्राके इछिन बोसिके ठिक बाटइ। इछिका तिनओटा छोप्रा बानाउ, एक्टा तेउह्राके, एक्टा मोसाके, र एक्टा एलियाके!” तर उख्राके आफ्नि किति बोराल ख्यालइ निजभइल।
34हसे पत्रुसेइ बोराइराख्तेखना एक्टा बाद्रि आइकुन उसब्के ढाक्ल र चेलासब डाराल। 35उहइबेला बाद्रिकमाटे यस्न आबाज अइल, “इसे मोइ छान्ल मेर छाहोम् हखइ, इहाइ कहल कुरा तोहेसब सुनउ।”
36इसे आबाज रोकिलपाछु चेलासबेइ येसुके मत्रइ देख्ल। उसबेइ इसे घटनाक कुरा आफ्नसाङ मत्रइ राख्ल र आफुइ देख्ल कुरा उसे बेलायँ अरु कोख्राहुके नइजे बाताल।
येसुइ भुत लाग्ल छवँडके निक पारिकेभइल
(मति १७:१४-१८; मर्कुस ९:१४-२७)
37कालुपल्ट येसु तिनजेना चेलासाङ पाहाडकमाटे झर्तेखना ओनेन्के भेटिके मानुसक बड्क भिड अइल। 38भिडसे एक जेनाइ चिच्चेइकुन कहल, “गुरु, बिन्ति कर्तम, मेर छाहोम्के हेरिदेओ किकेकने इसे मेर एक्टाइ मत्रइ छाहोम् हखइ! 39घरिघरि उख्राके भुतेइ धरित र उसे चिच्चेतिन् मुर्छा पोरित। मुहुकमाटे गाज निस्काइकुन लइटपइट करित् हसे भुतेइ उख्राके बल्लबल्ल छाडित। 40तेउह्र चेलासब्के मोइ भुत निस्काइदेओ कइकुन बिन्ति कर्ल, तर उसबेइ निजसक्ल।”
41हसे येसुइ जबाफ देइकेभइल, “कस्न बिस्वास निजभइल र अट्टेरि मानुससब रलाउ! तेउरसबसाङ मोइ कत्का दिनसमन बस्तम? मोइ तेउह्रासब्के कत्का सहिके?” उपाछु येसुइ छवँडक बुबाहाके कहिकेभइल, “तेर छाहोरके लेइकुन आउक्!”
42हसे बुबाहिक् छाहोके आन्तिनखना भुतेइ उख्राके धरिकुन काराक्कुरुक पारिहाल्ल। तर येसुइ भुतके हप्काइकुन, छवँडके निक पारिकुन बुबाहाके देइकेभइल।
43परमेसोरक बड्क सक्ति देखिकुन सभइ मानुससब छक्कइ पोर्ल।
येसुइ फेरि आफ्न मोर्लारक चर्चा करिकेभइल
(मति १७:२२-२३; मर्कुस ९:३०-३२)
ओनेन्क काम देखिकुन मानुससब छक्क परिराख्ल बेलायँ येसुइ चेलासब्के कहिकेभइल, 44“मोइ जे कतेबाटम, उसे कुरा झुनबिस्राओ, किकेकने मानुसक छावाके धरिकुन मानुससब्क हातयँ सोम्पिदेइत।” 45तर येसुक कुरा चेलासबेइ बुझिके निजसक्ल। उसबेइ इसे कुरा बुझिके सक्लाहार ग्यान निजपाउल गुनेइ येसुइ किति कहिकेभइल कइकुन बिचारइ करिके निजसक्ल। हसे ओनेनेइ किति कहिकेभइल हखत कइकुन उसबेइ पुछिके आँट पुनु नइजेकर्ल।
सभइसे बड्क कोनो
(मति १८:१-५; मर्कुस ९:३३-४०)
46येसुक बाह्र जेना चेलासब्क माझयँ सभइसे बड्क कोनचाहिँ हखइ कइकुन भनाभन भइल। 47येसुइ उसब्क मनक कुरा बुझिकुन एक्टा छावाके आफ्न छेओ आनिकेभइल 48हसे उसब्के कहिकेभइल, “जोनेइ मेर नाउयँ नान्हि छावाके अप्नेताहात् उहाइ मेराके अप्नेइत हसे मेराके अप्नेलाहारइ मेराके पाठाइकेभइल बुबाके पुनु अप्नेइत। जोनो तोहेसबमद्धे सभइसे नान्हि बाटइ, उहइ नइ सभइसे बड्क भइत।”
जोनेइ बिरोध नाकरत् उसे तेउरसबसाङ भइताहात्
(मर्कुस ९:३८-४०)
49युहन्नाइ कहल, “गुरु, हामे एक जेना मानुसेइ तेउह्र नाउ लेइकुन भुतसब निस्काइराख्ते देख्ल, हसे हामे उख्राके यस्न करिके निजदेल किकेकने उसे हाम्र हुलक मानुस नइजे रहइ।”
50“उख्राके झुनरोकुक, तेउह्रसब्क बिरोध नइजेकर्लाहार जत्का तेउह्रसब्कइ पच्छेक हखत।” कइकुन येसुइ उसब्के कहिकेभइल।
सामरिसबेइ येसुके मान नइजेकर्ल
51येसुक सोर्ग जइलाहार दिन नजिकइ अइलगुनेइ यरुसलेमपटि जाइके पक्का निधो करिकेभइल। 52हसे इसे खबर देइके लागि मानुससब्के आफ्निकते पइलानइ पाठाइकेभइल। उसब जइल, र ओनेन्क लागि सभइ कुरा तयार पारिके सामरिसब्क एक्टा गाउयँ पोस्ल। 53तर ओनेनेइ यरुसलेम जाइके निधो कर्ल थाहा पाइकुन उसे गाउक मानुससबेइ उनेहेनके मान नइजेकर्ल।#९:५३सामरियाक गेरासिम पाहाडयँ परमेसोरक आरधना करिकेपोरित कइकुन सामरिसबेइ बिस्वास कर्तेरहइ उहइगुनेइ यरुसलेमक मन्दिरयँ आरधना करिके उसब्क पइडायँ यहुदिसबेइ हिठ्ल मन निजपरातेरहत। 54इसे देखिकुन येसुके याकुब र युहन्नाइ कहल, “प्रभु, कि सोर्गकमाटे आगि झरिकुन हामे उसब्के मास्ल तोहे चाहाताउ?”
55तर येसुइ फनक्कइ फर्किकुन ओस्न कहलगुनेइ उसब्के हप्काइकेभइल। 56उपाछु ओनेनेइ उसब्के लेइकुन अर्क गाउयँ जाइकेभइल।
येसुके पच्छेतेखना तिरिकेपर्लार मोल
(मति ८:१९-२२)
57उछिसे उनेहेनसब जाइराख्तेखना एक जेना मानुस आइकुन येसुके कहल, “तोहे जुछि जइने पुनु मोइ तेउह्र पाछु अइतम्।”
58हसे येसुइ उख्राके कहिकेभइल, “चाहुक्, सियारक बोस्लाहार ढाड, र चरइक गुड बाटइ, तर मानुसक छावाके कने बिसालार ठाउ पुनु निजबाटइ।”
59हसे येसुइ अर्क एक जेना मानुसके कहिकेभइल, “मेर पाछु लागुक!”
तर उहाइ कहल, “गुरुजिउ, पइला मेर बुबाक लास गाडिके जाइके दिकेहबखाइ।”
60येसुइ उख्राके कहिकेभइल, “मोर्ल मानुसके मोर्ल मानुससबेइ नइ गाडुस।#९:६०यहुदिसबेइ लास गाड्लार कुराके एक्दमइ बड्क कुरा मान्तेरहत तर लास गाड्लारकते बड्क कुरा येसुक पाछु लागिके हखइ कइकुन ओनेन् कहिकेभइल। तर तइचाहिँ जाइकुन परमेसोरक राज्जेक खुसिक समचार प्रचार करुक्।”
61फेरि येसुके अर्क एक जेनाइ कहल, “पाउ, मोइ तेउह्र चेला भइके चाहातम, तर मेराके पइला जाहानसाङ बिदा लेइके देओ।”
62येसुइ उख्राके कहिकेभइल, “होर जोत्तेखना पाछु फर्किकुन चाहालाहार मानुसचाहिँ परमेसोरक राज्जेयँ काम नइजेलाग्लाहार।”
Currently Selected:
लुका 9: DRY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
