लुका 8
8
येसुके साघालार बेटिसब
1येसु केहाउ दिनपाछु परमेसोरक राज्जेक बारेयँ खुसिक समचार सुनातिन, गाउ-गाउ र सहर-सहरयँ जाइकेभइल। ओनेन्साङ बाह्र जेना चेला पुनु जइल। 2#मति २७:५५-५६; मर्कु १५:४०-४१; लुक २३:४९भुतसब र रोगसे निक भइलि बेटिसब मद्धे, सातोटा भुत लागिकुन निक भइलि मरियम मग्दलिनि पुनु रहि; 3हेरोद राजाक कोसादछ्य#८:३ कोसादछ्य पइसा राख्लाहार मानुस खुजासक दुलिहिक योअन्ना रहि। हसे सुसन्ना, र अरु पुनु धेरइ बेटि रहत जोनेइ येसु र ओनेन्क चेलासब्के धन-सम्पति दिकुन साघातेरहत।
बिया छर्लाहारक काथा
(मति १३:१-९; मर्कुस ४:१-९)
4सहर-सहरकमाटे मानुसक भिड अइतिन् रहत, येसुइ भेला भइकुन बोस्ल मानुससब्के, एक्टा काथा कहिकेभइल।
5“बारियँ जाइकुन एक जेना मानुसेइ बिया छर्ल। बिया छर्तेखना केहाउ बिया पइडायँ पोर्ल, र मानुससबेइ खुन्ल, हसे चरइ आइकुन खाइदेल। 6केहाउ बियाचाहिँ पाथर मत्रइ भइल बारियँ पोर्ल, उछिका उम्रिके त उम्रल, तर चिसोमाटि निजभइल गुनेइ सुखाइहाल्ल। 7केहाउ बिया साङ-साङ काटो पुनु उम्रल, तर काटो धेरइ छिटो झाङगिकुन उम्रल बिरुवाके बाढिके निजदेल। 8हसे अरु बियाचाहिँ मलिल माटियँ पोर्ल, र लहलह भइकुन बहड्ल, हसे एक्टा दानासे सय गुना फोर फोराल।”
यत्का कहिसक्लपाछु येसुइ कहिकेभइल, “जक्र सुन्लार कान बाटइ, उहाइ, सुनुस।”
काथाक उदेसे
(मति १३:१०-२३; मर्कुस ४:१०-२०)
9हसे येसुके इसे काथाक अर्थ किति हखइ कइकुन ओनेन्क चेलासबेइ पुछ्ल। 10येसुइ उसब्के कहिकेभइल, “तेरासब्के चाहिँ परमेसोरक राज्जेक भित्रि कुरा जानिके ग्यान देल बाटइ, तर अरुके चाहिँ इसे कुरा काथाकमाटे नइ कहतम्, उहइगुनेइ उसबेइ चाहिके त चाहाताहात् तर नादेखत्, र सुनिकेत सुन्तात् तर नाइबुझत।#यसइ ६:९-१०
बिया छर्लाहार काथाक अर्थ
(मति १३:१८-२३; मर्कुस ४:१३-२०)
11“इसे काथाक अर्थ चाहिँ, बिया नइ परमेसोरक बचन हखइ। 12पइडायँ पोर्ल बियाइ इसे बुझाइत कि उसबेइ बचन सुनिके त सुन्तात् तर मनयँ राखिके नासकत्; किकेकने बिस्वास करिकुन बाचिके झुन्पाउस कइकुन सइतान आइत हसे सुन्ल कुरा बिछिकुन लेजित। 13पाथरयँ पोर्ल बियाइ इसे कुरा बुझाइत कि उसबेइ परमेसोरक बचन सुन्ल बित्थिकइ बिस्वास कर्ताहात्, तर उसब जरि नइ निजभइल बिरुवा जस्नइ भइताहात्। ओसिन कर्तेखना उसब्क बिस्वास एकछिनक लागि मत्रइ भइत, हसे अस्कार र दुखक बेलायँ बिस्वास हेराइत। 14काटोक झाङगयँ पोर्ल बियाइ इसे कुरा बुझाइत कि उसबेइ परमेसोरक बचन त सुन्ताहात्, तर सन्सारक चिन्ता, धन-सम्पति र मोजमस्तिक जिन्दगिइ ढाक्ल गुनेइ बिस्वास बाढिके नापाओइ र उक्र फोर पाकिके पुनु नासकइ। 15मलिल माटियँ पोर्ल बियाइ इसे कुरा बुझाइत कि कोलोउ चाहिँ बचन सुन्तात् र आग्या मानिकुन सुन्ल बचनके राम्रसे मनयँ राख्तात्, र धेरइ फोर फोरातात्।
बत्तिक उजुङ
(मर्कुस ४:२१-२५)
16“बत्ति बारिकुन कोलोउ पुनु पाथिइ नाढाकइ, न त खाटतर लोकाइकुन राखित। बुरु घरभितर अइलाहारसब्के, उजुङ भउस् कइकुन बत्ति अल्ग ठाउयँ राखित।#मति ५:१५; लुक ११:३३
17“यस्के नइ जे जत्का लोकाइकुन राख्ल कुरा बाटइ, उसे सभइ बाहार देखार पारित र जे जत्का गोप्पे कुरा बाटइ उसे सभइ प्रस्टइ भइत।#मति १०:२६; १२:२
18“उहइगुनेइ तोहेसब सुन्ल कुराके राम्रसे ध्यान देओसब किकेकने जख्रासे बाटइ, उख्राके अझइ देइत तर जोख्रासे नइजे, उक्रसाङ जिति बाटइ कइकुन उहाइ ठानित, उसे कुरा पुनु उख्रासे आछ्राइत।”#मति २५:२९; लुक १९:२६
येसुक उइया र भाइकसब
(मति १२:४६-५०; मर्कुस ३:३१-३५)
19एक दिन येसुक उइया र भाइकसब ओनेन्के भेटिके अइल, तर मानुससब्क भिडेइ कर्ते उसबेइ ओनेन्के भेटिके निजसक्ल। 20एक जेना आइकुन येसुके कहल, “तेउह्र उइया र भाइसब तेउह्राके भेटिके बाहार असेइराख्ल बाटत।”
21तर ओनेनेइ उसब्के कहिकेभइल, “उसब नइ मेर उइया र भाइसब हखइ जोनेइ परमेसोरक बचन सुनिकुन आफ्न जिबनयँ पालन कर्ताहात्।”
येसुइ आँधिके सान्त पारिकेभइल
(मति ८:२३-२७; मर्कुस ४:३५-४१)
22येसु एक दिन आफ्न चेलासबसाङ डोङायँ चढिकुन, “हामे तालक ओपारपटि जाहुँ कहिकेभइल।” र ओनेन्सब जाइकेभइल। 23जइतेखना, येसु निदाइकेभइल। तालयँ बड्क आँधिबेरि चलिके थाल्ल, डोङा पानिइ भोरिके थाल्ल, र उसब बड्क आपतयँ पोर्ल। 24ओस्न भइतेखना चेलासब आइकुन येसुके उठातिन कहिके थाल्ल, “गुरुजिउ, गुरुजिउ! हामे त मोरिके थाल्ल।” इसे सुनिकुन येसु उठिकुन आँधिबेरि र भेलके हप्काइकेभइल। उहइबेला नइ आँधिबेरि रोक्ल र सभइ सान्ति भइहाल्ल।
25येसुइ चेलासब्के कहिकेभइल, “खइ, तेह्रसब्क बिस्वास?”
उसब छक्कइ पोर्ल, ओनेन्क सक्ति देखिकुन डारातिन एक-अर्कसे कुरा करिके थाल्ल, “उसब कोनो हखत? ओनेनेइ हप्कानेपार त भेल र आँधिबेरिइ समेत ओनेन्क आग्या मान्ते रलाहाइ।”
भुत लाग्ल मानुस निक भइल
(मति ८:२८-३४; मर्कुस ५:१-२०)
26येसु र ओनेन्क चेलासब गालिल तालक ओपार, गेरासेनस ठाउयँ पुगिकेभइल। 27येसु डोङासे उत्रिसक्लपाछु, ओनेनेइ उहइ सहरक एक जेना भुत लाग्ल मानुसके भेटिके भइल। उसे मानुसेइ धेरइ दिनसे लुगा निजलागातेरहइ हसे घरयँ पुनु नबसिकुन, चिहानघारियँ बोस्ते रहइ। 28जब उहाइ येसुके देख्ल, उसे बड्क सोरेइ चिच्चेइकुन, ओनेन्क आघु घोप्टो पोरिकुन कहल, “हे येसु सभइसे बड्क परमेसोरक छावा, तोहे मेराके किति करिके खोज्ते बाटउ? मोइ बिन्ति कर्तम, मेराके दुख झुनदेओ।” 29येसुइ भुतके आघुहिँ निस्किके आग्या देइकेभइल गुनेइ उसे मानुसेइ यस्के कहल रहइ। उसे भुतेइ धेरइ पल्ट उख्राके धर्ल रहइ, उक्र हात-गोड साङ्लाइ बाधिकुन राख्ते पुनु, भुतक सक्तिइ साङ्ला टुटाइकुन उसे मानुस उजाडभइल ठाउपटि भाग्तेरहइ।
30येसुइ उख्राके पुछिकेभइल, “तेर नाउ किति हखइ?”
उहाइ कहल “फउज।”#८:३०ग्रिक भासायँ “बथान” कहल इक्र अर्थ ६,००० सिपाहिसब हखइ किकेकने उक्र जिउयँ धेरइ भुतसब पोस्ल रहइ। 31येसुसाङ भुतसबेइ हाम्राके अतल कुन्डयँ झुनपाठाओ कइकुन बिन्ति कर्ल।
32एक बथान सोर नजिकइक डाँडायँ चह्रिराख्ते रहइ। हसे येसुसाङ भुतसबेइ उहइ सोरभित्र पोसिके आग्या माङ्ल, येसुइ उसब्के कहिकेभइल, “जाओसब।” 33उसे मानुसकमाटे भुतसब निस्किकुन सोरभित्र पोस्ल। हसे सोरक बथान भिरकमाटे खसिकुन तालयँ बुडिकुन मोर्ल।
34सोर चरुहाँसब यस्न घटना देखिकुन भाग्ल र इसे कुरा गाउ र सहरभरि जाइकुन फइलाइदेल। 35येसुकलघि धेरइ मानुससब किति भइल रलाइ कइकुन चाँइके अइल, हसे पइला भुतेइ साताल मानुसके ठिक भइकुन, लुगा लागाइकुन, येसुक छेओ बोसिराख्ल उसबेइ देख्ल र यस्न देखिकुन उसब सभइ डाराल। 36भुत लाग्ल मानुस निक भइल कुरा देख्लारसबेइ अरु मानुससब्के पुनु सुनाइदेल। 37उपाछु येसुके उसे ठाउक सभइ मानुससबेइ इछिकमाटे जाइहालउ कइकुन बिन्ति कर्ल, किकेकने उसब बेस्के डाराल रहइ। हसे येसु फर्किकुन जाइके लागि डोङायँ चढिकेभइल। 38उहइबेलायँ निक भइल मानुसेइ येसुके बिन्ति कर्ल, “पाउ मेराके पुनु तेउह्रसाङ लेजिकेहबखाइ।”
तर येसुइ उख्राके कहिकेभइल, 39“तोइ आफ्न घरयँ जाउक् र परमेसोरेइ तेर लागि किति करिकेभइल, उसे कुरा अरु मानुससब्के सुनाउक।”
येसुइ आफ्न लागि करिकेभइल कामक बारेयँ, उसे मानुसेइ सहरभरि सुनातिन हिठ्ल।
याइरसकि छाहिक् र मन्देलि बेटि
(मति ९:१८-२६; मर्कुस ५:२१-४३)
40येसु तालक एपार आइपुग्लपाछु, मानुसक भिडेइ ओनेन्के मान करिके, असेइकुन बसिराख्ल रहत। हसे ओनेन्के उसबेइ मान कर्ल। 41हसे सभाघरक याइरस कलाहार सासक आइकुन; येसुक गोडयँ पोरिकुन मेर घरयँ आइकेहबखाइ कइकुन बिन्ति कर्ल, 42किकेकने बाह्र बर्सक, उक्र एक्टि मत्रइ छाहिक्, मोरिलालि रहि। येसु उक्र बिन्ति सुनिकुन उक्रसाङ जाइके लाग्लथनाइ, येसु जाइके लाग्ल देखिकुन मानुससब चारइपट्टिकमाटे खचाखच करिकुन आइके लाग्ल।
43उहइ हुलयँ बाह्र बर्ससे रकत बोहलार बेथाइ दुख पाउलि एक्टि बेटि रहि। उहाइ आफ्न सभइ सम्पति उपचार करिकुन सक्लि पुनु उख्राके निक पारिके निजसक्ल। 44उहि मानुसक भिडयँ पाछुकमाटे आइकुन, येसुक लुगाक एक छेओ छिउलबित्तिकइ उक्र रकत बोहलार बेथा निक भइहाल्ल। 45येसुइ पुछिकेभइल, “मेराके कोनेइ छिउल?” तर उसबेइ “मोइ त निजछिउल” कहल।
हसे पत्रुसेइ कहल, “गुरुजिउ, तेउह्राके त मानुससब्क भिडेइ नइ धक्लतेबाटइ।”
46तर येसुइ कहिकेभइल, “नइजे, कोलोउयेइ मेराके छिउल बाटइ किकेकने मेराकमाटे सक्ति निस्किकुन जइल मोइ थाहा पाउल।” 47उसे बेटि लोकाइराखिके निजसक्लार कुरा थाहा पाइकुन, डरेइ काप्तिन ओनेन्क अगाडि घोप्टो पर्लि। ओनेन्के उहि छिउलि, र छिउल बिथिकइ निक भइलि कुरा सभइक आघु कहलि। 48येसुइ उख्राके कहिकेभइल, “मेर छाहिम्, तेर बिस्वासेइ तोइ निक भइलि बाटस्, आबे खुसि भइकुन जाउक्।”
49येसुइ यस्के कहतिन् खना एक जेना मानुस सभाघरक अगुवा याइरसक घरसे आइकुन कहल, “तेउह्र छाहिउ त मोरिसक्लि, आबे गुरुरके दुख झुनदेउक।”
50तर येसुइ इसे कुरा सुनिकुन याइरसके कहिकेभइल, “हरेस झुनखाउक, बिस्वास मत्रइ करुक्, तेर छाहिर बाचित।”
51येसुइ याइरसक घर पुगिकुन पत्रुस, याकुब, युहन्ना र उसे बेटिक उइयाक-बुबाक बाहेक अरु कोख्राहुके पुनु भितर पोसिके नइजेदेइकेभइल। 52बेटि मोर्लि कइकुन उछिका जम्मा भइल सभइ जेना धेरइ रोउते रहत। येसुइ उसब्के कहिकेभइल, “झुनरोउक; उसे त निन्दालि मत्रइ हखि, निजमोर्लि बाटि।”
53ओनेन्क कुरा सुनिकुन उसबेइ होस्ते उडाल, किकेकने उसब्के बेटि मोर्लइ हखि कइकुन पक्का थाहा रहइ। 54तर येसुइ बेटिक हात धरिकुन कहिकेभइल, “ए बाबि, उठुक्!” 55हसे बेटिक परान फेरि फर्किकुन अइल, र ओख्निहिँ उसे उठ्लि, र येसुइ उसे बेटिके केहाउ खइलाहार कुरा दिउक कहिकेभइल। 56उसे बेटिक उइया-बुबाक छक्कइ पोर्ल, तर येसुइ उसब्के “इसे कुरा कोख्राहुके पुनु झुनकहुक!” कइकुन कडा आग्या देइकेभइल।
Currently Selected:
लुका 8: DRY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
