लुका 10
10
येसुइ सत्तरि जेना चेलाके पाठाइकेभइल
1उपाछु प्रभु येसुइ अरु सत्तरि जेना मानुसके छानिकेभइल। उसब्के दुइ-दुइ जेना करिकुन आफ्नेन् जाइके लाग्ल गाउ र सहरपटि आफ्नेन्कते आघु पाठाइकेभइल। 2ओनेनेइ उसब्के कहिकेभइल, “उठाइके पोर्लाहार बालि त धेरइ बाटइ, तर खेतारसब कने थोरइ बाटइ। बालिक साहुसाङ बालि उठालाहार खेतारसब आफ्न खेतयँ पाठाइदेओ कइकुन बिन्ति करुक्। 3चाओ, मोइ तेउह्रासब्के बनकुकुरक माझयँ भेडा पाठालजस्नइ करिकुन पाठातिन बाटम। 4जइतेबेला तोहेसब पइसा, झोला, जुत्ता, केहाउ नाबोकिके। कोलोउके पुनु पइडायँ सेवासलाम करिकुन समय खेर झुनघुघाओ।
5“जोख्नि तोहेसब मानुसक घरयँ पुग्ताहाउ ‘इसे घरयँ सान्तिइ बास करुस्’ कइकुन आसिक देओ। 6यदि उसे घरक मानुसेइ सान्ति रुचातात् कने उसबेइ सान्ति पाउताहात्। तर उसबेइ सान्ति नारुचाओत कने तेउह्र आसिक तेउह्रसब्कलघि नइ फर्किकुन आइत। 7हसे उसबेइ जिति खाइके देताहात्, उसे खाइकुन तोहेसब उहइ घरयँ बोसउ किकेकने खेतारसबेइ जेला पाइके नइ पोरित। तर घर-घरयँ बास बोस्ते नाहिठिके।
8“ओसिनकरिकुन सहरयँ जइते पुनु उछिक मानुससबेइ मान करिकुन खाइके देल कुरा खाओ। 9सहरयँ भइल मन्देलसब्के निक पारिकुन, ‘परमेसोरक राज्जे अइलाहार बेला भइल बाटइ’ कइकुन प्रचार करुक्। 10तर जोनो सहरयँ जइताहाउ, उछिक मानुससबेइ तेउह्रासब्के मान नाकरत् कने पइडायँ निस्किकुन जाओ र कओ, 11‘तेउह्रासब्के सहरक धुलो हाम्र गोडयँ टासिने पुनु तेउह्रासब्के बिरुद्धयँ हाम्र गोड टक्टकेताहिँ। तर पुनु इसे जानसब कि परमेसोरक राज्जे अइलाहार बेला भइल बाटइ।’ 12तर तेउह्रासब्के मोइ कतेबाटम, न्यायक दिनयँ उसे सहरक मानुससब्क हालतकते त बुरु पापेइ भर्ल सदोम सहरक मानुससब्क हालत सहिके सक्लाहार भइत!
बिस्वास नइजेकर्लाहार सहरसब्क दसा
(मति ११:२०-२७; १३:१६-१७)
13“ए खोराजिन र बेथसेदा सहरसब, तेउह्राके धिक्कार! किकेकने तेउह्रसब्क माझयँ कर्ल अचम्मक काम टुरोस र सिदोन सहरयँ कर्ल भइने उछिक मानुससबेइ धेरइ पइला नइ आ-आफ्न पाप छाड्लारत् हसे पाप छाड्ल देखाइके बोराक लुगा लागाइकुन खारानि घस्लारइ। 14तर न्यायक दिनयँ तेउह्रासब्के हालतकते त टुरोस र सिदोनक मानुससब्क हालत सहिके सक्लाहार भइत। 15हसे कफर्नहुम सहरक मानुससब, कि तोहेसब सोर्ग पुग्ताहि कताहाउ? तोहेसब त पातालयँ नइ पुग्ताउ।
16“तेउह्रसब्क कुरा सुन्लारइ मेर कुरा सुनित; तेउह्रासब्के निजमान्लारइ मेराके पुनु नामानइ; हसे मेराके निजमान्लारइ मेराके पाठाइकेभइलार परमेसोरके पुनु नामानइ।” कइकुन येसुइ चेलासब्के कहिकेभइल।
सत्तरि जेना चेलासब फर्किकुन अइल
17सत्तरि जेना चेलासब फर्किकुन अइल हसे खुसि भइतिन् प्रभुके कहल, “प्रभु, तेउह्र नाउक सक्तिइ भुतसब पुनु हाम्र अधिनयँ अइल।”
18येसुइ उसब्के कहिकेभइल, “मोइ सइतानके बिजुलिजस्नइ आकासकमाटे झरिराख्ते देख्ल। 19सुनुक्, मोइ तेउह्रासब्के साप र बिच्छिके खुनिकुन हिठ्लाहार सक्ति हसे सत्रुक सभइ सक्तिके जितिके अधिकार देल बाटम। कोलोउ कुराइ तेउह्रासब्के नोक्सान नाकरइ। 20तइपुनु तेउह्रसब्क अधिनयँ भुतसब अइल बाटइ कइकुन झुनरामाओ। बुरु तेउह्रसब्क नाउ सोर्गयँ लेख्ल बाटइ कइकुन रामाओ।”
21येसुइ उहइ बेलायँ पबित्र आत्माकमाटे आनन्दइ भरिकुन कहिकेभइल, “ए परमेसोर बुबा, सोर्ग र पिर्थिबिक मालिक, मोइ तेउह्राके धन्यबाद देतम, किकेकने तोहे इसे कुरासब बुद्धिमान र टाठो-बाठोसे लोकाइकुन राखिकेभइल हसे केट्-केटिसब जस्नइ इसे मानुससब्के बुझाइ देइकेभइल! ए बुबा, यस्न करिके तेउह्र इच्छा रहइ!
22“सभइ कुरा मेर बुबाइ मेराके सोम्पिदेल बाटत। बुबाइ बाहेक छावा कोनो हखइ कइकुन कोलोउयेइ नाचिनत, ओस्नइ करिकुन बुबा कोनो हखत कइकुन छावाइ र उहाइ चिनाल मानुससबेइ बाहेक कोलोउयेइ नाचिनत।”
23उपाछु येसु चेलासबपट्टि फर्किकुन उसब्के सुटुक्कइ कहिकेभइल, “तोहेसब इसे सभइ कुरा देखिके पाइके तेउह्रसब्क लागि कत्का बड्क आसिसक कुरा हखइ! 24मोइ तेउह्रासब्के कतेबाटम, तोहेसब देख्ल इसे कुरासब धेरइ अगमबक्ता र राजासबेइ देखिके र सुनिके बड्क इच्छा कर्ल रहत, तर देखिके र सुनिके पुनु निजपाउल।”
राम्र छिमेकिक काथा
25एक दिन धर्मगुरुइ येसुके जाँचिकेलागि ठोडेइकुन पुछ्ल, “मास्टर, अजम्बरि जिबन पाइके लागि मोइ किति करिकेपोरित?”
26येसुइ कहिकेभइल, “इख्राके मोसाक धर्मक कानुनयँ किति लेख्ल बाटइ? तोइ किति पढ्ते बाटस्?”
27उसे मानुसेइ जबाफ देल, “‘तोइ आफ्न परमप्रभु परमेसोरके आफ्न पुरइ मनसे, पुरइ आत्मासे, पुरइ बलसे र पुरइ दिमाखसे माया करुक्,#बेब ६:५ हसे आफ्न छिमेकिके आफइके जस्नइ माया करुक्’।”#लेबि १९:१८
28येसुइ उख्राके कहिकेभइल, “तोइ ठिक कहल। तोइ ओसिन करुक् हसे अजम्बरि जिबन पाउतस।”
29तर उहाइ आफइके धर्माति देखाइकेलागि येसुके कहल, “ओसेकने मेर छिमेकि चाहिँ कोनो हखइ त?”
30येसुइ उख्राके एक्टा काथा कहिकेभइल, “एक जेना मानुस यरुसलेमकमाटे यरिहोपट्टि झर्तिन रहइ, उहइ बेलाके चोरसब आइकुन उख्राके धर्ल हसे नाङ्टइ पारिकुन ठोक्ल र अच्कल्टो पारिकुन छाडिदेल। 31एकछिनपाछु यहुदि पुजेहेरि उहइ पायडकमाटे आइराख्ते रहइ। चोट लाग्ल मानुसके पइडायँ देखिकुन अर्कइपटि तर्किकुन हिठ्ल। 32ओसिनकरिकुन परमेसोरक मन्दिरयँ काम कर्लाहार लेबि पुनु उहइ पायडसे अइल हसे चोट लाग्ल मानुसके देखिकुन उसे अर्कइपटि फर्किकुन जइल। 33उपाछु एक जेना सामरि#१०:३३सामरि यहुदिसब्क नजरयँ एक्टा तुच्छ जात। जातक उहइ पायडसे जइतिन् रहइ र चोट लाग्ल मानुसके देखिकुन उक्र मन दयाइ भरिल। 34हसे उक्रलघि जाइकुन उहाइ घाउ सफा करिकुन तेल र अङ्गुरक मोद#१०:३४तेल र अङ्गुरक मोदघाउयँ लागालाहार बिरोउ लागाइकुन चेथ्रो बान्देल, हसे उख्राके आफ्न गधायँ चाढाइकुन एक्टा नान्हि होटेलयँ पुरेल, हसे उख्राके सिहार-सुसार करिकुन बोस्ल। 35कालुपल्ट जइलाहार बेलाके सामरिइ होटेलक साहुके चाँदिक दुक्टा सुक्का#१०:३५चाँदिक दुक्टा सुक्का दुइ दिनक कमाइ देइकुन कहल, ‘इख्राके राम्रसे चाइसाइ। अरु खर्च लाग्ने मोइ फर्किकुन अइते तेउह्राके तिरिदेतम।’”
36हसे येसुइ धर्म-कानुनक गुरुके पुछिकेभइल, “तेर बिचारयँ इसे तिन जेनामद्धेयँ चोरसब्क हाथयँ पोर्लाहार मानुसके छिमेकिक जस्नइ बेभार कोनेइ कर्ल?”
37उहाइ कहल, “उख्राके दया कर्लाहार मानुस।” हसे येसुइ कहिकेभइल, “जा, तोइ पुनु ओसिन करुक्।”
मार्था र मरियमसाङ येसुक भेट
38हसे येसु र ओनेन्क चेलासब जइतिनखना एक्टा गाउयँ पुग्लपाछु, उछिका उनेहेनसब्के मार्था नाउक बेटिइ आफ्न घरयँ मान कर्लि। 39उक्र एक्टि बइनिक रहि जोक्र नाउ मरियम रहइ। उहि प्रभु येसुक गोडछेउ बोसिकुन ओनेन्क बचन सुनिके थाल्लि। 40तर मार्था मान कर्लाहार कामयँ अल्झलि रहि। हसे आफ्नि मत्रइ धेरइ काम करिकेपर्ल गुनेइ उहि येसुकलघि आइकुन कहलि, “ए प्रभु, बइनिइ केहाउ पुनु नाकरि, सभइ काम मोइ करिकेपोरित। किति तोहे नादेखउ? उख्राके आइकुन मेर कामयँ साघाइके कइदेओ।”
41प्रभु येसुइ उख्राके कहिकेभइल, “ए मार्था, तोइ धेरइ कुराक चिन्ता र फिक्रि कर्तस। 42तर चाहालार कुरा एक्टाइ बाटइ, उहइ राम्र कुरा नइ मरियममेइ रोज्लि बाटि, जोनो कुरा उख्रासे नाआछ्राओइ।”
Currently Selected:
लुका 10: DRY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
