Yowani 20

Ekômwoka kwa Yesu

(Mat 28:1-8; Mar 16:1-8; Luk 24:1-12)

1Ábere lwe'inga lumbuli-mbuli, Mariya we'Makatala era kuya kwa shinda ya Yesu. Áikire'ko, era kulola kwa bàlangwire ekoi lya bábaa bàhukire kwa chiso che'i shinda.

2Bushi no'ku, Mariya kuna kulibita áya kuhonda Simoni Petero, no'la unji mwanafunzi* Yesu ábaa atúla asímire. Era kubabura mbu: «Aaye! Cha chirunda cha Enawetu, bàkulire'chi mwa chinjifwa, tùteshi ne'ra bàbikire'chi!»

3Petero no'yu unji mwanafunzi* mulikabo, bera kwire bálibichira kwa chinjifwa. 4Mwo'ku kulibita kwa banáli babiri, oyu unji mwanafunzi* yeke, era kurenza Petero emaulu, na ába mubere kuika kwa chinjifwa. 5Áikire'ko, era kwínamirira, era kulungulira'mo, na álola kwe'ra mirembe yeine oshâo iyanáshibire ala'shi. Si chiro ákêngirira'mo.

6Chasinda, Simoni Petero nai era kuika, unao-unao yeke kuna kwêngirira'mo. Nai era kulola kwe'i mirembe ìri ala'shi, 7era kulola no'kwa luchimba lwa bábaa bàhukire kwe'twe lya Yesu, lùbungirirwe mwai-mwai. 8Oyu unji mwanafunzi* wátangiraa kuika kwa chinjifwa, nai era kwire êngirira'mo. Na mango yeine áchiloreraa kwe'bi, era kwêmerera mwa muchima wai. 9Byábaa bacha, bushi ebanafunzi* bábaa bàtanafuraa kumenyerera emyasi era Maanjiko Mabuya-buya matúla màtechire kwa byěmire Yesu ómwoke.

10Chasinjire, ba banafunzi* babiri bera kufuluka kwa wabo.

Yesu ápamukira ku Mariya we'Makatala

(Mat 28:9-10; Mar 16:9-11)

11Mariya yeke, kwêmanga ku ábaa anêmenze ofu ne'shinda, álira. Ábere anáchiri álira, era kwínamirira, nai atúmbikise'mo. 12Era kulola ku bamalaika* babiri bàli'mo běmbese njimba sa muoko-muoko. Bábaa běkese ala chirunda cha Yesu chábaa chàbikibwe. Muuma ábaa àli kwa lunda lwe'twe, ne'unji kwa lwe'maulu. 13Abu bamalaika*, bera kubusa Mariya mbu: «E mama! Chi wálirira kasi?» Nai mbu: «Aaye! Bàkulire echirunda cha Enawetu omola, ndaményire ne'ra bàbikire'chi.»

14Mango Mariya ábaa era àtetaa ei myasi, era kubinduka na álola kwa Yesu eménze aola. Si chiro ákamenyerera kwa i'yoyu. 15Yesu era kumubusa mbu: «E mama! Chi wálirira? Nde iwáhonda kasi?»

Mariya era kuchichinga mbu oyu wámubusa bacha, i'mulanzi we'ri hwa. Bushi no'ku, era kumwǎkula mbu: «eWaliya, akaba uwàtolire echirunda chai, unyíburaa ngai u'wàbikire'chi, nyíye kutola'chi.»

16Yesu era kumubura mbu: «Mariya!»

Unao-unao, Mariya kuna kubinduka, na ámubura mwa Chieburaniya mbu: «Raboni!» Kukuteta mbu: «Mukangirisi.»

17Yesu era kumubura mbu: «Ùtaereresaa wányiuma'ko, bushi ndasa kwérukira era mwa Tata. Si uyáa kubura banyaketu kwa nyingérukira tanga era mwa Tata, kanji ina Eho wenyu, i'Ongo wanyi, kanji ina Ongo wenyu.» 18Bushi no'ku, Mariya we'Makatala era kunaya kubura ebanafunzi* mbu: «Nyono nàlolire ku Enawetu!» Ne'myasi era Yesu ámutumaa, era kunabàbura'i.

Yesu ápamukira kwa banafunzi bai

(Mat 28:16-20; Mar 16:14-18; Luk 24:36-49)

19Ábere lwera luolo-olo lwo'lu lusuku lwe'inga, ebanafunzi* ba Yesu bera kubuanana mu nyumba nguma. Bera kuchinga enyisi, bushi bábaa bôbaa ebakulu-kulu be'Bayuta.

Mwo'lu, Yesu kuna kubapamukira'ko, na áchikoma mwa kachi-kachi kabo. Era kubabura mbu: «Mubáa ne'bôlo!» 20Ábere era àtetaa bacha, era kutangirisa ábalosa emino sai ne'lukanga lwai. Bushi no'ku, ebanafunzi* bera kumowa busese mwa kuhuba kulola ku'Enawabo. 21Yesu era kubabura kanji mbu: «Mubáa ne'bôlo! Rero, ngo'kwa Tata ányitumaa, ku nanyi nánabatuma.» 22Ábere Yesu era àtetaa ei myasi, era kubabuira emuka, na ábabura mbu: «Mùbonaa eMuchima Mubuya-buya. 23Ebandu boshi ba mungénde mwábabalira ebibi byabo, bangénde banábabalirwa'bi. Na ba mùtangende mwábabalira ebibi byabo, bàtangénde bánababalirwa'bi.»

Yesu ápamukira ku'Tomasi

24Mango Yesu ápamukiraa kwa banafunzi* bai, Tomasi ola básulaa mbu i'Maaha, kanji muuma mwa ndumwa* ekumi ne'biri sa Yesu, yeke ábaa atáli ala'uma na balikabo. 25Rero abu balikabo, mango bámuburaa mbu: «Twalólire ku Enawetu mira», era kubǎkula mbu: «Ei myasi, nyono ndàngayêmerera chiro na hicha, akaba ndasa kuchilorera kwa nzuwe se'misumari mwa byâha byai, ne'kubika emutoke wanyi ala bamúkomauliraa emusumari, ne'kubika emino yanyi mwa lukanga lwai.»

26Ábere kwàrenga einga liuma, ebanafunzi* ba Yesu bábaa babúanayire kanji mwe'i nyumba. Rero, Tomasi nai ábaa àli ala'uma nabo. Kanji bábaa bachíngire enyisi. Si Yesu era kuhuba kubapamukira'ko, na áchikoma mwa kachi-kachi kabo. Era kubabura kanji mbu: «Mùbaa ne'bôlo!»

27Chasinda, era kubura Tomasi mbu: «Bikaa emutoke wao, ulóle no'mwa byâha byanyi. Nánulaa ne'kuboko kwao, ùchiumire mwa lukanga lwanyi. Rero, ùtachânganwaa, si wíree wêmerera mwa muchima wao!»

28Tomasi kukwera kumwǎkula mbu: «Woyo u'Enawetu, kanji u'Ongo wanyi!»

29Chasinjire, Yesu era kwire ámubura mbu: «Oku wànyilolire'ko kukwera kwátuma wányemerera mwa muchima wao? Rero, baáhanyirwe ba bangányemerera busira kunyilola'ko!»

Emyasi era chine chitabo cháhonda kutubura

30Kuli binji bisomerano binene bya Yesu áiraa mwa meho me'banafunzi* bai. Si byeke, bìtaanjikirwe mwe'chine chitabo. 31Si ene myasi yǎnjikirwe'mo, chasiya mwěmerere kwa Yesu ina Kirisito*, Mwana wa Ongo. Na múkamwemerera mwa michima yenyu, kuika munábone ekalamo kumurengera'ko.

Currently Selected:

Yowani 20: tbt

Highlight

Copy