Yowani 21

Yesu ápamukira kwa banafunzi bai kwa nyanja

1Era nyuma se'bi, Yesu era kuhuba kupamukira kwa banafunzi* bai, kwa musike se'nyanja ye'Tiberiya.#21:1 nyanja ye'Tiberiya: Ei nyanja i'bénde bérika kanji mbu: Nyanja ye'Kalilaya. Rero, bacha ku ábapamukiraa'ko: 2Simoni Petero ábaa àli aola, ala'uma na Tomasi ola básulaa mbu Maaha, na Natanaeri, mwesha mwa musi we'Kana, mwa chio che'Kalilaya, na baala ba Sebetayo, na banji banafunzi* babiri ba Yesu.

3Simoni Petero era kubura balikabo mbu: «Nyono nera náchiira kufuba efi.» Nabo mbu: «Netu twáchiendera nao.» Bera kuna chiuma, na bérukira mu bwato buuma. Si mwo'bu butufu boshi, bátabona chiro ne'limboolo.

4Ábere luchiri lumbuli-mbuli, bera kulola ku Yesu emenze kwa musike se'nyanja, si chiro bákamumenya. 5Yesu era kubabusa mbu: «Ebana banyi! Mùtechire efi?» Nabo mbu: «Aaye! Chiro ne'limboolo tutànêchire'li!»

6Era kwire ábabura mbu: «Muúmaa ekasira kenyu kwa lunda lwe'malyo lwe'bwato, eri mwèta efi.» Bera kunákauma kwo'lu lunda. Bera kwîta efi sinene busese, bera kunáikira báfundwa kukululira ekasira mwa bwato.

7Chasinda, emwanafunzi* ola Yesu ábaa atúla asímire, era kubura Petero mbu: «Enawetu onola!»

Simoni Petero, ômvire bacha, era kwémbala eluchimba lwai, bushi ábaa àkongore'lo mango ábaa áloba, kuna kuchihunda kwa meshi. 8Balikabo, bera kumukulikira ne'bwato, báenda bákulula ekasira ka kábaa kèhwire mwe'fi. Bushi bábaa bàtachiri bure no'kwa musike se'nyanja, si bábaa bera bàli ku metere sìngaika ku eyana oshâo. 9Ábere baíka kwa musike, bera kulola ku mukati, na makala ma mákorera. Kwa'mu makala, kwábaa kuli efi.

10Yesu era kubabura mbu: «Munyíreteraa kwe'si efi mwechíre.» 11Simoni Petero era kwire érukira kanji mwa bwato, na ákululira ekasira kwa musike se'nyanja. Aku kasira, kábaa kèhwire efi sinenene eyana na matano ne'hatu. Si chiro àngaba mbu sábaa siri sinene bacha, aku kasira kabo chiro kákanabereka.

12Yesu era kubabura mbu: «Mubáhaa mwěkule.» Kutábaa chiro na muuma mubo, ola wáereresaa ámubusa mbu i'nde, bushi bábaa baményire mira kwa Enawabo oyola.

13Bushi no'ku, Yesu era kwire áchifunda ofu nabo, era kutola emukati na áberesa'o. Chasinda, era kuberesa ne'se'fi.

14Rero, oku kupamukira kwa Yesu ápamukiraa kwa'bu banafunzi* bai, ku kwábaa kwa kahatu kutengera mango ômwokaa.

Yesu ábura Petero mbu amúkoreraa

15Mango bábaa bera bâkúlaa, Yesu era kubusa Simoni Petero mbu: «Simoni mwenyi Yowani! Eri utúla unyísimire kurenza ngo'kwa bano banji nabo batúla banyisimire?»#21:15 Somaa Matayo 26:33. Nai mbu: «Enawetu, si weine ùnêshi kwa nyitúla nyikusimire.» Yesu era kumubura mbu: «Úndaa wêresa ebyana bye'mbuli sanyi ebiryo.»

16Yesu era kumubusa ebwakabiri mbu: «Simoni mwenyi Yowani! Eri utúla unyísimire!» Nai kanji mbu: «Nechi Enawetu! Si weine ùnêshi kwa nyitúla nyikusimire.» Yesu era kumubura kanji mbu: «Úndaa wálanga embuli sanyi.»

17Chasinjire, Yesu era kumubusa ebwakahatu mbu: «Simoni mwenyi Yowani! Eri utúla unyísimire!» Petero era kwire ásibuka, bushi na Yesu ekumubusa kahatu mbu eri atúla àmusimire. Bushi no'ku, era kwire ámwǎkula mbu: «Enawetu, si utúla wìshi byoshi! Rero, ùnêshi kanangana kwa nyitúla nyikusimire.»

Yesu era kumubura kanji mbu: «Úndaa wêresa embuli sanyi ebiryo. 18Kubinali, nákubura kwa mango wábaa uchíri mutabana, wéndee wáchěmbasa emukaba wao weine, kanji wéndee wáya era unásimire. Si mango ukákunguwa, kunánula ku ukénde wánanula emaboko mao, unji mundu ánakwěmbasa emukaba, ánakweka ne'ra utáhonda.»

19Yesu áteta bacha, chasiya alóse Petero kwa àkêchibwa bushi ne'kweresa Ongo etunda. Ábere Yesu era àmalaa kuteta ei myasi, era kubura Petero mbu: «Unyíkulikiraa!»

Yesu ne'mwanafunzi ola ábaa atúla asímire

20Petero era kubinduka, na álola kwa mwanafunzi* ola Yesu ábaa atúla asímire abákulikire. Oyu mwanafunzi*, iwábaa wèyamire kwa chifuba cha Yesu mango bábaa bálya ebiryo bye'Pasaka*. Mwa'mu mango, mu ábusaa Yesu mbu: «Enawetu, nde i'ungákurenganya kasi?»

21Rero, mango Petero ábaa era àlolaa kwo'yu mulikabo, era kubusa Yesu mbu: «Enawetu, no'no nai, bate kasi?» 22Yesu nai mbu: «Akaba náhonda mbu ono mundu àendekeraa kuba muuma-uma, kuikira mango nyikábaha kanji, ebyera bìtakwêrekere. Si woyo, kunyikulikira ku unányikulikiraa!»

23Mango Yesu áburaa Petero bacha, oyu mwasi era kunahandabana mwa bemeresi boshi kwa oyu mwanafunzi*, yeke atákafe chiro na hicha. Si Yesu atámuburaa mbu oyu mwanafunzi* atákafe, si ámuburaa mbu: «Akaba náhonda mbu ono mundu áendekera kuba muuma-uma, kuikira mango nyikábaha kanji, ebyera bìtakwêrekere.»

Emyasi isinda

24Oyu mwanafunzi*, iwátetaa era luulu se'i myasi, kanji iwánayǎnjikaa. Rero netu tunêshi kwa ináli ya kanangana.

25Kuli inji myasi inene busese era Yesu áiraa. Rero ei myasi, akaba yoshi bàngayǎnjikire mwa bitabo, naányisise kwa ebutala boshi, bùngabere bueke kwa kulanga'bi.

Currently Selected:

Yowani 21: tbt

Highlight

Copy