Mikolo ye'ndumwa 12

Yakobo êchibwa na Petero áumwa mwa buroko

1Mwe'si suku, mwami Heroti era kutangirisa kunde álibusa bauma mwa bemeresi. 2Era kwêchisa Yakobo munyakabo Yowani mwa bômbo. 3Mango Heroti álolaa kwa echera chàsimise eBayuta, era kuteta kwa basímbaa na Petero. Ebyera byábaa mwa suku sikulu sa sěrikirwe mbu: «Suku se'mikati era itáli mu chachu*.»#12:3 Mwa Bayuta, esuku sikulu se'mikati era itáli mu chachu, séndee sámala einga liuma era nyuma se'Pasaka*. 4Ábere era àsimbaa Petero, era kumuuma mwa buroko. Era kubura bikembe bine bya basula bane-bane mbu bàmulangaa. Abu basula, béndee bákola bauma era nyuma se'banji. Áiraa bacha, bushi ábaa áhonda amútonganye era muhondo se'bandu mango ePasaka* ingába yàrengire. 5Petero era kunekala álangibwa mo'bu buroko, si ebemeresi bera kunáendekera bámwěmera era mwa Ongo na bushiru bunene.

Malaika wa Enawetu ákula Petero mwa buroko

6Ebutufu bwe'ra muhondo se'lusuku lwa Heroti ábaa álalira kutonganya mu Petero, Petero ábaa àonjire ala kachi-kachi ka basula babiri. Ábaa àminyirwe na mareure mabiri, no'kwa chiso che'buroko kwábaa kuli balanzi. 7Unao-unao, malaika* muuma wa Enawetu era kupamukira, ne'chasi kuna kulomekera mwa chumba cha bábaa bàli'mo. Oyu malaika*, era kuhaanya-haanya Petero amúsuse. Era kumubura mbu: «Bàtukaa fuba!» Ma mareure mábaa mamúminyire emaboko, kuna kuchitowangira. 8Malaika era kumubura mbu: «Mìnaa emukaba wao, wémbale ne'birato byao.» Petero era kunáira bacha. Kanji malaika* era kumubura mbu: «Émbalaa ne'kochi lyao unyêmise.» 9Petero era kunáuluka mwa buroko ákulikira oyu malaika*. Si atámenyaa kwa bya malaika* ábaa áira byábaa bìri bya kanangana. Era kuchichinga mbu àli mu byabunya biroto. 10Ábere bera bàhabukaa echikembe chibere-bere che'balanzi, ne'chakabiri, bera kuika kwa lwisi lwe'chuma lwa lwábaa lwèrekere mwa musi. Olu lwisi, kuna kuchiboola lweine mwa meho mabo, na báuluka. Bera kuenzikanya mu mwêngere muuma, unao-unao ola malaika* era kumureka.

11Ábere Petero era àfulusaa ebwenge, era kuteta mbu: «Nérire námenyerera kanangana kwa Enawetu iwàtumaa malaika* wai ànyinunule kutenga mwa mino sa Heroti ne'mwa mabi moshi ma eBayuta babáa báhonda bànyiirire.» 12Mango éraa ámenyerera kubuya-buya bya byàbere, era kuya ala mwa Mariya nyina wa Yowani, ola wásulwaa esina lya Mariko. Mwe'i nyumba, mwábaa mubwáananyire bandu banene ba bábaa béma Ongo. 13Petero era kukongota kwa lwisi lwera butala. Muandakasi muuma mbu i'Rota era kuya kômvirisa kwa lwisi. 14Era kumenyerera emurenge wa Petero, si bushi ne'lumoo chiro ákachichungula lwa lwisi. Era kulibichira mwa nyumba áya kubura ebandu kwa Petero i'ùli'ko. 15Nabo bera kumwǎkula mbu: «Emwa! Wasíreire!» Si Rota nai mbu: «Nechi betu! Emurenge wa Petero i'nòmvire.» Bera kutangirisa báteta mbu: «umh! Oyola àli malaika* wa Petero.»#12:15 eBayuta bábaa batúsa mianyisa ya kuteta kwa chira mundu atúsa malaika wai ola wénde wámulanga. Oyu malaika, ábaa àngaulukira mwe'huhe lyo'yu mundu. 16Si Petero kukongota ku ánaendekeraa ákongota. Ábere bachúngula lwa lwisi, bera kumulola'ko, na básanwa busese. 17Petero kukwera kubasimira mwa mino mbu basíraa. Era kutangirisa ábalikisisa'bo kute ku Enawetu amúkulaa mwa buroko. Era kubabura kanji mbu: «Mubáliraa Yakobo ne'banji bemeresi kwe'ne myasi.» Chasinjire, era kuuluka, era kuya mu chinji chisiki.

18Ábere mwe'i mishangya, ba basula ebwenge bwera kubasungulira busese. Bera kutangirisa bábusanya mbu: «Ewashe! Chi oyu Petero afíre betu?» 19Heroti era kuteta mbu bàmuhondaa, si chiro bákamulola'ko. Era kutonganya ebalanzi ba bábaa bámulanga, era kuteta mbu běchibwaa. Chasinda, Heroti era kutenga eYuteya ândaalira mwa musi we'Kaisariya. Era kubera mo'yu musi suku burebe.

Ekufa kwa mwami Heroti Akiripa

20Mwe'si suku, Heroti ábaa àsibukirire besha mwa musi we'Tiro ne'we'Sitona. Si besha ei misi, bera kulaana kuya kumulola'ko. Bera kômvikana tanga na Balasito iwábaa wèmangirire ebakosi bo'mwa nyumba ya mwami. Bera kwéma baáte ebôlo na mwami, bushi ebiryo bya béndee bálya, mwa chio chai mu byéndee byátenga.

21Ábere elusuku lwa bálaanaa lwaíka, Heroti era kwímbala enjimba sai se'bwami. Era kwékala kwa ndebe yai ye'bwami, chasinda era kubura ebandu myasi inene. 22Abu bandu bera kutangirisa báuma emirenge mbu: «Nechi! Àtachiri murenge wa mundu oyu, si análi wa ongo.» 23Si unao-unao, malaika* muuma wa Enawetu kuna kuhuta Heroti bulwala, bushi átolaa etunda lya Ongo kuba lyai. Bushi no'ku, enzoka so'mwa bula sera kumuluma, era kufa. 24Si chiro bacha, eChinwa cha Ongo chánaendekeraa kuya era muhondo na kuhandabana mu bisiki binene. 25Mango Baranaba na Saulo bábaa bera bamálaa emulimo wabo eYerusalemu,#12:25 Somaa 11:29-30. bera kutenga'yi ala'uma na Yowani ola wásulwaa esina lya Mariko.

Currently Selected:

Mikolo ye'ndumwa 12: tbt

Highlight

Copy