Mikolo ye'ndumwa 13

eMuchima Mubuya-buya álondola Baranaba na Saulo

1Mwa bemeresi ba bábaa batúla mwa musi we'Andiyokiya, mwábaa mùli barebi na bákangirisi: Baranaba, na Simoni ola wásulwaa esina lya Nikeri, na Lukiyo mwesha mwa musi we'Kurene, na Saulo, na Manaeni ola wákuliraa ala'uma na mwami Heroti. 2Lusuku luuma bába bàli mwa lubuanano lwe'kutonga Enawetu, bàli no'mwa memo ma ménde máirwa busira kulya. eMuchima Mubuya-buya era kuteta mbu: «Munyíbikiraa Baranaba na Saulo ala musike bushi ne'mulimo ola nàbalondorere.» 3Mango bábaa banáchiri mwa'mu memo, bera kubabika kwe'mino kwa kuběmera, chasinda, bera kubareka baénde.

Saulo na Baranaba báhubanganya eChinwa cha Ongo eChipuro

4Mango eMuchima Mubuya-buya ábaa era àtumaa Baranaba na Saulo mwa mulimo, bera kwândaalira mwa musi we'Sereukiya. Mwo'yu musi, mu beraa bátorera ebwato na báhabukira kwa chisimba che'Chipuro. 5Ábere báika mwa musi we'Salami, bera kunde báhubanganyisa ebandu eChinwa cha Ongo mwa mashenge me'Bayuta. Yowani nai ábaa àli nabo kwa kunde ábaasa.

6Era nyuma se'kusungula echi chisimba choshi, bera kuika mwa musi we'Pafo. Bera kubuana'mo muhonga muuma wa Muyuta mbu i'Bara-Yesu. Oyu Bara-Yesu ábaa énjire áchiíra murebi*. 7Oyu muhonga, ábaa atúla wo'mwa chikali che'mukulu-kulu we'chi chisimba mbu'i Serikiyo Paulusi. Oyu Serikiyo, ábaa mundu wa bwenge. Era kuteta mbu bámwâmaliraa Baranaba na Saulo bushi ábaa áhonda ómve kwa Chinwa cha Ongo. 8Si oyu muhonga Erema (ku esina lyai lìtechire bacha mwa Chikiriki), era kunana emyasi yabo. Era kuhonda kukongobanya oyu mukulu-kulu angesha kwêmerera Yesu. 9Rero, Saulo iwérikwaa mbu Paulo, bushi ábaa ákoresibwa ne'Muchima Mubuya-buya, era kumutumbikisa, 10era kumubura mbu: «E u'muala wa Wamusimu! Mwa muchima wao mwehwíre butebanyi ne'burenzi bwa bùrengerese. Woyo ùtomva byoshi bya bìri bye'kanangana. Kanji utákanareke kunde wáorombya eMwasi we'kuli wa Enawetu? 11Rero, Enawetu angákulosa kwa kasibu. Ungába chiumi-umi, ku suku burebe utálole kwe'suba.» Unao-unao, emusimya kuna kuya mwa meho mai, kuikira kwa bihangi era kunába chiumi-umi. Era kutangirisa ámamata-mamata áhonda ola ungámutandaisa. 12Mango oyu mukulu-kulu álolaa kwe'bya byàbere, era kusanwa busese bushi ne'myasi ya Enawetu. Bushi no'ku, era kwêmerera Yesu.

Paulo na Baranaba mwa musi we'Andiyokiya

13Era nyuma se'bi, Paulo na balikabo bera kutola ebwato bátenga mwa musi we'Pafo na báhabukira mwa we'Perika mwa chio che'Pamufiriya. Báikire mwo'yu musi, Yowani ola wásulwaa esina lya Mariko era kulikanuka nabo, era kuhuba eYerusalemu. 14Si Paulo na Baranaba beke, bera kutenga ePerika, bera kuendekera ne'lubalamo lwabo na báika eAndiyokiya mwa chio che'Pisitiya. Elusuku lwe'Sabato*, bera kwêngirira mwa bushenge bwe'Bayuta*, bera kwékala'mo. 15Ábere bamála kusoma mwa bitabo bye'Mwaso wa Musa ne'bye barebi, ebakulu-kulu be'bushenge bwe'Bayuta* bera kubatumira mundu muuma áye kubabura mbu: «E banyaketu, akaba mwéte mwasi ola mùngabalira ebandu mwa kubasesa emuchima, mwiree mwáteta.»

16Paulo kukwera kubatuka, era kubika emino mwa chanya kwa kubura ebandu mbu basíraa. Era kuteta mbu: «E mu benyi Isiraeli, nenyu mu banji mu mutúla mùtunjire Ongo munyûmvirisaa! 17Ongo wo'luno lubaa lwe'Baisiraeli, iwálondolaa bahokulu betu. Era kubaíra kuba lubaa lunene mango bábaa bàli baenyi mwa chio che'Misiri. Chasinda, era kubakula mwe'chi chio kwa buashi bwai bunene. 18Kanji era kunabalanga myaka ìngaika ku mane mwa buyeye*. 19Ne'ra nyuma se'kusikya mbaa sirinda so'mwa chio che'Kanana, era kwêresa'bo echi chio kuba chabo esuku ne'mango. 20Ebi byoshi byámalaa myaka ìngaika ku maana mane na matano. Chasinda, era kuberesa ebasusu kuikira esuku sa murebi* Samweri. 21Chasinda, bera kutangirisa béma emwami. Ongo era kuberesa Saulo muala wa Kisi, wo'mwa chirongo cha Benyamina. Oyu Saulo, era kwěma myaka mane.#13:21 Somaa 1 Samweri 8:5. 22Era nyuma se'kukula Saulo kwa bwami, Ongo era kwêmika Tauti. Oyu Tauti i'Ongo átetaa era luulu sai mbu: ‹Nàchilondorere Tauti mwenyi Yese bushi àli mundu ola unyísimise, kanji i'ukáira ekuhonda kwanyi koshi.›#13:22 Somaa 1 Samweri 13:14, Saburi 89:21. 23No'lu lubuto lwa Tauti, lu Ongo álondolaa mbu Yesu ashókaa'mo, na kumuira mununusi we'Baisiraeli, kukulikana ne'chiraane chai. 24Era muhondo Yesu aíke, Yowani ábaa áhubanganyisise eBaisiraeli boshi kwa babíndulaa emyanya yabo, banábatisibwe. 25Mango Yowani ábaa era áhonda kumala emulimo wai, era kunde ábusa ebandu mbu: ‹Mwénjire mwáanyisa mbu nyìri nde? Mùtachichingaa mbu nyono nyi mwénde mwálinjirira. Si muményereraa kwa era nyuma sanyi, kungábaha mundu ola nanyi ndéte kwanyìri kwa kùngatuma nábona ebuashi bwe'kuboola emirisi ye'birato byai.›»

26«Banyaketu, mu mwáshokaa ku Aburahamu, nenyu mu bandu be'sinji mbaa mu mutúla mùtunjire Ongo, muményereraa kwa tubano tu Ongo átumiraa ono mwasi we'bununusi. 27Si besha eYerusalemu ala'uma ne'bakulu-kulu babo, batámenyereraa kwa Yesu àli mununusi. Kanji bátendee bêmerera ne'maanjiko me'barebi ma méndee másomibwa chira lusuku lwe'Sabato*. Bushi no'ku, mwa kumuchinjibusa mbu ěchíbwaa mu béree báira kwa'mu maanjiko matúla màtechire. 28Abu bandu, chiro àngaba mbu bátabonaa cha chìngatumire Yesu êchibwa, bera kunéma Pilato mbu kuika anêchibwe. 29Ábere byoshi bya byánjikwaa era luulu sai byera byabáa, ebandu bera kwaândasa echirunda chai kwa musalaba na bátaba'chi mwa chinjifwa. 30Si Ongo era kumwomola. 31Na ku suku sinene, Yesu ábaa énjire áchilosa kwa bandu ba baéndaa nai kutenga eKalilaya bérukira eYerusalemu. Nabo, bu bera bénjire báhambalira ebanji Baisiraeli emyasi báchiloreraa'ko era luulu sai.

32«Netu, oyu Mwasi Mubuya-buya ola Ongo álaanyaa bahokulu betu itwábahubanganyisa. 33Rero, mwa kwômola Yesu, Ongo érire álosa echi chilaano* ku tubano tu bana babo, kukulikana no'kwa maanjiko matúla màtechire mwa chitabo cha Saburi chimbi cha kabiri mbu:

‹Woyo wera muala wanyi,

nanyi kutengera lwarero nyi nera eho.›#13:33 Somaa Saburi 2:7.

34Kanji bacha ku Ongo átetaa bushi ne'kwômoka kwai angesha kubola mbu:

‹Nyikákweresa engahanyi sibuya-buya, kanji sa se'kanangana,

sa nálaanyaa Tauti.› #13:34 Somaa Isaya 55:3.

35Echera chi chitúmire áteta mu manji maanjiko mbu:

‹Utákêmerere mbu eMubuya-buya wao abórere mwa shinda.›#13:35 Somaa Saburi 16:10.

36Si Tauti, era nyuma se'kukola kukulikana ne'kuhonda kwa Ongo mwa kalamo kai, era kufa. Chasinda, era kutabwa ala'uma na bahokulu bai, era kubola. 37Si ola Ongo ômwolaa yeke, atábolaa.

38«Bushi no'ku banyaketu, muményereraa kwa bushi no'yu Yesu ku emwasi we'bubabalire bwe'bibi byenyu, énjire áhubanganyisibwa. Obu bubabalire mùtabonaa'bo kurengera eMwaso wa Musa. 39Kanji kurengera oyu Yesu, ku chira mundu woshi ola wa mwêmerere énde ábabalirwa.#13:39 Somaa Baroma 3:21-31; 10:4. 40Rero, muchilángaa kubuya mungesha kusimbwa ne'ne myasi ebarebi bátetaa mbu:

41‹Mǔmvaa mu mwénde mwákena ebanji,

musánwaa busese, munátenge no'mwa meho manyi!

Bushi mwe'sine suku mùli'mo nyingáira mwasi,

ola mùtangemerera kwa kasi àngaba, chiro mbu kùngabere ola wábabalikisisa era luulu sa'o.›»

42Mango Paulo na Baranaba bábaa bera bàulukaa mwa bushenge bwe'Bayuta*, ebandu bera kuběma mbu bahúbaa kuika kuhambala kwe'i myasi elusuku lwe'Sabato* kwa linji einga. 43Ábere ebandu bera báhandabana, Bayuta banene ala'uma na banji bandu ba sinji mbaa ba bêmereraa etini lye'Bayuta, bera kukulikira Paulo na Baranaba. Esi ndumwa ebiri sábaa sénjire sásesa'bo emuchima kwa baéndekeraa kusimika mwa kuchinyiira ebonjo bwa Ongo.

44Mango elunji lusuku lwe'Sabato* lwáikaa, bandu banene busese bo'mwa musi, bera kuhuba kubuanana kwa kûmvirisa eChinwa cha Enawetu. 45Si mango eBayuta bálolaa kwo'lu luamba lwe'bandu, bera kufa mufula munene. Bera kunana emyasi era Paulo ábaa áteta, ne'kunamukamba. 46Paulo na Baranaba kukwera kubabura busira buba mbu: «Mwabo mu mùngabere bábere tanga kuhubanganyisibwa eChinwa cha Ongo. Si bushi mwanányire'chi, kanji muséne nga ekalamo ke'suku ne'mango kàtabětere mufa, rero tubano, tungére twáchiira era bandu be'sinji mbaa bàli. 47Mǔmvaa, bacha ku Enawetu àtubwirire:

Nákuirire kuba bulangare bwe'mbaa soshi,

chasiya wěkere ebandu boshi bo'mwa butala ebununusi.»#13:47 Somaa Isaya 49:6.

48Mango ebandu be'sinji mbaa bómvaa kwe'i myasi, bera kumowa busese na kutangirisa bátonga eChinwa cha Enawetu. Ebandu ba Ongo álondolaa kutengera mira kwa kubona ekalamo ke'suku ne'mango, nabo bera kwêmerera Yesu. 49Ebandu boshi ba mwe'chi chio, bera kumva eChinwa cha Enawetu. 50Si eBayuta bera kushíirisa ebashamuka be'musi ala'uma na bakasi bauma ba bábaa béte etunda, kanji ba béndee béma Ongo. Bera kulibusa Paulo na Baranaba busese, bera kunálinda bábakolokanyá mwa chio chabo. 51Esi ndumwa sera kubakunguchira emukungu kutenga kwa bihando byabo,#13:51 Mwa Bayuta, ekukunguta emukungu kutenga kwa bihando, kwábaa kulosa kwa ebandu bàlikanukire bulio. Kulikuteta kanji mbu emundu ola wàtumwaa àtachéte mwinda wo'la àtumwaa'ko. Somaa Mariko 6:11. sera kuchiira eIkonyiyo. 52Ebemeresi be'Andiyokiya beke, bera kushiba na lumoo lunene kanji bábaa bákoresibwa ne'Muchima Mubuya-buya.

Currently Selected:

Mikolo ye'ndumwa 13: tbt

Highlight

Copy