Mikolo ye'ndumwa 11

Petero áfulira ebemeresi be'Yerusalemu kwa myasi ye'mulimo wai

1Endumwa, ne'banji bemeresi ba bábaa batúla eYuteya bômvaa emwasi kwa ebandu be'sinji mbaa nabo bemérere eChinwa cha Ongo. 2Rero, mango Petero áfulukaa eYerusalemu, ebemeresi be'Bayuta bera kumubanganya mbu: 3«Era! Chi chatúmaa wêngirira mwa nyumba ye'bandu be'sinji mbaa, kanji wanálya nabo?»

4Petero kukwera kutangirisa ábatondosesa chiuma kwa chiuma emyasi yoshi kwa yanátangirisaa. Era kubura'bo mbu: 5«Nyono, nabáa nyìri mwa musi we'Yopa néma Ongo, nera kuya mu byabunya biroto. Mwe'bi biroto, nera kulola ku yabunya ngwaya inene yátenga mwa chanya, yândaalira kwa chitaka ala nabáa nyináli. Ei ngwaya, yabáa isímbirirwe kwa mapembe mai mane. 6Ábere náihunda kwe'meho, nera kulola mùli chira buko bwa bifuana bya bitúsa birenge bine ala'uma ne'nyama so'mwe'rungu, ne'sa sénde sáendera kwa bula, ala'uma ne'milonge. 7Chasinda, nera kûmva murenge muuma ányibura mbu: ‹Petero, èmukaa, ukére, unálye esi nyama!› 8Si nera kwǎkula mbu: ‹Nânga Enawetu! Nyono ndàfuraa kulya chiro na kandu ka Mwaso wetu atúla àtolire nga kàtakomisibwe*.› 9Si oyu murenge wabáa wátengera kwa nguba, era kuhuba kunyibura mbu: ‹Bya Ongo àirire kuba bibuya, ùtabyêrikaa mbu bitakomisibwe*.› 10Ábere oyu murenge ànyiikira kahatu, byoshi kuna kuhuba kwa nguba.

11«Unao-unao, balume bahatu bera kuika mwa nyumba era nabáa nyìri'mo. Abu balume, bátumwaa era nyìri kutengera eKaisariya. 12eMuchima Mubuya-buya nai, era kunyibura mbu nyiéndaa ala'uma nabo busira kusinda-sinda. Na bano banyaketu ndatu muséne'ko, bu bànyêrekesaa na twěngirira mwa mwa mulume muuma mbu i'Koroneliyo. 13Oyu Koroneliyo, era kutubalikisisa kute kwa malaika* àulukiraa mwa mwai ne'kumubura mbu éraa átumaa ebandu eYopa, bàmubingire Simoni Petero, 14bushi oyu Simoni, i'ungámubura emyasi era ìngamuretera ekalamo ke'suku ne'mango ala'uma ne'ngumo yai.

15«Àbere nera nánatangirisa náhambala, abu bandu bera kubona eMuchima Mubuya-buya ngo'kwa netu twánabonaa'o lyebere. 16Mwe'chi chihangi, nera kukengera echinwa cha Enawetu Yesu átetaa mbu: ‹Yowani àbatisaa ebandu mwa meshi, si mwabo mungábatisibwa kwa Muchima Mubuya-buya.› 17Mango tweméreraa Enawetu Yesu Kirisito, Ongo era kutweresa eMuchima Mubuya-buya. Rero, akaba nabo àngabêresa'o, nyono nyi nera nde we'kulwisa Ongo?»

18Abu bemeresi, ábere bômva bacha, boshi chiro bákachimubanganya kanji. Bera kwire bátangirisa bátonga Ongo mbu: «Kasi ebandu be'sinji mbaa nabo, Ongo abáboorere enjira ye'kubindula emyanya yabo babóne ekalamo!»

eMwasi Mubuya-buya wa Yesu áika mwa musi we'Andiyokiya

19Era nyuma se'kufa kwa Sitefano, ebemeresi bárengaa mu malibuko manene. Bauma bera kuhandabana kuikira mwa chio che'Foinikiya, ne'banji kwa chisimba che'Chipuro, ne'banji bera kunáikira no'mwa musi we'Andiyokiya. Mwe'bi bisiki byoshi, bera kunde bánahubanganya eChinwa cha Ongo kwa Bayuta beine oshâo. 20Si mwa'bu bemeresi mwábaa mùli besha Chipuro, na besha mwa chio che'Kurene. Ábere baíka eAndiyokiya, beke bera kunde báhubanganyisa eBakiriki nabo eMwasi Mubuya-buya wa Enawetu Yesu. 21Ebemeresi bábaa béte ebuashi bwa Ongo, echera chera kutuma bandu banene bémerera emwasi wa Enawetu, na bámualukira.

22Ábere ebemeresi be'Yerusalemu bômva kwo'yu mwasi, bera kutuma Baranaba eAndiyokiya. 23-24Oyu Baranaba ábaa atúla mundu mubuya kanji ábaa ákoresibwa ne'Muchima Mubuya-buya, ábaa atúsa na bwemeresi bunene. Rero, mango ábaa era aíkaa'yi, era kuchilorera kanangana kwa Ongo aáhanyire abu bandu. Era kumowa busese na kubabura mbu emichima yabo boshi ináendekeraa kusera mwa kuchinyiira Enawetu.

25Chasinda, Baranaba era kutenga eAndiyokiya, era kuya kuhondera Saulo mwa musi we'Tariso. 26Mango ámulolaa'ko, era kumureta eAndiyokiya. Bera kumala'yi mwaka wa mutenga bénjire bábuanana ne'bemeresi, na kunde bákangirisa bandu banene era luulu sa Yesu. Mwo'yu musi, mu ebemeresi bátangiriraa bérikwa mbu "Bakirisito".

27Mwe'si suku sinesi-sinesi, barebi bauma nabo bera kutengera eYerusalemu bândaalira eAndiyokiya. 28Muuma mubo mbu i'Akabo, era kwîmanga ne'kutangirisa áreba ne'misi ye'Muchima Mubuya-buya. Era kuteta mbu mwa butala boshi mungáika bulio bunene. Obu bulio, bwera kunaika mango Mwami Kalautiyo ábaa emíre mwa musi we'Roma.#11:28 Kalautiyo i'mwami wakatano wêmaa eRoma, kutengera mwaka wa 41 kuikira 54 era nyuma se'kubutwa kwa Yesu. 29Bushi no'ku, ebemeresi bera kwire bêmeresanya kuira muholore kukulikana no'kwa chira mundu àngaala, babóne kute bàngaasa bemeresi balikabo ba bábaa bàli eYuteya. 30Bera kunáira oyu muholore. Emwango ola bábonaa, bera kwêsa'o Baranaba na Saulo, nabo bera kwekera'o ebemangisi be'bemeresi be'Yerusalemu.

Currently Selected:

Mikolo ye'ndumwa 11: tbt

Highlight

Copy