Mikolo ye'ndumwa 10

Malaika áhambala ne'mukulu-kulu we'basula

1Mwa musi we'Kaisariya mwábaa mutúla mulume muuma mbu i'Koreneliyo. Oyu Koroneliyo ábaa mukulu-kulu wa chikembe chiuma cha basula be'Baroma cha chéndee chérikwa mbu Chikembe cha Bataliana. 2Oyu mulume, ábaa atúla mundu wa kanangana kanji ábaa atúla àtunjire Ongo ala'uma ne'ngumo yai yoshi. No'mwa lubaa lwe'Bayuta, éndee áasa mu bákene banene, kanji éndee éma Ongo esuku soshi.

3Lusuku luuma, ngo'mwa saa mwenda se'mushi, era kuya mu byabunya biroto. Mwe'bi biroto, era kulola kubuya-buya ku malaika* muuma wa Ongo êngirira mwa mwai, ne'kumubura mbu: «Koroneliyo!» 4Koroneliyo, era kutumbikisa oyu malaika* na buba bunene, na ámwǎkula mbu: «Kute Waliya!» Malaika nai mbu: «Ememo mao wénde wáira, ne'mabuya wénde wáirira ebakene, Ongo àmowerere'mo. Bushi no'ku, àkukengere. 5Rero, kuno na murenge, wíree wátuma ebandu mwa musi we'Yopa bàkubingirire mulume muuma mbu i'Simoni Petero. 6Oyu Petero, atúla mwa mwa mulume muuma mbu i'Simoni, murenga ola wénde wákunganya enyuu. Ne'nyumba yai, kwa musike we'nyanja ku itúla.»

7Ábere oyu malaika* era aéndaa, Koroneliyo era kwâmaala babiri mwa baanda bai na musula muuma. Oyu musula, ábaa muuma mwa ba béndee bámulanga, kanji ábaa atúla àtunjire Ongo. 8Era kubalikisisa abu bandu bai byoshi bya byàmuikiraa. Chasinda, era kubatuma eYopa.

Petero áhambala na Ongo mu byabunya biroto

9Ábere mwe'i mishangya, ngo'mwa saa ndatu se'mushi, ebandu ba Koroneliyo átumaa bábaa báhonda kuika ofu ne'musi we'Yopa. Mwe'chi chihangi, chine'chi, Petero era kwérukira mwa chumba cho'kwa ngangamo éme Ongo.#10:9 Somaa Luka 5:19. Bayuta bauma, mwa kuimba enyumba sabo, béndee bátambika emichi kwa ngangamo, chasinda bánabika kwe'matebura. 10Si ebusinya bwera kumusimba, era kwire áhonda álye. Mango bábaa bera bámutekera ebiryo, era kuya mu byabunya biroto. 11Mwe'bi biroto, era kulola enguba ìbookere, na yabunya ngwaya inene yátenga mwa chanya, na yândaalira kwa chitaka. Ei ngwaya, yábaa isímbirirwe kwa mapembe mai mane. 12Kanji mui, mwábaa mùli chira buko bwe'nyama se'birenge bine, ne'sa sénde sáendera kwa bula, ala'uma ne'milonge. 13Chasinda, era kûmva emurenge ámubura mbu: «Petero, èmukaa, ukére, unálye esi nyama!» 14Si Petero era kwǎkula mbu: «Cha-cha! Nânga Enawetu! Nyono ndàfuraa kulya chiro na kandu ka Mwaso wetu atúla àtolire nga kàtakomisibwe*.»

15Si oyu murenge era kuhuba kumubura mbu: «Bya Ongo aírire kuba bibuya, ùtabyêrikaa mbu bitakomisibwe*.» 16Ábere wa murenge àbura Petero oyu mwasi muuma kahatu, unao-unao, era ngwaya kuna kuhuba kwérusibwa kwa nguba.

17Mango Petero ábaa anáchiri áchibusa kute ku ebi biroto bìtechire, mu mango ba balume Koroneliyo ábaa àtumire nabo bábaa bera bàli kwa chiso. Abu balume, ebandu bábaa bàbalosise mira ala mwa Simoni. 18Bera kubarangirira kwa chiso mbu: «Ewashe, mu Simoni ola bénde bérika mbu Petero atúla muno?»

19Mango Petero ábaa anáchiri áchibusa era luulu se'bi biroto, eMuchima Mubuya-buya era kumubura mbu: «Ǔmvaa! Kwa lwisi kuli balume bahatu bákuhonda. 20Rero, kuno na murenge, èmangaa, wéndaale unáende nabo busira buba, bushi nyínabátumire.»

21Petero era kunândaala, na ábura abu bandu mbu: «Nyono onola mwáhonda. Chi mwaéndere kasi?» 22Nabo mbu: «Mukulu-kulu muuma we'basula mbu i'Koroneliyo iwatútumire ene ùli. Oyu Koroneliyo, atúla mundu wa kanangana kanji atúla àtunjire Ongo, ne'lubaa loshi lwe'Bayuta lwénde lwámutonga ngachi. Rero, malaika* wa Ongo àmuikiraa, era kumubura mbu àkwâmaalaa úye era mwai, omve kwa myasi era ungámubura.» 23Petero era kubahuukasa na bêngirira mwa nyumba, era kubalosa ala bangáonjira. Ábere mwe'i mishangya, Petero era kutangirisa elubalamo ala'uma nabo. Bemeresi bauma bo'mwa musi we'Yopa nabo, bera kumwerekesa'yi.

Petero áhubanganyisa ebandu be'sinji mbaa

24Ábere mwe'li lishisho, Petero era kuika mwa musi we'Kaisariya. Koroneliyo ábaa ábalanga ala'uma na banyakabo na bera bai bo'kwa muchima ba ábaa àlalikire. 25Mango Petero ábaa áhonda kwêngirira mwa mwa Koroneliyo, Koroneliyo era kuya kumuhuukasa. Unao-unao, era kufukama era muhondo sai kwa kumweresa etunda. 26Si petero era kumwimanza ne'kumubura mbu: «Èmukaa, bushi nanyi nyináli mundu kuuma nao.»

27Chasinda, Petero era kwêngirira mwa nyumba áenda áhambala na Koroneliyo. Áikire'mo, era kubuana bandu banene babúananyire'mo. 28Era kubabura mbu: «Bera banyi, mwìshi kwa kukulikana ne'Mwaso wetu tu Bayuta, tùtěmire kukomerana nesi kutambira mundu murebe wa lunji lubaa. Si Ongo yeine iwànyilosise kwa kutěmire nyinde nátola mundu murebe ngo'la ùtakomisibwe* nesi kumutobolola. 29Echera chi chatúmire nábaha busira kusinda-sinda kuno wanyâmaere. Rero, cha chatúmire mwányamaala chi mwíraa mwányibura.»

30Koroneliyo era kumwǎkula mbu: «Suku ehatu sine sàrenga nyìri mwa memo muno mwanyi, mwa bihangi bìri nge'bine bye'saa mwenda. Unao-unao, mundu muuma ola wabáa wěmbese njimba sa sálangala busese, kuna kunyipamukira'ko, na êmanga era muhondo sanyi. 31Era kunyibura mbu: ‹Ememo mao wénde wáira, ne'mabuya ma wénde wáirira ebakene, Ongo àmowerere'mo. Bushi no'ku, àkukengere. 32Rero, wíree wátuma ebandu mwa musi we'Yopa, bàkubingire mundu muuma mbu i'Simoni Petero. Oyu Petero atúla mwa mwa mulume muuma mbu i'Simoni, murenga ola wénde wákunganya enyuu. Ne'nyumba yai, kwa musike we'nyanja ku itúla. 33Unao-unao, nera kutuma ebandu bàkubinge. Nao wanákolire kuno waíkire. Rero tuboshi bano tùli era muhondo sa Ongo kwa kûmvirisa emyasi yoshi era Enawetu akútumire utúbure.›»

34Petero era kwire áuma mwa bunu mbu: «Kubinali, nérire námenyerera kanangana kwa Ongo àtatusa katobololo. 35Si mu chira lubaa, emundu woshi ola wénde wátunda Ongo ne'kuira bya bikomire mwa meho mai, oyola iwénde wámusimisa. 36Átumiraa eBaisiraeli emwasi kwa chira ola ukêmerera Yesu Kirisito akábona ebôlo. No'yu Yesu, i'Enawetu tu bandu boshi. 37Era nyuma sa Yowani kuhubanganyisa ebandu era luulu se'bubatiso, si munêshi emyasi era yárengaa mwa chio choshi che'Yuteya, era yátangiriraa eKalilaya. 38Si kanji mùtanabukire kwa Yesu we'Nasareti, Ongo ámulondolaa mwa kumwehusa ne'Muchima Mubuya-buya ala'uma ne'buashi. Abáa énjire áirira ebandu mabuya na kunde álamya boshi ba babáa bàli mwa bucha bwe'Musimu. Ebi byoshi, abáa énjire ábiira bushi Ongo abáa análi ala'uma nai.

39«Kanji emyasi yoshi era Yesu aíraa mwa chio che'Bayuta no'mwa musi we'Yerusalemu, tubano twanáchiloreraa kui. Oyu Yesu, i'ebandu betáa mwa kumumanyika kwa musalaba, 40si Ongo era kumwomola elusuku lwa kahatu, na ámulosa era muhondo se'bandu. 41Atá ebandu boshi bu bàmulolaa'ko, si tubano oshâo, tu Ongo álondolaa tùchilorere kwe'i myasi. Kanji tubano tu twabáa twénjire twálya ne'kumwa ala'uma nai era nyuma se'komwoka kwai. 42Chasinda, era kututuma mbu tuéndaa kuhubanganyisa ebandu, ne'kubura'bo kwa oyu Yesu i'Ongo álondolaa kwa kuchinjibusa ebandu boshi: Ba bàsene anabe ne'ba báfire mira. 43Era luulu so'yu Yesu, ye'barebi boshi bátetaa mbu chira mundu ola ukámwemerera, Ongo akámubabalira ebibi byai bushi ne'buashi bwe'sina lyai.»

Ebandu be'sinji mbaa bábona eMuchima Mubuya-buya

44Ábere Petero anáchiri áhambala, ebandu boshi ba bábaa bômvirisa eChinwa cha Ongo, bera kubona eMuchima Mubuya-buya. 45Ba bemeresi boshi be'Bayuta ba bábaa berékesise Petero, bera kusanwa busese mwa kulola kwa Ongo erésise ebandu be'sinji mbaaa nabo eMuchima Mubuya-buya. 46Básanwaa bacha, bushi ne'kûmva kwa abu bandu bera báteta mu manji mateta mayayaya ne'kutonga Ongo.

Petero álolire bacha, era kwire áteta mbu: 47«E banyaketu, bano bandu bàbonyire eMuchima Mubuya-buya kuuma netu, kuchiri cha chìngatuma bátabatisibwa mwa meshi?» 48Bushi no'ku, era kuteta mbu babátisibwaa kwe'sina lya Yesu Kirisito. Nabo bera kwire bámwema mbu ěkalaa nabo sinji suku burebe.

Currently Selected:

Mikolo ye'ndumwa 10: tbt

Highlight

Copy