Mikolo ye'ndumwa 9

Saulo êmerera Yesu

1Mwe'si suku, Saulo ábaa anáchiri éte emuchima mubi we'kulibusa ne'kwîta ebanafunzi* ba Enawetu. Lusuku luuma era kuendera emukulu-kulu we'bakuhanyi*, 2era kumwěma emaruba me'kuchikangana era muhondo se'bakulu-kulu be'mashenge me'Bayuta mo'mwa musi we'Tamasiki. Amu maruba, mábaa ma kumuwa loso lwa kumina ebemeresi, ebalume ne'bakasi, abêke eYerusalemu.

3Ábere era àli mwa njira ofu ne'Tamasiki, unao-unao chângasi chinene cha chátengera kwa nguba kuna kumusungula. 4Saulo kuna kuchihunda kwa chitaka. Era kûmva emurenge ámubura mbu: «Saulo! Saulo! Chi chátuma wányiribusa?» 5Saulo nai mbu: «Woyo únde waliya?» No'yu murenge mbu: «Nyono Yesu nyíwalibusa. 6Wímangaa úye mwa musi, no'mu mu bangákubwirira bya wěmire kuira.»

7Ebandu ba bábaa bàli na Saulo, bera kwêmanga bátungwa busese. Bátungwaa bushi emurenge ibábaa bànômvire oshâo, si bábaa bàtasene ku mundu asibya. 8Saulo era kubatuka. Si chiro angaba mbu ábaa àsibwire emeho, ábaa àtachisene ku kandu. Balikabo bera kwire bámuachirira kwa kuboko na bámutandaisa kuikira mwa musi we'Tamasiki. 9Era kumala suku ehatu atálola, atálya, atámwa na kandu kasibya.

10Mwo'yu musi we'Tamasiki mwábaa mutúla mwemeresi muuma mbu i'Ananiya. Oyu Ananiya, Enawetu era kumwamáala mu byabunya biroto mbu: «Ananiya!» Nai mbu: «Karame Enawetu.» 11Enawetu era kumubura mbu: «Uyáa mwa mwêngere ola utúla wěrikirwe mbu Mwêngere Ushímire. Chasinda, ungêngiraa mwa mwa Yuta, omola mu ubúsisaa mulume muuma mbu i'Saulo, mwesha mwa musi we'Tariso. Oyu mulume, mwa memo mu àli mwe'bine bihangi. 12Oyu Saulo nai alólire mu byabunya biroto ku mulume muuma êngirira mwa nyumba amúbike kwe'mino, amwémere chasiya ahúbe kulola. No'yu mulume esina lyai i'Ananiya.»

13Ananiya era kumwǎkula mbu: «Enawetu! Oyu mundu nòmvire kwa ngulu yai ibi. Ne'bisibu byoshi bya álosise kwa bemeresi bao mwa musi we'Yerusalemu, bandu banene bànyibalikisise'kubi. 14Kanji aíkire na mwo'no musi, éte ebuashi bwe'kumina ebandu boshi ba batúla bakútunjire. No'bu buashi, ebakulu-kulu be'bakuhanyi bu bamúwere'bo.» 15Si Enawetu nai mbu: «Unáendaa, bushi oyu Saulo nyeine nyi nàmulondwere mwa mulimo we'kukangirisa ebandu era luulu sanyi era muhondo se'bandu be'sinji mbaa ne'ra muhondo se'bami babo no'kwa Baisiraeli. 16Kanji nyeine nyi nyingámulosa kute angálibuka busese bushi nanyi.»

17Bushi no'ku, Ananiya era kunaenda. Áikire mwa Saulo ábaa àli, era kumubika kwe'mino na ámubura mbu: «E munyaketu Saulo! Enawetu Yesu ola wàkupamukiraa'ko mwa njira mango wabáa wábaha enera, iwànyitumire ene ùli, bushi áhonda uhúbe kulola, ubóne ne'Muchima Mubuya-buya.» 18Unao-unao, mwa meho ma Saulo mwera kutowanga byabunya byámba, kuna kutangrisa álola kanji. Chasinda, era kwêmuka na ábatisibwa. 19Chasinjire, era kulya na áhuba kuata misi.

Saulo áhubanganya eMwasi Mubuya-buya mwa musi we'Tamasiki

Saulo ámalaa suku burebe ala'uma ne'bemeresi ba bábaa bàli mwa musi we'Tamasiki. 20Busira kulinjira, era kutangirisa ákangirisa ebandu mwa mashenge me'Bayuta mbu: «Yesu análi Mwana wa Ongo.» 21Ebandu boshi ba béndee bômvirisa bya áteta, bera kunde basanwa busese ne'kuburana mbu: «Ewashe! Si ono mulume iwábaa wénjire wálosa ebandu kwa kasibu ba batúla bàtunjire Yesu mwa musi we'Yerusalemu! Kanji ne'chi chi chanámurechire no'kuno, chasiya abámine ne'kubeka era muhondo se'bakulu-kulu be'bakuhanyi!» 22Si chiro bacha, Saulo era kunaendekera áata buashi bunene mwa kukangirisa ebandu eChinwa cha Ongo. eBayuta ba bábaa batúla eTamasiki bera kunde báina cha bàngamwǎkula mango éndee ábalosa kanangana kwa Yesu i'na Masiya*.

23Ábere kwàrenga suku burebe, abu Bayuta be'Tamasiki bera kuya lwango lwa kwîta Saulo, 24si era kûmva ekamesi-mesi kwa bàmulaanyirire. Bushi no'ku, emushi ne'butufu béndee bámùlingira kwa biso bye'misi chasiya bàmwîte. 25Lusuku luuma butufu, ebanafunzi* ba Saulo, bera kumubika mwa chitonga na bámwandaasisa era nyuma se'lusito lwe'musi.

Saulo áhuba eYerusalemu

26Mango Saulo áikaa eYerusalemu, era kunde áereka kuchibika kwa banji bemeresi, si boshi bera kunde bámwobaa bushi baténdee bêmerera kanangana kwa kasi nai anêra mwemeresi. 27Baranaba era kwire ámutola na ámweka era muhondo se'ndumwa*. Era kubalikisisa'si kute kwa oyu Saulo àbuananaa na Enawetu mango abáa àli mwa lubalamo lwe'kuya eTamasiki, na kute kwa Yesu yeine àhambalaa nai. Kanji era kubabalikisisa kute kwa àhubanganyisaa besha Tamasiki era luulu sa Yesu busira buba.

28Kutengera mwe'si suku, Saulo era kwire ánaba ala'uma nabo ne'kunde ásungula nabo mwa musi we'Yerusalemu áenda áhubanganyisa ebandu era luulu sa Enawetu Yesu busira buba. 29Kanji ábaa énjire áenda ebwaka ne'Bayuta ba béndee báteta eChikiriki. Si beke bábaa bénjire bánahonda kute bàngamwîta. 30Mango bemeresi balikabo bômvaa kwo'yu mwasi, bera kumuhaisa eKaisariya, era kutengera'yi bámutuma eTariso.

31Mwe'si suku, ebemeresi ba bábaa bàli mwa chio choshi che'Yuteya, ne che'Kalilaya ne'che'Samariya bábaa bàli mwa bôlo, echera chera kutuma bábona emisi. Bera kuluwa bushi ne'kutunda Enawetu, kanji bushi eMuchima Mubuya-buya éndee ábasesa emichima.

Petero álamya Aineya

32Mango Petero ábaa énjire átambira ebemeresi boshi ba mwe'bi bio, lusuku luuma era kuya kutangula ba bábaa bàli mwa musi we'Luta. 33Áikire'mo, era kubuana'mo mulume muuma mbu i'Aineya. Oyu Aineya, ábaa amála myaka munane kwa njingo, bushi ábaa àremere. 34Petero era kumubura mbu: «Aineya, Yesu Kirisito àkulamise! Rero, bàtukaa ùchiháshulire enjingo yao weine.» Unao-unao, Aineya kuna kubatuka. 35Besha mwa musi we'Luta ala'uma na besha mwa bulambo bwe'Saroni boshi bera kulola kwa Aineya àlamisibwe. Bushi no'ku, bera kwêmerera Enawetu.

Petero ômola Tabita

36Mwa musi we'Yopa namo, mwábaa mutúla mwemeresi muuma wa mukasi mbu i'Tabita. Mwa Chikiriki mbu'i Torika kukuteta mbu Mburuko. Oyu mukasi ábaa atúsa myanya ibuya kanji éndee áasa ne'bakene. 37Lusuku luuma era kulaka, chasinjire era kufa. Mango bemeresi balikabo bábaa bera bamálaa kwôsa echirunda chai, bera kubika'chi mwa chumba cho'kwa ngangamo. 38Rero, bushi emusi we'Luta ábaa atúla ofu ne'we Yopa, ne'bemeresi bábaa bòmvire emwasi mira kwa eLuta yi'Petero àli. Bera kwire bámutuma ku balume babiri báye kumubura mbu: «Utúbabaliraa ubáhe fuba ene mwetu!» 39Petero ômvire bacha, kuna kuchiuma ala'uma nabo. Ábere aíka, bera kumwěrusisa mwe'cha chumba. Ebahumbakasi boshi bera kuchifunda ala ábaa àli báenda bálira. Bera kumulosa ne'njimba sa Tabita éndee álanjiraa'bo mango abáa àchiri ala'uma nabo.

40Petero kukwera kubura ebandu boshi mbu baúlukaa era mbuwa. Era kukoma emafi na éma Ongo. Chasinda, era kwêrekera era cha chirunda chábaa chìri na áteta mbu: «Tabita èmukaa!» Unao-unao, Tabita kuna kuboola emeho. Álolire ku Petero, era kwekala. 41Petero era kumuachirira kwa kuboko àmwêmuse. Chasinda, era kwâmaala ba bahumba-kasi ala'uma ne'banji bemeresi, na ábalosa Tabita era àli muuma-uma. 42Besha mwa musi we'Yopa boshi, bera kunômva ko'yu mwasi, na banene mubo bera kwêmerera Enawetu. 43Petero era kwekala mwo'yu musi suku sinene mwa mwa mulume muuma mbu i'Simoni. Oyu Simoni ábaa murenga wa kukunganya enyuu.

Currently Selected:

Mikolo ye'ndumwa 9: tbt

Highlight

Copy