Mikolo ye'ndumwa 8

1Olu lufu lwa Sitefano, Saulo nai ábaa àli mwa lwango lwalo.

Saulo álibusa ebemeresi

Mwo'lu lusuku luno'lu, mu ebemeresi boshi ba bábaa bàli mwa musi we'Yerusalemu bátangirisaa bálibusibwa busese. Bushi no'ku, bera kuhandabana mwa ndambi se'chio che'Yuteya ne'che Samariya. Endumwa seine si sáneshibaa eYerusalemu. 2Ábere Sitefano era echíbwaa, ebandu ba bábaa batúla bàtunjire Ongo, bera kumutaba na kumuirira mishibo inene.

3Mwo'lu, Saulo yeke kusikya ku ánaendekeraa ásikya ebemeresi. Era kunde êngirira mwa manyumba áhondera'mo ebalume ne'bakasi. Abu boshi, era kunde ábaumanga mwa buroko.

Firipo áhubanganya eMwasi Mubuya-buya mwa musi we'Samariya

4Ba bemeresi ba báhandabanaa bera kunde bárenga mu chira chisiki báhubanganyisa ebandu eMwasi Mubuya-buya. 5Muuma mubo mbu i'Firipo, era kwândaalira mwa musi munene we'Samariya. Era kunde áhubanganyisa besha'mo era luulu sa Masiya*. 6Bya éndee áteta, ebandu boshi bera kunde bábyumvirisa kubuya-buya, bushi ne'kulola kwa bisomerano bya ábaa énjire áira. 7Era kunde âmbula ebihwasi ku bandu banene mubo. Ebi bihwasi, byera kunde byábatenga'ko byáenda byálakanga busese. Kanji ábaa énjire álamya na birema binene. 8Bushi no'ku, besha mwo'yu musi bera kunde bámoa busese.

9Rero, mwo'yu musi we'Samariya, mwábaa mutúla mulume muuma mbu i'Simoni. Oyu Simoni ábaa erisa mwo'yu musi, kanji ábaa atúla muhonga. Mwa kulaula kwai, era kwire énde áchitonga era muhondo sa besha'mo mbu yeine i'namulume. 10Ebandu boshi, emukulu ne'mutoto, bera kunde bámuteya ematwi. Bera kunde báteta mbu: «Ono mulume análi buashi bwa Ongo, bwa bénde bérika mbu: Buashi Bunene.» 11Béndee bámwomvirisa kubuya-buya bacha, bushi éndee ábashishasa no'bu buhonga bwai ku suku sinene. 12Si mango Firipo éraa áhubanganyisa'bo eMwasi Mubuya-buya era luulu se'Bwami bwa Ongo* ne'ra luulu sa Yesu Kirisito, bera kwêmerera. Bushi no'ku, ebalume ne'bakasi bera kubatisibwa. 13Oyu Simoni nai era kwêmerera Yesu, na ábatisibwa. Chasinda, era kutangirisa kuba luuma-luuma na Firipo. Na mango éndee álola kwa bisomerano ne'bimenyeso bya Firipo ábaa énjire áira, era kunde ásanwa busese.

14Mango endumwa sa Yesu sa sábaa sìri mwa musi we'Yerusalemu sômvaa emwasi kwa besha Samariya nabo bemérere eChinwa cha Ongo, sera kwire sábatumira Petero na Yowani. 15Ábere baíka eSamariya, bera kwémera ebemeresi babóne eMuchima Mubuya-buya, 16bushi oyu Muchima Mubuya-buya, ábaa àtasa kwândaalira chiro na muuma mubo. Mwe'sina lya Enawetu Yesu oshâo mu abu besha Samariya bábaa banábatisibwe. 17Chasinda, Petero na Yowani kukwera kubabika kwe'mino, nabo bera kubona eMuchima Mubuya-buya.

18Ola Simoni mango álolaa kwa Muchima Mubuya-buya énjire ândaalira ebemeresi ba endumwa sàbikire kwe'mino, era kuhonda ěrese Petero na Yowani ebuteya. 19Mwo'lu, era kubabura mbu: «E betu, nanyi mumbaa kwo'bu buashi, chasiya chira mundu ola nanyi nyingénde nábika kwe'mino abóne kwo'yu Muchima Mubuya-buya.» 20Si Petero era kumwǎkula mbu: «Ufe shambyo ala'uma ne'buteya bwao! Weke wáanyisa mbu mwa buteya mu emundu àngaula elwêmbo lwa Ongo? 21Uményereraa kwa utéte mwango nesi cha chikwêrekere mwe'ne myasi, bushi emuchima wao àtatungenene era muhondo sa Ongo. 22Rero, ubíndulaa emyanya yao ibi, wémerere Enawetu, kuli emango ànganakubabalira kwe'i mianyisa yao. 23Nanyi nyeine nànachilorere kwa mwa muchima wao mwihwire mufula munene, no'kwa bibi bichíri bikuminyire.» 24Simoni nai kukwera kubura Petero na Yowani mbu: «Munyěmeraa era mwa Enawetu nyingesha kusimbibwa na mwasi mwe'bi byoshi mwera kuteta.»

25Ábere Petero na Yowani bamála kuhambalira ebandu bya beine bàchiloreraa'ko era luulu sa Yesu na kubahubanganyisa eChinwa cha Enawetu, bera kuhuba eYerusalemu báenda báhubanganya eMwasi Mubuya-buya mu misi inene ye'Basamariya*.

Firipo ábatisa mukulu-kulu muuma we'Etiyopiya

26Lusuku luuma, malaika* muuma wa Enawetu era kubura Firipo mbu: «Uchíteyanyaa úye kwa lunda lwera masina. Mwa kuike'yi, wánatola enjira era itèngire eYerusalemu yândaalira mwa musi we'Kasa.» (Ei njira, ebandu bàtachitula bàkomere kurenga mu'i.) 27-28Unao-unao, Firipo kuna kuchiuma. Áikire mwe'i njira, era kubuanana na mukulu-kulu muuma wo'mwa chio che'Etiyopiya.#8:27-28 Anola, echio cha chěrikirwe mbu «Etiyopiya», mwe'si suku chábaa chìtangirire mwa musi we'Asuwa mwa chio che'Misiri chanasinjira eKaritumu, musi munene we'chio cha chěrikirwe mwe'sine suku mbu "Suta". Oyu mukulu-kulu, iwábaa utúla wèmangirire ebikulo bya Kandaki, mwamikasi we'chi chio.#8:27-28 Kandaki lite'sina lya mundu si lìri sina lya bukulu-kulu lya béndee bérika mwamikasi ola wéndee wéma mwa chio che'Etiyopiya, ngo'kwa béndee bérika emwami ola wéndee wéma mwa chio che'Misiri mbu Farao. Ono mukulu-kulu ábaa era áfuluka eEtiyopiya átenga kwéma Ongo eYerusalemu. Ábaa ekere mwa mutukali wai áenda ásoma echitabo cha murebi* Isaya áanjikaa. 29eMuchima Mubuya-buya kukwera kubura Firipo mbu: «Uchífundaa ala mutukali yola àli.» 30Firipo era kunalibichira'o. Áikire'o, era kûmva kwo'yu mukulu-kulu ásoma echitabo cha'murebi* Isaya.#8:30 Ábaa ásoma na murenge munene, bushi ebandu bo'kwa mira bábaa batúla bàsimire kunde básoma bacha. Era kumubusa mbu: «Ewaliya, ei myasi wásoma, unômvire'i kubuya kwa ìtechire?» 31Nai mbu: «Kute kunyingomva'i kubuya ndéte no'la wányirikanusisa'i?» Chasinda, era kwire ábura Firipo mbu érukaa mwa mutukali wai ékale ala'uma nai. 32Emilongo ye'Maanjiko Mabuya-buya ma ábaa ásoma, bacha ku yábaa ìtechire:

«Êkibwaa nga mbuli era báya kukera,

kanji ábaa nga chana cha mbuli cha chitǎma era muhondo so'la wáishanga'chi eboya.

Mwe'bi byoshi, átanaboolaa ebunu bwai.

33Êmereraa kukenyibwa,

na kwîmibwa emwaso wai.

Nde i'ukáteta era luulu se'lubuto lwai?

Bushi bàmwîtaa kuno butala.»#8:32-33 Somaa Isaya 53:7-8.

34Oyu mukulu-kulu kukwera kubusa Firipo mbu: «Ewaliya, nákwêma unyíbure: ono murebi* Isaya átetaa ene myasi era luulu sa nde? Áteta era luulu sai yeine nesi era luulu sa unji mundu?» 35Firipo mwa kumwǎkula, àba ei myasi oyu mukulu-kulu ábaa ásoma yánatangiriraa'ko mwa kumubalikisisa eMwasi Mubuya-buya era luulu sa Yesu.

36Ábere bánachiri báenzikanya, bera kuika mu chisiki chiuma ala ábaa àli meshi. Oyu mukulu-kulu era kwire ábura Firipo mbu: «Si meshi mano máli anola! Chi chìngatuma ndàbatisibwa?» [ 37Firipo nai mbu: «Akaba wemérere Yesu ne'muchima wao woshi, ùnganabatisibwa.» Nai mbu: «Nechi! Nèmerere kwa Yesu Kirisito análi Mwana wa Ongo.»] 38Chasinda, ola mukulu-kulu era kuteta mbu běmanzaa emutukali. Unao-unao, buna Firipo bera kwândaalira mwa meshi. Firipo kuna kumubatisa. 39Ábere bera bátenga mwa meshi, eMuchima wa Enawetu, kuna kuirimya Firipo. Oyu mukulu-kulu chiro ákachimulola'ko, si era kunaendekera ne'lubalamo lwai na lumoo lunene. 40Firipo era kuchichingira era àli mwa musi we'Asoto. Chasinjire, era kusungula mwa misi yoshi áenda áhubanganyisa ebandu eMwasi Mubuya-buya, kuikira mango áikaa mwa musi we'Kaisariya.

Currently Selected:

Mikolo ye'ndumwa 8: tbt

Highlight

Copy