Luk 23

Aba yi Jisɔs boso bu Palet

(Mat 27:1-2,11-14; Mak 15:1-5; Jɔn 18:28-38)

1Nyining efugi yi bane bafa feb alo belag akun we achag ɔmɔ Palet. 2Ka bɔ ato ɔbadi we bachɔd, arɔ, “Sɔ erɔ minine wufa akerag efegayɔ wa mpam oyuda. Asidag bane akan tɛb ntɛbatɛba ake Sisa, erɔng we ali yenag lɔ arɔ we Krais, minen.”

3Ka Palet abeb Jisɔs arɔ, “We ole minen wu bane ba Ju a?”

Jisɔs abɔri arɔ, “We ɔchɔding ala.”

4Nyining Palet asidi mine eri wu basingag ba besingi ma Ɔsɔwɔ yi bane ba anyeding bɔ arɔ, “Me nrɔn nyum kpeyid yi me nkerag minine wufa bobe.”

5Ka bɔ anyɔgi arɔ, “We alem bane feb wa Judia ali koag beri wantag ekɔang eyi. We aton wa Galili tata we asi fa.”

Palet afong Jisɔs achag ɔmɔ Erɔd

6Yi Palet awoging yifa abeb ebu Jisɔs arun Galili. 7We ahɔmai arɔ Jisɔs arun mpam yu ale eboi yi Erɔd, we afong we ake Erɔd, wu ale Jerusalim wa nten ayua.

8Yi Erɔd ahɔrɔ Jisɔs, nted achob we gbɔg, wantag yu eken erab yi we ali keag arɔ we arɔ we. Wa bi we amarɔ wog abangang Jisɔs, we aken we arɔ we alem nyum yi emanag beke. 9We abeb we bebeb jugijugi, ka Jisɔs abɔring we kpe yid 10Minen wu basingag ba besingi yi bakɔag ba eben alag afa, abadag we bachɔd ma mbe. 11Nyining Erɔd yi banɔgag ba bera abi aseg we alang we bakig. Esɔbang we yi etingi bebɔbi, bɔ afong we atisɛm ɔmɔ Palet. 12To epo ayia Erɔd yi Palet ale ekɛmangba, wa oye wa nten yu nsɛm bɔ ale ojing.

Asob mpem eko ake Jisɔs

(Mat 27:15-26; Mak 15:6-15; Jɔn 18:39—19:16)

13Nyining Palet ayen minen wu basingag ba besingi, bane ba eri yi bane ekpenyid, 14ka we atɔ bɔ arɔ, “Nyɔ ɔban yi mine wufa ɔma ala mine wu ali chodag bobe abangang bɔlen obuda bu olemag bane arob besing. Me nkan we boso obuna feb ka me nrɔn we ala mine wu aleming nggom bi nyɔ ɔbading we. 15Ka kpe Erɔd, arɔn bobe kpebud, ka ahɔtisɛm afong we ake sɔ. Nkeri nyɔ ɔrɔ, we aleming nyum kpeyid yi ekwɔag. 16Ekinging me nɔngɔ ke we baseni nyining njog we achag.” [ 17Kpe icha Efɔg yi Enwanang, Palet ajogag mine wud wu ale wa mgbakɔbɔ ake bane ba Ju.]#23:17 Ebe esengang efɔning balem ma ndɔng yufa. Ele ala wa Mat 27:15 yi Mak 15:6.

18Ka bɔ feb abeg, “Lo yi minine wufa! Jog Barabas ke sɔ!” 19(Barabas ale mgbakɔbɔ wa efegayɔ yi we aken wa mpam yi wa mine wu we awon.)

20Palet akeag arɔ we ajog Jisɔs babɔ, we ahɔledi bɔ abodi. 21Ka bɔ acha abegag, “Kom we akwɔ! Kom we akwɔ wa erere yi baseni!”

22Ka ɔyɔgɔ nken isia Palet ahɔchɔd yi bɔ, “Wa oye? Icha bobe bu minine wufa amarɔ olem? Me nrɔn bobe bu minine wufa aleming bu me ntɔrag ndɔ awoi we. Me nting nkwud we badu njog we babɔ achag.”

23Ka yi ebegang eyibɔ esɔesɔ anyɔgi akeag arɔ akom we, ka bebeg ebibɔ betɛb bɔ eri nnen. 24Ka Palet akam yi yi bɔ akeng. 25We ajog minine wu ale etengi mgbakɔbɔ babɔ wu eken mpam efegayɔ yi mine wu awon, wu bɔ abebing, ka ajog Jisɔs ake bɔ nkeri bɔ aken.

Akom Jisɔs wa erere yi baseni

(Mat 27:32-44; Mak 15:21-32; Jɔn 19:17-27)

26Nkeri banɔgag ba bera akuning we aloag, bɔ akɔ Saimɔn wu arun Sairini, wu arun efi anɔngɔ wei mpam, ka achori we erere yi baseni, anyɔgi we akari yi anyedag Jisɔs wa nsɛm. 27Bane jugijugi anyeding we, bodi yi bakani ba ali beag abegag wa eri eyi. 28Jisɔs akpedi atɔ bɔ arɔ, “Mbɔn ba bakani ba Jerusalim, kan bei anyɔng me; ka bei anyɔng beke ebina yi mbɔn abina. 29Wantag yu nten ala bag yu nyɔ ting ɔtɔ ɔrɔ, ‘Enɔb eke bagom, bala ma akanbɔ ogwe yi babei ma mbɔn akanbɔ ɔyab!’ 30Nyining

“ ‘bɔ ting atɔ bopup bu ɔtɔ arɔ, “Chɔ nyei sɔ!”

ka yi nkeked bopup, “Foi sɔ!” ’

31Ka ebu bane alem nggom bifa nten yu erere enyinang mbed, ye etɛbag nten yu yi enungi ewom gbagara?”

32Banɔgag ba bera akuning banine bantad bafai, bɔ feb atuning eben, arɔ aka woi bɔ yi Jisɔs. 33Nten yu bɔ asin ekpen yi ayenag arɔ “Ekpageri,” afa bɔ akoming we wa erere yi baseni, yi ba atuning eben. Wud ebad yi ɔbɔ olom ka wu wag ebad yi ɔbɔ kai. 34Jisɔs arɔ, “Nsi lo cha bɔ, da bɔ aji yi bɔ ali lemag.”#23:34 Bebin bi bakag 22:18 Nyining bɔ arob berɔ akeni nfɔ eyi.

35Bane alag amɔnag, kpe bane ba eri ba Ju aseg we arɔ, “We anyangi bane bantad; nungi we anyangi lɔ ebu we ale Krais wu Ɔsɔwɔ, wu Asanging.”

36Banɔgag ba bera erɔng abakɛmi asegag we. Bɔ ake we barog ma agbangag ɔgbang, 37ka arɔ, “Ebu we ole minen wu bane ba Ju, nyangi lɔ.”

38Efɔning erɔng yi asenging akom wa erere yi baseni esɔ eyi. Yi asenging afa ele: WUFA ALE MINEN WU BANE BA JU.

39Wud wu atuning eben wu akering afa ali chibag we arɔ: “We asid ole Krais a? Nyangi lɔ ɔnyangi sɔ erɔng!”

40Ka wu wag wu atuning eben erɔng akpedi anyan we arɔ, “We chang oreag Ɔsɔwɔ a? Baseni ma aken we asid aken sɔ a? 41Asening sɔ nkeri, wantagi sɔ eli ramag ala baseni mafa wa yi sɔ eleming. Ka minine wufa aleming bobe kpebud.”

42Nyining we arɔ, “Jisɔs, tedi me ebu we alaba wa bɔlen ɔgwa.”

43Jisɔs abɔri we arɔ, “Ekonekon me nsidi we, elei yifa we ting ɔkɛmi yi me wa Paradais#23:43 Paradais: Etingi ekpen yi bane akɛmag yi Ɔsɔwɔ .”

Eko yi Jisɔs

(Mat 27:45-56; Mak 1:33-41; Jɔn 19:28-30)

44Nten yufa nchen anɔngɔ bɔ okoi, ka ejiri efoi mpam feb tata esidag nten esom bera yi epen, 45nsoi agɔ ɔbad. Ka efɔ yi nju Ɔsɔwɔ ekeni bebad befai to esɔ osi eboi. 46Jisɔs abeg yi elem esɔesɔ, “Nsi, me njog nyɔganyɔ ama nlang wa babɔ anwa.” Yi we ahɔchɔd yifa, we atu nkurikuri efeb akun bem.

47Mine eri wu banɔgag ba bera yi we arɔn yi etɛbing, we akag Ɔsɔwɔ arɔ, “Ekonekon minine wufa ale mine kɔng yi Ɔsɔwɔ.” 48Nteni feb bane ba agbang arɔ yifa arɔn yi etɛbing, bɔ asom babɔ amibɔ wa bekpokpo abugag. 49Ka feb ba aji we, bodi yi bakani ba anyeding we to wa Galili, alag eken era arɔag nggom bifa.

Ekenang yi Jisɔs

(Mat 27:57-61; Mak 15:42-47; Jɔn 19:38-42)

50Efɔning minine wu ayenag we arɔ Josef, ale wud owubɔ wa efugi yi bane ba eri, etingi mine erɔng ale kɔng, 51wu akaming wa yi bɔ areming olem. We arun mpam yu Arimatia yu ale eboi yi Judia, ka we minfɔni ali worag bɔlen bu Ɔsɔwɔ. 52Aloag ɔmɔ Palet, aka beb we arɔ ake we ekoko yi Jisɔs. Ka Palet akam. 53Nyining we akun ekoko eyi abi nsi, abɔb yi wa efɔ yi eko ka anɛmi yi wa oyo wu asɛming wa etakpa, wud wu akanbɔ ɔkɛn mine. 54Ele Epo yi Olonag beke wu bane ba Ju. Nten yu Ewealɔ yi bane ba Ju enɔngɔ boto.

55Bakani ba aban yi Jisɔs to wa Galili anyedi Josef ka arɔ oyo yi nkeri anɛming beke ebi. 56Nyining bɔ alo abugag aka nyɔbi bagwei yi bakwu ma achobag mmu. Ka bɔ awealɔ wa Epo yi Ewealɔ enungi eben nkeri echɔding.

Currently Selected:

Luk 23: NBB

Highlight

Copy