Luk 22

Juda akam ɔchɔ Jisɔs

(Mat 26:1-5; Mak 14:1-2; Jɔn 11:45-53)

1Nteni efɔg yi bred yu akankwe yis, yu ayenag arɔ efɔg yi enwanang, ele kpɛd, 2ka balen ba basingag ba besingi yi bakɔag ba eben ali reag baso ma bane ka bɔ akeag bɔlen bu bɔ awoag Jisɔs wa ewobi. 3Nyining Setan awei Juda, wu ayenag we Iskarɔd, wud wu ba ɔfɔ yi bafai. 4Ka Juda alo aka kpɔgi minen basingag ba besingi yi bane ba eri ba ababag nju yu Ɔsɔwɔ akami nkeri we amanag achɔ Jisɔs. 5Boted bochob bɔ ta bɔ akam yi akerag we bakpoga. 6We akam ammɔnag nten yu efed ekɛmag yi we ajogag Jisɔs ake bɔ wa nten yu bane chang.

Nkurikuri Beliang

(Mat 26:17-25; Mak 14:12-21; Jɔn 13:21-30)

7Nyining epo esi yi efɔg yi Bred yu Akan Langing Yis yi esɔmag mmɔn ɔwɔng wa efɔg yi Enwanang. 8Jisɔs afong Pita yi Jɔn, arɔ, “Chog anyɔng nyɔ ɔka loni yi sɔ eyag beliang bi Enwanang.”

9Bɔ abeb we arɔ, “Wan we ɔken ɔrɔ sɔ eloni yi?”

10We abɔri arɔ, “Nkeri nyɔ ɔweag ala wa mpam, minine wu akaring nkpang yu mmamai ting akpɔgi nyɔ. Nyedi anyɔng we osi nju yu we aweag, 11sidi minfɔni nju ɔrɔ, ‘Minkɔkɔi abeb arɔ: wan ale emangɔng yi bakenken, yi me mmanag nli beliang bi efɔg yi Enwanang yi ba anyedag me.’ 12We ting atɔngi nyɔ etɛm emagɔng wa esɔenyɔng, aloni feb. Lem beliang afa.”

13Bɔ aloag aka rɔ nggom nkeri Jisɔs asiding bɔ. Nyining bɔ aloni beliang bi Enwanang.

14Yi nten ahɔsi, Jisɔs yi bɔ ba alag ɔbɔ owu akɛmi afari okpokoro. 15Ka we atɔ bɔ arɔ, “Ele me yi ka nyag efɔg yi Enwanang yifa yi nyɔ ka me nto bayig ɔrɔ. 16Ka me nsidi nyɔ, me nkɔngɔ oli bi tata eri eyi etɔngi wa bɔlen bu Ɔsɔwɔ.”

17Yi ahɔkun nkonkon, we akob Ɔsɔwɔ ka we arɔ, “Rami yifa keni yi wa erɔng eyina. 18Me nsidi nyɔ me nkɔngɔ ɔhɔyɔ barog ma greb mafa tata bɔlen bu Ɔsɔwɔ bɔba.”

19Ka we akun bred, akob Ɔsɔwɔ ka abeg yu ake bɔ, arɔ, “Yifa ele beke egama bi aken wa eri eyina; lem yifa eruafa nyɔ onungi otedag me.”

20Nkeri aleming kpa, yi bɔ amarɔ li bred we akun nkonkon, arɔ, “Nkonkon yufa ale enyɔ yieken wa nnung ema, yi apog ake nyɔ. 21Ka mine wu anɔngɔ chɔ me ale fa yi me wa okpokoro. 22Mmɔni Mine ting akwɔ nkeri Ɔsɔwɔ amarɔ oremi. Ka ebeb eke mine awua wu achɔg we!” 23Bɔ ato obeb erɔng eyibɔ wun owubɔ wu ting alem yifa.

24Ntang achɔ wa erɔng eyibɔ abangang nene owubɔ wu akering arɔ we atɔn aking. 25Jisɔs atɔ bɔ arɔ, “Balen ba akan sid bane ba Ju ali kɔrag bane abibɔ wa ɔsa. Ba ale ɔsa ayen lɔ ‘Batɔbag ba bane.’ 26Ka nyɔ ɔkan kɛmi alafa. Otuke, we wu atɔn aking wa erɔng eyina nungi we akɛmi ala we akebing aking, ka we wu ale bɔlen akɛmi ala we wu ale botug. 27Wun atɔn aking, we wu ale okpokoro lale we wu ali tugag? We wu ale okpokoro asida? Ka me nle erɔng eyina ala wud wu ale botug. 28Nyɔ ole bane ba nyɔ ɔmarɔ lami yi me wa nten yu bɔkan ɔgama. 29Me nke nyɔ ɔsa wu bɔlen, ala nkeri Nsi ema aken me, 30nkeri nyɔ ɔmanag oli, nyɔ yɔ yi me wa bɔlen ɔgama. Nyɔ ting ɔkɛmi ngɛd yu balen, nyɔ orebag bɔpem nyɔ okerag benud bi nju ɔfɔ yi befai bi Isrel.”

Jisɔs asidi nkeri Pita ting akeb we

(Mat 26:31-35; Mak 14:27-31; Jɔn 13:36-38)

31Jisɔs atɔ Saimɔn Pita arɔ, “Saimɔn, Saimɔn, Setan arami ɔsa we achag nyɔ ala wit. 32Ka me nlang we wa nsɔm, Saimɔn, nkeri ochorekpo ɔwa ɔkan yɔ mmai. Ka wa nten yu we ala tisɛm lang mbɔn banyen agwa ba banine ɔsa.”

33Ka Saimɔn Pita abɔri arɔ, “Minfɔni, me nloni beke bi nchag yi we kpe wa mgbakɔbɔ yi kpe ele yi eko.”

34Nyining Jisɔs abɔri we arɔ, “Me nsidi we, Pita, ka nkɔg akog elei, we ting okeb nken isia ɔrɔ we oji me.”

35Nyining Jisɔs abeb bɔ arɔ, “Nten yu me nfonging nyɔ babɔ babɔ nyɔ ɔkɔring ebam yi bakpoga, ebam yi etɔ yi eken lale nggom bi bako, kpeyid erin ori nyɔ a?”

Bɔ abɔri arɔ, “Kpenyum.”

36We atɔ bɔ arɔ, “Ka fafa ebu ɔkwei ebam yi bakpoga, kun yi, erɔng ebam yi etɔ yi eken; ka ebu ɔkwei ekangkang, chɔ nkwu ɔya yu efi yud ɔnam yid. 37Asenging wa botiti bu Ɔsɔwɔ arɔ: ‘Afang we erɔng yi balemag ba bobe;’ ka me nsidi nyɔ yifa etɛbag yi me. Ee-ee, yi asenging abangang me enɔngɔ tɛb alafa.”

38Ba anyedag Jisɔs arɔ, “Mɔn, Minfɔni, da bekangkang befai.”

We abɔri arɔ, “Cha anyɔng minchɔd awua!” #22:38 Ba anyedag ba Jisɔs yi akan mang yi we ali chɔdag, elem Jisɔs akuri ɔkami awun.

Jisɔs aka soi nsɔm wa Mpɔp yu Olif

(Mat 26:36-46; Mak 14:32-42)

39Jisɔs aloag Mpɔp yu Olif nkeri amang olem, ka ba anyedag we anyedi. 40Esiang ekpen ayin, we atɔ bɔ arɔ, “Soi anyɔng nsɔm nkeri nyɔ ɔkan chɔ ɔwei wa nkan.” 41We atin ninsed fe aking bɔ, anyudi nsi asoi nsɔm arɔ, 42“Nsi, ebu we ɔken, lɔb me nkonkon yufa; ka nkeri me nkeng asid, ka ekɛmi nkeri ɔya.” 43Minkamag efong yi Ɔsɔwɔ arun mpam esɔ atɛb alang we ɔsa. 44Ka wa ntagi botig bu baseni ma anɔngɔ ba, egbi we gbɔg, we asoi nsɔm gbɔg ta besɔngsɔng ebi bele ala belɔng bi nnung bechɔrag wa nsisi.

45Yi we ahɔman nsɔm alo belag atisɛm ɔmɔ ba anyedag we, aka kpɔgi bɔ elɔ, ejɔi bɔ wa ntag yu bayig. 46We abeb bɔ arɔ, “Ye ka nyɔ ɔlag? Lo anyɔng belag nyɔ osoi nsɔm nkeri nyɔ ɔkan chɔ ɔwei wa nkan.”

Akɔ Jisɔs

(Mat 26:47-56; Mak 14:43-50; Jɔn 18:3-11)

47Yi we anyinang achɔdag, ekakab yi bane aba ekpen ayia, ka minine wu ba ayenag we Juda, wud wu ba ɔfɔ yi bafai, aran bɔ nnen. Atin abɔg Jisɔs anɔg arɔ we kug we minyɔ, 48ka Jisɔs abeb we arɔ, “Juda, we ɔnɔngɔ ɔchɔ Mmɔn wu Mine yi ekugang minyɔ a?”

49Yi banyedag ba Jisɔs ahɔrɔ yi enɔngɔ tɛb, bɔ arɔ, “Minfɔni, enɔg yi bekangkang ebida?” 50Ka wud owubɔ akwe mingban wu minen wu minsingag besingi, asob oroi wu obolom owu.

51Ka Jisɔs abɔri arɔ, “Nhɔkei yifa!” Ka we agbi oroi wu minine awua agban we.

52Nyining Jisɔs atɔ balen ba basingag ba besingi, bane ba eri ba ababag nju yu Ɔsɔwɔ yi bakonang, ba aban we ɔkɔ arɔ, “Ye ka nyɔ ɔba me ɔkɔ yi bekangkang yi bekpri bi bopung ala mine eri wu bakerag ba efegayɔ? 53Kpeicha epo me nle yi nyɔ wa etengebam yi nju Ɔsɔwɔ, ka nyɔ ogbin me ɔbɔ. Ka fafa nten oyuna asi yu ejiri ekwei ɔsa.”

Pita akeb Jisɔs

(Mat 26:57-58,69-75; Mak 14:53-54,66-72; Jɔn 18:12-18,25-27)

54Nyining akɔ Jisɔs, ba akun we achag nju yu minkonang minen minsingag besingi. Pita anyedi bɔ ekenera. 55Ka nten yu ebe bane afuging minkod wa etengante yi etengebam bɔ akɛmi afa ekpen yid, Pita akɛmi afa yi bɔ. 56Mindig mingban arɔ we nkeri we akig wa mkpɔgi awugag minkod. We amɔn we gɔgigɔgi ka arɔ, “Minine wufa ale yi we.”

57Ka we akeb yi arɔ, “Minkani, Me nji we.”

58Wa ninsed nten mine wuntad arɔ we ka arɔ, “We erɔng ole owubɔ wud.”

Ka Pita abɔri arɔ, “Minine, me erɔng chang!”

59Yi ninsedi nten ahɔking mine wuntad arɔ, “Wa ekonekon minine wufa ale yi we, wantag yu we ale mine wu arun Galili.”

60Pita abɔri arɔ, “Minine, Me nji yi we oli chɔdag abangang!” Nkeri we ali chodag ala, nkɔg akog. 61Minfɔni akpedi amɔn Pita kɔng. Nyining Pita atedi elem yi Minfɔni asiding we: “Ka nkɔg akog elei, we ting okeb me nken isia.” 62Ka we atɛb efi aka bei yi ɔrem.

Ba bababi alang Jisɔs bakig

63Banine ba ali babag Jisɔs alang we bakig akwud we. 64Bɔ abɔb we efɔ mmɛd ka atɔ we arɔ, “Te! Nene atɛming we?” 65Ka bɔ achib we wa nggom bibɔ ali chɔdag wa bɔlen jugijugi.

Jisɔs boso bu Palet yi Erɔd

66Epo ehɔche bakonang ba bane, bodi yi balen ba basingag ba besingi yi bakɔag ba eben afugi ekpen yid, ka akun Jisɔs aba yi we wa boso obubɔ. 67Bɔ arɔ, “Ebu we ole Krais, sidi sɔ.”

Jisɔs abɔri bɔ arɔ, “Ebu me nsidi nyɔ, nyɔ ɔhɔ kam yi me, 68ka ebu me mbeb nyɔ, nyɔ ɔhɔ bɔri. 69Ka to fafa chog boso, Mmɔn wu Mine anɔngɔ kɛmi wa obolom wu Ɔsɔwɔ wu akwe basa feb.”

70Bɔ feb abeb we arɔ, “Nyining we ole mmɔn wu Ɔsɔwɔ a?”

Jisɔs abɔri bɔ arɔ, “Ekonekon yi nyɔ chɔding ele alafa nyɔ ɔrɔ me nle Mmɔn wu Ɔsɔwɔ.” 71Nyining bɔ arɔ, “Ye ka sɔ enyinang ekeag bɔtese buntad? Sɔ bafɔni ewog wa minyɔ owu.”

Currently Selected:

Luk 22: NBB

Highlight

Copy