Luk 24

Jisɔs anyimi wa eko

(Mat 28:1-10; Mak 16:1-8; Jɔn 20:1-10)

1Wa ndanen epo yi efɛn yi ele epo yi minchɔd wu Ɔsɔwɔ, yi epopo, bakani akun bagwei ma bɔ anyɔbing achag oyo. 2Aka rɔ arɔ abungi ndinda alɔb wa minyɔ oyo, 3ka yi bɔ aweng eteng, bɔ arɔn beke bi Minfɔni Jisɔs. 4Yi bɔ alag akerag abangang yifa, ebuyid banine bafai yi nfɔ ebadag ala nwawang alami bɔ nkpɔgi. 5Yi botig abua bakani aba atɛb beri yi baso amibɔ nsisi, ka banine aba atɔ bɔ arɔ, “Ye ka nyɔ ɔkeag mine mbed wa erɔng yi bakoko a? 6We chang fa; we anyimi! Tedi nkeri we asiding nyɔ, yi we ale yi nyɔ wa Galili: 7‘Mmɔn wu Mine ating ajog we alang babɔ ma bane ba mbe, akom we ka wa ndu isia we ahɔnyimi.’ ” 8Nyining bɔ atedi balem ami.

9Nteni bɔ atiming nsɛm wa oyo, asidi nggom bifa feb bɔ ɔfɔ yi wud yi bantad feb. 10Ale Meri wu arɔn Magdala yi Jɔana yi Meri nyeni Jems, ka yi bantad ba ale yi bɔ, ale bane ba asiding bɔ ba alag ɔbɔ wu Jisɔs yifa. 11Ka bɔ akaming yi bakani bafa asiding bɔ, waoye bachɔd amibɔ ale bɔ ala baram. 12Pita nyining, alo belag agbɛdi achag oyo. Anyudi nsi ka we arɔn efɔ yi eko yiyi enɔng, ka we atɛbag, akerag yi lɔ yi emarɔ tɛb.

Jisɔs atɛb boso bu bafai ba anyedag we yi ale nnen achag Emayɔs

(Mak 16:12-13)

13Wa epo ayia yid bafai abibɔ ba anyedag Jisɔs ali chag wa eri mpam yi ayenag yi arɔ Emayɔs. To wa Jerusalim osi wa mpam yu Emayɔs ale ala mail enyibisia. 14Bɔ ali chɔdag atangag yi bolom abangang feb nggom bi bemarɔ tɛb. 15Nkeri bɔ ali kamag ala abangang nggom bifa yi bolom, Jisɔs we minfɔni atɛb aken yi bɔ; 16bɔ arɔ we ka bɔ arening we.

17We abeb bɔ arɔ, “Icha bachɔd la ma nyɔ ɔkwe ɔchɔdag yi bolom nyɔ ɔkenag ɔchag?”

Bɔ alami jim yi baso amangag. 18Wud owubɔ, wu akamag arɔ Klopas, abeb we arɔ, “We bibi ole minkenken wa Jerusalim wu akan ji nggom bi bemarɔ tɛb afa ndu yifa?”

19We abeb arɔ, “Icha nggom?”

Bɔ abɔri arɔ, “Abangang Jisɔs wu arun Nasaret. We akɛming minrɔag eyammɛd yi Ɔsɔwɔ, ka balem ami yi elemang eyi efɔning ɔsa wa boso bu Ɔsɔwɔ yi bane feb. 20Balen ba basingag ba besingi yi bane ba eri ba Ju ajoging we ake balen ba Rom ba asobing mpem arɔ awoi we, ka bɔ akom we wa erere yi baseni. 21Ka sɔ efɔning ochorekpo sɔ erɔ we ale wud wu ɔnɔngɔ ɔfri Isrel. Ka ekuring afa, ele ndu isia yi bifa feb betɛbing. 22Ka ebodi afa, ebe bakani abida amaning sɔ beke. Bɔ achin wa oyo yi epo po yifa, 23ka arɔn beke ebi. Bɔ aba sidi sɔ arɔ bɔ arɔn eyammɛd yi bakamag ba befong bi Ɔsɔwɔ ba atɔn arɔ we ale mbed. 24Nyining ebe ba ale yi sɔ aloag wa oyo aka rɔ wu nkeri bakani asiding, ka bɔ arɔn Jisɔs.”

25We atɔ bɔ arɔ, “Ye ka nyɔ ochuag, nyɔ oyigang ekamang feb bi barɔag ba eyammɛd yi Ɔsɔwɔ amarɔ ɔchɔd! 26Chang nyum yi Krais arɔag bayig ma nggom bifa ka we nyining awei wa ekpen eyi yi ejeg a?” 27Ka etoang enud yi Mosis yi feb barɔag ba eyammɛd yi Ɔsɔwɔ, we alem erebi bɔ yi achɔding wa botiti bu balem ma Ɔsɔwɔ feb abangang we minfɔni.

28Yi bɔ ale kped yi mpam yu bɔ ali chag, Jisɔs aleming ala kpe we anyinang achag boso. 29Ka bɔ aledi we arɔ, “Kɛmi yi sɔ, wantagi eko esi.” Ka we anyedi aka kɛmi yi bɔ.

30Yi Jisɔs ale wa okpokoro yi bɔ, we akun bred, akob Ɔsɔwɔ, abeg yu, ka ake bɔ. 31Nyining mmɛd amibɔ arɛbi ka bɔ areni we. Ebuyid we alɛm mmɛd amibɔ. 32Bɔ abeb bolom arɔ, “Boted obuda bɔkɛming bosidag sɔ wa eteng yi we ali chɔdag yi sɔ wa nnen a, yi yi we aleming erɛbi sɔ abangang botiti bu balem ma Ɔsɔwɔ a?”

33Bɔ alo belag atisɛm ebuyid achag Jerusalim. Afa bɔ arɔn bawag Ɔfɔ yi wud yi bane ba ale yi bɔ, afugi ekpenyid. 34Bɔ ali chɔdag arɔ, “Ele ekonekon! Minfɔni anyimi wa eko atɛb atɔngi lɔ ɔmɔ Saimɔn.” 35Nyining aba bafai asidi yi etɛbing wa nnen yi nkeri bɔ arening Jisɔs nten yu we abeging bred ake bɔ.

Jisɔs atɛb erɔng yi Ba anyedag we

36Yi bɔ anyinang achɔdag abangang bifa, Jisɔs minfɔni atɛb alami erɔng eyibɔ ka atɔ bɔ arɔ, “Ekunakuna ekɛmi yi nyɔ.”

37Bɔ anig ka botig bɔkɔ bɔ, akerag arɔ bɔ arɔn minkoko. 38We abeb bɔ arɔ, “Ye ka nyɔ oreag erɔng ye ka bɔtang bɔtɛbag wa boted obuna? 39Mɔn anyɔng babɔ angama yi bako angama. Ekonekon me ala! Gbi me ɔrɔ; minkoko akwe nyam beke yi bekɛkɛb nkeri nyɔ ɔrɔn me mfɔn.”

40Yi amarɔ ɔchɔd yifa, we atɔngi bɔ babɔ ami yi bako. 41Ka yi bɔ anyinang akan kam yi yi wantag yu bochoba bu nted yi emanang beke, nyining we abeb bɔ arɔ, “Nyɔ ɔkwekwei nyum kpeyid yi eliang fa?” 42Bɔ ake we nnsi yu awɔnɔwɔ, 43ka we arami yu ali wa boso obubɔ.

44We atɔ bɔ arɔ, “Wa yi me nsiding nyɔ yi me nle yi nyɔ: Feb nggom betɛbag ekonekon bi asenging abangang me wa eben yi Mosis, Barɔag ba eyammɛd yi Ɔsɔwɔ yi wa Botiti bu Ebɛn.”

45Nyining we arɛbi boted obubɔ eruafa bɔ amai Botiti bu balem ma Ɔsɔwɔ. 46We asidi bɔ arɔ, “Da yi asenging wa Botiti bu Ɔsɔwɔ: Krais ting arɔ bayig ka anyimi wa eko wa ɔyɔgɔ ndu isia. 47Ka asenging erɔng wa Botiti bu balem ma Ɔsɔwɔ arɔ ting akun mpi oyu asidi bane wa feb bɔpam, to wa Jerusalim alo acha bobe obubɔ nkeri Ɔsɔwɔ aloag acha bobe obubɔ. 48Nyɔ ole bɔtese bu nggom bifa. 49Me ting nfong nke nyɔ yi Nsi ema amarɔ oremi, ka kɛmi anyɔng wa Jerusalim tata nyɔ ɔrami ɔsa wu orun esɔ.”

Jisɔs akom achag esɔ

50Nyining we akun bɔ achag ekpen yi ebɔging Betani, we atam babɔ esɔ ake bɔ enɔb. 51Yi we ali kerag bɔ enɔb, we acha bɔ ka akun we achag esɔ. 52Nyining bɔ ajegi we atisɛm yu Jerusalim yi bochoba bu nted pɔp. 53Ka bɔ acha wa nju yu Ɔsɔwɔ kpɔkpɔgi nten akagag we.

Currently Selected:

Luk 24: NBB

Highlight

Copy