Luk 15

Bokobi bu Ɔwɔng wu ɔlɛming

(Mat 18:12-14)

1Epo yid jugijugi baramag ba ntɛbatɛba yu mpam yi balemag ba bobe aban aba wog Jisɔs. 2Ka Farisi yi bakɔag ba eben ato ɔkpen arɔ, “Minine wufa aramag balemag ba bobe ayag yi bɔ.”

3Nyining Jisɔs ake bɔ bokobi bufa arɔ: 4“Ebu owuna wud afɔning bawɔng erɛm berɔn ka wud ɔlɛming, alemag lan? We ɔhɔ cha bawɔng mawag erɛm bene nsɛm eko yi ane wa efi aka kei wud wu ɔlɛming tata we arɔ wu a? 5Ka ebu we alarɔ wu, yi bochobag bu nted we atamag wu achori wa bepepeg ebi, 6akari wu abugag nju. Nyining we ɔnɔngɔ oyen erong eyi yi bane ba we ali kɛmag ekpen yid arɔ, ‘Chob anyɔng nted yi me; me nte ɔwɔng ɔma wu ɔlɛming. Nungi anyɔng sɔ ebɛn echob nted.’ 7Me nsidi nyɔ ndɔ wa nkeri bochoba bu nted ting boti wa mpam yu esɔ wa minlemag bobe wud wu agɔg bobe bu elemang eking bane ba nnɔ erɛm bene nsɛm eko yi bane ba arɔn nching yu bɔ acharag bobe.

Bokobi bu okpoga wu ɔlɛming

8“Lale ebu minkani wu afɔning bakpoga ma selfa ɔfɔ ka wud ɔlɛm, we alemag lan? We ahɔnwɔi enwɔi, we apag nju ka achei beke akei gɔgigɔgi tata we arɔ wu a? 9Ebu we alarɔ wu, we ayenag erong eyi yi bane ba bɔ ali kɛmag ekpen yid, we atɔrag bɔ arɔ, ‘Nted achob me gbɔg me nte okpoga wu selfa ɔma wu ɔlɛming. Nungi anyɔng sɔ echob nted!’ 10Me nsidi nyɔ, wa nkeri bakamag ba befong bi Ɔsɔwɔ bachobag nted ebu minlemag bobe wud agɔn bobe olem.”

Bokobi bu Mmɔn Minine wu alɛming

11Jisɔs ahɔsidi bɔ bokobi buntad arɔ, “Efɔning minine wud wu akwe mbɔn ba banine bafai. 12Wu fefe atɔ nsi eyi arɔ, ‘Nsi, keni nggom egama ke me.’ Ka minine awun akeni nggom ebi erɔng yi mbɔn abi bafai.

13“Enɛmig kpe ndu efeg mmɔn wu fefe akari nggom ebi achɔ aloag mpam yuntad yu ekenera, we aka bebi bakpoga ami feb wa echaba ekwen yi ali kwenag. 14Yi we ahɔbebi feb bi akwe, esɔnga ɔgba ɔsɛbi ɔkɔni feb bekpen ka we ahɔfɔn nyum kpe yid ɔbɔ. 15Ka we aloag aka lem erom yi wud wu minfɔni mpam ayua, wu afonging we arɔ achag wa nkwɔ eyi aka lei bakug ami. 16Ele we yi ka ayag beliang bi bakug ali yag, ka mine kpe wud wu aken we nyum kpe yid chang.

17“Wa nkurikuri yi we ahɔmai beke ebi, we arɔ, ‘Feb balemag ba erom yi nsi ema akwe beliang pɔp bi bɔ ayag ta becharag ebe, ka da me fa nɔngɔ ɔkwɔ nsɔng! 18Me ting ntisɛm ɔmɔ nsi ema nka tɔ we ndɔ, Nsi, me nlem bobe boso bu esɔ yi boso ɔgwa. 19Me nhɔkɔn wu ayenag me mmɔn ɔwa, kun me ala mine erom ɔwa wud.’ 20Ka we alo belag atisɛm ɔmɔ nsi eyi.

“Ka yi we anyinang eken era, nsi eyi arɔ we abag, nted oyu asoi yi enun yi nsɔn. We agbɛdi aka kpogi we, akpo we yi babɔ ami akug we minyɔ.

21“Nyining mmɔn owu atɔ we arɔ, ‘Nsi, me nlem bobe boso bu esɔ yi boso ɔgwa. Me nhɔkɔn wu ayenag me mmɔn ɔwa.’

22“Ka nsi eyi atɔ bagban abi arɔ, ‘Babab! Bag yi bebɔbi bi benɔbing beking nyɔ ɔba sɔbi we. Lang anyɔng we eragi yi benini wa benini ebi yi nggom bi bako wa bako ami. 23Nyining chog ɔka ba yi mmɔni mpɔng yu banɔi abawoi yu, nungi sɔ ali echob nted. 24Waoye mmɔn ama wufa akwɔnɔkwɔ ka ahɔnyimi, we alɛming ɔlɛm ka fafa ate we.’ Ka nyining efɔg ayin eto.

25“Wa nten yufa mmɔn wu minkonang ale ekwɔ. Yi we ali bugag abag ahɔsi kpedikpedi yi nju, we awog ebɛn yi ebɛnang wa nju. 26Ka we ayen mingban wud abeb we arɔ, ‘Ye eli chag boso?’ 27Ka mingban awun abɔri we arɔ, ‘Ninyen ɔwa atisɛm abug aba, ka nsi eya awoi mmɔni mpɔng yu banɔi wantagi we atisɛm mbed yi okorag beke.’

28“Ninyen wu minkonang aba asang nted akeb eweang wa nju, ka nsi eyi atɛb aba efi aba ledi we arɔ abag etengi nju. 29Ka we abɔri nsi eyi arɔ, ‘Mmɔn kpa, nya yi fa feb me nli tugag we ala minsob, me nkan ba we okeb nyum kpeyid elemang yi we ofongang me ɔrɔ nlem. We oke me ye? We ɔkan ba oke me kpe mmɔni mboi yuyu me nkun nchob nted yi erong ema! 30Ka yi mmɔn ɔwa wufa wu amarɔ ochi aka bebi bakpoga angwa feb yi bakani ba asasa ahɔtisɛm abug aba, we owoi mmɔni mpɔng yu banɔi oke we!’

31“Nyining nsi abɔri we arɔ, ‘Mmɔn ama, dɔ, kpɔkpɔk nten we ole yi me, ka kpe ye yi me nkwe ele eya. 32Ka enɔbɔnɔb sɔ enungi efɔg echob nted, wantagi ninyen ɔwa akwɔ ka fafa we anyimi; we alɛmɔlɛm ka fafa ate we.’ ”

Currently Selected:

Luk 15: NBB

Highlight

Copy