Luk 14
14
Jisɔs Agban Minine Ekɔn
1Epo yid yi Ewealɔ Jisɔs alon aka li beliang wa nju yu mine eri wud wu Farisi, ka bane ababag we arɔ gɔgigɔgi yi we alemag. 2Minine wu ali yɔg onuda aba boso bu Jisɔs. 3Jisɔs abeb bakɔag ba Eben yi Farisi arɔ, “Eben ekaming erɔ agban bane wa Epo yi Ewealɔ lale ekaming?” 4Ka bɔ acha wedegwedeg. Jisɔs agbi minine awun babɔ, agban we atɔ we arɔ achag.
5Nyining Jisɔs abeb bɔ arɔ, “Ebu owuna wud afɔning mmɔni minine lale mpɔng ka achɔn awei wa ebebe yi mmai wa Epo yi Ewealɔ, ebedi ka nyɔ ɔhɔkei bɔlen bu nyɔ ɔlɔbag we ebuyid wa Epo yi Ewealɔ a?” 6Ka bɔ amaning abɔri we ebeb yifa.
Jisɔs akɔi abangang ejegang lɔ
7Yi Jisɔs ahɔrɔ nkeri bakenken ba alaging ali sangag betingi bi boged bu ejeg, we aba sidi bɔ bokobi bufa arɔ: 8“Ebu mine ala lag we wa efɔg yi ebai, we kan rannen ɔkɛmi wa nged yu ejeg. Emanag ekɛmi arɔ alaging mine wuntad erɔng wu atɔn aking we. 9Ebu ele ala, mine wu alaging nyɔ bafai anɔngɔba aba tɔ we arɔ, ‘Ke mine wufa nged ɔya.’ Nyining enyi enɔngɔ kɛmi eya ɔnɔngɔ olo ɔka kɛmi wa nged yu eboi. 10Otoke, ebu ala lag we wa efɔg we chog ka kɛmi wa nged yu ale wa eboi, ebu minfɔni efɔg alaba ɔwa atɔrag we arɔ, ‘Nnum ama bag esɔ wa ekpen yi enɔbing eking.’ Yifa ekerag we ejeg wa boso bu bane feb ba alaging. 11Ka bɔ feb ba atamag beke ting apodi bɔ eboi, ka bɔ ba apodag lɔ ting atam bɔ esɔ.”
12Nyining Jisɔs atɔ mine wu alaging we arɔ, “Ebu we ɔla lag bane wa efɔg, we kan lag erong eya, mbɔn ba nyen agwa, bane ba orun yi bɔ yi bolom ba afangingɔfang ba nyɔ oli kɛmag ekpen yid. Waoye ebu ɔlag bɔ, bɔ amanag alag we erɔng wa nnen ayua bɔ ajog we yi we oleming oke bɔ. 13Ka ebu we ɔla rob efɔg, lag bakpak, bɔ ba agweri, bɔbeni yi bachegag ba mmɛd, 14da ting enɔb yi we. Kpe yi bɔ ahɔman ajog we, ka Ɔsɔwɔ ting ajog we wa epo yi bane ba nnɔ enyimag wa eko.”
Bokobi Bu Etɛm Efɔg
(Mat 22:1-10)
15Ka wud wu akig wa nlialia ayua yi Jisɔs ahɔwog yifa, we atɔ we arɔ, “Erienɔ ele yi bɔ ba ting ali wa efɔg yi Bɔlen bu Ɔsɔwɔ!”
16Ka Jisɔs abɔri we arɔ, “Minine wud arobing etɛm efɔg ka alag bane jugijugi. 17Nten ahɔsi yu efɔg ayin, we afong mingban owu arɔ aka yen bane ba we alaging, ‘Bag anyɔng da aloni nggom feb anungi.’
18“Ka bɔ feb ato ɔfangi wudugwudug. Minranen mine atɔ mingban arɔ, ‘Me nnaming ekwɔ fafa ka me nchag nka rɔ yi, ka betɛbi nungi me nchag, me nledi.’
19“Wuntad arɔ, ‘Me nnaming mpɔng ɔfɔ bu erom ka me nlag nnen nka kan bu. Ka me nhɔman mba, me nledi.’
20“Wuntad erɔng arɔ, ‘Me nsɔding ala minkani fafa, wantag ayua me nhɔman mba.’
21“Mingban atisɛm aka sidi nsinju eyi bifa feb. Nsinju aroi yi bɔsangang bu nted atɔ mingban owu arɔ, ‘Chog babab wa bɔlen yi bɔpibi bu mpam, ɔkaba yi bakpak, ba amarɔ ɔgweri, bachegag ba mmɛd yi bɔbɛni.’
22“Ebuyid mingban abɔri we arɔ, ‘Nsinju, yi ɔtɔn me nlem alafa, ka ɔfɔng onyinang.’
23“Nyining nsinju atɔ mingban arɔ, ‘Chog efi wa bɔlen bu ɔtɔ bu bochin bɔmpam buntad yi mbɔnɔ len obu ka lem bane abag eruafa nju ama anungi asoi. 24Me nsidi nyɔ, bɔ ba arannen ala alag kpewud ahɔwori beliang egama.’ ”
Yi ekunag ka we ɔkɛmi minyedag Jisɔs
25Epo yid jugijugi bane alon eken yi Jisɔs ka we akpedi atɔ bɔ arɔ, 26“Kpe nene wu abag ɔma ka we akan jinging nsi yi nyen, minkai yi mbɔn, mbɔn banyen ba banine yi ba bakani, kpe ekwen eyi, npɛdi mine awua ahɔman akɛmi minyedag me. 27Ka kpewun wu akan karing erere yi baseni eyi anyedi me ahɔ kɛmi minyedag me.
28“Nene owuna wud, wu ali remag ɔtɛb enyɔng, wu we ahɔrannen kpa amai efɛn eyi ka we arɔ ebu we akwekwe bakpoga gbɔg ma ting akɔn we alem erom ayin eman? 29Ebu we akan leming ala, we ɔhɔman atɛb yi eman ebu we alato enud, ka feb ba arɔn yi etɛbing ting awɔi we. 30Arɔ, ‘Mine wufa aton ɔtɛb ka ahɔman atɛb asi nkuri.’
31“Lale icha minen aloag bera aka nɔg yi minen wuntad, we ahɔranen akɛmi kpa akeri ka banine begod erɛm erɛm befai ba we akwe ting aman anɔg yi erɛm erɛm bene bi minen wu wag a? 32Ebu ahɔman, we ting afong bane achag aka kpɔgi minen wu wag yi we anyinang eken era aka aledi we bɔ akɔni. 33Wa nkeri we ɔhɔ kɛmi mine wu anyedag me ebu we akan joging feb nggom bi ɔkwe.
Minkang ma ahɔfɔn Bochob
(Mat 5:13; Mak 9:50)
34“Minkang anɔbɔnɔb, ka ebu bochob obu bɔhɔbe, alemag lan ka alem mɔ ahɔkɛmi minkang? 35Ahɔnɔb wa nsisi yi kpe wa mbeng esamasa. Akwadag mɔ wai.
“Kpewun wu akwe baroi ma awogag nungi we awog!”
Currently Selected:
Luk 14: NBB
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
