Luk 13

Cha Bobe Ɔgwa efefa Ɔkwɔg

1Wa nten ayua ebe bane ba ale afa asidi Jisɔs abangang bane ba arun Galili, ba Palet aken ɔsa arɔ awoi bɔ yi bɔ ali singag besingi ake Ɔsɔwɔ wa nju yu Ɔsɔwɔ ka awoi bɔ. 2Jisɔs abɔri bɔ arɔ, “Nyɔ ɔkering ɔrɔ bane ba Galili bafa ba awon ala wa nju yu Ɔsɔwɔ bɔ abebing aking bane bawag feb ba arun afa Galili a? 3Me nsidi nyɔ ndɔ, alafa asid! Ka tata nyɔ ɔjɔdi nyɔ ɔgɔ bobe olem ka ebu ala chang nyɔ erɔng feb ting nyɔ ɔkwɔ ala nkeri bɔ akwɔn. 4Lale ba eko yi bara ba enyɔng wa Silom echɔn ewoi bɔ, nyɔ ɔkering ɔrɔ bɔ abebing aking feb bane bawag ba ali kɛmag wa Jerusalim a? 5Me nsidi nyɔ, alafa asid! Ka tata nyɔ ɔjɔdi nyɔ ɔgɔ bobe olem ebu alafa chang nyɔ feb ting nyɔ ɔkwɔ ala nkeri bɔ akwɔn.”

Bokobi Abangang Erere yi Fig yi Chang Ewomag Bemei

6Nyining Jisɔs asidi bɔ bokobi bufa arɔ, “Minine wud afen erere yi fig wa ekwɔ eyi yi grep. Ka epo yid aloag arɔ we aka beng ebu ewomɔwom bemei, ka we arɔn emei kpeyid. 7Ka we atɔ mine wu ali mmɔnag ekwɔ ayin arɔ, ‘Ele nya isia fafa, yi me nlibag kpeicha eya mbag mbengang ka emei elele wa erere yi fig yifa, ka me nrɔn kpeyid. Gbeg yi rob nsi. Ye ka elag afa efoag nsisi?’

8“Ka mi mmɔnag ekwɔ ayin abɔri we arɔ, ‘Nsinju, cha yi tata eyankwɔ, me nting nsɛm mfari esin ayin nlang yi beliang. 9Ka ebu ewoming nsɛm eya, enɔb! Ka ebu ekan woming ka we ɔgbeg yi nyining orob nsi.’ ”

Jisɔs Agban Minkani wu ale mbɛni wa Epo yi Ewealɔ

10Epo yid yi Ewealɔ Jisɔs ali kwɔrag wa nju efugi yu bane ba Ju. 11We arɔ minkani wud wu ale afa wu ebe nyɔganyɔ emarɔ gweri we wa nya eko yi isia. We agɛmi achang amanag alami kɔng. 12Yi Jisɔs arɔn minkani wufa, we ayen we arɔ abag boso, atɔ we arɔ, “Minkani, ɔfri wa ekɔn eya.” 13Nyining we achori we babɔ, ka ebuyid we anyabi lɔ kɔng akag Ɔsɔwɔ.

14Ka mine eri wu nju efugi yu bane ba Ju nted asang we yi Jisɔs agbaning mine wa epo yi Ewealɔ. We asidi bane arɔ, “Ndu esabisia ele wa efɛn yi sɔ elemag erom, ka bag agban we wa bepo abia, ka chang wa epo yi Ewealɔ.”

15Minfɔni abɔri we arɔ, “Nyɔ bane ba baso afai! Chang nyɔ ɔwadag mpɔng lale ngwɔnkang oyuna wa ekpen yi nyɔ osiding wa Epo yi Ewealɔ nyɔ ɔkun yu nyɔ ɔkake yu mmai ayɔ a? 16Nyining mmɔn anyɔng mmɔn minkani wu Ebraham, wu Setan amarɔ bob we anungi nsi wa nya eko yi isia. Ka enɔbing awadi we wa Epo yi Ewealɔ a?”

17Ebɔri yi Jisɔs elang ba chang akamag yi we enyi, ka bantad boted bochob bɔ wa feb nggom bi ɔkwɔg beke bi we alem.

Bokobi bu mmuni Mɔsad

(Mat 13:31-32; Mak 4:30-32)

18Nyining Jisɔs abeb bɔ arɔ, “Bɔlen bu Ɔsɔwɔ bole ala ye? Yi ye me nkunag nkan yi bu? 19Bole ala mmuni mɔsad,#13:19 Mmuni mɔsad ale ala mmuni ndugi yu mine akuning afei wa ekwɔ eyi. Akoi ale esin erere ka bɔnɔnɔn bu esɔ bɔtɛb boju wa bɔrab obu.”

Bokobi bu Yis

(Mat 13:33)

20Ka we ahɔ beb bɔ arɔ, “Yi ye me nkunag nkan yi Bɔlen bu Ɔsɔwɔ? 21Bole ala yis yu minkani akuning abudi yi mgbangbang babɔ oso isia yu mbukpa yu akɔging ɔkɔg#13:21 Mbukpa yu akɔg ala ɔkɔg akunag yu alem bred. abudi yu gɔgigɔgi nkeri alemag bekpug ebi benud.”

Minyɔfu wu ole Mabang

(Mat 7:13-14,21-23)

22Nyining Jisɔs aloag yu Jerusalim, we aking wa bɔmpam bu ɔtɔ yi bu fefe akɔag bɔ. 23Minewud abeb we arɔ, “Minfɔni, etɛb arɔ bane ba asemag ba aho ti a?”

Jisɔs abɔri arɔ, 24“Nɔg ɔbɔ okoi nkeri ɔkingag wa minyɔfu wu ole mabang ɔwei eteng, waoye jugijugi bane ting anɔg nkeri bɔ aweag eteng ka bɔ ahɔman awei. 25Minfɔni nju ting alo belag afen minyɔfu, nyɔ ɔnɔngɔ cha belag efi nyɔ ɔkwudag minyɔfu nyɔ ɔledag nyɔ ɔrɔ, ‘Nsinju, rɛbi sɔ minyɔfu.’

“Ka we ting abɔri nyɔ arɔ, ‘Me nji nyɔ yi ebad yi nyɔ orun ɔbag.’

26“Nyining nyɔ ting ɔbɔri ɔrɔ, ‘Sɔ elin eyɔ yi we erɔng we ɔkɔi wa mpam oyuda.’

27“Ka we ting abɔri nyɔ arɔ, ‘Me nji nyɔ yi ebad yi nyɔ orun nyɔ ɔbag. Cha anyɔng me, nyɔ feb balemag ba bobe!’

28“Afa mbei yi mmɛng ma nliang ting akɛmi ebu nyɔ ɔlarɔ Ebraham, Aisik, Jekɔb yi feb barɔag ba eyammɛd yi Ɔsɔwɔ wa Bɔlen bu Ɔsɔwɔ, ka nyɔ bafɔni arobag nyɔ efi. 29Bane anɔngɔ oru ebad yi nsoi atɛbag yi ebad yi nsoi alɛmag, esɔ yi eboi aba kɛmi bekpen ebibɔ wa efɔg yi Bɔlen bu Ɔsɔwɔ. 30Wa ekonekon bɔ bane ba aben ala nsɛm fafa bɔ ting akɛmi bara ba nnen, ka bɔ ba arannen ala fafa ting akɛmi ba berag ba nsɛm.”

Enun yi Jisɔs Akwe yi Jerusalim

(Mat 23:37-39)

31Wa nten ayua ebe bane ba Farisi aban aba tɔ Jisɔs arɔ, “Cha ekpen yifa chog ebad yintad da Erɔd akeag arɔ we awoi we.”

32Ka Jisɔs abɔri bɔ arɔ, “Chog anyɔng nyɔ ɔkasidi anyɔng ɔgbɔnkang awua arɔ, ‘Me ting nkɛmi nkebag bebe bi bɔnyɔganyɔ betɛb beke bi bane yi egbanang bane elei yi nkwɔsi, ka ɔyɔgɔ ndu isia me ting mman erom ema.’ 33Kpelan, wa elei yi nkwɔsi yi ndu efai me nle nnen nchag yu Jerusalim, waoye ekpen yintad chang yi minrɔag eyammɛd yi Ɔsɔwɔ akwɔg yi ekinging Jerusalim!

34“Jerusalim, Jerusalim! Nyɔ ba woag barɔag ba eyammɛd yi Ɔsɔwɔ erɔng nyɔ orob bakamag ba befong bi Ɔsɔwɔ ba we afonging ake nyɔ bara. Ka nken efeg yu me mmarɔ nɔg ndɔ nfugi bane abina feb ekpen yid ala nkeri minkai nkɔg afugag mbɔn abi wa bepabi ebi, ka nyɔ ɔkaming me! 35Ka mɔn anyɔng, nju oyuna yu nsɔm achɔ ekpaga. Me nsidi nyɔ ndɔ, Nyɔ ɔkɔngɔ ɔrɔ me tata nten asi yu nyɔ ɔtɔrag nyɔ ɔrɔ, ‘Erienɔ yi Ɔsɔwɔ ele yi we wu aba wa mpi yu Minfɔni.’ ”

Currently Selected:

Luk 13: NBB

Highlight

Copy