Luk 16
16
Bokobi bu mimag nyum mingban wu ale eri
1Jisɔs asidi ba anyedag we bokobi bufa arɔ, “Efɔning efangane wu asiding we abangang mingban owu wu ali mmɔnag nggom ebi nkeri ali bebag nggom abin. 2Ka we ayen we aba abeb we arɔ, ‘Ye la yi me nli wogag abangang we? Lem me mmai nkeri oli kɔrag nggom egama feb bi bele babɔ agwa, wantagi we ɔkɔngɔ ɔkɛmi mimmɔnag nggom egama.’
3“Nyining mingban awun atɔ lɔ arɔ, ‘Me nlemag lan fafa? Nsinju ema anɔngɔ lɔb me wa erom. Me nkwei ɔsa wu nlemag erom ekwɔ erɔng nsɔn ahɔkam me nledi beledi. 4Me mmai yi me ting nlem nkeri, nten ala lɔb me wa erom, bane ting arami me wa boju obubɔ.’
5“Ka we ayen feb ba akwe nsinju eyi barɛm. We abeb mindanen mine arɔ, ‘Bakpoga afeg we ɔkwei nsinju ema barem?’
6“We abɔri we arɔ, ‘Bɔkpang bu bakwu ma olif erɛm barɔn.’
“Mine eri awun atɔ we arɔ, ‘Kun eri botiti bu nyɔ ɔkaming, kɛmiɔkɛmi ɔjɔdi ɔseng erɛm befai nsɛm ɔfɔ.’
7“Nyining we abeb mibɔgabɔga mine arɔ, ‘Ka we a, barɛm anwa ale ye?’
“Ka we abɔri we arɔ, ‘Bekpa bi wit#16:7 Wit ale ala mbukpa egɔd berɔn.’
“Mine eri atɔ we arɔ, ‘Da beri bi botiti egwa, jɔdi ɔseng begɔd bene.’
8“Wantag yufa nsinju wu mingban wu bewag wufa akag we wa ɔmanyum owu, wantag yu bane ba nggon yufa aji miwag pɔp wa ekɔrang bachɔd amibɔ aking bane ba ale ake ewereng. 9Me nsidi nyɔ, kun efang eya yi nggon olem berong oke lɔ, eru afa ebu nggom bi nggon bela king bɔ ting arami we wa nju yu ɔkɛmag yibanya.
10“Kpewun wu amaning akɔri nkekedi nggom we ting aman akɔri bi etinɔti. Ka wu akamaning akɔri nkekedi nggom kpe bi etinɔti we ahɔman akɔri. 11Ka ebu we ɔkamaning ɔkɔri efang yi nggon, nene anungag nted akam ake we efang yi ekonekon? 12Ka ebu we ɔkamaning ɔmɔn nggom bi mine wuntad gɔgigɔgi, nene akerag we nggom bi bele egwa?
13“Mingban chang wu amanag atug nsinju befai wa nten yud, ekinging we ajingang wud, wud anun we, erɔng we atugag wud achai wu wag. We ɔhɔman atug Ɔsɔwɔ otug bakpoga nten yud.”
Jisɔs ake lesigi abangang Farisi
(Mat 11:12-13; 5:31-32; Mak 10:11-12)
14Ka yi bɔ ba Farisi awoging bifa feb, bɔ alang Jisɔs bakig wantag yu akwe ennun yi bakpoga. 15Ka Jisɔs atɔ bɔ arɔ, “Nyɔ ole bane ba nyɔ ɔtɔgaglɔ ala bane ba nnɔ wa mmɛd ma bane bantad, ka Ɔsɔwɔ aji boted obuna. Yi nyɔ bane ɔkuning ala etɛmi nyum ele echaba nyum wa boso bu Ɔsɔwɔ.
16“Eben yi Mosis yi yi barɔag ba eyammɛd yi Ɔsɔwɔ asenging wa bi beli babag bɔ ta nten yu Jɔn mipogag mmai. Ka to nten ayua, akwɔri Etingi Nsidi abangang Bɔlen bu Ɔsɔwɔ, ka kpeicha mine anɔgag arɔ we awei wa obu. 17Ka ele ewɔra esɔ yi nsisi elɛm eking ninsed nyum wa eben yi Ɔsɔwɔ elem ɔsa owu.
18“Kpeicha minine wu ebai emaning yi minkai owu asɔd minkani wuntad aboi efem erɔng minine wu asɔdag minkani awua wu ebai eman yi minum owu we aboi efem.
Bokobi bu Efangane yi Laserus
19“Efɔning efangane wud wu asɔbag lɔ yi nfɔ yi ekon efɛn we ayag nchɔg beliang akwenag ekwen yi betim bi bane kpɔkpɔk epo. 20Amang ɔkari mine wud wu aledag beledi kpe icha epo anungag we wa minyɔfu ɔkɔ wu efangane. Mpi mine awua akamag arɔ Laserus. Beke ebi feb bele yi befo. 21Laserus achorag mmɛd we ali ndug yi beliang yi eruag esɔ okpokoro wu beliang wu efangane bechɔ wa nsi. Kpe bɔgwɔ bɔbag boninang befo ebi.
22“Minkpak wufa akwɔ ka bakamag ba befong bi Ɔsɔwɔ akari we akanungi nkpɔgi yu Ebraham. Efangane erɔng akwɔ aken. 23Ka wa mpam yu bakoko ekpen yi we ale wa baseni, we atam mmɛd amɔn esɔ arɔ Ebraham eken era yi Laserus nkpɔgi oyu. 24Ka efangane abeg arɔ, ‘Nsi Ebraham! Nungi me nkɔ we nsɔn, fong Laserus abedi eri benini wa mmai aba kuni elebi ema, wantagi me nlɛ wa etɛm bɔsang wa minkod wufa!’
25“Ka Ebraham abɔri we arɔ, ‘Mmɔn ama, tedi ɔrɔ wa ekwen eya we ɔraming betingi bi nggom, ka Laserus araming bebe bi nggom, ka fafa we ale ekwen ka we ole wa baseni. 26Ka yifa bibi asid, ka etengante eyida yi we etɛm ɔdimgborong okeni sɔ. Eruafa bɔ ba akeng angwani fa achag awa ahɔman, erɔng baba ale nsɛm ayua ahɔman angwani aba nsɛm oyuda.’
27“Ka efangane abɔri arɔ, ‘Me nledi we, nsi Ebraham, fong Laserus achag nju nsi ema, 28wantagi nkwei mbɔn banyen ba banine barɔn. Nungi we achag aka ke bɔ lesigi eru afa bɔ erɔng akan ba ekpen yifa yi baseni.’
29“Ka Ebraham abɔri we arɔ, ‘Mbɔn ba nyen agwa akwe Mosis yi barɔag ba eyammɛd yi Ɔsɔwɔ, nungi mbɔn ba nyen agwa awog ekɔang eyibɔ.’
30“Nyining Efangane abɔri we arɔ, ‘Nsi Ebraham! Alafa asid, ayia yiyi ekɔning. Ebu mine ala nyimi wa eko aka sidi bɔ, bɔ ting akam agɔ bobe bu olemang.’
31“Ka Ebraham atɔ we arɔ, ‘Ebu mbɔn banyen agwa akan woging beben bi Mosis yi barɔag ba eyammɛd yi Ɔsɔwɔ, kpe mine anyiming fa wa eko aka nsidi bɔ, bɔ ahɔkam.’ ”
Currently Selected:
Luk 16: NBB
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
