Acts 13

Barnabas nia Saul tha tal eq takat aa

1Antioch mondoli na rangsamal tang etho tataltey tang angta: Ning Barnabas, Simeon bara Niger ta halta, Cyrene wang Lucius, Herod governor jamoq nijang wang hun chalotey Manaen etho Saul angta. 2Baluk o ning aa wokcham etho Teyhungwa shumnuk atho, Asang Tsija ning ma batta, “Nga Barnabas nia Saul tha bari jaksom rangma hal táng, eshi jaksom rangma ning ni shi phal chak inn.”

3Ning wokcham etho romtam chu eq etho ningni haan o jak shing eq takat ta.

Cyprus na

4Asang Tsija wang takat eq, Barnabas nia Saul Seleucia náng kata etho eshiwang ningni waqwan o qhung eq Cyprus náng kata. 5Ning ni Salamis náng thu atho, ningni aa Jehudi tang synagogue tang na Shkewa raaq phanchan kot ta. Etho John Mark aa ningni jaksom lot nong ta.

6Ning iri jung jaktung haq náng ka eq Paphos samhaq náng thuta, eshina ashey mantan miqwa Bar-Jesus ta miing aa piq jam tho tachong ta, piq sha Jehudi phan alik rangsamal angta. 7Piq eshi haq governor Sergius Paulus nokwa angta bara piq rapney asam atol miqwa angta. Governor aa Barnabas nia Saul tha ujakho náng halta chammatakoi piq aa Shkewa raaq tat ma nukta. 8Etharin mantan samtey Elymas, (Greek raaq na piq miing irimal angta) ning ma tachong ma kot moq, chammatakoi piq aa governor tha uhan wang táng ma nukta. 9Etho Saul aa, bara umiing Paul ta tho ang aa, Asang Tsija wang shey ta; piq aa achal eq eshi mantan ching náng siin eq batta. 10“Nang Thangwa miqwasa! Nang raa asing ralwa! Nang aa ba tinmong na rapney jashit tinthin hol u, etho Teyhungwa asing raaq raa nang aa hutdip ma tathin u! 11Teyhungwa nang tatsam pha nu; nang chomwey ma miikduk angnu etho rangwung sha khimu angnu. Etho Elymas miik tha amak wang tathuk chakta etho piq aa miq tha piq ni piq sha solma tat bi eq kata.”

12Esho governor aa iri tang raa khita, piq aa uhan sey ta; chammatakoi piq aa Teyhungwa raaq tat eq rapney patja ta.

Antioch nia Pisidia na

13Paul nia unokwa tang Paphos wang thalat eq Pamphylia Perga na thuta, eshina John Mark tha shingchak eq Jerusalem náng wey welta. 14Perga wang thalat eq ning Pisidia Antioch haq náng thuta, Sabbath saal na ning synagogue náng ka eq tong ta. 15Moses thong etho rangsamal tang aa likka phat jio, synagogue wang ajong tang aa raaq taholta: “Nokwa tang, miqtang tin tharong ma nim tin raaq atha ang ajo jin bat eq inn.” 16Paul tunshat eq, ujak tha tun ta, etho raaq ta: Israel tang etho Shkewa ma chotey Gentile tang tat inn!

17Egypt mung na tong aa rangham tho hun iri Israel miqtang Shkewa hiqtang tey awa tha talta etho miqtang ma ashey ajong phan ma hunta. Shkewa utarong wang ning tha Egypt wang solkat ta. 18Etho pang rokbali piq aa phang haq na ning thanan eq tatong ta. 19Canaan haq na piq aa sanat mung tathin eq eshi haq sho ning tha tatong ma kot ta. 20Eshi tang raa pang rokbali raa pang banga angta. Iri jio piq aa phung tey tang Samuel rangsamal rangham náng kot ta.

21Etho ning aa ashey lungwang chuta; etho Shkewa pang rokbali rangma Benjamin phan wang miq ashey Kish miqwasa Saul sha ning lungwang ma shingta. 22Iri jio, Shkewa hun David ning Lungwang angma hunta. Ira Shkewa aa batta: Jesse sa David “Itin nuk wang kap táng. Piq aa hun ithaji tinthin sha tahom na.” 23Ira Jesu, bara Shkewa Israel miqtang piq rangtum tahom ma takat tapha, piq David phi aa lí wang thu tapha. 24Piq ukat jakho John aa thaji Israel miqtang ma tin kaley eq junglam ma phanchan ta. 25John aa jaksom uthun sey angma ta tho piq aa miqtang ma batta, “Nga ri utang aa ta nim aa tathin inn? Nga piq tha ang mong. Etharin tat inn; iji na piq sha ka phana, etho nga piq jaaqhong ru qhang kot rol tho ang mong.”

26Israel pho notang, Abraham phi aa lí tang, etho í jamna Shkewa ma chotey Gentile phan, iri lunwan raaq raa hiqtang ching náng tathok tapha. 27Chammatakoi Jerusalem na tongtey miqtang etho ning jaktáng o shingtey aa piq tha sing moq angta etho piq raa thaluntey etho rangsamal tang raaq salwet Sabbath saal o phat aa bara ning aa sam moq. Ethirangma ning aa Jesu sha damnak eq rangsamal raaq tha tahom ta. 28Ning aa piq tikwat eq ma jashit khi moq angta, ning aa Pilate ma piq tatik chak ma pitta. 29Ning aa chamtan somlo ching tang tha jin somlot jio Asang likwit na piq tung aa raaq chamal thawit aa thimal piq tha bólq wang anim náng taqhat eq piq tha haqbung mong náng shing katta. 30Etharin Shkewa piq tha utik wang thalun ta. 31Etho saal daqhan nángduk piq jamoq Galilee wang Jerusalem náng arum aa kattey miqtang relna takhita. Ning thanga tho miqtang ma miikkhi kottey tang. 32Í aa nim ma tungtang aqhal batphi: Shkewa í tey aa wa ma rangtum ta sha, 33piq aa Jesu tha utik wang thalun eq ning susa tang hiqtang o tahom ta. Psalm likwit na irimal thawit aa,

Nang raa isa;

thaney aa nang raa tachang taphang.

34Piq sha haq mongna baluk o tho shal moq angma, Shkewa piq sha wey thajey ta. Shkewa irimal batta,

“Asang nia asing sunmaan tang bara David ma nga rangtum táng,

esha nga nim ma kot phanáng.”

35Adak Psalm likwit na irimal tho bat eq ta,

Nang aa, ba asang miq shi baluk otho haq mongna shal ma kot mu angnu.

36Chammatakoi David sha atharang tok tho Shkewa tinthin jaksom somlo eq tita, etho piq tey aa wa tang jamoq bung ta. Etho eshina piq hanphung shalti ta. 37Etharin bara Shkewa thalunta, piq tha tashal moq angta. 38Ethirangma Israel pho notang, nim aa iri sam inn, Jesu tungkang o ngarey tolchak tung aa raaq sha í aa nim ma phanchan phi. 39Moses thong aa nim Shkewa jakho na asing miq ta jin shing moq angta, etharin piq tungkang o ukamtey tang thaji sha asing miq ta shing aa. 40Ethirangma, rangsamal tang aa chamta batta sha nim ching náng nak cham ang aa ta rangtun eq tong inn:

41Miiksuk tey tang siin inn, nim rapney patja eq ti inn.

Chammatakoi nga nim rangham tang o somlo ang

bara utang eq nim ma bat phin jo tho,

nim aa han min ang nin!

42Paul etho Barnabas synagogue wang thalat kam tho, ning ni adak Sabbath saal tho wey thu eq iri tung aa raaq tatat ma miqtang aa tinthanin eq batta. 43Synagogue na raaq wan thun jio, daqhan Jehudi tang etho Gentile phan wang Jehudi phan kaley tey tang eq Paul nia Barnabas ji phanta. Ningni aa ning ma Shkewa ráng manchan o tong inn ta batta etho tinthajong ta.

44Saalji Sabbath saal tho samhaq wang miqtang Teyhungwa raaq tat ma thajoq ta. 45Daqhan miqtang tha siin eq Jehudi phan ma ngeljota; ning aa Paul raaq tang tha miiksuk ta etho piq tha tharakri ta. 46Etharin Paul nia Barnabas cho hunga batta: “Shkewa raaq sha nim ma jakho bat hun eq ching. Etharin nim aa chik tin etho nim aa hun nim pattup rollung kaptey miq ta tathin min ang tin, ethirangma í Gentile phan jamnáng kati. 47Teyhungwa batta,

‘Nga nang raa Gentile phan rangma wallit hun taphang,

irimal ang eq ba tungkang o mingkang thaji thalun na.’”

48Baluk o Gentile phan aa ira tatta, ning rapney sungrang ta etho Teyhungwa tasapsey ta, etho chamtan pattup rullung kap ma talta ning aa uhan eq ta.

49Ethi thaji haq tho Teyhungwa raaq pholchalta. 50Etharin Jehudi miqtang aa eshi ajong samhaq solwa tang etho tanglom asing miqnu tang tha dipkup ta. Etho Paul nia Barnabas tha tahikham eq eshiwang phanchak ta. 51Etharin Paul nia Barnabas aa ning rangtun eq tong ching ta bat rangma ningni jaa wang buk tha thamot eq Iconium náng kata. 52Etho ujiphantey miqtang tin na rapney sungrang etho Asang Tsija eq shey chey ta.

Currently Selected:

Acts 13: Mmmm

Highlight

Copy