Acts 14

Paul nia Barnabas Iconium na

1Iconium na tho irimal angta: Paul etho Barnabas Synagogue náng ka eq bat atho Jehudi phan etho Greek phan wang daqhan eq han ta. 2Etharin Jehudi phan wang hanmoq tey tang aa Gentile tang ma dipkup takha eq uhantey tang thamiiksuk ta. 3Ning ni eshina daklot tong ta, etho cho hunga Teyhungwa raaq batta, etho Shkewa ningni jamna atha ta sam ma tarong patja jaksom etho asam atol takhi kot ta. 4Samhaq wang chamtey miqtang tha Jehudi phan jamoq etho apostle tang jamoq taphal ta.

5Gentile nia Jehudi phan wang chamtey eq solwa tang jamoq kashey raaq kara eq apostle ani jamoq jashit somlo eq long eq pat ma wanta. 6Etho ning ni aa ira sam eq, eshiwang Lycaonia mung na Lystra etho Derbe samhaq tang etho arel wang samhaq tang náng jol chuwang ta. 7Eshina ningni aa tungtang qhal raaq phanchan ro eq ta.

Lystra nia Derbe na

8Lystra na ashey miqwa angta, piq ukhi wang hun jakung angta etho baluk o tho qhing moq angta. 9Piq tong eq Paul raaq tha tat chey ta. Baluk o Paul aa piq sing siin ta tho piq uqhal angma han aa ta sing ta, 10etho jajong aa ring eq batta, “Ba ja wang achal eq lang u!” Ethi miqwa tha lang eq qhingta. 11Paul aa chamlang somlo ta tha miqtang aa khi eq, ning Lycaonia raaq na wanta, “Rangwa tang miq mal ang eq hiqtang jamnáng thutapha!” 12Ning aa Barnabas tha Zeus, etho Paul tha Hermes ta miing shingta, chammatakoi Paul aa hun raaq wanta. 13Zeus rangnuk him tingwa, bari rangnuk him sha samhaq phey na angta, piq aa maanpong nia pilpung tang tha kalung kang na som kat ta, chammatakoi piq nia eshiwang miqtang apostle tang ma pinthong kotma nukta.

14Paul nia Barnabas aa eshiwang miqtang aa chamli somlo ma nuk ta tha tat atho ningni aa khat tha ching eq miqtang thim náng ka eq ringta, 15“Nim aa irimal cham ma somlo inn? Í ni tho nim mal miq. Nim jaksom qhaq moq tang wang, mungtan nia mingkang, jungshi, etho iri tang na tongtey tang thaji huntey atharang Shkewa jamnáng katma í ni aa tungtang qhal phanchan chey i. 16Jakho o phan ajat tang tha ning mongtham wang taqhing ta. 17Etharin Shkewa salwet aqhal jaksom somlo eq piq atha ta takhi ta; piq nim ma mungtan wang ráng tachey aa, etho khakla rangham o tung aa cham kot aa. Etho piq aa nim ma taphaksat ma kot aa etho nim tinmong na sungrang kot aa.” 18Irimal bat jio tho apostle ni aa miqtang ma pinthong kot sha jin táng moq angta.

19Antioch nia Iconium wang Jehudi tang chamtey thu eq miqtang tha polrik ta. Ning aa Paul tha long wang pat ta etho piq utik sey angta ta tathin eq piq tha samhaq wang hum eq hang náng shingchak katta. 20Etharin uhantey miqtang piq relna thajoq eq tatim jio, piq shat eq samhaq náng nop ta. Saal dak na piq etho Barnabas jamoq Derbe náng kata.

Antioch Syria náng wey wel aa

21Paul nia Barnabas tungtang qhal raaq bat eq Derbe haqna rapney uhantey miqtang chalo ta. Etho ningni Lystra, Iconium etho Pisidia mung Antioch náng wey wel ta. 22Ningni aa uhantey tang tha kam na tharong ta etho kam na tong ro hun angma batta, “Hiqtang rapney tsamnang sha lit eq Shkewa rangmungtan náng thok ching.” 23Ning ni aa thaji mondoli na miqlang tang tha tal ta etho wokcham nia romtam jamoq, ning sha Teyhungwa jaknáng kotchak ta, ning aa eshi Teyhungwa sha han ta.

24Pisidia mung lit eq ningni Pamphylia haq náng thuta. 25Ning aa Shkewa raaq Perga na tatat eq ningni Attalia náng kata. 26Etho eshiwang ningni Antioch náng waqwan o wey wel ta. Antioch na ningni ma Shkewa ráng manchan wang somlot ma takat ta, bara ningni aa tahom ta.

27Baluk o ningni Antioch náng thuta, mondoli miqtang tha thajoq eq, Shkewa ningni jamoq ang eq thaji jaksom somta etho Gentile phan tang uhan eq ma kalung lak kot ta ta batta. 28Etho ningni jiphantey jamoq daklot tong ta.

Currently Selected:

Acts 14: Mmmm

Highlight

Copy