Acts 12
12
Ahan tahikham
1Eshi rangham tho Herod lungwang aa mondoli wang chamtey miqtang tha tahikham ta. 2Piq aa John no James tha jantong wang tatik chakta. 3Jehudi tang irima sungrang ang aa tha piq aa khita tho piq aa Peter tha tho lota. Ethi saal tha wung moq phan banlo kut aa kan angta. 4Herod aa piq tha lo eq chuk náng sakta, etho bali ralkoltey bali waan shingta. Herod aa Peter ma Ulit kut aa kan jio miqtang relna solkat ma tathin ta. 5Eshirangma Peter tha chukna shingta, etharin mondoli miqtang aa piq ma Shkewa ching wang romtam chuta.
Peter chuk wang lat aa
6Herod aa piq tha inap miqtang thim o solkat eshi rangpal tho Peter ubantey ani jaktung na ujip ang chey ta. Piq tha ani janru eq qhakta, etho ubantey kalung kang na langta. 7Photla Teyhungwa ashey rangkamwa eshina langta etho chuk mong na ulit phang ta. Rangkamwa aa Peter tha sukkang tho thamot eq tasil wang tathing ta etho kalo shat u ta batta. Takshey lam o hun janru tha Peter jak wang taqhang eq tachon ta. 8Etho rangkamwa aa batta, “Khing kit ni tachak u etho jaakhong ni qhong u.” Peter aa eshimal hun somta, etho rangkamwa aa Peter ma batta, “Khatnup ri sam u etho ijio kaphu.” 9Peter chuk wang thalat eq piq jio kata; etharin rangkamwa bara somta tha asing ta Peter aa sam moq angta. Piq aa máng khi angta tathin ta. 10Ning ni aa jakho ubantey waan tha lit eq adak waan tha tho janta etho jankalung náng thuta bari kalung raa samhaq náng thuta. Eshi jankalung tha piq ni piq thalak ta, etho ningni tha ran náng thalat ta. Ningni lam na kachey atho tasam hunga ethi rangkamwa aa Peter tha shingchak ta.
11Etho Peter aa chamli angta tha samta, etho batta, “Thanga asing ta nga usam eq ang! Teyhungwa urangkamwa tha takat eq Herod jakwang nga thalun ta etho Jehudi tang tungmang tha tathun chakta.”
12Thanga chamli ang atha ira sam eq, piq Mary him náng kata, bara John Mark nu angta, daqhan miqtang eshina thajoq eq romtam chu chey ta. 13Peter aa kalung thara dokta etho Rhoda ta miqnu sanga kalung relnáng kata. 14Piq aa Peter raaq tha sing eq piq sungrang wang kalung tha lak hunga kalung himmong náng thong wang ta etho batta, Peter tha kalung kang na lang aa. 15Ning piq ma raaq aa, “Nang raa ajat.” Etharin piq aa ira asing hun ta batta. Ethirangma ning aa batta, “Ira piq rangkamwa!”
16Etharin Peter aa kalung tha dok ro hun eq ta. Ning aa kalung tha lakta tho piq tha khi eq rapney patja ta. 17Piq aa ujak thamot eq ning ma shu shu angma batta etho ethi jio ning ma Teyhungwa chamal eq nga chuk wang ináng sol kat taphang ta lak eq batta. Piq aa irimal tho bat eq ta, “James etho adak uhantey tang ma iri tang raa tho ubat eq inn.” Etho piq ethi wang thalat eq adak haq náng kata.
18Rangnap sey ang atho, ralkoltey tang waan tha tungnung ta, “Peter chamlang angta?” 19Herod aa piq tha bi eq kap moq angta. Req piq ralkoltey tang ma pit pita etho ning tha tatik chak ma raaqkhat kot ta.
Ethi jio, Herod aa Judea tha shing chak eq Caesarea na chomwey rangma tong kata.
Herod tik
20Herod Tyre nia Sidon miqtang ma rapney khata. Ethi rangma eshi miqtang tha Herod jamoq tachong ma thuta. Lungwang him siintan tey Blastus jamoq jakho wanta, ning Herod relnáng thu eq nungmay ang rangma batta. Chammatakoi ning mung na Herod mungwang phaksat kapta.
21Utal saal tho Herod aa piq lungwang khat sam eq lungwang tongching na tong ta etho miqtang ma raaq batta. 22Miqtang ring eq batta, “Ira miq raaq ang moq, etharin ira rangwa raaq!” 23Photla o Teyhungwa ashey rangkamwa piq tha watta, chammatakoi piq aa Shkewa tha rangka moq angta. Jongbal tang aa piq tha phakta etho piq tha tita.
24Etharin Shkewa raaq phochal ta etho chalo ta.
25Barnabas nia Saul aa ningni jaksom tha tathun eq Jerusalem náng welta, ningni jamoq John Mark tha tho sol eq ta.
Currently Selected:
Acts 12: Mmmm
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
