Luk 12

Yesus muluŋan yiŋ gek sayiy Farasi gok tipiraŋ yuŋ.

(Mat 10:26-27)

1Nal iŋgura, welalem guway sip epe abiyaŋa, iŋgura afu kafur yitotŋiŋ lem dip debaya yiŋ araŋya weŋweŋa tiyaŋa. Arya patuw sip go Yesus muluŋa nimi yiŋ nigu kuka sayiy, <<Di yis Farasi ragu nina neŋtotpira. Na toptobaŋa yiŋ dagu nina gigatem. 2Lem yiŋ mat omuŋ tusu ulal bituwta iŋgu emita yiŋ mawtara futtimitap. Iŋgura lem atŋinda iŋap. Tusu kuka atŋinda sasaŋ eti iŋgu mautara futtip. 3Iŋguniŋ kuka atŋinda aroma nawŋonda tuwta iŋgu go, lem yiŋ ata beŋ iŋap. Tusu di imami ya nawŋonda saksakay tu kuka tuwta iŋgu go, yiŋ ya buŋta gaŋyusu, welalem delayinpiŋ, giy.

Lem Takela nina niŋgi reri tipir

(Mat 10:28-31)

4<<Tusu dariyiy, Debana yiŋ, na nigu daridugusu, di lem abaŋnin niŋgi urŋiŋ emawti iŋgu reriya tipiraŋ go, tusu emita yiŋ giradiya yit bitipiraŋ yuŋ. 5Gu di lem gon reriy tip iŋgu go na mawtara daridugusu. Di Takela niŋgi reriy tipiraŋ. Takela iŋ muki geyiŋ, lem urŋiŋ emaŋ niŋgi amikŋiŋ ditda lele ragu. Na kuka payiŋ daridigatem, di Takela niŋgi reriy tipiraŋ. 6Di iŋawta lem yiŋ nuŋ bulubuli faif iŋgu tutoyara niŋgi yebawta. Iŋgura Takela iŋ nuŋ bulubuli iŋgu diya buway tiŋyu kiyaŋ melaŋ. Yuŋ. 7Tusu Takela iŋ taboŋ danda yepda atŋinda iŋgu weyboŋriy. Tusu iŋ patak sip iŋaduwti, iŋguniŋ di reri tipiraŋ go, diwi go nuŋ guway bulubuli iŋgu atŋinda kelyaŋ.

Niŋ Yesus nawŋonda etaŋ gigi nina reri tingin yuŋ.

(Mat 10:32-33; 12:32; 10:19-20)

8Yesus atebaw nigu giy, <<Na daridigatem, lem gon iŋ welalem dariyip, na Yesus kita etam gip go, Lem Urmiŋ iŋ yit Takela ragu ensel dariyip, lem iŋon iŋ soŋnim gip. 9Gu lem gon iŋ welalem dariyip, iŋ nawi iŋanuw kiyaŋ melaŋ gip go, na yit mautara Takela ragu engel deŋyanda dariyukuna, na lem iŋgu iŋaw kiyaŋna melaŋ.

10Lem go iŋ Lem Urmiŋ nina kuka buli tip go, Takela pasek iŋdagu sabirpiŋ. Gu lem gon iŋ Ur Aririyay tusu Muki nina kuka buli tip go, Takela pasek iŋdagu iŋgu sabirpiri yuŋ.

11Arya yiŋ duwadu lep, fomyeyiŋ Yuda ragu nawŋonda, tusu Gabman deŋyanda, tusu lem biŋaya geyiŋ sinyanda lep go, di buwada buwada tiŋ, niŋ le gorogoro esnin titinina gipirago? 12Nal iŋgura sip, Ur Aririyay tusu Muki iŋ sip keta weldiŋ kuka tip.>>

Lem ulal guway geyiŋ iŋ kabol burarawi bituwti, iŋgu ragu kuka luŋyaŋ

13Arya Lem diyap welalem iŋgu lapyanda kusu nigu Yesus daririy, <<Muŋa lem, niŋ ewnin emariy patuw. Iŋguniŋ ga kakana darita kinara, ulal niŋdagu atŋinda iŋgu siwtusu neragu go sanit,>> giy. 14Gu Yesusda nigu daririy, <<Gorogoro, na gonda sip alayniy na ononaŋ lem diragu futtukuna tusu ulal diragu atŋinda lapdarda siwtiti nina?>> 15Iŋguniŋ Yesus welalem daripyi kiyaŋa iŋgu dariyiy, <<Di patak sip neŋtot piryaŋ. Diyap miydiya, di ses guway wilwili nina buwada tuwkipir. Arya ga ses geragu guway sip tip, gu ga ses iŋgura gakera giŋ wasiŋ kipira yuŋ sip.>>

16Iŋguniŋ Yesus kuka luŋiyaŋ diyap nigu dariyiy, <<Arama diya lem sesnim guway iŋdagu, iŋgu go aŋyay guway keraŋ futtiy. 17Arya lem iŋgu nigu onyaŋriy, <Mat na gira sip gorukuna? Na ya guway yuŋ, aŋyay soŋna atŋinda ini ababi nina.> 18Iŋguniŋ iŋ nigu giy, <<Na nigu bitukuna, na aŋyay yeyiŋ soŋna atŋinda keka mitasu, atebaw ya beŋbeŋ bitukuna. Iŋgura wit tusu ses soŋna atŋinda wilu le ya gura abukuna. 19Iŋguniŋ, na nansip nina nigu gukuna, <Na ses namiy guway sip kiŋ le sesa guway sip legat, arya mat go na yaŋ niŋgi tusu kukuna. Na yaŋ niŋgi tusu aŋyay beŋbeŋ bitusu, buwana wasiŋiŋ kukuna.> 20Gu Takelara nigu daririy, <Ga lem bururaw sip. Mat sulap niŋgi ga emap. Iŋgura ses atŋinda patuw patiŋboŋra eti iŋgu gonda sip ep?>> 21Iŋgura Yesus nigu giy, <<Kabol inanaŋ, lem yiŋ ses soŋya guway abu eta iŋgu go yiŋ buŋta futtip. Tusu yiŋ Takela deyiŋinda go yiŋ bubul lem sip eta,>> giy.

Bubul tusu ononaŋ guway kaboli

(Mat 6:25-34)

22Iŋgura Yesus muluŋan yiŋ nigu dariyiy, <<Iŋguniŋ na daridigatem, di kiki soŋdaniŋ ononaŋ guway tipiraŋ go, tusu niŋ gira ninkina, ma niŋ tapyow giray kerankina gipiraŋ go. 23Yararaŋ kiki iŋgu, aŋyay dagu ulal yuŋ. Tusu abaŋnin iŋgu tapyow ulal kelyaŋ. 24Di alu ragu kabol iŋgu onaŋna. Yiŋ aŋyay seru kiyaŋya melaŋ tusu yiŋ aŋyay wilu le abu kiyaŋya melaŋ. Yiŋ ya yuŋ aŋyay wilu le kerkera nina, tusu yiŋ ya yuŋ wit wilu le kerkeranina. Go yiŋ Takelara aŋyay sayuwti. Gu diwi welalem go di nuŋ ulal iŋgu keliyaŋa. 25Tusu lem gon diragu diya iŋ kiki soŋni daŋ ini buŋta nina ononaŋ guway tuwkip, arya ga iŋata iŋgu nal iŋdagu atebaw segiŋ miy lep yaŋ? Iŋgu yit yuŋ sip. 26Arya di ulal bulubuli guninaŋ bitiŋiniŋ yuŋ tip go, arya di giran ulal dip nina buwada tuwti?

27Di plawa mira iŋgu patak neŋna, iŋ gorogoro futtuwti iŋgu. Yiŋ urata tow kiyaŋya melaŋ, tusu yiŋ tapyow bituw kiyaŋya melaŋ. Gu na daridigatem, indanis Taboŋ Solomon neri nimi wasiŋ wasiŋ kerawkiy, go plawa neri wasiŋ ini Solomon dagu neri iŋgu keluwti. 28Mat mutmut mira neriy belak belak eta ini iŋgu, sugatiŋgu niŋgi lemda kunasu amikŋiŋ ditda lep. Tusu mutmut mira neriy belak inanaŋ iŋgu Takela iŋ neruwti, gugu sip diyit Takela neridip. Iŋguniŋ di gon yiŋ buwada payiŋ diragu bulakayiŋ iŋgu go, Takela iŋ neridip. 29Iŋguniŋ di buwada bultiŋ, ononaŋ guway tusu, niŋ aŋyay tusu way giray ninkina, gipiraŋ go. 30Welalem atŋinda daŋ ini buŋta yiŋ Takela iŋaw kiyaŋya melaŋ iŋgu yiŋ buwaya bultuwti ulal guninaŋ ulula nina. Gu Ewta go iŋ patuw iŋawti, di ulal iŋgu nina buwada buwada tuwtiy. 31Iŋguniŋ di patak onaŋusu, Takela kerana Taboŋ diragu kipir. Iŋgutiŋgu di yit ulal iŋgu sadip.

Ulal guway ababiragu kabol

(Mat 6:19-21)

32Yesus atebaw nigu giy, <<Ewta iŋ patuw buway wasiŋri afu welalem soŋni yiŋ ulayiyi ragu iŋgu sadidi nina, iŋguniŋ di reri tipiraŋ go. Di sipsip daripi yuŋ tusu di mukida melaŋ. 33Di welalem yasona ulal diragu atŋinda yebapiraŋ, iŋgura gamudeyiŋ iŋgu owsu lem ulal yuŋ iŋgu sayipiraŋ. Di gamudeyiŋ indagu paus#12:33 paus Madi ino gat nem blong paus, so mipla bro tasol. bultuw kiyaŋ melaŋ iŋgu epiraŋ, tusu di ulal wasiŋ wasiŋ saba buŋta ragu abu kipiraŋ. Saba buŋta ulal eltuw kiyaŋ melaŋ, tusu ebi lem yit ebu kiyaŋya melaŋ, tusu binara yit giyaw kiyaŋ melaŋ. Yuŋ. 34Ulal diragu wasiŋ wasiŋ kuwti afu gura iŋgu go, buwada diragu yit gura kip.

Urata lem iŋ oli tusu kuwti

(Mat 24:42-44)

35Yesus atebaw gugu giy, <<Di yamel damiy kerana pet tiŋgutuŋgu, rawrawa bukdanda emusu, sul soŋda werasu oli tusu kipiraŋ. 36Di waŋaray tuw kipiraŋ, lem taboŋ yamiy waŋeru kuwta gugu, iŋ aŋyay beŋgoy welalem duŋ e e tiŋ bituwta iŋgu sowsu mulituw epnigusu. Iŋ epe yam keŋpiŋ go, yiŋ awru sip yam wekayinpiŋ. 37Lem beŋgoy epusu urata welalem soŋni yiŋ neŋyip wiyaŋya melaŋ, yiŋ waŋaraytuw kip, iŋgu go wasiŋ sip. Na payiŋ sip daridigatem, Lem Ewumboŋ atnisoŋ yamel aŋyay beŋbeŋ indagu iŋgu wekusu, urata lem dagu yamel iŋgu kerawsu, iŋgura iŋ daridiŋ le aŋyay afuy inda yaŋ tiyaŋ guniŋ. Iŋgura Lem beŋgoy iŋ sip epusu aŋyay sadip. 38Arya lem Ewumboŋ iŋ sulap sip epiŋ ma, karkeku kemŋiŋ keraw aŋaŋukiŋ, iŋ epusu urata welalem neŋyip wiyaŋya melaŋ, yiŋ waŋaraytuw kip go, urta welalem iŋgu yiŋ buwya wasiŋpir.

39Di iŋana. Ya ewi patuw iŋap, ebi lem nal girara sip epiŋ iŋgu, iŋgura iŋ ebi lem iŋgu soŋ epe ya iŋdagu wakorusu nawŋonda lepir yuŋ sip. 40Di yit olay muki tusu kipiraŋ. Nal diya lem Urmiŋ eppiŋ, di iŋaw epir yuŋ guw kiŋ, iŋ yu eppiŋ,>> giy.

Kuka luŋiyaŋ urta lem wasiŋ tusu bulin gis yiŋ dagu

(Mat 24:45-51)

41Arya Pitara miŋtiy, <<Ewumboŋ, ga kuka luŋyaŋ iŋgu niŋ nina niŋgi giyakara, ma welalem atŋinda nina?>> giy. 42-43Iŋgura Ewumboŋ nigu giy, <<Taboŋ giray iŋ ononaŋ wasiŋ utinda eti, tusu urata soŋni wasiŋ towti? Ewumboŋ iŋ lem guninaŋ alayuti patiti lem futtusu urata lem soŋni yiŋ ulayiyi ragu, tusu ya ulula ragu tusu aŋyay sayiyi ragu, Lem Ewumboŋ nal alayriy iŋgura. Lem Ewumboŋ mulutuw epusu urata lem iŋgu, urata tow kiŋ neŋyip go, urata lem iŋgu iŋ buwaya wasiŋpir. 44Na payiŋ sip daridigatem, Lem Ewumboŋ iŋ urata lem iŋ alaypiŋ iŋgu, iŋ ulalnim atŋinda ulaw kiyaŋ guniŋ. 45Gu urata lem iŋgu buwanira nigu gip, beŋgoy neragu awru eppir yuŋ. Iŋgura iŋ kemŋiŋ keraw urata lem tusu urata wela feŋayip, iŋgura iŋ aŋyay nuw way muki nusu bururaw tusu kip. 46Arya urata lem iŋgu oli tiyaŋa melaŋ kiŋ, arya taboŋ iŋdagu nal diyara eppiŋ. Iŋgura taboŋ urta lem iŋgu giyatotusu keraŋ le afu lem, Ewumboŋ iŋdagu kuka suŋu kiyaŋya melaŋ iŋgu isi kip.

47Urata lem iŋ, Taboŋ soŋni buway gorogoro iŋgu iŋ iŋawti, gu iŋ ulal patiŋyaŋ melaŋ tusu iŋ Taboŋ iŋgu buway suŋyaŋ melaŋ. Iŋguniŋ Taboŋ iŋgu urata lem ayik sip feŋap. 48Gu urata lem iŋ beŋgoy soŋni buway iŋaŋ melaŋ, iŋgura kabol bitiriy iŋgu iŋ tatu e e nina, iŋgu lem beŋgoy inda bulakayiŋ feŋap. Lem gon yiŋ lem diya siŋinda ulal iyaŋa iŋgu, yiŋ atebaw ulal guway ketpiŋ. Arya lem gon yiŋ urata beŋgoy ey tip go, lem iŋgu iŋ urata iŋgu egay guway keraŋ futtipir.>>

Yesus iŋ welalem keka yiyi nina epriy

(Mat 10:34-36)

49Arya Yesus nigu giy, <<Na dit kerawgusu epmiy, yaŋ buŋta dit amikugusu epmiy, na buwana go, dit iŋgu awru sip diyaŋ guniŋ. 50Gu iŋ gugu futiyaŋ melaŋ kiŋ niŋgi, na le abaŋna buŋta oma beŋbeŋ owsu tuŋgu. Iŋguniŋ na iŋgu waŋerusu buwana murweŋ totget sip. 51Diyap miy diya di buwada gip go, na buwa imimay daŋ buŋta ow epmiy gipiraŋ go. Yuŋ. Na daridigatem, na epmiy iŋgu na welalem wakoryugusu epmiy. 52Neniŋtiŋ mat tusu emita yit, lem faif asila diyap nawŋonda nina yiŋ ya diyap nawŋonda kip go, yiŋ kekaya tiŋ yeratiŋ tip. Arya arbutiŋ go yeratiŋ agerya tip. Arya yeratiŋ go arbutiŋ agerya tip. 53Tusu yiŋ kekaya tip, arya lem diya iŋ urnigis ager tip, tusu urmiŋ yit ewni gis ager tip. Tusu wela diya yit felani gis ager tip, tusu feliŋ yit mamni gis ager tip. Arya wela diya go iŋ urni weliŋ iŋis ager tip, tusu urmiŋ weliŋ yit lemni mamin gis ager tip,>> giy.

Lem yiŋ iŋaw kiyaŋya melaŋ gira eiŋiniŋ ulal iŋgu futtigat

(Mat 16:2-3)

54Yesus nigu welalem guway dariyiy, <<Di yaŋ neŋuta ata kusyuwti kita futtuw epuwti go, di awrusip niguta, <Way epugusu guwta. Go payiŋ peŋ sip way epuwti.> 55Tusu di der (saut) muki neŋuta epuwti go di niguwta, <Mat ata waŋyeyiŋ eppiŋ guwta.> Go payiŋ peŋ sip, ata waŋyeyiŋ epuwti. 56Gu di lem tobtobaŋa dadegay, di daŋ inim dagu ulal tusu saba buŋta ragu go di patak sip onaŋuta. Gu di giran kabol mat futtuwti iŋgu di onaŋiniŋ yuŋ?>>

57<<Di gira nina kabol pendeŋyeyiŋ iŋgu patak sip iŋawsu onaŋuw kiyaŋda melaŋ? 58Gu ga lem kukara gatogusu iŋgu isi ketara palaŋutuw lowkip ababu yeyiŋinda go, ga tonaŋu ketara kuka patiŋpira buwadar diyap keraŋ guniŋ. Diyap miy diya iŋ okgu le lem kuka onaŋuta siŋyanda leŋ niŋgi iŋ kanmuni lem atyanda gakera giŋ, yiŋda guwagu le oyara gakera gipiraŋ. 59Na payiŋ sip daridigatem, ga futtipira yuŋ, yiŋ gamudeyiŋ onaŋ ginyaŋa iŋgu oya yebaboŋusu tuŋgu, sow futtip,>> giy.

Currently Selected:

Luk 12: Madi

Highlight

Copy