Maka 13

Na Jegarana na Ruma Zelepade

(Matiu 24.1-2; Luke 21.5-6)

1Tonai sa korapa taloa votu pa kakabarena zelepade si Jisu, sa kame ira na ona sepele sa paranga, <<Tinoni vaivagigalai, Doro! Na beko patu babata jonga beto na vinaturu babata jonga!>> sau.

2Poni pira saunia i Jisu sisa, <<Qu batiria sira vinaturu lalavata pira? Kepore sosoto kai patu qai kole makele vavaitopare lani sa mina kole jola, goto doruna sa kode ira na tinoni mai qovara betoria,>> sau si Jisu.

Ira na Tapata beto na Paranga Vinabalau

(Matiu 24.3-14; Luke 21.7-19)

3Ego ko tonai sa korapa toqona pa kubo pa Olive ko sa bata lao vei pa karovona na zelepade si Jisu, sa qai mavo nanasa golomia ira Pita, i Jekopi, i Jone, beto i Aduru sisa, pira qarigunia, 4<<Mu ule vanigei! Pa visa sa mai gore votu aipira, beto na sa sa na vinagigila beto mai raja sira doru sakasava qu koni pojaria ao inara?>> qarigu.

5Poni sa paranga laoria i Jisu sira, <<Mu suvere vabalau, ko maike toni vapirugou ira na tinoni. 6Kubo sira na tinoni kode mai lame pa isongoqu ara ko mai paranga vei pira, <Ara sa isa,> marigu, ko mai toni vapiru paleria sira na soku tinoni. 7Tonai muna nongoroniria agou sira na vaipera beto na vavakatodi na vaipera, sa muke matagutu. Kode mai pidoko lame tugu sira na sakasava pira ba sa oqoro kamua sa na vinabetona. 8Kode kai puku tinoni mina turu talea kai goto puku tinoni, beto kai binangara mina turu talea kai goto binangara. Mina nunu soku eqa beto kode mina raja na songe. Na sakasava pira sa vei na popodalaina na vivitigi teku koburu.

9Ko agou mu doro kopunigou mekamiu. Ura kode mai teku valaogou pa vaikamu tadira qai vavaituti beto ko mai pipiqologou pa ruma vavaikamuna. Beto kode muna turu pa moedi ira na qavuna beto ko ira na babangara pa veveina na isongoqu ara, ko muna ule vaniria sa na veveina na nongoro jongana. 10Ko momoe na nongoro jongana sa mina tatarae mai tu tadira doru puku tinoni. 11Ko tonai mai toni laonigou pa ia vavaitutina sagou, sa munake takulangania na sa mene pojai kita mugu. Isa tugu na paranga muna taiania na totoso isa sa muna poja votunia. Ura nake agou sa muna paranga, goto na Gagala Tabuna tu. 12Na totoso isa ira kao tamatasi marene ba mai vaitoni valao pa mate, ira na tamadi ba mai veiniria tugu sira na tudia, beto ira na koburu sa mai raja vamamateria sira na tamadi na tinadi. 13Beto agou sa na veveiqu ara sa kode maike tavaraguanigou doru tinoni. Ba na tinoni mina vangaju kamua na vinabetona sa mina taalo,>> sau si Jisu.

Na Rane Ikeredi qai Korapa Lame

(Matiu 24.15-28; Luke 21.20-24)

14<<Ba tonai muna batia agou sa na beku tana tamasa seseke mina turu pa ia madina pa zelepade ketakoi sa tabunana mina lao (agou qu tiroa api sa mu vakoinonoa na ginuana sapi!), poni sa ira na tinoni qai suvere pa Jiudia sa tonai mai uku sagereria sira na okokoto kubo ketakoi. 15Isa na tinoni sa korapa suvere pa narena nona ruma sa mike mule gore qaqiriria na ona sakasava pa leona ona ruma. 16Na tinoni sa korapa pa inuma sa mike mule tekua na ona poko pa ona ruma. 17Na totoso takulangadi jola tadira na rereko qai bogata beto ira qai isongo melalu sira na rane ira! 18Mu vavara tetepa lao tana Tamasa, ko na sakasava aipira sa maike raja lame pa totoso sa lomoso vivitigi na eqa. 19Ura na tapata mai gosoria ira na tinoni na rane ira sa mina lavata jolaniria doru tapata qai jola, podalai vei tu totonai sa vapodakia na kasia abana na Tamasa ko sa kamua kopira ko pa liguna isa sa kepore mule sa kai sakasava veveina mina raja ligu. 20Vei bike kobu vapapakaria na Bangara sira na rane ira, poni sa kepore sa kai tinoni bi toa. Goto koko vei sa roquria isa sira na tinoni taviledi sa tei vileria tu isa, sa sa vapapakaria na Bangara sira na rane ira.

21Ko vei bi parangagou kai tinoni, <Doro! Api sa na Karisito!> babi <Doro! Ina sisa!> biu, sa babana vasosotoa sisa. 22Ura kode mai bobola kamu sira na karisito sesekedi beto na tinoni kokorotai sesekedi. Kode mai roiti votuniria sira na dia vinagigila beto na roiti vaivagabaradi, ko vei mai boka sa kode mai toni vapiruria tugu sira na tinoni taviledi tana Tamasa. 23Ko agou sa mu suvere vabalau! Qa tei poja vakolenigou tu ara sira doru sakasava aipira tonai qai oqoro tu gore votu,>> sau si Jisu.

Na Mule Lamena na Tuna na Tinoni

(Matiu 24.29-31; Luke 21.25-28)

24<<Ba pana rane ira totonai mina kamua na totoso tapata,

mina rodomo sa na tapo

beto na popu sa minake kabere;

25mai vukele sira na seru pa noka

beto ira na neqi pa noka mai tajou vakanoko.#Aisea 13.10; 34.4.

26Beto mai batia ira sa na Tuna na Tinoni mina lame vei pa lei tavitia na neqi beto na kabere lavata. 27Ego beto sa kode mina garunu laoniria isa pa made uquna na kasia gusu sira na mateana ko mina vaikamuniria sira nona tinoni taviledi, podalai pa kai uquna na kasia gusu ko mai lao vaokotia pa vinabetona,>> sau si Jisu.

Na Vinakaberena na Gou Piqi

(Matiu 24.32-35; Luke 21.29-33)

28<<Mu teku vinakabere pa gou piqi. Tonai mina takelai sa na equruna beto mai podalai ijoko ligu sa na boko kaena, poni sa qu gigilai agou sa sa tata lame sa na totoso mangini. 29Ko agou ba vei tugu. Tonai muna batiria mai gore votu sira na sakasava qa pojanigou ara, sa mu gigilai sa tata vivitigi gu pa atakamana sisa. 30Ma poja sosotonigou ara sagou: tonai mai oqoro maragutu ira na sasae tinoni kopira sa kode mai gore votu sa na sakasava pira. 31Na oka beto na peso sa mai maragutu, ba na paranga taqu sa maike isongo maragutu podeke,>> sau si Jisu.

Na Rane beto na Totoso qaike Tagigila

(Matiu 24.36-44)

32<<Goto na veveina na rane babi na totoso isa sa kepore kai tinoni sa gigilai. Ira na mateana ba qaike gigilai, na Tuna ba sake gigilai tugu. Mekana gu na Tamana sa gigilai. 33Mu suvere vabalau beto mu suvere kopu, ura quke gigilai agou sa na totoso. 34Kai muqisi podeke vei gu kai tinoni sa riu lelekogona pa kai gusu souna. Tonai sa oqoro taloa riu poni sa sa okoto ianiria na roiti sira na ona nabulu ko mai okoto roiti sau. Beto sa poja vakolenia tugu sa na tinoni sa kopu pa atakamana ko mina suvere gegelenia sa na mule lamena saunia. 35Ko sa vei sa agou ba mu suvere gegele, ura quke gigilai agou sa na totoso mina mule lame na bangarana na ruma. Sake tagigila sa bi lame na vevelu sa, na korapa bongi sa, na piranga kokorako sa, babi na vuvugei jonga. 36Kita mi lame kamu vasiboro, poni mi batigou mu korapa puta mumagamiu agou. 37Ko isa tugu qa korapa poja veinigou agou pira, sa qa poja veiniria tugu sira doru: mu suvere gegele,>> sau si Jisu.

Currently Selected:

Maka 13: LGA

Highlight

Copy