Maka 12

Na Vavakato Vavapadadi ira na Tinoni Roiti pa Inuma Qurepi

(Matiu 21.33-46; Luke 20.9-19)

1Ego sa podalai vavakato pa vavakato vavapada tadira si Jisu, pira sau, <<Koleona sa kai tinoni sa roitinia kai inuma qurepi beto sa bara vailivutainia. Sa ruri kori vaoqili valolua isa sa kai patu ketakoi mina tamuja teku sa na kolona na qurepi, beto sa vaturua isa sa kai ruma gegelena ketakoi mina takopu sa na inuma qurepi. Beto sa loa valao vaniria ira kaki tinoni roiti ko qai roiti sa pa inuma isa ko qai kopunia, beto sa taloa riu pa kai gugusu souna sisa. 2Ego totonai sa kamua sa na totoso lolokete poni sa sa garunu vamulea na tinoni poreona inuma api sa kai ona pinausu ko mi lao tadira na tinoni kopu ko mi teku vania sa na iana tonai mai lolokete sau. 3Ba qai lao tu ira na tinoni kopu ketakoi ko qai aru tamania sa na pinausu isa ko qai maja vivitigi pale beto qai iju vamule gagale palea. 4Poni sa garunu laonia mule na tinoni poreona inuma api sa kai goto pinausu. Ba qai lao mutugu ira na tinoni kopu ko qai maja vapapalekai sa na batuna beto qai vakea vivikere pale. 5Ba sa kai garunu laonia mutugu sa kai goto pinausu mule, ba tonai sa qai vamate sosotoa sisa. Ko na motadi sira sa garunu laoniria, ba inara tugu qai veiniria, kaki qai piqoloria goto kaki qai vamateria.

6Ego kai memekana gu sa sa kole jola, isa tugu na tuna sa roroqu vivitigia. Ko liligu bebeto, sa sa garunu laonia isa tadira qai kopu inuma sa na tuna api ura pira sa roroqu vei sisa, <Na tuqu sosoto gu ara sapi, ko kode isa mai pangagania,> sau sisa.

7Ba totonai sa ira na tinoni kopu inuma sa pira qai vaiparanga vei, <Isa kode mina isongo vakarovoria na isisongo tana tamana sapi! Mei, lame! Aria ko ta vai vamate pale sisa, ko na isisongo tana tamana sa tana teku vakarovoria noda gita!> qarigu. 8Ko qai aru tamania ko qai vamate pale, beto qai gona votu pale pa peguruna na inuma sa na kokobu tinina isa.

9Ko inara sa vei poni sa na sa mina roitinia sa na bangara poreona inuma api? Kode pira gu mina roiti vei sisa: mina kamu sisa, ko mina vai vamate beto paleria sira na tinoni kopu inuma beto sa mina vakarovo lao vaniria mule ira kaki goto tinoni kopu sa na ona inuma qurepi api. 10Ai vei qu oqoro tugu tiro vakakaberia agou sa isa sa tapoja pa Kukuti Tabuna? Pira sau sisa,

<Isa tugu na patu qai kilu pale

ira na tino vavaturu ruma,

isa tugu sa na kuta patu viviso.

11Na roiti tana Bangara sapi

ko sa vaivagabara jola

pa oda dodogoro!>#Kera Vinatarasae 118.22-23. sau>>,

sau si Jisu.

12Ko qai gigilai ira na boko iviva lalavata sa na vavakato vavapada api sa sa juturia gu ira qarigu, ko qai nyaqoni soana ko mai aru tamania qarigu. Ba qai matagutunia ira sa na minete tinoni ko qai loai si Jisu ko qai riudia gu.

Na Veveina na Tabara Takisi

(Matiu 22.15-22; Luke 20.20-26)

13Ego ira kaki Parese beto ira qai sosoria i Herodi sa qai tagarunu lao tai Jisu ko mai vagonai pa kaki paranga sisa qarigu. 14Ko qai lame tana sira ko pira qarigunia sisa, <<Tinoni vaivagigalai, qe gigilaimei agei sa qu sotomua gu sao, beto kepore sa kai tinoni qu matagutunia ao. Beto sa kepore veveina tamu sa na tuturuna tana tinoni, goto qu vaivagigalainia gu ao sa na soana sosotona tana Tamasa. Ai vei, na tavamalumuna tugu pana Vavanau sa mina tatabara lao tana bangara Siza sa na takisi, ba dai? Ko mene tabaria tugu agei sa na mei takisi, ba meneke pavu tabaria?>> qarigu sira.

15Ba sa tei bati poai tu i Jisu sa na dia seseke, ko pira sauniria, <<Ai sa vei ko qu korapa nyorogua vagonasiu ara sagou? Valamea kai poata siliva ko ma doria ko,>> sau sisa.

16Ko tonai qai pogoso laonia sa kame poni pira sauniria, <<I sei na isumatana beto na isongona sa pa poata api?>> sauniria.

Poni sa pira qarigunia sisa, <<Na bangara Siza,>>#12.16 Na Siza sa na bangara pa Romu. qarigu.

17Poni sa paranga si Jisu, <<Ego mu vania na Siza sisa tana Siza, beto mu vania na Tamasa sisa tana Tamasa,>> sauniria.

Ko qai gabara sira na tinoni.

Na Nanasana na Turumule pa Mate

(Matiu 22.23-33; Luke 20.27-40)

18Ego qai lame tai Jisu sira na Sadusisi, ira na tinoni qaike vasosotoa na turumule pa mate, ko qai nanasia, pira qarigu, 19<<Tinoni vaivagigalai, sa kuti vakole vanigita i Mosese gita sa vei mina mate loaia kai tinoni sa na maqotana ba bi kepore na tuna, sa mina alava beia na tasina marene sa na naboko api ko mina vapore vania na tuna vuana sa na tugana sa tei mate tu. 20Ko koledia sira ka vitu tamatasi marene. Na tugadi pa moa sa alavia sa kai rereko ba kepore na tuna vuana sa na marene isa beto sa sa mateona.#Vavanau 25.5. 21Ego ko sa teku alavia na tuti vinarua sa na naboko isa, ba kepore mutugu na tuna vuana beto sa mate mutugu sisa. Ko na tasidi marene vinaue ba sa vei mutugu. 22Ko ira ka vitu tamatasi doru sa qai alavia sa na rereko nanaboko isa, ba kepore beto tugu na tudia vuadi. Pa liguna qai mate beto ira ka vitu doru pira, beto sa mate sa na rereko nanaboko isa. 23Ego ko pa rane turumule tonai mai turu mule ira na tinoni sa kode i sei na maqotana sa na rereko api? Ura ira ka vitu doru qai alavia sisa,>> qarigu.

24Poni sa pira sauniria i Jisu sira, <<Qu sela sagou! Ura quke gigilai agou sa na Kukuti Tabuna beto na neqi tana Tamasa! 25Ura tonai mai turu mule pa mate sira qai tei matedi tu, sa kode maike vaialava lao lame sira na marene na rereko, goto kode mai suvere vei gu ira na mateana pa noka sira. 26Na veveidi ira qai turu mule pa mate sa qu oqoro tu tiro vakaberia agou pa buka sa kutia i Mosese? Pana ia ketakoi sa pojai na veveina na mumuqu toana sa vuvurungu, ketakoi sa paranga ti Mosese sa na Tamasa, pira sau, <Ara sa na Tamasa ti Ebarahami, na Tamasa ti Aisake, beto na Tamasa ti Jekopi,>#Votu 3.2-6. sau. 27Ko isa sa nake Tamasa tadira na tinoni matedi, goto tadira tu na tinoni toadi. Ko qu sela sagou!>> sau si Jisu.

Na Garunu Momoeniria Dorudi

(Matiu 22.34-40; Luke 10.25-28)

28Ego kai tinoni sa vavaivagigalainia na Vavanau sa lame ko sa nongororia tugu isa sira na sakasava qai vaiguania ira. Ko tonai sa dogoria isa sa sa oe vataleria i Jisu sira na Sadusisi, poni sa sa nanasia sisa, pira sau, <<Ai garunu sa sa momoe jolaniria ira doru?>> sau sisa.

29Poni sa oe lao si Jisu, pira saunia, <<Na garunu sa momoe sa api, <Vainongoro, agou na tinoni Izireli! Na Bangara na oda Tamasa, na Bangara sa kai memekana. 30Ko mu roroqunia na Bangara na mua Tamasa na doruna bulomu, na doruna mua toa, na doruna roqumu, beto na doruna mua neqi,> #Vavanau 6.5. sau. 31Na vinarua garunu sa api, <Mu roroqua na goto tavitimu vei qu roroqu veinigo mekamu,>#Iama 19.18. sau. Kepore sa kai garunu sa poreveveina jolaniria karu garunu pira,>> sau si Jisu.

32Tonai sa paranga lao tai Jisu sa na tinoni sa vavaivagigalainia na Vavanau isa, pira sau, <<Vavagua, tinoni vaivagigalai! Qu sotomua gu sa isa vei qu pojai kai memekana gu sa na Tamasa, ko kepore sa kame sa varuai isa.#Vavanau 6.4; 4.35. 33Beto ko na tinoni sa mina roroqunia na Tamasa na doruna bulona, na doruna nona gigalai, beto na doruna na ona neqi, beto mina roqua na goto tavitina vei sa roroqu veinia mekana. Mina tutiria na tinoni sa karu garunu pira, sa sa jongana jolania mina valaoa na ona vaivana beto na ona vavakukuvu tana Tamasa,>>#Vavanau 6.5. sau sa na tinoni api.

34Ko tonai sa nongoria i Jisu na tuvisina sa na oe tana tinoni api poni sa pira saunia, <<Ao sa quke sou pa binangara tana Tamasa,>> saunia. Ko totonai ko mi lao sa qai pangaga nanasia mule ira sisa.

Na Nanasana na Veveina na Karisito

(Matiu 22.41-46; Luke 20.41-44)

35Ego totonai sa kole vaivagigalai pa kakabarena na zelepade si Jisu sa pira sa paranga vei, <<Ai sa vei ko qai vavaivagigalainia tu ira qai vaivagigalainia na Vavanau sa na Karisito sa na tuna i Devita qarigu? 36I Devita mekana sa tonia na Gagala Tabuna sa pira tu sa paranga vei,

<Sa paranga sa na Tamasa tana qua Bangara:

Mu toqo lani pa kale matuaqu,

ko koi vei tu mana tete vakilasaria ara

sira na mua kana, sau,>#Kera Vinatarasae 110.1; Roiti 2.34-35; 1 Koriniti 15.25; Giburu 1.13. sau si Devita.

37Mekana i Devita sa gigalania na <Bangara> tu sisa, ko ai sa vei mina boka tuna tu i Devita sa na Karisito sa sa vei?>> sau si Jisu.

Ko qai qerania ira na tinoni si Jisu tonai qai kole vainongoro.

Na Vabalaudi ira qai Vaivagigalainia na Vavanau

(Matiu 23.1-36; Luke 20.45-47)

38Ko pa ona vaivagigalai sa pira sa paranga vei si Jisu, <<Mu balauniria sira qai vaivagigalainia na Vavanau, qai nyorogua popoko vakakasa beto qai lelekogo ko mai gosoro qeqeraniria ira na tinoni pa ia mamaketina qarigu. 39Beto ko qai vileria na totoqona poreveveidi pa leona na ruma vavaikamuna beto na totoqona tadira na tinoni lalavata pa ivata vavolo. 40Qai raragata variuniria na dia sakasava ira na nanaboko, beto qai vavara vavakakasa ko mai tabata tadira na tinoni qarigu. Ba na vinakilasa mai tekua ira sa mina lavatana jola,>> sau si Jisu.

Na Vaivana Tana Nanaboko Golabana

(Luke 21.1-4)

41Ego tonai sa korapa toqona pa moena na loloa poatana pa leo kakabarena zelepade si Jisu, sa sa doro lao sa sa batiria isa sira na minete tinoni qai okoto lao loloaria na dia poata vaivana. Ko ira kubo tinoni isisongo sa qai okoto kole lao loaria na dia baiki poata. 42Beto sa tuti lao sa kai rereko nanaboko gogolabana ko sa lao loaia sa karu poata kopa ikete momoqasana, na padana sa kai pene gu.

43Pana totoso isa sa sa kuku vaikamuniria i Jisu sira nona sepele ko pira sauniria, <<Ma poja sosotonigou ara sagou: isa sa loai na nanaboko gogolabana api sa sa soku jolania isa qai loai pa loloa poatana ira doru tinoni isisongo. 44Ura ira doru sa qai teku pana dia isisongo sa pugele nyonyoa qai valao, goto na nanaboko api sa pana ona qasa sa valaoa isa sa doruna, isa doruna sa isongia ko bi toania,>> sau si Jisu.

Currently Selected:

Maka 12: LGA

Highlight

Copy