Maka 11

Na Tome ti Jisu pa Jerusalema

(Matiu 21.1-11; Luke 19.28-40; Jone 12.12-19)

1Totonai qai tata pa Jerusalema sira ko qai kamu pa Betipezi beto pa Betani pa Kubo pa Olive, sa sa garunu lao momoeniria i Jisu sira karu ona sepele, 2pira sauniria, <<Mu lao pa gusu kai karovona pa moemiu poni. Ko isa tugu muna bola lao sa kode muna batia sa kai dongiki na tapiko vaturu kolena isa oqoro koia tugu kai tinoni. Mu ruvatia sisa ko muna toni lamenia. 3Vei mai nanasagou kaki tinoni, <Ai sa vei qu korapa roiti vei ina?> marigunigou, sa pira muna oe veiniria, <Na Bangara sa nyoguania mai beto nake sovaina mina vamule lamea sau,> munaguniria,>> sau si Jisu.

4Ego ko qai taloa lao sira karu ko qai batia sa na dongiki koregana na tapiko vaturu kolena pa peguru na atakamana pa kekete soana, ko qai lao ruvatia. 5Poni sa qai paranga sira kaki tinoni qai suvere tata ketakoi, pira qarigu, <<Na sa qu korapa roitinia? Ai sa vei ko qu korapa ruvatia na dongiki ina?>> qarigu. 6Poni sa qai pojai ira karu sa isa vei sa poja veiniria i Jisu. Poni sa qai vamalumu vaniria. 7Ko qai toni vakamunia tai Jisu, ko qai lovasa vamakelenia na poko sa na pokotona na dongiki, beto sa koi si Jisu. 8Ira kubo tinoni sa qai lovasaria pa soana sa na dia poko, goto ira kaki qai kaele teku eqequru gogou ko qai lovasaniria pa soana. 9Ko ira na tinoni qai rerege momoe lao beto qai tuti pa liligu sa qai kukuku,

<<Aroia!

Sa tamana sisa sa lame

pa isongona na Bangara!#Kera Vinatarasae 118.25-26; Matiu 21.15; 23.39.

10Sa tamana sa na binangara

tana tamada i Devita.

Aroia pa nulu vavagalo,>> qarigu.

11Ego ko sa kamu pa Jerusalema sisa ko sa lao tome pa kakabarena zelepade. Ko sa kole dogoro vailivutainiria isa sira doru sakasava ketakoi, ba sa tei gore tu sa na vevelu ko sa votu laona pa Betani sisa beto ira ka manogarua sepele.

I Jisu sa Levenia na Gou Piqi

(Matiu 21.18-19)

12Ego ko sa rane neqa ko qai taloa koko lame vei pa Betani, sa vaia na burana si Jisu. 13Tonai tu sa korapa lalameona pa soana sa sa batia sa kai gou piqi sa mota jola na equruna, ko sa lao doria palu koleona na vuana sau. Ba tonai sa lao kamua sa kepore sa kai vuana bi batia goto na gagale equruna gu ura sa oqoro kamua na ona totoso vua. 14Poni pira saunia i Jisu sa na gou piqi isa, <<Kepore tugu kai tinoni mi gania na vuamu sao!>> saunia sisa.

Ko qai nongoriadia tugu ira na ona sepele sa na parangana i Jisu.

I Jisu sa Lao pa Kakabarena Zelepade

(Matiu 21.12-17; Luke 19.45-48; Jone 2.13-22)

15Ego tonai qai kamu pa Jerusalema poni sa tome lao pa kakabarena zelepade si Jisu ko sa podalai adu vovotuniria sira qai korapa vavai beto ira qai vavainiria na sakasava pa kakabarena zelepade, beto sa peluku vaopo paleria sira na tevolo tadira qai bebei poata karovodi beto ira na totoqodi tadira na tinoni qai kole vavainiria na kuru vavakukuvudi, 16beto sa suquturia ko kepore kame bi pogoso vaikarovainia kai sai pa karu uquna na kakabarena zelepade. 17Beto sa kole vaivagigalai, pira sauniria, <<Quke gigilai tu agou sa isa vei sa takuti pa Kukuti Tabuna?

<Na ruma taqu sa mina tavaisongo

na ruma vavarana

tadira doru puku tinoni,>#Aisea 56.7. sau!

Ba agou qu roiti veinia tu na bevi ovovona tadira na tinoni raja ikikodi,>>#Jeremae 7.11. sauniria.

18Ko tonai qai nongoronia ira na kuta iama beto ira qai vaivagigalainia na Vavanau sa sa vei inara i Jisu, sa qai podalai nyanyaqo soana ko mai vamatea sisa qarigu. Ba qai matagutunia sisa, ura doruna na tinoni sa qai gabarania sa na ona vaivagigalai.

19Ego totonai sa gore na vevelu poni sa sa votu lao pa peguruna na gugusu si Jisu beto ira na ona sepele.

Na Lesonina na Gou Piqi

(Matiu 21.20-22)

20Ego totonai qai rerege jola na vuvugeina sa qai batia ira sa na gou piqi sa tei malei mate tu, sa podalai tu pa batuna ko sa gore tu kamu pa bagerena. 21Poni sa roroqu kamua i Pita sa na veveina na gou piqi api ko pira saunia si Jisu, <<Rabi, doro! Na gou piqi qu levenia ao sa sa tei mateona tu!>> sau sisa.

22Poni sa paranga laoria i Jisu sira, pira sauniria, <<Mu rangea na Tamasa. 23Ma poja sosotonigou ara sagou: na tinoni sa paranga laoa sa na kubo api, <Mu tajopu ko mu gona laonigo mekamu pa ivere,> sau, beto sake ruarabeke pa bulona goto sa vasosotoa gu sa isa vei sa pojai sa mina gore votu tugu sau sisa, poni sa kode mina gore votu vei tugu sa pojai isa. 24Ko sa vei isa sa ma pojanigou: doru sakasava qu vavara ko qu tepai, sa mu vasosoto sa qu tei tekua tu, beto sa kode muna isongia ao sisa. 25Ko totonai muna turu vavara sa mu taleosonia sa na sela qu puku tutinia na goto tinoni, ko na Tamamiu pa noka ba mi taleosonigou na miu sela sagou,>>#11.25 Na pikata 26 sa sake kole pa doru kukuti kokoleidi. Pira sau sa na pikata 26 isa: <<Goto vei munake taleosoniria, poni sa na Tamamiu pa noka ba minake taleosoniria tugu sira na miu sela.>> sau si Jisu.

Na Nanasana na Veveina na Neqi Ti Jisu

(Matiu 21.23-27; Luke 20.1-8)

27Ego sa kamu bei mule pa Jerusalema si Jisu beto ira nona sepele. Ko totonai sa korapa rerege pa kakabarena zelepade si Jisu, sa qai vaikamu lao tana sira na kuta iama beto ira qai vaivagigalainia na Vavanau beto ira na iviva mamata. 28Ko qai nananasia sisa, pira qarigu, <<Ai neqi veveina sa qu isongia ao ko qu roitiniria na roiti veveidi inara? I sei sa sa vanigo na neqi ko qu roitiniria sa pira?>> qarigu.

29Poni pira sauniria i Jisu sira, <<Ego ara ba ma nanasanigou mai kai nanasa ropi sagou. Ko vei muna oesiu agou sa kode mana ule vanigou ara sa pa neqi tai sei qa roitiniria ara sira na roiti aipira. 30Pai sa koko lame vei sa na neqi sa isongia i Jone ko sa paputaiso? Sa lame vei tana Tamasa pa noka, ba na koko lame veina tadira na tinoni gu? Mu oesiu moko,>> sau sisa.

31Poni qai kole vaigua mekadi, pira qarigu, <<Vei tana Tamasa pa noka tanagu gita poni sa kode pira minagu, <Ba ai sa vei ko quke vasosotoa tu agou si Jone,> kode minagunigita. 32Goto vei tana paranga sa gita <Na lame veina tadira na tinoni gu,> tanagu, sa sa vaivamatagutu sa,>> qarigu. (Qai matagutuniria ira sira na tinoni, ura doru tinoni sa qai rovea si Jone sosoto sa kai tinoni kokorotai qarigu).

33Ko pira gu qai oe veinia si Jisu, <<Dai, qeke gigilai agei sa!>> qarigu.

Poni pira sauniria i Jisu sira, <<Ego, ko vei sa ara ba maneke ule vanigou tugu sa pai qa teku neqi beto qa roitiniria ara sira na sakasava pira,>> sauniria.

Currently Selected:

Maka 11: LGA

Highlight

Copy