Maka 14

Na Kukitina i Jisu

(Matiu 26.1-5; Luke 22.1-2; Jone 11.45-53)

1Ego karu rane sa kole beto mina kamua sa na vavolo Alokata beto na vavolo Bereti Nake Kovuruna. Ko ira na kuta iama beto ira qai vaivagigalainia na Vavanau sa qai kole nyanyaqoni soana ko mai aru tamania ko mai vamatea si Jisu qarigu. 2Pira qai kole paparanga vei sina, <<Nake totoso vavolo Alokata, tana arua, kita ta kole vaiperaniria ira na tinoni,>> qarigu.

Sa Tavuva Tarini Oela pa Betani si Jisu

(Matiu 26.6-13; Jone 12.1-8)

3Ego sa korapa pa Betani si Jisu ko sa korapa suvere pa ruma tai Saimone, isa na tinoni sa rajai mai na popoqu perangana. Ko tonai sa korapa teteku i Jisu sa sa pogoso kamunia kai rereko sa kai jagi patu alabasita sa pugelia na oela liosona, na oela isa sa taroiti pa gou nadi ko sa sae jola na vaina. Sa lobitia isa sa na jagi api beto sa vuvania pa batuna i Jisu. 4Ba kaki ira qai suvere ketakoi sa qai kole vaiparanga tagigiri mekadi, pira qarigu, <<Koi, ai sa vei ko sa korapa tavuva vivikere goboro vei inara sa na oela jojonga ina? 5Bi boka vavainia ko bi tekunia jola kue gogoto poata siliva#14.5 Kue gogoto poata siliva sa na poata padana na tabara kai tinoni pa roiti kai aoro. sa na oela api beto ko bi vaniria ira na tinoni golabadi sa na poata!>> qarigu. Ko qai tagigiri vivikerenia sa na rereko isa.

6Ba sa paranga si Jisu, <<Tari tu, loai! Ai sa vei ko qu korapa vatapatia? Kai roiti jongana tugu sa sa korapa roitinia isa taqu. 7Ura ira na tinoni golaba vaivasevidi sa kode mai suvere tavitigou doru totoso, ko tonai muna nyorogua tokaniria sa muna boka tokaniria gu. Goto ara sa maneke suvere tavitigou doru totoso. 8Na rereko api sa korapa roitinia sa isa vei sa bokai. Sa vuvani oela umanga jonga sa na tiniqu ara, ko sa varoroqu momoenia na golomoqu ara. 9Ko ma poja sosotonigou ara sagou: doru eqa pa kasia gusu mina tatarae sa na nongoro jongana api sa mina tavavakato tugu ko na varoroquna na rereko isa sisa na roiti sa korapa roiti lamenia isa taqu,>> sau si Jisu.

I Jiudasi mina Gabala Kanai si Jisu

(Matiu 26.14-16; Luke 22.3-6)

10Ego i Jiudasi Isikarioti, kame ira ka manogarua sepele, sa sa taloa lao tadira na kuta iama ko mina toni valao vaniria isa si Jisu sau. 11Ko totonai qai nongoria ira na parangana i Jiudasi sa qai qera ko qai poja vakolenia ko kode mai vania na poata sisa qarigu. Ko sa popodalai nyanyaqoa i Jiudasi sa kai lolomo jongana tonai mina boka toni valao vaniria si Jisu sau.

Na Tetekuna Vavolo Alokata

(Matiu 26.17-25; Luke 22.7-14, 21-23; Jone 13.21-30)

12Ego pa rane momoena na vavolo Bereti Nake Kovuruna, totonai qai kukuboloria sira na lami vavolo Alokata, sa qai nanasia ira nona sepele si Jisu, pira qarigu, <<Pai sa na ia qu nyoroguanigei ao, ko mene vatana vanigo sa na tetekuna vavolo Alokata?>> qarigu.

13Poni sa garunuria i Jisu sira karu ona sepele, pira sa poja veinira, <<Mu lao pa gusu lavata. Kai tinoni sa sa korapa popogosiaona kai bogu pie sa kode mina gosorogou. Muna tutia sisa 14ko ketakoi mina lao tome isa sa muna parangia sa na tinoni poreona ruma isa, pira munagunia, <Na Tinoni vaivagigalai sa pira sau, Pai sa na lose ketakoi mina tekua na tetekuna vavolo Alokata isa beto ira na ona sepele? sau,> munagunia. 15Ko isa kode mina ule vanigou sa kai lose lavata pa nulu sa tei tavanaqiti vakole tu. Ketakoi sa muna vatanai agou sa na tetekuna tadagita,>> sau si Jisu.

16Ko tonai qai taloa riu ko qai lao kamu pa gugusu lavata sira karu sepele, sa qai batiria sira tugu vei sa pojaniria i Jisu, ko qai vatanania sa na tetekuna vavolo Alokata.

17Ko totonai sa gore sa na vevelu, sa i Jisu sa lame tavitiria ira ka manogarua ona sepele. 18Tonai qai vaikamu ko qai korapa teteku, sa paranga si Jisu, <<Ma poja sosotonigou ara sagou: kame agou qu korapa teteku tavitisiu ara sa mina gabala kanasiu ara,>> sau si Jisu.

19Tonai sa qai mamata sira na sepele ko qai okoto nanasa memekai si Jisu, pira qarigu, <<Ai vei, nake ara sa qugunisiu ao?>> qarigu.

20Poni sa oe laoria i Jisu sira, <<Kode kame gu agou ka manogarua pira, isa sa somana totogologana bereti pa baolo tavitisiu ara. 21Na Tuna na Tinoni sa mina tavamate vei sa tei pojai tu na Kukuti Tabuna, ba mina gania na takulanga sa na tinoni sa gabala kanai na Tuna na Tinoni! Sa jongana jola sa bike pavu gu podo sa na tinoni isa!>> sau si Jisu.

Na Teteku Bebetona

(Matiu 26.26-30; Luke 22.14-20; 1 Koriniti 11.23-25)

22Ego totonai qai korapa teteku sira, sa sa tekua i Jisu sa na bereti ko sa manania beto sa kikipai ko sa ianiria sira na sepele, beto pira sau, <<Pia tekua, api sa na tiniqu,>> sau.

23Beto sa tekua sa na kapa vaini ko sa paranga jonganania beto sa vaniria ko qai vaibukunia ira doru.

24Beto sa pira sauniria, <<Api sa na orunguqu ara na vamauruna na vinaego, sa tavuva vaniria ira na soku tinoni. 25Ma poja sosotonigou ara sagou: maneke buku ligua ara sa na vaini api tinganai mina kamua na rane totonai mana bukua ara sa na vaini korega pa binangara tana Tamasa,>> sau si Jisu.

26Beto qai kerania ira sa kai kera, beto sa qai taloa votu lao pa kubo pa Olive.

Sa Korotonia i Jisu sa i Pita mina Kilu Palenia sisa

(Matiu 26.31-35; Luke 22.31-34; Jone 13.36-38)

27Ego beto sa parangaria i Jisu ria, <<Agou doru sa kode muna uku loa palenisiu sara, ura sa paranga sa na Kukuti Tabuna,

<Ara mana vamatea na sepati,

ko mai okoto nyanyalia neqa sira na sipi,>#Zakarae 13.7. sau.

28Ba pa liguna mana turu mule pa mate sara, sa mana lao momoe veranigou pa Qalili,>> sau sisa.

29Poni sa paranga lao tana si Pita, <<Goto ara sa mai uku loa palego tu ira doru, ba ara sa maneke isongo loago sao!>> sau.

30Poni sa paranga lao si Jisu, <<Pita, ma poja sosotonigo ara sao: ao sa kode bongi tugu api totonai mina oqoro piranga vinarua na kokorako sa muna kilu palenisiu kue totoso ara sao,>> sau.

31Ba sa paranga vivivagana tugu si Pita, pira sau, <<Ara vei mana mate tavitigo tugu ao ba maneke isongo osonigo tugu sao,>> sau. Ko ira doru sepele ba qai paranga vei tugu inara.

I Jisu sa Vavara pa Qetisemani

(Matiu 26.36-46; Luke 22.39-46)

32Ego totonai qai kamu sira pa kai ia na isongona pa Qetisemani, sa pira sauniria i Jisu sira na ona sepele, <<Mu suvere vera lani, goto ara ma lao vavara,>> sau. 33Beto sa toniria gu sira Pita, i Jekopi, beto i Jone. Sa tei podalai mamata na takulanga vivitigi tu sisa, 34ko pira sauniria sira kue, <<Na takulanga pa buloqu sa lavata jola sara ko mi vamatesiu sau. Mu suvere lani ko mu suvere gegele agou,>> sauniria.

35Beto sa rerege lao vasou iqona si Jisu beto sa opo gore pa peso ko sa vavara ko vei bi boka sa bi tavarijo tu sa na totoso vitigi api sau. 36Beto pira sau, <<Aba, Tamaqu. Kepore sa kai sava sa tapatigo ao. Mu varijo pale taqu sa na totoso vitigi alepi, ba nake isa vei qa nyoroguania ara sa mi taroiti goto isa tu vei qu nyoroguania ao,>> sau.

37Totonai sa mule lame poni sa batiria qai korapa puta mumagadia tu, ko pira saunia si Pita, <<Saimone, qu korapa putagamu sao? Ai vei, quke boka sosoto tugu suvere gegele kai aoa? 38Mu suvere gegele beto mu vavara ko muke vukele pa totoke. Na gagala sa malumu ba na tini sa munyala,>> sau.

39Beto sa kai gabala lao bei ko sa vavara vei mutugu tonai sa vavara momoe si Jisu. 40Tonai sa mule lame ligu poni sa batiria qai korapa mutugu puta mumagadia, ura sa ngaolo vivitigiria na nyo puta. Ko qaike gigilai sa na sa mai paranga laonia.

41Tonai sa mule lame na vinaue totoso, poni pira sauniria, <<Qu korapa tugu puta minere vatalemiu sagou? Kopira sa pada gu! Doro, sa kamu gu sa na totoso mina tavalao pa limadi ira na tinoni seladi sa na Tuna na Tinoni. 42Aria, turu ko ta lao gosoria. Doro! Sa kamu gu api sa na tinoni sa gabala kanasiu ara,>> sau si Jisu.

I Jisu sa Taaru Tamana

(Matiu 26.47-56; Luke 22.47-53; Jone 18.3-12)

43Ego ko totonai tugu sa korapa paparanga vei inara i Jisu sa sa bola gu si Jiudasi, isa kame ira ka manogarua sepele. Sa toni bolania isa sa na puku minete tinoni qai pogoso benete vavaisobena beto na maja kubau. Ira na tinoni aipira sa na tagarunudi tadira na kuta iama, ira qai vaivagigalainia na Vavanau beto ko ira na iviva mamata.

44Kai vinagigila sa sa tei poja vakoleniria tu i Jiudasi na tinoni sa gabala kanai sira na minete sa toniria, pira sauniria, <<Isa na tinoni mana lao aoia na paparana ara sa isa sa na tinoni muna lame aru tamania ko muna toni riunia,>> sauniria. 45Ko isa tugu sa bola kamu si Jiudasi poni sa sa rerege tuvisi lao gu sa ti Jisu, ko sa paranga, <<Rabi!>> sau, beto sa aoa na paparana. 46Totonai tugu sa qai lao ragata tekua ko qai aru tamania si Jisu. 47Ba kame ira qai korapa turu ketakoi sa sa saputu votunia sa na ona benete vavaisobena ko sa maja teusu palea sa kai kale talingina na pinausu tana kuta iama lavata.

48Poni sa paranga si Jisu, pira sauniria, <<Na tinoni raraja ikikoqu sara ko qu pogoso tarinisiu na benete vavaisobena beto na maja kubau ko muna teku aru tamanasiu? 49Beko doru rane sa qa kole gu suvere tavitigou pa kakabarena zelepade ko qa kole vavaivagigalai ba quke isongo aru tamanasiu agou. Ba jongana ko mi gore votu tugu sa na Kukuti Tabuna,>> sau sisa. 50Ego tonai sa qai uku loa palenia ira doru sepele sisa.

51Ego kai koburu marene kokoregana sa popokonia kai titivi gu sa sa somana tututia tugu i Jisu. Ko isa ba mai aru tamania tugu qarigu, 52poni sa uele vaniria gu nona poko beto na gagadona gu sa sa oqai na taba.

I Jisu sa Turu pa Moedi ira na Kauniseli tadira na Jiu

(Matiu 26.57-68; Luke 22.54-55, 63-71; Jone 18.13-14, 19-24)

53Ego ko qai toni laonia tana kuta iama lavata si Jisu, ko ira doru kuta iama, na iviva mamata beto ira qai vaivagigalainia na Vavanau sa qai vavaikamu beto ketakoi. 54Ego i Pita sa sa kole mamavo tuti liligu pa souna tu ko sa lao tome laona pa leo kakabarena ruma tana kuta iama lavata. Ko ketakoi sa lao toqona tadira na nabulu kopu ko sa davangaona pa keketai iku. 55Ko qai kole popodeke nyaqo votunia ira na kuta iama beto ira doru iviva pa kauniseli#14.55 Na kauniseli sa na vaikamu tadira na tinoni lalavata Jiu. Na kuta iama lavata sa na tinoni lavatana pa vaikamu tinoni mamata isa. sa vei bi koleona kai vavakato vei mina boka ulenia kai roiti ikerena sa roitinia i Jisu ko mai boka vamatea si Jisu qarigu. 56Ura na mota joladi sira qai jutu tarini seseke si Jisu, ba na dia vavakato sa qaike vavaitoto.

57Beto qai gasa turu sira kaki ko qai jutu tarini seseke si Jisu, pira qarigu, 58<<Agei qe nongoriamei sa pira sa paranga vei sina, <Ara mana jegara palea sa na zelepade madina qai roitinia ira na tinoni, beto pa liguna kue rane gu sa mana vaturu ligua sa kame isa nake ira na tinoni qai roitinia,> sau,>> qarigu. 59Ba ira ba sake vavaitoto tugu sa na dia vavakato.

60Ego beto sa turu pa moedi ira doru sa na kuta iama lavata ko sa nanasia si Jisu, pira sau, <<Ai sa vei munake oe sao? Na sa sira na vavakato qai korapa jutu tarinigo ira pira?>> sau sisa. 61Ba sa nguju puku ko sake pojai tugu kai pakata paranga si Jisu.

Poni sa kai nanasa mule sa na kuta iama lavata, pira sau, <<Ao tugu sa na Karisito, na Tuna na Tamasa tamanana?>> saunia.

62Totonai sa oe si Jisu, <<Ara tugu. Beto kode muna batia agou sa na Tuna na Tinoni mina toqona pa kale matuana na Tamasa vivana jola beto mina lagere vei pa lei pa noka,>>#Kera Vinatarasae 110.1. sau.

63Tonai sa paranga vei inara si Jisu poni sa sa bako rikata palea na kuta iama lavata sa na ona poko, beto pira sau, <<Na vavakato vinasosoto sa mule sa taqe korapa verania gita? 64Qu tei nongoriamiu tugu agou sa sa vamoroania na Tamasa sa na tinoni api. Ko na sa sau na miu roroqu sagou?>> sau sisa.

Ko qai vaegoa ira doru sa sa pada tugu ko mina tavamate si Jisu qarigu. 65Pana totoso tugu isa sa ira kaki sa qai podalai tue taria si Jisu, beto qai ude pikoni poko na isumatana beto qai piqolia beto sa pira qarigunia, <<Ego mu ulenia moko i sei sa sa majago!>> qarigunia. Beto sa qai saputu tekua ira na nabulu kopu sisa ko qai kole popoaria.

I Pita sa Kilu Palenia si Jisu

(Matiu 26.69-75; Luke 22.56-62; Jone 18.15-18, 25-27)

66Totonai sa korapa suvereona pa leo kakabarena pa kauruna na ruma si Pita, sa sa rerege tata lao sa kai nabulu rereko tana kuta iama lavata.

67Ko tonai sa batia isa si Pita sa korapa davangaona, sa sa doro taria beto sa parangia, <<Ao tugu sa kame qu sosomana tutia na tinoni Nazareti ina?>> saunia.

68Ba sa kilu pale sisa, pira sau, <<Ara qake gigilai beto qake vakaberia sisa qu korapa pojai ao ina,>> sau sisa. Beto sa mavo rijo votu laona pa atakamana na kakabarena na ruma.

69Ego sa bati beia mutugu na nabulu rereko ketakoi sisa, ko sa ule vaniria sira qai kole turu tavitia isa ketakoi, pira sau, <<Isa tugu sa kame ira!>> sau. 70Ba sa kilu pale mutugu sisa.

Ba sa oqoro isongo sovai sa ira mule na tinoni qai kole turu tavitia ketakoi sa qai parangia mule sisa, pira qarigu, <<Ao sosoto tugu sa kame ira! Ura na tinoni Qalili sao!>> qarigunia.

71Ba tonai sa maulu tarinia mekana na leleve si Pita, pira sau, <<Qake isongo gigila podekia ara sa na tinoni qu korapa pojai agou ina!>> sau.

72Totonai tugu sa sa piranga vinarua gu sa na kokorako. Poni sa sa roroqu kamua i Pita sa isa sa paranga veinia i Jisu tonai pira saunia, <<Mina oqoro piranga vinarua na kokorako sa kode muna kilu palenisiu ara kue totoso sao,>> saunia. Ko tonai tugu sa takakoto gu ko sa vodangia na lukana si Pita.

Currently Selected:

Maka 14: LGA

Highlight

Copy